Mataupu Faavae ma Feagaiga 133:36–74

Faatomuaga

O le lesona lona lua lenei ua talanoaina ai le faaaliga ua faamaumauina i le Mataupu Faavae ma Feagaiga 133. Na maua e le Perofeta o Iosefa Samita lenei faaaliga i le aso 3 o Novema, 1831. Ua tali ai fesili sa i ai a faifeautalai e uiga i le talaiga o le talalelei ma le faapotopotoina o Isaraelu. O loo faamatala mai ai foi le Afio Mai Faalua o le Alii ma mea e tatau ona tatou faia e saunia ai.

Mataupu Faavae ma Feagaiga 133:36-40

Ua tautino mai e le Alii e faapea, o le a talaiina atu le talalelei i le lalolagi atoa

I lau api talaaga mo le suesueina o tusitusiga paia, tusi ai nisi o ou lagona a o e mafaufau loloto i le Afio Mai Faalua o Iesu Keriso. O e lagona le fiafia ma le faamoemoe e uiga i le vaaia o le Faaola i le taimi o Lona Afio Mai Faalua? E mafai faapefea e a tatou sauniuniga mo le Afio Mai Faalua ona fesoasoani ia i tatou e faatoilalo ai le fefe?

O le Afio Mai Faalua o Iesu Keriso o le a avea o se aafiaga manaia ma matagofie mo nisi, ae o se aafiaga taufaafefe mo isi—e faalagolago i a latou sauniuniga ma agavaa faaletagata lava ia.

Suesue le Mataupu Faavae ma Feagaiga 133:36–39, ma vaavaai mo faamaoniga e faapea, e finagalo le Faaola i tagata uma ina ia saunia mo Lona Afio Mai Faalua.

E i ai sa tatou matafaioi i le fesoasoani e saunia le lalolagi mo le Afio Mai Faalua o Iesu Keriso. E faavae i mea ua e aoaoina i le Mataupu Faavae ma Feagaiga 133:37–38, faauma le upumoni lenei: I le avea ai ma ni auauna a le Atua, e mafai ona tatou fesoasoani e saunia isi mo le Afio Mai Faalua e ala i le .

E tusa ai ma le fuaiupu e 38, e tatau ona tatou folafola atu le talalelei “ma le leo tele.” O le a sou manatu i le uiga o lenei mea?

Faitau le Mataupu Faavae ma Feagaiga 133:40, ma vaavaai mo se isi mea o le a fai e auauna a le Atua a’o lumanai le Afio Mai Faalua o Iesu Keriso. O le a le mea o loo faamatala mai i lenei fuaiupu e uiga i lagona o le a i ai i le au amiotonu e uiga i le Afio Mai o le Faaola?

I le fuaiupu e 40, o a upu e ta’u mai ai le mananao o le au amiotonu e vaai i le Alii i Lona Afio Mai Faalua? Atonu e te manao e faailoga nei upu i au tusitusiga paia.

Mataupu Faavae ma Feagaiga 133:41-56

Ua faamatala mai e Iesu Keriso Lona Afio Mai Faalua

Suesue i le Mataupu Faavae ma Feagaiga 133:41–45, ma vaavaai mo faamanuiaga o le a oo mai ia i latou e tatalo ma faatalitali mo le Afio Mai Faalua o Iesu Keriso. Atonu e te manao e faailoga mea ua e maua.

Mai le fuaiupu e 45, ua tatou aoao ai ua saunia e le Alii ni faamanuiaga maoae mo i latou o e faatalitali ia te Ia. Atonu e te manao e tusi le mataupu faavae lenei i au tusitusiga paia.

A o e faitau i le saunoaga lenei a Elder Jeffrey R. Holland o le Korama a Aposetolo e Toasefululua, vase lalo o mea e tatau ona tatou faia e faatalitali ai ma le faamaoni mo le Alii:

“E le, tatau ona tatou faataga i soo se vaitami po o tulaga, le mata’u ma le tama o mata’u (o Satani lava lea) e tata’i ese i tatou mai lo tatou faatuatua ma le ola faamaoni. Sa i ai lava i taimi uma ni fesili e uiga i le lumanai. O tagata talavou uma, po o ulugalii talavou uma i vaitaimi uma, na tatau ona savavali i le faatuatua i totonu o se mea na avea i taimi uma o sina le mautonu—e amata mai ia Atamu ma Eva i na uluai laa le mautonu i fafo atu o le Faatoaga o Etena. Ae e le afaina lea. O fuafuaga lenei. O le a lelei lava. Tau lava ia faamaoni. E pule le Atua. Na te silafia lou igoa ma Na te silafia ou manaoga. …

“O loo faamoemoe mai le Atua ia lava lou faatuatua ma le naunautai ma lava le talitonuina o Ia e faaauau ai pea ona e agai i luma, faaauau ai pea ona ola, ma faaauau ai pea ona olioli. O le mea moni, o loo faamoemoe mai o Ia ia le gata ina e faafetauia le lumanai (e fai si faalemanaia ma le faigata o lena mea); o loo faamoemoe mai o Ia e te talia ma mamanu le lumanai—ia alofa i ai ma fiafia i ai, ma olioli i ou avanoa.

“O loo faatalitali mai ma le naunautai le Atua mo le avanoa e tali ai i au tatalo ma faataunuu au miti, e pei lava ona Ia faia ai i taimi uma. Ae e le mafai ona Ia faia pe afai e te le tatalo, ma e le mafai pe afai e te le moemiti. I se faapuupuuga, e le mafai ona Ia faia pe afai e te le talitonu” (“Terror, Triumph, and a Wedding Feast” [saunoaga i le faeasaite a le Iunivesite o Polika Iaga, 12 Sete., 2004], 3; speeches.byu.edu).

Mafaufau loloto i le fesili lenei: Mata o le a iloa e tagata uma o ai Iesu Keriso i le taimi o Lona Afio Mai Faalua? Faitau le Mataupu Faavae ma Feagaiga 133:46–47, ma vaavaai mo se tali i lenei fesili.

Faitau le Mataupu Faavae ma Feagaiga 133:48–49, ma vaavaai mo se faamatalaga pe o le a faapei foliga o Iesu Keriso i le taimi o Lona Afio Mai Faalua.

Ina ia malamalama i le faafaatusa o le laei mumu o le Faaola, e aoga le iloa o le uiga o le faaupuga “tanoa-vine” i le fuaiupu e 48. O se tanoa-vine e ta’ua foi o se soliga vine, o se pesini tele e tumu i vine. E soli e tagata vine, e faasau ai i fafo le sua ina ia mafai ona faaputu i totonu o koneteina. A o soli e tagata ia vine, e masani ona pisipisia i sua o vine o latou lavalava i se lanu mumu paauli.

tagata o loo soliina vine — O vine sa soliina i totonu o se tanoa-vine po o se soliga vine.

Suesue i le Mataupu Faavae ma Feagaiga 133:48–51. Mai nei fuaiupu ua tatou iloa ai le faamasinoga tonu ma le tauimasui o le Alii i Lona Afio Mai Faalua.

I le faatusa o le soliga vine, o vine e faatusa i e amioleaga, o e o le a faaumatiaina i le taimi o le Afio Mai Faalua o le Faaola. O Ona laei mumu, e mafai ona vaaia o se faatusa o Lana faamasinogatonu.

Faitau le Mataupu Faavae ma Feagaiga 133:52–53, ma vaavaai mo le mea o le a manatua e e amiotonu ma ta’utaua i le “tausaga o a’u togiolaina” (MF&F 133:52). Atonu e te manao e faailoga mea ua e maua.

I lau api talaaga mo le suesueina o tusitusiga paia, tusi e uiga i ni taimi na e lagonaina ai le alofa agalelei o le Alii.

Faitau le Mataupu Faavae ma Feagaiga 133:54–56, ma vaavaai mo le mea o le a tupu i le Au Paia amiotonu o e maliliu a o lei oo i le Afio Mai Faalua.

Mataupu Faavae ma Feagaiga 133:57-74

Ua auina atu le talalelei e saunia ai le lalolagi mo le Afio Mai Faalua o Iesu Keriso

Sailiili i le Mataupu Faavae ma Feagaiga 133:57–62, ma vaavaai mo upumoni e uiga i mafuaaga e manaomia ai ona alu atu i luma le talalelei a o lei oo i le Afio Mai Faalua o le Alii.

A o e aoao i le talalelei ma ola ai, o le a e saunia mo le Afio Mai Faalua. O leMataupu Faavae ma Feagaiga 133:62 o loo faailoa mai ai se isi faamanuiaga e mafai ona e maua. Faaaoga le fuaiupu lenei e faauma ai le faamatalaga lenei: O i latou o e ma faapaia i latou lava o le a tuu atu .

Atonu e te vaaia se fesootaiga i le va o le mataupu faavae i le fuaiupu 62 ma le mataupu faavae na e faailoaina mai muamua i le fuaiupu e 45—e faapea, ua saunia e le Alii faamanuiaga silisili mo i latou o e faatalitali ia te Ia.

Tali le fesili lenei i lau api talaaga mo le suesueina o tusitusiga paia: E faapefea ona fesootai le mataupu faavae o loo i le fuaiupu e 62 i le mataupu faavae na e faailoaina mai i le fuaiupu e 45?

I le Mataupu Faavae ma Feagaiga 133:63–74, tatou te faitau ai e uiga i taunuuga mo i latou o e o le a lē salamo ma saunia mo le Afio Mai Faalua. O nisi o nei taunuuga e aofia ai le vavae ese mai le Alii ma le “tuu atu outou i le pouliuli” (MF&F 133:72).

Toe faitau le Mataupu Faavae ma Feagaiga 133:66–67, 70–71, lea o loo i ai afioga a le Alii i tagata o e e le talia o Ia. Ona sosoo lea, i lau api talaaga mo le suesueina o tusitusiga paia, fai ai se aotelega o filifiliga a tagata o loo faamatalaina i nei fuaiupu.

Mo i latou o e na maua le avanoa e talia ai le Alii, ae sa le’i taliaina o Ia, o le Afio Mai Faalua o le a avea o se taimi o le faanoanoa. Ae afai tatou te talia le valaaulia a le Alii e talia o Ia, usitai i Lona siufofoga, ma talitonu ma talia Ana auauna, o le Afio Mai Faalua o le a avea ma se aso fiafia mo i tatou.

Vaai faalemafaufau e faapea, ua toe foi mai le Faaola i le lalolagi i le aso. Mata o le a e olioli i Lana mafutaga faatasi ma i latou o e na faatalitali mo Ia? I lau api talaaga mo le suesueina o tusitusiga paia, tusi ai se mea se tasi o le a e faia ina ia avea le Afio Mai Faalua o le Faaola o se aafiaga fiafia mo oe.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mataupu Faavae ma Feagaiga 133:36–74 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: