Iunite 4: Aso 4

Mataupu Faavae ma Feagaiga 64:20–43

Faatomuaga

Na maua e le Perofeta o Iosefa Samita le faaaliga o loo faamaumauina i le Mataupu Faavae ma Feagaiga 64 i le aso 11 o Setema, 1831. Pe tusa o le lua vaiaso a o lei ona mauaina le faaaliga lenei, sa toe foi atu le Perofeta i Ohaio ina ua uma ona vaaia le faapaiaga o le laueleele ma le tulaga o le malumalu o Siona i Initipene, Misuri. O le Mataupu Faavae ma Feagaiga 64:20–43 o loo i ai aoaoga a le Alii e uiga i taulaga na Ia manaomia mai le Au Paia ma le faatuina o Siona i aso e gata ai.

Mataupu Faavae ma Feagaiga 64:20-25

Ua aoao mai le Alii na te manaomia o tatou loto

I luga o laina nei, ia tusi e uiga i se taimi na e lagonaina sa e ositaulaga ai e mulimuli i poloaiga a le Alii (e pei o le taofi o le auai i se taaloga po o se gaoioiga faapena ina ia mafai ona tausia ai le paia o le aso Sapati):

Mafaufau i auala na faamanuiaina ai oe ona o le faia o lenei osigataulaga. E mafai ona e aoao atili e uiga i osigataulaga na manaomia e le Alii mai ia i tatou a o e suesueina le Mataupu Faavae ma Feagaiga 64:20–43 ma faitau i poloaiga a le Alii ia Isaako Morley, Feterika G. Viliamu, ma isi uluai tagata o le Ekalesia.

faatoaga a Isaako Morley, Katelani, Ohaio

Sa anaina e Isaako Morley se faatoaga tele i Katelani, Ohaio. Sa ia valaaulia ma le agalelei le toatele o tagata o le Ekalesia, e aofia ai Iosefa Samita ma lona aiga, e nonofo i lona fanua.

Faitau le Mataupu Faavae ma Feagaiga 64:20, ma vaavaai mo le mea na faatonuina e le Alii ia Isaako e fai i lana faatoaga. I le avanoa talafeagai i le siata o loo i lalo, tusi ai mea na ta‘u mai e le Alii ia Isaako Morley e fai.

	Isaako Morley (MF&F 64:20)	Frederick G. Williams (MF&F 64:21)
O le a le mea na fetalai mai le Alii e tatau ona ia faia?
Na faapefea ona ia tali atu i le faatonuga a le Alii? (Tagai i le faamatalaga o loo i lalo.)
O le a le taunuuga o le usiusitai i le faatonuga a le Alii? (Tagai i le faamatalaga o loo i lalo.)

Sa o se osigataulaga tele lenei mo Isaako Morley. O le tele o le tupe mai le faatauina atu o le faatoaga, na tatau ona faaaogaina e faatau mai ai ni fanua mo isi tagata o le Ekalesia i Initipene, Misuri.

Suesuega le Mataupu Faavae ma Feagaiga 64:20, ma vaavaai mo faamanuiaga na folafola mai e le Alii e tuuina mai ia Isaako Morley, pe afai e faatau atu e Isaako lana faatoaga. Mai lenei fuaiupu ua tatou aoao ai, afai tatou te mulimuli i le finagalo o le Alii mo i tatou, o le a le faaosoosoina i tatou e sili atu nai lo o mea e mafai ona tatou gafatia.

Na mulimuli Isaako Morley i le poloaiga a le Alii e faatau atu lana faatoaga, ma sa faamanuiaina i le mafai ona ia talitalia faaosoosoga. O ia o se tasi o uluai tagata o le Au Paia na nofo i Initipene, Misuri, lea sa ia saili ai e faatuina Siona. Sa ia auauna atu ma le faamaoni i le Alii i lona soifuaga atoa. I le siata, tusi ai le gaoioiga na fai e Isaako ma le taunuuga o lana gaoioiga.

1. I lau api talaaga mo le suesueina o tusitusiga paia, ia lisi ai ni poloaiga se lua pe tolu ua tuuina mai e le Alii ia i tatou uma (e pei o le poloaiga ia tatalo e le aunoa). Ona faamatala lea pe mafai faapefea e le usitaia o nei poloaiga ona fesoasoani ia te oe e aloese ai mai faaosoosoga.

O se isi tamalii o Feterika G. Viliamu, sa anaina foi se faatoaga i Katelani. Sa i ai i lana faatoaga ni fale se lua, se fale tele e teu ai vaovao pe tuu ai manu, ma le tele o eka o fanua. Faitau le Mataupu Faavae ma Feagaiga 64:21, ma vaavaai mo le poloaiga na tuuina mai e le Alii ia Feterika G. Viliamu.

I le siata o loo i luga, tusi ai le mea na poloaiina e le Alii ia Feterika G. Viliamu e fai i lana faatoaga.

E ui lava sa le’i faatonuina Feterika G. Viliamu e faatau atu lana faatoaga e pei o Isaako Morley, ae sa ia faaalia pea se naunau e ositaulaga. Sa ia ta‘u atu i le Perofeta o Iosefa Samita, e mafai ona faaaoga lana faatoaga e faanonofo ai tagata o le Ekalesia na manaomia le fesoasoani, e aofia ai matua o le Perofeta. E le gata i lea, na faatagaina e Uso Viliamu ia totoina ma tausia ni laau toto ma lafu manu i lana faatoaga, e faaaoga e fafaga ma tausi ai le Au Paia. Mulimuli ane, na ia faapaiaina ai lana faatoaga atoa mo le Ekalesia e aunoa ma le mauaina mai ai o se totogi. E ala i osigataulaga a Feterika G. Viliamu ma isi tagata faamaoni o le Au Paia i Ohaio, na maua ai e le Alii “se taofiga malosi i le laueleele o Katelani, mo le va o le lima tausaga” (MF&F 64:21). I aluga o nei tausaga, na fausia ai e le Au Paia le Malumalu o Katelani. Sa latou faapaiaina le malumalu i le 1836, i le mavae ai o le lima tausaga talu ona tuuina mai le faaaliga i le Mataupu Faavae ma Feagaiga 64.

I le siata, faatumu le koluma mo Feterika G. Viliamu e ala i le tusia i avanoa talafeagai o le mea na ia faia ma le taunuuga o lenei gaoioiga.

Mai faataitaiga a Isaako Morley ma Feterika G. Viliamu, ua tatou aoao mai ai le mataupu faavae lenei: Ua faamanuiaina i tatou pe a tatou usitai i le Alii, ma osi atu taulaga ua Ia fetalai mai ai ia i tatou. Atonu e te manao e tusi le mataupu faavae lenei i au tusitusiga paia.

O osigataulaga a Isaako Morley ma Feterika G. Viliamu na faia e tusa ai ma a laua faatoaga, ua faaalia ai se osigataulaga na manaomia mai e le Alii ia i laua ma o loo Ia manaomia mai ia i tatou i aso nei. Faitau le Mataupu Faavae ma Feagaiga 64:22, ma vaavaai mo le taulaga e manaomia mai e le Alii ia i tatou.

Atonu e te manao e faailoga le mataupu faavae lenei i le fuaiupu e 22: E manaomia e le Alii o tatou loto.

2. Tali fesili nei i lau api talaaga mo le suesueina o tusitusiga paia:

   1. O le a sou manatu i le uiga o le, e manaomia e le Alii o tatou loto?

   2. E mafai faapefea ona e faaali atu i le Alii ua e naunau e tuuina atu lou loto ia te Ia?

Faitau le Mataupu Faavae ma Feagaiga 64:23–25, ma faailoa mai se poloaiga e mafai ona tatou tausia e faaali atu ai ua tatou tuuina atu o tatou loto i le Alii.

I le taimi lenei i le talafaasolopito o le Ekalesia, o le upu “sefuluai” e faatatau i taulaga e tuuina atu ma le loto-malie po o saofaga i le Ekalesia. I le 1838, sa faamanino mai ai le sefuluai o le tasi vae sefulu o tupe maua a se tagata (tagai i le ulutala o le MF&F 119). Talu mai lena taimi, na tatau i tagata uma ona totogiina le 10 pasene o a latou tupe maua i le tausaga.

3. Tali fesili nei i lau api talaaga mo le suesueina o tusitusiga paia:

   1. E mafai faapefea ona faaalia i le totogiina o sefuluai, ua tatou tuuina atu o tatou loto i le Alii?

   2. O a ni faamanuiaga o le totogiina o se sefuluai atoa ma faamaoni?

Toe faamanatu le Mataupu Faavae ma Feagaiga 64:23, ma vaavaai mo le folafolaga ua tuuina mai e le Alii ia i latou o e totogi sefuluai.

E ui o le faamanuiaga ua ta’uina mai i le fuaiupu e 23 e faatatau i le lumanai, ua faamanuiaina foi i tatou e le Alii i le taimi nei mo le totogiina o le sefuluai. Mafaufau e uiga i ni aafiaga na e maua ina ua faamanuiaina oe po o lou aiga o se taunuuga o le totogiina o sefuluai.

Mataupu Faavae ma Feagaiga 64:26-43

Ua tuuina mai e le Alii ni faatonuga mo le faatuina o Siona

Mafaufau i se taimi na faatonuina ai oe e fai se galuega sa faigata pe na e lagonaina le lofituina.

Ia Aokuso 1831, na tuuina mai ai e le Alii i le Au Paia se galuega tele o le mauaina mai o tupe e faatau mai ai fanua uma sa manaomia e fausia ai le aai o Siona i le Itumalo o Jackson, Misuri. Na iloa e le Au Paia afai latou te faatauina mai loa le fanua, o le a tatau ona latou galulue malosi e fausia le aai ma le malumalu iina.

O leMataupu Faavae ma Feagaiga 64:26–29 o loo i ai le poloaiga a le Alii i Ana auauna e toalua, o Newel K. Whitney ma Sini Gilbert, e faaaoga a laua faleoloa i Katelani, Ohaio, e fesoasoani e tuuina atu ai mea e manaomia e le Au Paia. O se tasi lenei o faataitaiga o se auala na talosagaina ai nisi o le Au Paia e ositaulaga ma saofaga atu i le fausiaina o Siona.

Faitau le Mataupu Faavae ma Feagaiga 64:30–33, ma vaavaai mo fuaitau na ono faamalosiauina ai le Au Paia o e sa taumafai ia ausia le galuega tele o le fausiaina o Siona.

E faavae i luga o mea ua e aoaoina mai le faitauina o nei fuaiupu, faauma le mataupu faavae lenei:

Afai tatou te , o le a mafai ona tatou ausia mea e tele.

Ina ua uma ona uunaia e le Alii le Au Paia ina ia filiga i le faia o mea lelei, sa Ia toe fetalai mai e uiga i le usiusitai. Pe sa e usiusitai i se matua, taitai o le Ekalesia, faiaoga, po o se faiaoga o taaloga, ae sa e faia ma se uiga faaalia le lelei? Ia matau i le Mataupu Faavae ma Feagaiga 64:34 upu o loo faamatala ai le uiga faaalia e tatau ona tatou maua a o tatou usiusitai i le Alii.

Atonu e te manao e tusi le mataupu faavae lenei i au tusitusiga paia i talane o le fuaiupu e 34: E tatau ona tatou usitai i le Alii ma o tatou loto ma mafaufau naunautai.

4. Tali fesili nei i lau api talaaga mo le suesueina o tusitusiga paia:

   1. O le a sou manatu i le uiga o le usitai i le Alii ma “le mafaufau malie”?

   2. Mafaufau i se taimi na e usitai ai i le Alii ma se loto ma se mafaufau malie [naunautai]. O le a le eseesega o lenei taimi mai taimi atonu e te le’i usitai ai ma le naunautai tele?

Faitau le Mataupu Faavae ma Feagaiga 64:41–43, ma vaavaai mo faamatalaga e uiga i le faatuina o Siona i o tatou aso. E taua le manatua o aso e gata ai, o Siona o le a le i ai i se nofoaga faalefaafanua se tasi, e pei o Initipene, Misuri. O le a faatuina Siona i atunuu uma e i ai tagata e usitai i le Alii ma o latou loto ma mafaufau naunautai.

5. I lau api talaaga mo le suesueina o tusitusiga paia, tusi ai i lalo se sini o se mea se tasi o le a e faia e usitai ai i le Alii ma se usiusitai sili atu ona loloto ma naunautai. A o e galue i lenei sini, ia matau le eseesega e faia e lenei ituaiga o usiusitai i lou olaga.

6. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Mataupu Faavae ma Feagaiga 64:20–43 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lo’u faiaoga: