Iunite 19: Aso 2
Mataupu Faavae ma Feagaiga 88:41–69
Faatomuaga
O le lesona lona lua lenei o lesona e tolu e suesue ai le faaaliga ua faamaumauina i le Mataupu Faavae ma Feagaiga 88. O le vaega o le faaaliga o loo aofia i le lesona lenei sa tuuina mai i se konafesi o faitaulaga sili i Katelani, Ohaio, i le aso 27 ma le 28 o Tesema, 1832. O loo aofia ai le faamalamalamaga a Iesu Keriso o le auala e pulea ai e le Atua Ana foafoaga ma se valaaulia mo i tatou e faalatalata atu ia te Ia.
Mataupu Faavae ma Feagaiga 88:41-50
Ua faaali mai e le Faaola o loo pulea mea uma e ala i le tulafono faalelagi
Pe na e vaavaai atu ea i fetu ma mafaufau e uiga i le Atua ma Ana foafoaga? O a ni fesili po o ni manatu sa e mafaufau loloto i ai a’o e faataupupula atu i le lagi?
Pe a mafaufau i tagata i le atulaulau o foafoaga a le Atua, o nisi taimi latou te lagona ai le faatauvaa ma le faalētaua. Atonu latou te mafaufau pe o silafia i latou e le Atua. O le tele o fuaiupu o le a e suesueina i le aso i le Mataupu Faavae ma Feagaiga 88 ua faaalia ai e silafia e le Atua oe ma Lona finagalo e faalatalata mai ia te oe.
Faitau le Mataupu Faavae ma Feagaiga 88:41. Mafaufau pe o faapefea ona faaalia e lenei fuaiupu, e i ai i le Atua le mana e silafia ai oe ma ou manaoga. Ona faitau lea o le Mataupu Faavae ma Feagaiga 88:42–45, ma faailoa mai pe faapefea ona pulea e le Atua o Ana foafoaga, e aofia ai le la, masina, fetu ma paneta. Atonu e te manao e faailoga mea e te maua.
-
Mafaufau i nisi o foafoaga a le Atua i le lagi ma i le lalolagi. I lau api talaaga mo le suesueina o tusitusiga paia, tusi e uiga i se foafoaga se tasi a le Atua e te maofa ai. O le a le mea ua aoao mai e lena foafoaga ia te oe e uiga i le Foafoa?
-
-
O le a le mea tatou te vaaia pe a tatou vaai i le foafoaga aupito itiiti a le Atua?
-
E faapefea ona fesoasoani foafoaga o loo e vaai i ai i le lagi ma i luga o le fogaeleele e faateleina lau molimau i le Atua?
-
-
Mataupu Faavae ma Feagaiga 88:51-61
Ua tuuina mai e le Alii se faataoto e uiga i ni tagata galulue i se fanua sa faapea ona asiasia
O leMataupu Faavae ma Feagaiga 88:51–60 o loo i ai se faataoto e fesoasoani tatou te malamalama ai i fegalegaleaiga a le Atua ma malo ua Ia foafoaina. O se faataoto o se tala e faaaoga ai faatusa e aoao atu ai se upumoni.
Faitau le Mataupu Faavae ma Feagaiga 88:51–55, ma vaavaai po o le a le mea na poloai atu e le tamaloa o loo i le faataoto i ana auauna taitoatasi e fai, ae o le a foi le mea sa ia folafola atu i ana auauna taitoatasi.
I le Mataupu Faavae ma Feagaiga 88:56–60, tatou te faitau ai, sa asiasi atu le pule o le fanua i ana auauna taitoatasi ina ua oo i o latou taimi: “Sa faapea ona latou maua uma le susulu o fofoga o lo latou alii, o tagata taitoatasi i lona itula” (MF&F 88:58).
Faitau le Mataupu Faavae ma Feagaiga 88:61, ma vaavaai mo mea o loo aoao mai e lenei faataoto e uiga i le ala e fegalegaleai ai le Atua ma malo na Ia foafoaina.
O le lalolagi ua tatou nonofo ai o se tasi lea o malo na folafola mai le Alii e asiasi i ai. O se tasi o upumoni e mafai ona tatou aoao mai i lenei faataoto o le, o le a asiasi le Alii i Ona malo taitasi ma o latou tagata o nonofo ai i Lana lava taimi. Atonu e te manao e tusi le mataupu faavae lenei i au tusitusiga paia.
O le a tatou olioli i le afioaga o le Alii i le lalolagi i le taimi o le Meleniuma, pe a mavae Lona Afio Mai Faalua.
Mataupu Faavae ma Feagaiga 88:62-69
Ua folafola mai le Atua, e faalatalata mai ia i tatou a’o tatou faalatalata atu ia te Ia
Mafaufau loloto i fesili nei: O le a lou latalata o loo e lagonaina i le Alii? E te manao ia lagona le latalata atili atu ia te Ia?
Faitau le Mataupu Faavae ma Feagaiga 88:62–63, ma vaavaai mo mea e mafai ona tatou faia e valaaulia ai le Alii ia faalatalata mai ia i tatou. Atonu e te manao e faailoga mea e te maua.
-
-
Tusi se mataupu faavae ua e aoao mai i le Mataupu Faavae ma Feagaiga 88:63 e uiga i le faalatalata atu i le Alii.
-
Tusi ni upu faatino se tolu mai le fuaiupu e 63 e tuu atu ai ia te oe se malamalamaaga e uiga i le auala e mafai ona e faalatalata atili atu ai i le Alii.
-
Tali le fesili lenei: O a ni mea ua e faia e saili, ole, ma tuitui atu ai ina ia e latalata atili ai i le Alii?
-
Faitau le Mataupu Faavae ma Feagaiga 88:64, ma vaavaai mo le mea ua folafola mai e le Alii ia i latou e tatalo atu i le Tama i Lona suafa.
O le a le mea na aoao mai e le Faaola e uiga i le auala e tali mai ai le Tama Faalelagi i a tatou tatalo? I lenei fuaiupu o le fuaitau “tatau ai mo outou” e mafai ona toe faaupuina “sili ona lelei mo outou.” O le mea lea, o le mataupu faavae e tasi e mafai ona tatou aoao mai i lenei fuaiupu, e tali mai le Tama Faalelagi i a tatou tatalo i auala Na te silafia e sili ona lelei mo i tatou.
E mafai ona fesoasoani le saunoaga lenei a Elder Richard G. Scott o le Korama a Aposetolo e Toasefululua, e te malamalama ai, pe aisea e tatau ai ona e lagona le lotofaafetai e tusa lava pe tali mai le Tama Faalelagi i se tatalo i se auala e ese mai le mea sa e faamoemoe pe sa e faatalitali i ai: “E matua faigata lava pe afai e le tali maia se tatalo faamaoni mo se mea e te matuai manao lava i ai i le ala e te manao ai. E faigata ona malamalama pe aisea e le tuuina mai ai le tali manaomia o le faatinoina o lou faatuatua moni ma le faamaoni mai se olaga usiusitai. … E i ai taimi e faigata ona iloa le mea e sili po o le tatau mo oe i ni taimi. O le a faigofie atu lou olaga pe a e taliaina faapea, o mea e faia e le Atua i lou olaga e mo lou lelei e faavavau“ (“Faaaogaina o le Meaalofa Faalelagi o le Tatalo,“ Ensign po o le Liahona, Me 2007, 9).
-
I le Mataupu Faavae ma Feagaiga 88:66, tatou te aoao ai o se tasi o auala e fesootai mai ai le Atua ia i tatou o le “ua pei o le leo o lē ua alaga i le vao.” Faitau le fuaiupu lena, ma vaavaai mo auala e oo mai ai le siufofoga o le Atua ia i tatou. Mafaufau e uiga i ni taimi na e lagonaina na latalata mai ai le Atua ia te oe e ui lava e te le’i vaai ia te Ia.
Faitau le Mataupu Faavae ma Feagaiga 88:67–69, ma vaavaai mo ni auala faaopoopo e mafai ona e faalatalata atu ai i le Alii. Atonu e te manao e faailoga mea e te maua.
O le faaaogaina o nei fuaiupu, faauma le faamatalaga lenei: Afai e taulai atu lau vaai i le mamalu o le Atua, ona .
I le fuaiupu e 67, o le fuaitau “tau-tasi … mata i lo’u mamalu” o lona uiga o le tuuto atoa atu i le galuega ma faamoemoega o le Atua.
-
-
O ai se tagata e te iloa e foliga mai ua faatumulia i le malamalama o le Alii?
-
O a ni auala e te vaaia ai le malamalama o le Alii i lena tagata?
-
I le fuaiupu e 68, ia matau, ina ia mafai ona tau-tasi lou mafaufau i le Atua, e tatau ona e faapaiaina oe lava. O le fuaitau “faapaia outou lava” e faatatau i le manaomia ona faaatoatoaina ma faamamaina mai agasala. E mafai ona faapaiaina oe e ala i le Togiola a Iesu Keriso ma le uunaiga a le Agaga Paia, a o e salamo ia au agasala, maua sauniga o le perisitua, ma tausi au feagaiga.
-
Faaiu le lesona lenei i le faitauina ma mafaufau loloto i le saunoaga lenei a Peresitene Dieter F. Uchtdorf o le Au Peresitene Sili:
“Uso e ma tuafafine, atonu e sa’o o le tagata o le mea noa lea pe a faatusatusa atu i le telē o le lalolagi. E i ai taimi tatou te lagona ai foi le faalētaua, le iloa, tuua toatasi, po o le faagaloina. Ae, ia e manatua i taimi uma—e taua oe ia te Ia! …
“E silasila mai le Atua ia te oe e le gata o se tagata soifua i luga o se paneta itiiti, ma o le e ola mo se taimi itiiti—E silasila mai o Ia ia te oe o Lona atalii/afafine. E silasila mai o Ia ia te oe o le tagata e gafatia ma faamoemoeina e avea ai oe. E finagalo o Ia ia e iloa e taua oe ia te Ia” (“E Taua Oe ia te Ia,” Ensign po o le Liahona, Nov. 2011, 22).
-
Ua ou suesueina le Mataupu Faavae ma Feagaiga 88:41–69 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: