Mataupu Faavae ma Feagaiga 129; 130:1–11, 22-23

Faatomuaga

I le aso 9 o Fepuari, 1843, sa faailoa mai ai e le Perofeta o Iosefa Samita ni “ki autu e tolu” (MF&F 129:9) mo le iloagofie ai o le natura o agelu auauna ma le agaga. O nei faatonuga ua faamaumauina i le Mataupu Faavae ma Feagaiga 129. O leMataupu Faavae ma Feagaiga 130 o loo i ai aoaoga a le Perofeta e uiga i ni aoaoga faavae eseese a o feiloai ma le Au Paia i Ramese, Ilinoi, i le aso 2 o Aperila, 1843.

Mataupu Faavae ma Feagaiga 129

Ua tuuina mai e le Perofeta o Iosefa Samita ni faatonuga e faatatau i le natura o agelu auauna ma le agaga

A faapea e fesili atu se tasi ia te oe, pe talitonu le Au Paia o Aso e Gata Ai i agelu, o le a sau tala e fai atu ia i latou?

Faitau le saunoaga lenei a Elder Jeffrey R. Holland o le Korama a Aposetolo e Toasefululua:

“Mai lava i le amataga seia oo mai i le auga tisipenisione, sa faaaoga lava e le Atua ia agelu e fai ma Ana avefeau e faailoa mai ai Lona alofa ma le popolega mo Ana fanau. …

“E masani lava o ni ituaiga tagata e le vaaia. O nisi taimi e vaaia ai i latou. Ae pe vaaia pe le vaaia, e latalata mai lava i latou i taimi uma. O nisi taimi, e matua malualii ma taua o latou tofiga mo le lalolagi atoa. O nisi taimi o savali e sili ona patino. E i ai taimi o le faamoemoega faaagelu o le lapatai. Ae o le tele lava o taimi o le faamafanafana, e tuuina mai sina gauai alofa, ma se tomatauga i taimi faigata” (“O Le Auaunaga a Agelu,” Ensign po o le Liahona, Nov. 2008, 29).

E amata mai i le 1839 ma faaauau mai ai i le 1843, na tuuina mai ai e le Perofeta o Iosefa Samita ni faatonuga i nisi o tagata e fesoasoani ia latou iloa ai le auala e iloa ai le natura o agelu auauna ma le agaga.

Faitau le Mataupu Faavae ma Feagaiga 129:1–3, ma vaavaai mo se eseesega taua i le va o agelu ma agaga. (Atonu e aoga le iloa o le upu amiotonu o lona uiga o le amiosa’o.) E faapefea ona ese agelu mai i agaga?

Faitau le Mataupu Faavae ma Feagaiga 129:4–7, ma vaavaai mo se auala e iloa ai le eseesega i le va o agelu ma agaga amiotonu.

Ina ia malamalama atoatoa i le fuaiupu e 7, ia manatua ona o agaga e leai ni tino o aano ma ivi, e le mafai ona latou uulima ma tagata ola. Afai e faafoliga agaga e i ai ni gafatia latou te le o mauaina, o lena mea o se taufaasese, ma o se agaga o le a taumafaia lenei mea o le a le avea o se “tagata amiotonu.” O le mea lea, o agaga o tagata amiotonu ua atoatoa o le a le taumafai e lululima pe a faaloaloa atu se lima ia i latou. Mai le Mataupu Faavae ma Feagaiga 129:7, tatou te aoao ai o le a le faaseseina i tatou e avefeau moni e auina mai i le Tama Faalelagi.

O nisi taimi e taumafai ai le tiapolo e faaali mai “o se agelu o le malamalama” ina ia mafai ona faasese tagata (tagai i le MF&F 129:8). E le gata i lea, “ua talanoa mai foi tusitusiga paia e uiga i agelu a le tiapolo. O agaga na o e na mulimuli ia Lusifelo ma sa lafo i fafo o le afioaga o le Atua i le muai olaga ma tutuli mai i lalo i le lalolagi (Faaaliga 12:1-9; 2 Ni. 9:9, 16; MF&F 29:36-37)” (Taiala i Tusitusiga Paia, “Agelu,“ scriptures.lds.org).

Faitau le Mataupu Faavae ma Feagaiga 129:8–9, ma vaavaai mo auala e iloa ai se agaga o le tiapolo o le e saili e faasese e ala i le faaali mai o se agelu o le malamalama. (Atonu e fesoasoani le iloa o le upu auaunaga i le fuaiupu e 9 e faatatau i se faaaliga po o le asiasiga mai se agelu po o se agaga.)

E mafai ona fesoasoani le saunoaga lenei mai i le Perofeta o Iosefa Samita, e te malamalama ai i le pogai o le a mulimuli ai i taimi uma ia agaga leaga i faatonuga o loo i le Mataupu Faavae ma Feagaiga 129: “O le a pei … e i ai tuaoi, tapulaa, ma tulafono a agaga amioleaga ia e taitaiina ai ma taulimaina ai i latou, ma iloa ai o latou taunuuga i le lumanai” (i le History of the Church, 4:576).

I lau api talaaga mo le suesueina o tusitusiga paia, fai se aotelega o mea ua e aoaoina mai le Mataupu Faavae ma Feagaiga 129 e uiga i le eseesega i le va o agelu, agaga amiotonu, ma agaga leaga. Faamalamalama mai po o le a le isi mea, e faaopoopo atu i faatonuga o loo i nei fuaiupu, ua tuuina mai e le Tama Faalelagi ia te oe e fesoasoani e te iloatino ai faiga taufaasese a Satani.

Mataupu Faavae ma Feagaiga 130:1–11, 22–23

Ua faamalamalama mai e le Perofeta o Iosefa Samita ni aoaoga faavae eseese

I le aso 2 o Aperila, 1843, sa faia ai e le Perofeta o Iosefa Samita se konafesi faalesiteki faatasi ma le Au Paia i Ramese, Ilinoi, lea sa tusa e 20 maila i sautesasae o Navu. I le taimi o se sauniga o le taeao, sa laugaina ai e Elder Orson Hyde o le Korama a Aposetolo e Toasefululua, se savali ma aoao atu se faauigaga o mau sa le’i sa’o, lea na ia aoaoina mai i ana fegalegaleaiga muamua ma se isi ekalesia. O le a le tiutetauave sa i ai o le Perofeta i lenei tulaga?

O taitai pulefaamalumalu i le Ekalesia, e pei o perofeta, peresitene o siteki ma epikopo, ua i ai le tiutetauave ina ia mautinoa e aoao atu mataupu faavae sa‘o i tulaga o le Ekalesia. Ina ua uma le sauniga o le taeao, sa faapea ona faia se taumafataga o le aoauli a Iosefa Samita, Orson Hyde, ma nai isi tagata i le fale o lona tuafafine o Sofarania. I le taimi o le malologa sa fai atu ai le Perofeta ia Elder Hyde “o le a ia faia ni faasaoga i lana lauga.” Na tali mai Elder Hyde, “O le a taliaina ma le faafetai i latou” (i le History of the Church, 5:323).

I lana saunoaga i le taeao, sa faauigasese ai e Orson Hyde le Ioane 14:23. Faaalu se taimi e suesue ai i lenei fuaiupu.

Ina ua uma ona ta’ua e Orson Hyde lenei fuaiupu, sa ia tau atu i tagata, “o se faamanuiaga mo i tatou le i ai o le Tama ma le Alo e afifio i totonu o o tatou loto” (i le History of the Church, 5:323). O leMataupu Faavae ma Feagaiga 130 o loo i ai le faasa‘oga e le Perofeta o Iosefa Samita o lenei manatu. O loo aofia ai foi nisi o aoaoga faaopoopo.

Faitau le Mataupu Faavae ma Feagaiga 130:1–3, ma vaavaai mo le mafuaaga na sese ai le saunoaga a Orson Hyde e faatatau i le uiga o le Ioane 14:23.

E toatele tagata i aso nei, a le o le leai o se manatu faavae o le Atua po o le, e pei o Orson Hyde, o le sa avea i se tasi o taimi ma se failauga Campbellite, ua i ai se manatu le sa’o e uiga i le natura o le Atua ona o uputuu sese. E mafai ona tatou fesoasoani i isi ia malamalama i le natura moni o le Tama Faalelagi ma lo latou sootaga ia te Ia.

Tali le fesili lenei i lau api talaaga mo le suesueina o tusitusiga paia: I ni talanoaga ma tagata e i ai ni i uputuu po o ni talitonuga sese e uiga i le Atua, e mafai faapefea ona e agalelei ma loto malamalama pe a faasoa atu mea ua e iloa e uiga i le natura moni o le Atua—o le tulaga moni o loo i ai o Ia?

Suesue i le Mataupu Faavae ma Feagaiga 130:22-23, ma vaavaai mo upumoni na aoao mai e le Perofeta o Iosefa Samita e uiga i le aiga Atua. (O leMataupu Faavae ma Feagaiga 130:22-23 o se mau tauloto. Atonu e te manao e faailoga i se auala e iloagofie ai ina ia fesoasoani i lou sueina i le lumanai.)

Faauma galuega atofaina nei i lau api talaaga mo le suesueina o tusitusiga paia:
1. Mai mea ua e aoaoina i le Mataupu Faavae ma Feagaiga 130:22-23, tusi ni aoaoga faavae se lua pe tolu e uiga i le aiga Atua.
2. Tusi se fuaiupu se tasi pe lua e faamatala ai pe faapefea ona e faaaogaina upumoni ua aoaoina i fuaiupu 22-23 e aoao ai isi e uiga i le aiga Atua.
3. Aisea e te manatu e taua ai le malamalama o le Tama Faalelagi ma Iesu Keriso o ni tagata mavaevae ua i ai ni tino o aano ma ivi?

O le tele o uputuu e uiga i le Atua le Tama, o Iesu Keriso, ma le Agaga Paia e faavae i luga o ni manatu e mafaufauina e alii ma tamaitai e faaletino. O nisi o nei manatu ua tulai mai ona o se taunuuga o finauga i le va o taitai faalelotu. O lo tatou malamalama e uiga i le aiga Atua ua oo mai e ala i faaaliga mai le Atua i Ana perofeta. O faamatalaga nei ua otooto atu ai upumoni ua faaalia mai e uiga i le aiga Atua. A o e faitauina, ia faailoga upu ma fasifuaitau e tulaga ese ia te oe.

“O leAtua le Tama: O le tulaga masani lava o le Tama, po o Elohima, o le ua faatatau atu i ai e ala i le faalagiga o le Atua. Ua ta’ua o Ia o le Tama aua o Ia o le tama o o tatou agaga. … O le Atua le Tama o le pule aoao o le atulaulau. E ia te Ia le malosi uma … , e silafia mea uma … , ma e afio i soo se mea e ala i lona Agaga. … E i ai se sootaga faapitoa a le tagata ma le Atua, lea e tulaga ese ai le tagata mai isi mea uma ua foafoaina: o alii ma tamaitai o fanau agaga a le Atua“ (Taiala i Tusitusiga Paia, “Atua, Aiga Atua”; scriptures.lds.org).

“O leAtua le Alo: O le Atua ua suafa ia Ieova le Alo, o Iesu Keriso. … E galue Iesu i lalo o le taitaiga a le Tama ma o loo ogatasi atoatoa ma Ia. O tagata ola uma o Ona uso ma tuafafine, aua o ia o le ulumatua o fanau agaga a Elohima” (Taiala i Tusitusiga Paia, “Atua, Aiga Atua” scriptures.lds.org). O Ia o le Togiola, ma sa mafatia o Ia i agasala ma tiga o tagata ola uma ma faatoilaloina le oti faaletino mo tagata uma.

“O leAtua le Agaga Paia: O le Agaga Paia o se Atua foi ma ua ta’ua o le Agaga Paia, o le Agaga, ma o le Agaga o le Atua, e i ai faatasi ma isi igoa talitutusa ma faalagiga [e pei o le Fesoasoani]. Faatasi ai ma le fesoasoani a le Agaga Paia, e mafai ai e le tagata ona iloa le finagalo o le Atua le Tama ma iloa o Iesu o le Keriso” (Taiala i Tusitusiga Paia, “Atua, Aiga Atua,” scriptures.lds.org). O le matafaioi autu a le Agaga Paia o le molimau mai e uiga i le Atua le Tama ma Iesu Keriso. O le Agaga Paia e aoao ma faamautu mai upumoni.

I lau api talaaga mo le suesueina o tusitusiga paia, tusi ni nai fuaiupu e aotele ai mea ua e aoaoina e uiga i le Aiga Atua. Faamalamalama mai po o le fea o upumoni e tulaga ese ia te oe ma pe aisea. Atonu foi e te manao e faaaofia ai lau molimau e uiga i le aiga Atua.

Toe faamanatu le Mataupu Faavae ma Feagaiga 130:2. A o e faia lena mea, atonu e te manao e faailoga upu o loo aoao mai ai le faamatalaga faale-aoaoga faavae lenei: O sootaga e mafai ona tatou faia i le lagi e tutusa lava ma sootaga ua tatou olioli ai i le lalolagi, ae o le a aofia ai le mamalu e faavavau. (O le upu mafutaga i le fuaiupu e 2 e faatatau i le natura o a tatou fegalegaleaiga ma sootaga faaletagata lava ia.)

Na faasoa mai e Peresitene Henry B. Eyring o le Au Peresitene Sili, lana molimau e uiga i nei sootaga e faavavau: “Talu ai ona o le toefuataiga o le malamalama i aiga e faavavau, ua sili atu ai ona tatou faamoemoe ma sili atu ona agalelei i a tatou sootaga uma faaleaiga. O le fiafiaga sili i lenei olaga e tutotonu lea i aiga e pei ona o le a latou i ai i lalolagi a sau. Ou te matuai faafetai mo le faamautinoaga ua ou maua e faapea afai tatou te faamaoni, o fegalegaleaiga lava nei o loo tatou olioli ai i lenei olaga o le a faavavau ma i tatou i le lalolagi a sau, i le mamalu e faavavau. [Tagai i le MF&F 130:2.]” (“O le Ekalesia Moni ma le Ola,” Ensign po o le Liahona, Me 2008, 22).

Faauma galuega atofaina nei i lau api talaaga mo le suesueina o tusitusiga paia:
1. Tali le fesili lenei: E mafai faapefea e le iloa o o tatou sootaga i le lalolagi e faaauau atu pea i le mamalu e faavavau i le lagi, ona faatosinaina au fegalegaleaiga ma isi?
2. Mafaufau i se mea se tasi e mafai ona e faia e faamalosia ai ou sootaga ma isi, aemaise lava o tagata o lou aiga. Ona tusi lea o se sini ina ia faia lena mea.

O nisi o aoaoga faavae faaopoopo na aoao mai e le Perofeta o Iosefa Samita i Ramese, Ilinoi, o loo i ai i le Mataupu Faavae ma Feagaiga 130:4–11. Faitau fuaiupu nei, ma vaavaai mo aoaoga a le Perofeta e uiga i agelu, ma e uiga i le lumanai o le lalolagi. E tusa ai ma fuaiupu 10–11, o i latou uma o e mautofi i le malo selesitila o le a maua se Urima ma se Tumema e fesoasoani latou te aoao ma malamalama ai i mea faalelagi. E le’i auiliiliina mai e le Perofeta lenei aoaoga.

Mau Tauloto—Mataupu Faavae ma Feagaiga 130: 22-23

Na saunoa mai Elder Jeffrey R. Holland, “Tatou te folafola atu o loo faamaonia mai i tusitusiga paia o le Tama, o le Alo ma le Agaga Paia o ni peresona mavaevae, o ni tagata paia e toatolu” (“O Le Atua Moni e Toatasi Atoa Ma Le Na Ia Auina Mai o Iesu Keriso Lea,” Ensign po o le Liahona, Nov. 2007, 41). Ina ia iloa le auala o loo aoao manino mai ai le aoaoga faavae o le Aiga Atua i tusitusiga paia, sue ia le itiiti ifo i le tolu ni mau i le Feagaiga Fou o loo aoao mai ai le aoaoga faavae na faamatala mai e Elder Holland. O le a fesoasoani le faaaogaina o fesoasoani mo suesuega, e pei o le Taiala i Autu, o le faasino upu i au tusitusiga paia, ma le Taiala i Tusitusiga Paia. Tusi ia tusi o mau e te maua i lau api talaaga mo le suesueina o tusitusiga paia. Atonu foi e te manao e tusi i totonu o au tusitusiga paia i tafatafa o le Mataupu Faavae ma Feagaiga 130:22-23.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Sa ou suesueina le Mataupu Faavae ma Feagaiga 129; 130:1–11, 22-23 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: