Mataupu Faavae ma Feagaiga 42:1–29

Faatomuaga

I le aso 9 o Fepuari, 1831, a’o lei leva ona taunuu i Katelani, Ohaio, na maua ai e le Perofeta o Iosefa Samita se faaaliga lea ua avea nei ma Mataupu Faavae ma Feagaiga 42:1-72. Sa ia mauaina nisi faatonuga atili i le aso 23 o Fepuari (tagai i le MF&F 42:73–93). O nei faaaliga ua tuufaatasi, ua ta’ua “o le tulafono a le Ekalesia” (tagai i le MF&F 42 folasaga o le vaega). O leMataupu Faavae ma Feagaiga 42 ua vaevaeina i ni lesona se lua. O le lesona lenei ua aofia ai fuaiupu 1–29, lea o loo tuuina mai ai faatonuga i le aoaoina atu o le talalelei ma faataatitia mai ai tulafono faalauaitele e faatatau i amio a tagata o le Ekalesia.

Mataupu Faavae ma Feagaiga 42:1-10

Ua valaau le Alii i toeaiina e aoao atu le talalelei ma atiina ae Lana Ekalesia

Lio upu o loo i lalo e te manatu e faatatau i tulafono ma poloaiga a le Atua:

Faatapulaa	Faamanuiaga	Faigata	Puleaina
Meaalofa	E faagataina	Taui	Saolotoga

Aisea tatou te vaai ai i tulafono ma poloaiga a le Atua i se auala le lelei i nisi o taimi? Aisea e taua ai le malamalama o Ana tulafono ma poloaiga taitasi o se meaalofa po o se faamanuiaga? E faapefea e le usiusitai i tulafono ma poloaiga a le Atua ona faasaoloto i tatou mai taunuuga o le agasala?

A o e suesue i le lesona o le aso, vaavaai po o a ni lagona o le Au Paia anamua e uiga i le mauaina o tulafono a le Atua, ma mafaufau loloto i ou lava uiga faaalia i le poloaiga.

Na poloaiina e le Alii le Au Paia i Niu Ioka e o atu i Ohaio ma folafola mai, o le a Ia tuuina mai ia i latou Lana tulafono pe a latou taunuu iina (tagai i le MF&F 38:32). E ala i osigataulaga tetele, sa latou tuua ai o latou fale ma meatotino ae usiusitai i le poloaiga e faapotopoto i Ohaio. O le toatele o le Au Paia i Niu Ioka sa usitai i le poloaiga e faapotopoto i Ohaio. Ina ua taunuu atu nisi o i latou i Katelani, sa feiloai ni toeaiina e toa 12 ma le Perofeta o Iosefa Samita ma valaau atu i le Alii. Faitau le Mataupu Faavae ma Feagaiga 42:1-3, ma vaavaai pe aisea na faapotopoto ai toeaiina o le Ekalesia.

Na faapotopoto nei toeaiina, e pei ona sa poloaiina ai, ina ia mafai ona tuuina mai e le Alii ia i latou Lana tulafono. O le faatonuga muamua a le Alii ia i latou o le, ia o atu o ni faifeautalai, taitoalua, e faasalalau atu le talalelei ma atiina ae le Ekalesia i itulagi uma lea sa valaauina i ai i latou seia faapotopotoina mai tagata uma ia tasi (tagai i le MF&F 42:4–10).

Mataupu Faavae ma Feagaiga 42:11-17

Ua faatulaga mai e le Alii mataupu faavae o le aoaoina atu o le talalelei

Vaai faalemafaufau e faapea, o loo e saofai i le falesa e faatalitali mo le amataina o le sauniga faamanatuga. E leai se tasi o le au epikopo po o le au peresitene o le paranesi ua i ai. Ua tula’i ae se tagata mai le faapotopotoga ma faamalamalama mai ua manao o ia e tuu mai ni nai valaauga ma aoao mai ni aoaoga faavae fou na faaalia mai ia te ia. O le a sau mea e fai i lenei tulaga? Aisea?

Faitau le Mataupu Faavae ma Feagaiga 42:11, ma faailoa mai mea e manaomia muamua ona faatoa mafai lea e se tasi ona talai atu le talalelei pe atiina ae le Ekalesia o se sui aloaia o le Ekalesia. O lenei faatonuga e uiga i le faauuga e le gata ina faatatau i faifeautalai ae faapea foi i soo se tasi e vaetofia e aoao atu ma taitai i le Ekalesia. Atonu e te manao e faailoga upu po o fuaitau i lenei fuaiupu o loo aoao mai ai le mataupu faavae lenei: O i latou o e aoao atu ma atinae le Ekalesia e ao ina valaauina e le Atua ma faauuina pe vaetofia e taitai ua faatagaina o le Ekalesia.

Mafaufau i le faiga o le faasilasilaina ma le lagolagoina faalauaitele o taitai ma tagata o le Ekalesia i o latou valaauga, ua faataunuu ai le poloaiga a le Alii e faapea o la latou pule “ua lauiloa i le ekalesia” (MF&F 42:11; tagai MF&F 28:13). E faapefea ona tuuina mai e lenei faiga le faatulagaga tatau i le Ekalesia ma tumau ai lo tatou saogalemu mai le faaseseina?

Faitau le Mataupu Faavae ma Feagaiga 42:12–13, ma faailoga tiutetauave ua tuuina mai i tagata o e aoao atu ma taitai i le Ekalesia.

Tali fesili nei i lau api talaaga mo le suesueina o tusitusiga paia:
1. E tusa ai ma le Mataupu Faavae ma Feagaiga 42:12, o a mea e tatau i faiaoga i le Ekalesia ona aoao atu?
2. E tusa ai ma le fuaiupu e 13, e faapefea ona o latou aoao atu?
Ia matau le fasifuaitau “vaai ia faia feagaiga ma mataupu faavae o le ekalesia” i le Mataupu Faavae ma Feagaiga 42:13. I lau api talaaga mo le suesueina o tusitusiga paia, tusi ai pe aisea e taua mo faiaoga ma taitai ona ola ai i mea latou te aoao atu. Ua faapefea ona faamanuiaina lou olaga po o le olaga o se tasi e te iloa, ina ua ola se faiaoga po se taitai i aoaoga ma mataupu faavae na ia aoaoina mai?

Faitau le Mataupu Faavae ma Feagaiga 42:14, ma faailoa mai mea e tatau ona faia e i latou o e aoao atu ina ia maua ai le taitaiga a le Agaga. Ona faauma lea o le mataupu faavae lenei: Afai tatou te , e mafai ona tatou maua le Agaga e fesoasoani ia i tatou i le aoaoina o isi. (Atonu e te manao e faailoga upu i lena fuaiupu o loo aoaoina mai le mataupu faavae po o le tusi o le mataupu faavae i le laina o au tusitusiga paia.)

O le isi mataupu faavae o loo aoao mai i le Mataupu Faavae ma Feagaiga 42:14 o le afai e le o ia i tatou le Agaga, o le a tatou le aoao atu.

Ina ia fesoasoani ia e malamalama i le pogai e taua ai le i ai o le Agaga a’o e aoao ma aoao atu le talalelei, faitau le Mataupu Faavae ma Feagaiga 42:16–17, ma faailoa mai le mea e iloa ma faia e le Agaga Paia. O le upu Faamafanafana o loo faaaogaina i nei fuaiupu, o se tasi o le suafa o le Agaga Paia. I avanoa ua saunia, faauma le aoaoga faavae lenei mai le fuaiupu e 17: E silafia e le Agaga Paia ma molimau mai e uiga i le .

E faavae i lenei upumoni, e mafai faapefea e le Agaga Paia ona fesoasoani ia te oe ao e aoao atu?

Ona e silafia e le Agaga Paia mea uma, ua Ia silafia mea na oo ia i tatou uma ma manaomia i o tatou olaga. O i latou o e e aoao atu, molimau atu, pe faamalamalama atu upumoni o le talalelei e ala i le musumusuga a le Agaga Paia, e mafai ona taialaina e fesoasoani i isi ia maua mea ua silafia e le Alii o loo latou manaomia.

I lau api talaaga mo le suesueina o tusitusiga paia, faamatala se taimi na e lagonaina ai uunaiga a le Agaga Paia a o e aoao atu, faasoa atu, faamalamalama atu, pe molimau atu e uiga i le talalelei. Tusi foi e uiga i se aafiaga na e lagona ai le molimau o le Agaga Paia ia te oe e uiga i le Tama Faalelagi ma Iesu Keriso. Afai e te le o mautinoa pe ua e oo i nei ituaiga o aafiaga, fai atu i se tagata o le aiga po o se uo e uiga i aafiaga i se taimi na ia lagonaina ai le uunaiga a le Agaga Paia ma tusi e uiga i le mea ua e aoaoina mai i le tala a lena tagata.

Mataupu Faavae ma Feagaiga 42:18-29

Ua tuuina mai e le Alii ia tulafono ma poloaiga mo tagata o le Ekalesia

Ina ua uma ona tuu mai e le Alii ia faatonuga e uiga i le aoao atu i le Ekalesia, sa Ia faaalia mai tulafono ma poloaiga e faatatau i tagata uma o le Ekalesia. Faitau le Mataupu Faavae ma Feagaiga 42:18–29, ma faailoa mai ai poloaiga na aoao mai i na fuaiupu. Atonu e te manao e faailoga mea ua e maua.

E ui lava ina fai mai le fuaiupu e 19 e faapea, “ae o ia e fasioti tagata o le a oti,” o le fuaiupu e 79 ua fesoasoani tatou te malamalama ai o tagata fasioti tagata e tatau ona momoli atu i taitai faalemalo “ma faia ia te i latou e tusa ai ma tulafono o le laueleele.”

I le Mataupu Faavae ma Feagaiga 42:20–28, o le “tuli i fafo” o lona uiga ia tapeese le igoa, po o le le toe avea ma se tagata auai i le Ekalesia. E ui ina aoao mai e nei fuaiupu o le tapeina o le igoa e mo i latou o e o le a le salamo, ae o taunuuga o le tapeina o le igoa mo ni agasala matuia, e mafai ona avea ma se vaega o le faagasologa o le salamo mo nisi o tagata lotomaualalo ma agaga salamo, o e o loo sailia le faamagaloga o a latou agasala. O le aoaiga i le Ekalesia e puipuia ai le Ekalesia, ma fesoasoani ia i latou o e agasala ia salamo ma maua ai faamanuiaga o le Togiola a le Faaola.

Ina ia faateleina lou malamalama i nisi o mataupu faavae na aoao mai i le Mataupu Faavae ma Feagaiga 42:18–29, tali fesili nei i lau api talaaga mo le suesueina o tusitusiga paia:
1. Aisea e te manatu ua faaosoosoina ai tagata i aso nei e gaoi? O le a sou manatu i se mea e mafai ona fesoasoani ai i se tagata e masani ona faaosoosoina e gaoi?
2. O se tasi o ituaiga o pepelo o le faaimamago. Aisea e te manatu ai o le pepelo ma le faaimamago o ni agasala matuia?
3. Mafaufau i ni aafiaga na e oo i ai, aisea e sese ma leaga ai le faia o ni faamatalaga leaga e uiga i isi tagata?

Toe faamanatu le Mataupu Faavae ma Feagaiga 42:22-23, ma faailoga upu o loo aoao mai ai lenei mataupu faavae: Afai tatou te manao i se isi tagata, ua tatou faafitia le faatuatua, ma lē maua ai le Agaga.

O le tuinanau e le o le alofa lea. O i latou o e tuinanau i isi o loo popole ma manatu faapito i le faamalieina o i latou lava. Latou te vaai atu i isi ua na o ni mea e faaaoga ma leai se loto pulea. O le tuinanau e faaseseina ma suia ai le auala e te vaai atu ai i isi. E mafua ai ona e le maua le taitaiga a le Agaga ma e mafai ona faaleagaina ai lou gafatia e maua ai se sootaga masani ma isi, aemaise lava o lou toalua i le lumanai. Na te faatapulaaina lou gafatia e lagonaina ai le alofa moni. O le tuinanau e faaalia ai le leai o sou faatuatua i le Atua ma tetee ai i le ala ua Ia finagalo tatou te vaai atu ai i isi.

O se tasi o meafaigaluega o le tuinanau ua taatele i o tatou aso o ponokalafi. Ua lapatai mai Elder Dallin H. Oaks o le Korama a Aposetolo e Toasefululua:

“O ponokalafi e faaleagaina ai le malosi o se tasi e fiafia ai i se mafutaga masani faalelagona, alofa, ma le faaleagaga ma se tagata o le isi itupa. …

“O ponokarafi e avea foi ma mausa. E faaleagaina ai le mafaia ona fai ia faaiuga ma e ‘noatia’ ai i latou e faaaogaina, e faaosofia ai i latou ina ia saili pea mo nisi mea se tele. …

“Ia e faia mea uma e te mafaia e aloese ai mai ponokarafi. Afai e te iloa ua e aafia ai—lea e mafai ona oo i soo se tasi i le lalolagi o loo tatou nonofo ai—mulimuli i le faataitaiga a Iosefa o Aikupito. Ina ua tago atu le faaosoosoga i lona ofu, sa ia tuua le faaosoosoga ‘ma ua sola i fafo’ (Kenese 39:12).

“Aua lava nei faatagaina soo se tulaga o le faaosoosoga. Ia teena le agasala ma aloese i le taulimaina o ona faatafunaga ua iloaina. O lea, ia tape loa! Pupula ese! Aloese mai ai tusa lava pe o le a le tau. Ia taula’i atu ou mafaufauga i ala e lelei. …

“… Aua e te lagolagoina ia ponokarafi. Aua e te faaaogaina le mana e faatau ai, e lagolago ai le toilalo o uiga mama. Tamaitai talavou, faamolemole ia malamalama afai e le talafeagai lelei ou laei, o loo e faalauteleina lenei faafitauli e ala lea i le avea ma se vaaiga faatosina i nisi o alii e vaai atu ia te oe” (“O Ponokarafi [tusi ma ata mataga],” Ensign po o le Liahona, Me 2005, 89–90).

I lau api talaaga mo le suesueina o tusitusiga paia, tusi se parakalafa e faamatala ai mea e mafai ona e faia e faamalosia ai oe lava e tetee atu i faaosoosoga o le tuinanau. Ia aofia i lau parakalafa mafuaaga e te manatu e taua ai lenei poloaiga. (Atonu e te manao e suesue le autu “Chastity” i le Faamaoni i le Faatuatua: O Se Tusitaiala o le Talalelei [2004] mo ni manatu faaopoopo.)

Ina ia faaiuina lenei lesona, faitau le Mataupu Faavae ma Feagaiga 42:29 ma faailoa mai le mataupu faavae o loo aoao mai i lenei fuaiupu.

I lau api talaaga mo le suesueina o tusitusiga paia, tusi ai pe aisea e te manatu ai o le tausia o tulafono ma poloaiga a le Atua, e faaalia ai lou alofa ia te Ia. Na faapefea ona e latalata atili i le Atua ona o le tausiga o poloaiga?

I le vaiaso a sau, ia faaali atu le alofa faateleina i le Atua e ala i le taumafai ia sili atu ona usiusitai i se tasi o Ana tulafono po o poloaiga.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mataupu Faavae ma Feagaiga 42:1–29 ma faamaeaina lenei lesona i le (aso).

O fesili, mafaufauga, ma manatu faaopoopo ou te fia faasoa atu i lou faiaoga: