Iunite 14: Aso 1
Mataupu Faavae ma Feagaiga 60–62
Faatomuaga
I le aso 8 o Aokuso, 1831, na sauni ai le Perofeta o Iosefa Samita ma toeaina e toa 10 e tuua ai Initipene, Misuri, ma toe foi atu i Ohaio. Na faatonuina e le Alii ia toeaina e talai atu le talalelei a o latou malaga—o faatonuga o loo ua faamaumauina nei i le Mataupu Faavae ma Feagaiga 60. I le aso lona tolu o la latou malaga, sa aafia ai le vaega i se tulaga matautia i le Vaitafe o Misuri. O aso e lua na sosoo ai, 12 ma le 13 o Aokuso, na maua ai e le Perofeta o Iosefa Samita ni faaaliga se lua mai le Alii. O na faaaliga o loo ua faamaumauina nei i le Mataupu Faavae ma Feagaiga 61 ma le 62. O loo aofia ai upu o aoaoga, lapataiga, faamafanafanaga, ma faamalosiauga.
Mataupu Faavae ma Feagaiga 60
Ua poloaiina e le alii toeaina e talai atu le talalelei a o latou malaga mai Misuri i Ohaio
Mafaufau i se taimi na e tau musu ai e ta‘u atu i isi e uiga i ou talitonuga pe sa e musu e faasoa atu lau molimau o le talalelei.
Sa aoaiina e le Alii nisi o toeaina o e sa malaga atu i Initipene, Misuri. Faitau le Mataupu Faavae ma Feagaiga 60:1–2 e iloa ai le pogai sa le fiafia ai le Alii i nisi o nei toeaina. Atonu e te manao e faailoga mea ua e iloa.
O toeaina na faamatalaina i fuaiupu 1-2 na malaga mai Ohaio i Initipene, Misuri, ina ia auai i le faapaiaga o le laueleele ma le tulaga o le malumalu. Na poloaiina i latou e le Alii e talai atu le talalelei i isi a o latou malaga atu i Misuri (tagai i le MF&F 52:9–10). Ae peitai, sa le’i usiusitai isi o toeaina i lenei poloaiga. Na fetalai mai le Alii, “Ona ua latou lē tatalaina o latou gutu, ae ua latou natia taleni ua Ou tuu atu ia te i latou” (MF&F 60:2). I se isi faaupuga, sa latou le faasoaina atu a latou molimau o le talalelei.
E tusa ai ma le Mataupu Faavae ma Feagaiga 60:2, aisea na le faasoaina atu ai e nisi o toeaina a latou molimau i isi?
Faitau le Mataupu Faavae ma Feagaiga 60:3 ina ia iloa ai mea e mafai ona tupu pe afai tatou te le faasoaina atu a tatou molimau.
Atonu e te manao e tusi le mataupu faavae lenei i au tusitusiga paia: E mafai ona aveesea a tatou molimau pe afai tatou te le faasoaina atu. O le faasoaina atu o molimau e le o taimi uma e faatatau ai i molimau aloaia e tautalagia i fonotaga a le Ekalesia. O nisi tagata o le Ekalesia o e e le taitai pe seasea lava tautatala i fonotaga a le Ekalesia, e faasoa atu a latou molimau e ala i ituaiga olaga latou te ola ai. O nisi e molimau atu e uiga i le talalelei e ala i le onosaia o tofotofoga o le soifua maloloina ma isi faigata. O isi e molimau atu faasamasamanoa i tagata o le aiga po o uo, e ala i le faailoa atu o le faamoemoe ma le faatuatua.
Na aoao mai Peresitene Boyd K. Packer o le Korama a Aposetolo e Toasefululua, e uiga i le taua o le faasoaina atu o a tatou molimau:
“O le a oo mai le Agaga ma le molimau a Keriso ia te oe i le tele lava o itu pe a, ma tumau ai ia te oe pe afai, e te faasoaina atu. O lena auala, o le aano moni lava lea o le talalelei.
“Pe le o le faamatalaga atoatoa ea la lenei o le faa-Kerisiano? E le mafai ona e maua, pe e te taofia foi, e le mafai foi ona e faalauteleina sei vagana ua e naunau e fetufaai. O le tuuina atu e avea ai mou” (“O Le Lamepa a le Alii,” Ensign, Jan. 1983, 55).
-
Tali fesili nei i lau api talaaga mo le suesueina o tusitusiga paia:
-
O le a se taimi na e lagonaina ai le tuputupu a’e o lau molimau ona sa e faasoaina atu?
-
O afea e te ono maua ai se avanoa i le vaiaso a sau pe a e faasoa atu ai lau molimau?
-
I le vaega o totoe o le Mataupu Faavae ma Feagaiga 60, o le a e faitau ai na poloaiina e le Alii nei toeaina e talai atu le talalelei a o latou malaga toe foi atu i Ohaio. A o e suesue, e te ono vaseina lalo o upu ma fuaitau e faatatau i le tuuina atu o se molimau, e pei o le “folafola atu la‘u upu” po o le “talai.”
Mataupu Faavae ma Feagaiga 61
Ua saunia e le Alii le taitaiga mo le Perofeta o Iosefa Samita ma isi toeaina i la latou malaga i Ohaio
Na iloa e le Perofeta o Iosefa Samita ma toeaina e toa 10 sa latou i ai i tulaga matautia a’o latou malaga e ala i paopao i malosi o le aave o le Vaitafe o Misuri. A o e faitauina le tala lenei, ia mafaufau po o a ni ou lagona pe ana faapea sa e i ai iina.
Vaitafe o Misuri, McIlwaine’s Bend
Sa ta’ua e Iosefa Samita e faapea, i le aso lona tolu o le faigamalaga, “sa faapea ona aliae ai le tele o tulaga matautia lea e masani ona i ai i vaitafe i sisifo; ma ina ua uma ona matou tolauapi i luga o le auvai o le vaitafe, … sa vaaia e Uso [William W.] Phelps, se faaaliga vaaia matilatila i le ao, le faaleaga mea i lona mana sili ona matautia, o faasee mai i luga o le vaitafe; o isi na faalogoina le pao, ae sa le’i vaai i le faaaliga” (i le History of the Church, 1:203). Na muamua atu i lenei faaaliga, “sa faapea ona aliae ai nisi o feeseeseaiga ma lagona le lelei i le usoga” (B. H. Roberts, Comprehensive History o le Ekalesia, 1:262–63). I lena afiafi, sa talanoaina ai e le usoga o latou faafitauli, ma mafai e le toatele o i latou ona faamagalo atu le tasi i le isi. O le taeao na sosoo ai, na tatalo ai Iosefa ma maua ai le faaaliga o loo tusia i le Mataupu Faavae ma Feagaiga 61.
Faitau le Mataupu Faavae ma Feagaiga 61:2, 20, 36-37, ma faailoga fuaitau atonu na aumaia le faamafanafanaga i nei toeaina.
E le gata i le faamagaloina o nei toeaina i a latou agasala, ae na aoao mai foi le Alii e faapea, o le a tutupu “faafanoga e tele” i luga o vai i aso amuli (tagai i le MF&F 61:5, 14–19). Na fetalai mai foi le Alii e uiga i Lona mana. Faitau le Mataupu Faavae ma Feagaiga 61:1, 6, 10, ma vaavaai mo mea na aoao mai e le Alii e uiga i Lona mana.
Ona o le faaaliga a William W. Phelps e uiga i le faaleaga-mea i luga o vai, ua manatu ai nisi e faapea ua i ai ia Satani lea mana i luga o vai. Ae ui i lea, ua faamautu mai e le Mataupu Faavae ma Feagaiga 61:1 e faapea, ua i ai i le Alii le mana uma. O lenei mea e aofia ai le mana i luga o vai. O fuaiupu e 6 ma le 10 ua faamautu mai ai le gafatia e le Alii ona faasaoina i tatou. Atonu e te manao e tusi le mataupu faavae lenei i au tusitusiga paia: O loo i ai i le Alii le mana uma, ma e mafai ona Ia faasaoina i tatou.
O le vaega o totoe o le Mataupu Faavae ma Feagaiga 61 o loo i ai isi faatonuga mai le Alii i nei toeaiina e taiala ai lo latou foi atu i Ohaio.
Mataupu Faavae ma Feagaiga 62
Ua tauleleia e le Alii le faamaoni o se vaega o toeaina na malaga atu i Initipene, Misuri
I le siata o loo i lalo, tusi se “X” i autafa o fesili e te manatu atonu e sili atu ona taua i le Alii.
|
Pe e tatau ona ou alu i le Lotu i le Aso Sa? | |
|
Pe e tatau ona ou ofuina se sakete uliuli po o se sakete lanumeamata i le Lotu? Pe e tatau ona ou faia se fusiua lanumumu po o se fusiua lanumoana? | |
|
Pe e tatau ona ou auauna atu i se misiona? Afai o lea, o afea? | |
|
Afai e ofo mai lo’u tina e kuka le meaai e sili ona ou fiafia i ai, o le a le mea e tatau ona ou filifilia? |
E faalagolago i tulaga, o le tele o faaiuga tatou te faia atonu e taua i le Alii, a o isi atonu e leai. I faaaliga o loo tusia i le Mataupu Faavae ma Feagaiga 60–62, na fesoasoani le Alii i toeaina o Lana Ekalesia ia malamalama o nisi o faaiuga na manaomia ona latou faia sa sili atu le taua ia te Ia nai lo o isi [faaiuga]. A o faaauau ona e suesue i nei faaaliga, e mafai ona e maua se malamalamaaga e taiala ai oe i le faia o faaiuga.
Ina ia malamalama i le nofoaga [na maua ai le] Mataupu Faavae ma Feagaiga 62, faitau le faatomuaga o le vaega.
O toeaina o loo ta‘ua i le folasaga o le vaega, na sili atu ona telegese la latou malaga atu i Initipene, Misuri, nai lo o isi ona o a latou taumafaiga filiga e talai atu le talalelei. O se taunuuga, na latou misia ai le konafesi lea sa faapaiaina ai le laueleele ma le tulaga o le malumalu.
Faitau le Mataupu Faavae ma Feagaiga 62:1–3, ma vaavaai mo nisi o faamanuiaga e oo mai ia i latou o e talai atu le talalelei ma faasoa atu a latou molimau.
Suesue ia mau faasino o loo lisi atu i le koluma agavale o le siata lenei. I le koluma talafeagai, tusi ai i lalo mea sa taua i le Alii ma mea sa le taua ia te Ia.
|
O le a le mea sa taua i le Alii? |
O le a le mea sa le taua ia te Ia? | |
|---|---|---|
-
I le faamatalaga lenei mai ia Elder David A. Bednar o le Korama a Aposetolo e Toasefululua, vase lalo o upu po o fasifuaitau o loo fesoasoani ia te oe ia e malamalama i mea sa aoao mai e le Alii i toeaina ina ua Ia fetalai e faapea, o nisi mea e taua ia te Ia ae o isi e leai:
“E manino lava, e le o fetalai atu le Faaola i nei faifeautalai e le o popole ia latou mea la e fai. Ae, sa Ia faamamafaina le taua o le faamuamua o mea e tatau ona faamuamua, ma ia taulai atu i mea tonu. … O le mea taua o le galuega ua tofia i latou e faataunuu; o le auala e oo ai iina e taua, ae le o le autu.“ (“O Se Faatanoa o le Vaiola,” [Faeasaite a le Ofisa o Aoga a le Ekalesia mo le autalavou matutua, Fep. 4, 2007], 4; LDS.org).
-
Faitau le Mataupu Faavae ma Feagaiga 62:8, ma faailoa mai ni mea se lua e mafai ona tatou faalagolago i ai pe a faia faaiuga. Ona faauma lea o le mataupu faavae lenei i le faatumuina o avanoa: Pe a tatou faia ni faaiuga, e tatau ona tatou faalagolago i le ma le .
-
-
Aisea e te manatu e taua ai le faalagolago i lo tatou faamasinoga faapea foi ma le taitaiga a le Agaga?
-
O anafea na e faia ai se faaiuga e faavae i lau lava faamasinoga faapea foi ma le taitaiga mai le Agaga? Na faapefea ona faamanuiaina oe mo le faia o lena mea?
-
Mafaufau i auala e mafai ona e galue ai i se tasi pe sili atu o mataupu faavae ua e aoaoina i lau suesuega o le Mataupu Faavae ma Feagaiga 60–62.
-
Ua ou suesueina le Mataupu Faavae ma Feagaiga 60–62 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: