Iunite 21: Aso 1
Mataupu Faavae ma Feagaiga 98
Faatomuaga
I le aso 20 o Iulai, 1833, na faatonu ai e se vaega e 400–500 o tagata Misuri ina ia aua ne’i toe siitia atu nisi tagata o le Au Paia i le Itumalo o Jackson, ma faapea foi o i latou uma o loo nonofo ai iina e tatau ona o ese. A o lei mafai ona tali atu i ai le Au Paia i Misuri, na amata e ni tagata leaga ona faaleaga a latou meatotino ma faamatau atu o latou ola. I le aso 6 o Aokuso, 1833, na maua ai e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 98, lea na faatonuina ai e le Alii le Au Paia i le auala e tali atu ai i sauaga. E ui lava atonu na oo atu ni tala o le faalavelave i Misuri i le Perofeta i Katelani, Ohaio, e tusa ma le 900 maila (1,450 kilomita) le mamao, ae na o faaaliga lava na mafai ona ia malamalama ai i le ogaoga o le tulaga. I lenei faaaliga na ta’ua ai e le Alii puapuaga o le Au Paia, fautuaina i latou e mulimuli i le tulafono faavae o le laueleele, ma faatonu i latou e tausia a latou feagaiga.
Mataupu Faavae ma Feagaiga 98:1–22
Ua fautuaina e le Alii le Au Paia ia tausia a latou feagaiga i taimi faigata
I le Mataupu Faavae ma Feagaiga 98:1–22, ua fautuaina ai e le Alii le Au Paia puapuagatia e avatu le faafetai i mea uma, ma faatalitali ma le onosai i le Alii.
Faitau le Mataupu Faavae ma Feagaiga 98:11–12, ma sue le poloaiga na tuuina mai e le Alii i le Au Paia.
Faitau le Mataupu Faavae ma Feagaiga 98:13–15, ma vaavaai i le mea na ta’u mai e le Alii i le Au Paia e uiga i le tofotofoina po o le faamaonia. Mai nei fuaiupu ua tatou aoao tatou te faamaonia i tatou lava i le Alii e ala i le tausia o a tatou feagaiga, e tusa lava pe faigata ona faia lena mea.
Mafaufau pe aisea atonu na taua ai mo le Au Paia na nonofo i Misuri i le 1833 ona manatua le taua o le tausia o a latou feagaiga e tusa lava pe sa faigata ona faia lena mea. Aisea e te manatu ai atonu e taua mo i tatou i le taimi nei ona manatua le taua o le tausia o a tatou feagaiga i taimi o faigata?
Mataupu Faavae ma Feagaiga 98:23-32
Ua faaali mai e le Alii le ala e tatau ona tali atu ai le Au Paia i sauaga
-
Tusi ni koluma se tolu i lau api talaaga mo le suesueina o tusitusiga paia. Faaautu le ulutala muamua O le Tulafono a le Alii i le Tauimasui (MF&F 98:23–32), o le koluma lona lua O le Tulafono a le Alii i Taua (MF&F 98:33–38), ma le koluma lona tolu O le Tulafono a le Alii i le Faamagalo Atu (MF&F 98:39–48). Tuu ni avanoa i koluma taitasi e tusi ai mataupu faavae ma aoaoga faavae e te tau i ai a o e suesue i lenei lesona. A o e galue i le lesona, o le a e maua ai faatonuga e uiga i mea e tatau ona tusi i nei koluma.
O le a sou lagona pe a fai e se tasi se mea e te afaina ai pe afaina ai lou aiga? Aisea e te manatu e ono mananao ai nisi tagata e faaagatonu (ia tauimasui) i se tagata na mafua ai ona latou afaina?
Faitau le Mataupu Faavae ma Feagaiga 98:23–27, ma vaavaai mo le fetalaiga a le Alii e uiga i le tauimasui ma le faaagatonu.
Atonu e te manao e faailoga le fuaitau “le upuleaga” ma le “talia ma le onosai” i nei fuaiupu.
E faavae i luga o mea na aoao mai e le Alii i le Au Paia i Misuri, ua tatou aoao ai afai tatou te tauaveina le agaleaga ma le onosai ma e aunoa ma le tauimasui, o le a tauia i tatou e le Alii. Tusi lenei mataupu faavae i lau api talaaga mo le suesueina o tusitusiga paia i lalo o le ulutala “O le Tulafono a le Alii i le Tauimasui.”
-
-
O a ni auala e te manatu e leaga ai le faaagatonu po o le saili e tauimasui?
-
Mafaufau i se tasi e te iloa (pe na faitau foi e uiga i ai) na faaalia le onosai a o onosaia ni faiga le lelei ma sa le’i saili e tauimasui. O le a le mea na faia e lenei tagata e faaali ai lona onosai e ui lava i faiga le lelei?
-
Ina ua faia se vaega a tagata faatupu faalavelave i le Itumalo o Jackson, Misuri, i le aso Toonai, 20 Iulai, 1833, sa le gata ina latou faaleagaina meatotino, ae sa latou saili foi e fai ni mea ia afaina ai taitai o le Ekalesia. O le tala lenei o loo faaalia ai auala na tali atu ai Epikopo Eteuati Paterika ma Charles Allen, o se tagata e le’i leva na liliu mai e 27 ona tausaga mai Penisilevania, i faiga le lelei sa faia ai i la’ua e tagata faatupu faalavelave i Misuri.
Ua luiina e se vaega o tagata faatupu faalavelave taitai o le Ekalesia i le Itumalo o Jackson, Misuri.
“Na maua e le au faatupu faalavelave ia Epikopo Eteuati Paterika ma Charles Allen, ma toso faatata atu i laua i le mumu o tagata feita, lea na faalumaina ma sauaina ai i laua a’o agai atu i le auala seia tau atu i le nofoaga e faapotopoto ai tagata lautele. O iinei na fofola atu ai ia te i laua ni filifiliga se lua; a le o le faafitia o le la talitonuga i le Tusi a Mamona po o le tuua o le itumalo. Sa le mafai ona la faafitia le Tusi a Mamona, pe malilie foi e tuua le itumalo. Na faapea atu Epikopo Paterika, o le sa faatagaina e tautala, na puapuagatia le au paia i augatupulaga uma o le lalolagi, ma sa malie o ia e puapuaga mo Keriso, e pei ona sa faia e le au paia i vaitau na muamua atu; ma e leai se mea na ia faia e faatiga ai i se tasi, ma afai latou te sauaina o ia, o le a latou faamanualia se tagata le sala. O iinei na le lagona ai lona leo ona o le vavao o tagata, ma o le toatele o i latou sa alalaga atu: ‘Valaau i lou Atua e laveai oe …!’ Sa saeia ese lavalava o nei uso e toalua, o Paterika ma Allen, ae valiina [nini] i le ta, na palu faatasi ma vailaau vevela, po o isi aseti e aati i le aano [o le tino], ma se vaega o fufulumanu na faasalalau i o la’ua luga. Sa laua onosaia lenei faiga mataga faatufanua ma sauaga ma le onosai ma le agamalu sa faapea ona saō ai le anoano o tagata, ma na foliga sa maofa i le mea sa latou molimauina. Sa faapea ona faatagaina le usoga e o ese mai ma le filemu” (B. H. Roberts, A Comprehensive History of the Church, 1:333; tagai foi Church History in the Fulness of Times Student Manual, 2nd ed. [Church Educational System manual], 2003, 133).
-
-
O le a se mea e faagaeetia ai oe i le auala na tali atu ai Epikopo Paterika ma Charles Allen i sauaga sa oo ia i laua?
-
O le a se mea e mafai ona e faia e te mulimuli lelei ai i le fautuaga a le Alii i le vaega lenei?
-
I le Mataupu Faavae ma Feagaiga 98:28–32, na fautuaina ai e le Alii le Au Paia, afai na faatolu ona latou afaina i se fili e aunoa ma le mauaina o le tauimasui o le Atua, e tatau ona latou lapataia le fili i le suafa o le Alii ia aua ne’i o latou toe faia se mea leaga ia i latou. Na faamalamalama atili mai e le Alii e faapea, afai e faaauau pea ona faia e le fili mea e afaina ai i latou i le mavae ai o lenei lapataiga, ona ta’uamiotonuina lea o le Au Paia i le “tauia o ia e tusa ma ana galuega” (MF&F 98:31). Ae ui i lea, sa ta’u atu foi i le Au Paia afai latou te faasaoina o latou fili e ui lava ina sa tauamiotonuina i le faaagatonu, o le a tauia i latou mo lo latou amiotonu.
Mataupu Faavae ma Feagaiga 98:33-38
Ua faamalamalama mai e le Faaola le taimi e taumiotonuina ai taua
E i ai nisi o lou aiga po o ni uo o e sa auauna atu i se taua mo lo latou atunuu? Pe na e mafaufau po o le a se mea na aoao mai e le Alii e uiga i taua?
Faitau le Mataupu Faavae ma Feagaiga 98:33–34, ma vaavaai mo le mea na ta’u mai e le Alii i Ona soo anamua e uiga i taua.
E faavae i mea na e faitauina i le fuaiupu e 33, faatumu avanoa e faauma ai le fuaitau lenei: E tatau ona latou o e tau faasaga i soo se atunuu, ituaiga, gagana, po o le tagata, o le Alii i latou. Atonu e te manao e tusi lenei upumoni i lau api talaaga mo le suesueina o tusitusiga paia i lalo o le ulutala “O le Tulafono a le Alii i Taua.” (Ia manatua na tuuina mai e le Alii lenei tulafono e faapitoa lava i tagata o e sa ola i se taimi ese ma i se aganuu e ese. E ui e moni le mataupu faavae o le tulafono, ae o aso nei ua tatou usitai foi i tulafono a atunuu ua tatou nonofo ai [tagai i le Mataupu Faavae o le Faatuatua 1:12].)
E tusa ai ma le Mataupu Faavae ma Feagaiga 98:34, o a mea na tatau ona fai muamua e na soo anamua pe afai e folafola mai e se tasi se taua e faasaga ia i latou? (Tusi lau tali i le fesili lenei i lau api talaaga mo le suesueina o tusitusiga paia i lalo o le ulutala “O le Tulafono a le Alii i Taua.”)
Faitau le Mataupu Faavae ma Feagaiga 98:35–38, ma vaavaai mo le mea na ta’u mai e le Alii i Ona soo anamua e fai, pe afai na le taliaina la latou talosaga mo le filemu.
Mai nei fuaiupu ua tatou aoao ai e mafai ona taʼuamiotonu taua i lalo o tulaga faatonuina a le Alii. Tusi lenei upumoni i lau api talaaga mo le suesueina o tusitusiga paia i lalo o le ulutala “O le Tulafono a le Alii i Taua.”
Ina ua auai le tele o atunuu i le taua i le taimi o le Taua Lona II a le Lalolagi, na faamalamalama mai e Peresitene Tavita O. MaKei tulaga e tauamiotonuina ai soo o le Alii i le o atu i le taua:
“O taua e faafeagai ma aoaoga a Keriso. O le talalelei a Iesu Keriso o le talalelei o le filemu. O le taua o lona faafeagai tonu lea ma e fanau mai ai le ita. …
“Ae peitai, o loo i ai tulaga e lua e mafai ona tauamiotonu ai se tagata Kerisiano moni e ulufale—manatu ane oe, ou te fai atu ulufale, ae le o le amataina—o se taua: (1) O se taumafaiga [a se tasi] e pulea ma faoa mai se isi lana faitalia e filifili ai, ma le (2) Tuuto faamaoni i lona atunuu. Atonu o loo i ai se lona tolu, e [ta’u], o le Puipuiga o se atunuu vaivai ua olopalaina ma le le sa’o e se atunuu malosi, ma le faalealofa” (i le conference Report, Ape. 1942, 71–72).
Mataupu Faavae ma Feagaiga 98:39-48
Ua aoao e le Alii le Au Paia i auala e tatau ona latou tali atu ai i o latou fili
E faatatau i le tulafono a le Alii i le tulafono i taua, o le tulafono a le Alii i le faamagalo atu i le Mataupu Faavae ma Feagaiga 98:39–48. O le tala lenei i se mea na tupu ina ua uma le Taua Lona II a le Lalolagi, ua faaalia ai le tulafono a le Alii i le faamagalo atu:
“I Holani i le taimi o le Taua Lona II a le Lalolagi, sa faaaoga ai e le aiga o Casper ten Boom lo latou fale e fai ma lafitaga mo i latou sa sailia e le Nazis. O la latou auala lenei sa ola ai i lo latou faatuatuaga faaKerisiano. E toafa tagata o le aiga na maliliu ai ona o le tuuina atu o lenei sulufaiga. Sa faaalu e Corrie ten Boom ma lona uso o, Betsie, ni masina matautia i le tolauapiga o le falepuipui inosia o Ravensbrück. Sa maliu ai Betsie iina—ae ola Corrie.
“ Ravensbrück, sa iloa ai e Corrie ma Betsie e fesoasoani le Atua ia i tatou ia loto faamagalo. Ina ua maea le taua, sa naunau ia Corrie e faasoa atu lenei savali. I se tasi taimi, sa faatoa talanoa atu ai lava i se vaega o tagata i Siamani sa mafatia mai le faatamaiaga a le taua. O lana savali o le, ‘E faamagaloina e le Atua.’ O iina na fotuai mai ai faamanu-iaga o le faamaoni o Corrie ten Boom.
“Sa alu atu se tamaloa ia te ia. Sa ia iloaina o ia, o se tasi o leoleo aupito saua sa i ai i le tolauapiga. ‘Sa e ta’ua Ravensbrück i lau tautalaga,’ o lana tala lea. ‘Sa ou leoleo ai iina. … Peitai, talu mai lena taimi, ua avea au ma Kerisiano. Na ia faamatala e faapea, sa ia sailia le faamagaloga mai le Atua mo mea leaga sa ia faia. Sa ia faaloaloa mai lona lima ma fesili mai, ‘Pe mafai ona e faamagalo mai ia te au?’
“Ona faapea atu lea o Corrie ten Boom:
“‘Atonu e le’i tele ni sekone na tutu ai o ia iina—ma lona lima o loo faaloaloa mai—ae ia te au lava ia sa foliga mai e tele ni itula a o ou tauivi ma le mea aupito sili ona faigata sa tatau ona ou fai.
“’… O le savali faapea e faamagaloina e le Atua e i ai se … tuutuuga: tatou te faamagalo atu ia i latou na agaleaga mai ia i tatou. …
“’… “Fesoasoani mai ia te a’u!” sa ou tatalo le leoa ai. “E mafai ona sii lo‘u lima. Na pau lena o le mea e mafai ona ou fai. Auina mai e oe le lagona.”
“’… Ma le musua, ma le le mafaufau i ai, sa ou tuu faamalosi atu lo’u lima i le lima sa faaloaloa mai ia te au. A o ou faia lena mea, sa tupu se mea e faigata ona talitonuina. O le ãu tafe na amata i lo’u tauau, ma puna vave a’e ai i lo’u lima, ma sosolo atu ai i o ma’ua lima ua soofaatasi. Ona foliga mai ai lea ua lilofia lo’u tagata atoa i lenei mafanafana faamalolo, ma aumaia ai loimata i o’u mata.
“’”Ua ou faamagalo ia te oe, le tuagane!” sa ou tagi ai. “Ma lo’u loto atoa.”
“‘Sa umi se taimi o ma taufai uumau e le tasi le lima o le isi, o le sa leoleo ma le sa pagota. Ou te lei iloaina muamua le o’oo’o o le alofa o le Atua e pei ona sa ou iloa ia i lena taimi.’ [Corrie ten Boom, Tramp for the Lord (1974), 54–55.] ” (Keith B. McMullin, “O Le Ala o Mea e Tatau ona Tatou Faia,” Ensign po o le Liahona, Me 2010, 13).
O le a se mea ua aoao mai e lenei tala ia te oe e uiga i le faamagalo atu?
Faitau le Mataupu Faavae ma Feagaiga 98:39–40, ma vaavai mo le tulafono a le Alii i le faamagalo atu.
E tusa ai ma nei fuaiupu, o le a le mea e tatau ona tatou faia pe a talosaga mai se tasi mo la tatou faamagaloga?
O le fuaitau “seia faafitugafulu ni fitu” i le fuaiupu e 40 ua faaalia mai ai le mea moni e faapea, e tatau ona tatou faamagalo atu i isi po o le a lava le tele o taimi latou te salamo ai ma sailia la tatou faamagaloga pe a uma ona faatiga pe sauaina i tatou. (E ui lava ua poloaiina i tatou e faamagalo atu, ae e le faapea ai e tatau ona tatou faatagaina isi e faaauau pea ona sauaina i tatou.)
Faitau le Mataupu Faavae ma Feagaiga 98:41–43, ma saili mo upumoni faaopoopo na aoao mai e le Alii i le Au Paia e faatatau i o latou fili, o e agaleaga mai ia i latou ma le salamo.
Tusi se otootoga o le tulafono a le Alii o le faamagalo atu, i lau api talaaga mo le suesueina o tusitusiga paia i lalo o le ulutala “O le Tulafono a le Alii i le faamagalo Atu.”
-
-
Aisea e te manatu ai ua poloaiina i tatou e faamagalo atu i isi e tusa lava pe latou te le talosaga mai mo se faamagaloga?
-
Aisea ua poloaiina ai i tatou e faamagalo atu i o tatou fili?
-
Mafaufau i se mea e mafai ona e faia i lou olaga e mulimuli ai i le tulafono a le Alii o le faamagalo atu.
I le Mataupu Faavae ma Feagaiga 98:44–48, na folafola mai e le Alii, afai o le a salamo fili o le Au Paia, o le a latou sao mai i Lona tauimasui.
-
Ua ou suesueina le Mataupu Faavae ma Feagaiga 98 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: