Iunite 25: Aso 4
Mataupu Faavae ma Feagaiga 117–20
Faatomuaga
I le aso 8 o Iulai, 1838, i Sisifo Mamao, Misuri, na maua ai e le Perofeta o Iosefa Samita ni faaaliga se fa ua faamaumauina nei i le Mataupu Faavae ma Feagaiga 117–20. O le faaaliga muamua o nei faaaliga (MF&F 117), na poloaiina ai e le Alii ia Viliamu Mareko ma Newel K. Whitney e faamaea a la pisinisi i Katelani, Ohaio, ma auai atu i le Au Paia faamaoni o e sa faapotopoto i Sisifo Mamao. Na poloaiina foi e le Alii ia Oliver Granger e alu i Katelani o se sui o le Au Peresitene Sili. I le faaaliga lona lua (MF&F 118), na valaauina ai e le Alii ni Aposetolo fou e faatumu ai avanoa o i latou o e na pauu ese, ma na Ia valaauina sui uma o le Korama a le Toasefululua e auauna atu i ni misiona i Peretania Tele. I faaaliga lona tolu ma le fa, ua faamaumauina i le Mataupu Faavae ma Feagaiga 119 ma le 120, na aoao mai ai e le Alii le aoaoga faavae o le sefuluai ma faaali mai ai taiala mo taitai o le Ekalesia e iloa ai le auala e faaaogaina ai tupe o le sefuluai.
Mataupu Faavae ma Feagaiga 117:1–11
Ua poloaiina e le Alii ia Viliamu Mareko ma Newel K. Whitney e faamaea vave a laua pisinisi ma o ese atu ma Katelani
I le vaega muamua o le Mataupu Faavae ma Feagaiga 117, na fetalai mai ai le Alii ia Viliamu Mareko ma Newel K. Whitney. O Viliamu Mareko sa avea ma peresitene o le siteki i Katelani, Ohaio. Sa ia anaina se pisinisi e faatau atu ai tusi. O Newel K. Whitney sa avea ma epikopo i Katelani. Sa avea o ia ma se faipisinisi faamanuiaina, ma sa ia tuuina atu le tele o lona fanua i le Ekalesia.
I le aso 26 o Aperila, 1838, na poloaiina ai e le Alii le Au Paia e faapotopoto i Sisifo Mamao, Misuri, ma isi nofoaga (tagai i le MF&F 115:17–18). I le aso 6 o Iulai, 1838, na tuua ai e se vaega na ta’ua o le Tolauapiga a Katelani, lea na aofia ai le silia ma le 500 o le Au Paia mai le eria i Katelani, mo Misuri (tagai i le Church History in the Fulness of Times Student Manual, 2nd ed. [Church Educational System manual, 2003], 179). Sa nonofo ai lava ia Peresitene Mareko ma Epikopo Whitney i Katelani.
I le Mataupu Faavae ma Feagaiga 117:1–3, ua tatou faitau ai, na poloaiina e le Alii ia Peresitene Marks ma Epikopo Whitney e faamaea vave fuafuaga o a laua pisinisi ma o ese mai Katelani. Sa tatau ona laua faia lenei malaga a’o le’i auina mai e le Alii le kiona i le eria. I se isi faaupuga, sa tatau ona laua o ese atu i totonu o le tusa ma le fa masina.
A o e faitau i afioga a le Alii i le Mataupu Faavae ma Feagaiga 117:4–5, o le a e iloa ai, o nei alii sa sili atu le popole i meatotino i Katelani.
Ia matau le fesili lenei o loo i le fuaiupu e 4: “O a ea meatotino ia te au?” Faitau le Mataupu Faavae ma Feagaiga 117:5–8, ma vaavaai mo ni mafuaaga o le a fetalai mai ai e le Alii lenei fetalaiga. (Atonu o le a fesoasoani le iloaina o le fuaitau “fanua laugatasi o Olaha Saianea” e faasino i le eria faataamilo i Atamu-onai-Amani i Misuri.)
Mafaufau faapea o loo i ai sau sioti lapoa o le vaiinu e sili ona e fiafia i ai, o loo taatia i ou luma faapea ma se ipu inu tele e leai se mea o i ai. Ia vaai faalemafaufau la faapea, ua liligi e se tagata se matāua laitiiti o le vaiinu i totonu o lau ipu inu. O le fea o mea e te manao i ai, o le ipu inu tumu pe na o se matāua? Aisea?
O le a sou manatu i le uiga o le “mananao … [i] se matāua, ma faatalalē ai i mataupu sili atu ona mamafa”? (MF&F 117:8). O le manao o le manaonao lea i se mea o loo i ai i se isi tagata. E faapefea ona faapei le aoga o le faasaoina o meatotino i Katelani e na o se “mataua” e faatusatusa atu i le aoga o le usiusitai i poloaiga a le Alii e faapotopoto i Misuri?
-
I lau api talaaga mo le suesueina o tusitusiga paia, fai se aotelega o mea na aoao mai e le Alii i nei alii e uiga i le fanua sa laua manaonao i ai, e faatusatusa atu i Lona mana e faamanuia ai i laua.
Mai le Mataupu Faavae ma Feagaiga 117:5–8, e mafai ona tatou faailoa mai ai se mataupu faavae e uiga i le mea e tupu pe a tatou mananao i mea faaletino. I se tasi o auala e faailoa mai ai lenei mataupu faavae o le, manaonao i mea faaletino e mafua ai ona tatou faatuatuanai i mea e sili atu le taua.
-
-
O a nisi o “matāua” faaletino o lou olaga atonu o loo mafua ai ona e faatuatuanai i mea e sili atu le taua o le talalelei?
-
O le a se mea e mafai ona e faia e faateleina ai lou taulai atu i mea e faavavau le taua?
-
I le Mataupu Faavae ma Feagaiga 117:10, tatou te faitau ai, na valaauina e le Alii ia Viliamu Mareko ia faaauau pea ona auauna atu o se taitai o le Ekalesia pe a taunuu atu i Sisifo Mamao, Misuri. Sa fetalai mai foi le Alii, afai o le a “faamaoni [Peresitene Mareko] i mea iti,” o le a avea o ia “ma pule i mea e tele” (tagai foi i le Mataio 25:23).
Faitau le Mataupu Faavae ma Feagaiga 117:11, ma vaavaai mo le aoaiga na tuuina mai e le Alii ia Newel K. Whitney. O le au Nikalaitai, o loo ta‘ua i lenei fuaiupu, sa o ni tagata o se vaega faalelotu anamua. Sa latou fai mai o i latou o Kerisiano ae sa latou o ese mai i mataupu faavae o le talalelei e agai atu i faiga faalelalolagi. Mo se faataitaiga, o a latou tapuaiga na aofia ai le faia o agasala o feusuaiga. (Tagai i le Bible Dictionary, Nicolaitans”; Doctrine and Covenants Student Manual, 2nd ed. [Church Educational System manual, 2001], 290.)
Afai na filifili Newel K. Whitney e taulai atu i fanua i Katelani nai lo le faapotopoto faatasi ma le Au Paia, mata e faapefea ona faapei ana faatinoga o faatinoga a le au Nikalaitai?
Ona o lo laua popole e uiga i fanua a le Ekalesia i Ohaio ma ona o sauaga i Misuri, sa le mafai ai ona faapotopoto faatasi atu Viliamu Mareko ma Newel K. Whitney ma le Au Paia i Sisifo Mamao. Ae ui i lea, sa laua mulimuli i le fautuaga a le Alii ma tumau i le faamaoni, ma sa laua faatasi mulimuli atu i le Au Paia i Navu, Ilinoi, lea sa auauna atu ai Viliamu Mareko o le peresitene o siteki ma Newel K. Whitney e avea ma se epikopo.
Mataupu Faavae ma Feagaiga 117:12-16
Na tofia e le Alii ia Oliver Granger e fai ma sui o le Au Peresitene Sili i taualumaga faapisinisi i Katelani
Mafaufau e uiga i valaauga o le Ekalesia ma tofiga e ono mafai ona e maua. O nei valaauga ma tofiga atonu e aofia ai le auauna atu i le au peresitene o se korama po o se vasega, tuu atu o se lauga i le sauniga faamanatuga, auauna atu o se faiaoga o aiga, faaaumeaina o se tasi, po o le auauna atu o se faifeautalai faamisiona. O a ituaiga o osigataulaga e ono manaomia i nei valaauga?
O alii talavou o e o loo umia le Perisitua Arona e mafai ona auauna atu o ni faiaoga o aiga.
Na poloaiina e le Alii se tagata e igoa ia Oliver Granger e alu ese mai Sisifo Mamao, Misuri, ma toe foi atu i Katelani, Ohaio, ina ia “finafinau faamaoni mo le laveaiina o le Au Peresitene Sili o laʼu Ekalesia” (MF&F 117:13). O lenei tofiga na aofia ai le faatauina atu o fanua o le Ekalesia ma le faamaeaina o mataupu faapisinisi a Iosefa Samita. O lenei mea o le a manaomia ai Oliver, o le sa toetoe lava a tauaso, e faia ni osigataulaga. Faitau le Mataupu Faavae ma Feagaiga 117:12–15, ma vaavaai mo faamanuiaga na fetalai mai le Alii o le a maua e Oliver a’o ia faataunuuina lenei tofiga.
I le fuaiupu e 13, ia matau le fetalaiga a le Alii e faapea, “o le a sili atu le paia o lana taulaga ia te aʼu nai lo ona faatelega.” E faailoa mai i lenei mea, na sili atu le manatulia e le Alii o le osigataulaga a Oliver nai lo se tupe e ono maua mai e Oliver o se vaega o lona tofiga. Ua tatou aoao mai i lenei fuaiupu le mataupu faavae lenei: O osigataulaga tatou te faia i le galuega a le Alii e paia ia te Ia. Faailoga upu i le fuaiupu e 13 o loo aoao mai ai lenei mataupu faavae.
-
-
Aisea e taua ai le faia o mea uma e te mafaia e faataunuu ai se tofiga po o se valaauga o le Ekalesia?
-
O a ni ou lagona pe a e mafaufau e faapea o osigataulaga e te faia i le galuega a le Alii e paia ia te Ia?
-
Na maliu Oliver Granger i Katelani i le aso 25 o Aokuso, 1841. I le taimi lena, sa galue ai lava o ia e fai ma sui o le Au Peresitene Sili i a latou mataupu faapisinisi, ma sa valaauina foi o ia e pulefaamalumalu i le Ekalesia i Katelani. E ui ina sa le‘i faamanuiaina atoatoa o ia i le faamaeaina o mataupu faapisinisi a le Ekalesia, ae sa galue o ia e faasao le amio sa’o ma le igoa tauleleia o le Ekalesia. Sa faamaoni o ia i le Alii ma le Perofeta o Iosefa Samita.
I se tusi o molimau, sa faamatalaina ai e Iosefa Samita ma isi sui o le Au Peresitene Sili ia Oliver Granger o “se tagata sa sili ona amio sa’o a’ia’i ma amio mama; ma i se aotelega, … o se tagata o le Atua” (i le History of the Church, 3:350). Na saunoa mai Peresitene Boyd K. Packer o le Korama a Aposetolo e Toasefululua:
“O le a se mea na faia e Oliver Granger e tatau ai ona manatuaina lona igoa ma le paia? O le mea moni, e tau leai se mea. E le faapea ona o mea sa ia faia, ae o le ituaiga tagata sa i ai o ia. …
“Sa lei faamoemoe le Alii e atoatoa ia Oliver pe faamanuiaina foi. …
“E le mafai ona tatou mafaufau tatou te manuia i taimi uma, ae e tatau ona faia le mea sili tatou te mafaia” (“O E Aupito Itiiti o O’u Uso Nei,” Ensign po o le Liahona, Nov. 2004, 86).
Mataupu Faavae ma Feagaiga 118
Ua tofia e le Alii ni Aposetolo fou ma valaauina Aposetolo uma e auauna atu i se misiona
I le aso 8 o Iulai, 1838, na valaauina ai e le Alii ni Aposetolo fou e sui ai i latou o e na liliuese. Na valaauina foi e le Alii le au Aposetolo e Toasefululua e talai atu le talalelei.
Faitau le Mataupu Faavae ma Feagaiga 118:4–5, ma vaavaai po o fea na faatonuina e le Alii le Toasefululua e talai atu i ai le talalelei. O le fuaitau “i luga o le vai tetele” e faatatau i le malaga atu i le Vasa Atelani i Peretania Tele. I le Mataupu Faavae ma Feagaiga 118:5, matau le nofoaga na tatau ona latou faapotopoto ai a’o lei malaga atu ia latou misiona. Ia matau foi le aso na fetalai mai le Alii e tatau ona latou faapotopoto ai i lena nofoaga.
I masina na sosoo mai ai i lenei faaaliga, na faateleina ai sauaga i Misuri. Na iu lava ina tutuliese mai le Au Paia mai i lena setete. O nei tulaga sa lamatia ai le faataunuuina e le Toasefululua o le poloaiga a le Alii e faapotopoto i Sisifo Mamao. E toatele tagata Misuri sa gugutu faaaliali e faapea, o le a latou taofia le faataunuuga o lenei faaaliga. Ae sa naunau lava le Toasefululua e usitai i le poloaiga a le Alii.
I le taeao o le aso 26 o Aperila, 1839, na faapotopoto ai sui o le Korama a Aposetolo e Toasefululua i le tulaga o le malumalu. (Sa le mafai ona i ai uma iina tagata faamaoni o le korama. O nisi sa faafalepuipuiina.) Sa latou toe amatalia le faataatiaina o le faavae o le malumalu (tagai i le MF&F 115:11) e ala i le tuuina o se maa tele e lata tulimanu i sautesasae o le fasifanua. Sa latou faauuina ni Aposetolo fou e faatutumu ai avanoa i le Korama a le Toasefululua. Ona latou o lea, e aunoa ma le iloaina e o latou fili. (Mo se tala atoa o lenei aafiaga, tagai i le Aoaoga a Peresitene o le Ekalesia: Wilford Woodruff [2004], 144–47
Sa faataatia maatulimanu mo se malumalu i Sisifo Mamao, Misuri, ia Iulai, 1838.
Mataupu Faavae ma Feagaiga 119–20
Ua faaali mai e le Alii le tulafono o le sefuluai
O leMataupu Faavae ma Feagaiga 119 ma le 120 o loo i ai ni faaaliga se lua e uiga i le tulafono o le sefuluai. I le faaaliga ua faamaumauina i le Mataupu Faavae ma Feagaiga 120, na faatonuina ai e le Alii, e tatau ona faatulagaina se aufono e taitaia le faaaogaina o tupe o le sefuluai a le Ekalesia. I aso nei, o uarota po o paranesi taitasi e auina atu tupe o sefuluai a le au paia i le laumua o le Ekalesia ma lenei aufono, ua ta’ua o le Aufono e Faasoasoaina Sefuluai. E le fuafuaina e taitai i le lotoifale le auala e faaaogaina ai tupe o sefuluai.
Faitau le Mataupu Faavae ma Feagaiga 119:1–4. Atonu e aoga le iloa i le fuaiupu e 4, o le upu mea faaopoopo o lona uiga o le totogi po o le tupe maua.
Na faamalamalama mai e Peresitene Howard W. Hunter: “O loo fai mai le tulafono, o le ‘tasi vaesefulu o a latou mea faaopoopo uma.’ O mea faaopoopo o lona uiga o polofiti, taui, ma siitaga. O le totogi o se tagata e faigaluega, o le polofiti mai le faagaoioia o se pisinisi, o le faaopoopoga a se tagata e totoina pe gaosia, po o le tupe maua a se tagata mai soo se punavai lava. Ua fetalai mai le Alii o se tulafono tumau ‘faavavau’ e pei ona sa i ai i taimi ua mavae” (i le Conference Report, Ape. 1964, 35).
A o e faitau i saunoaga nei a Peresitene o le Ekalesia, vaavaai mo faamanuiaga e mafai ona e maua pe a e totogiina le sefuluai:
Sa faatatau atu Peresitene Harold B. Lee i le folafolaga a le Alii e “tatala … pupuni o le lagi” e faamanuia ai le au totogi sefuluai (tagai i le Malaki 3:8-11): “O le tatalaina o pupuni o le lagi, o lona uiga o faaaliga mai le Atua ia te ia o le o loo faapea ona naunau e ositaulaga” (“The Way to Eternal Life,” Ensign, Nov. 1971, 16).
Sa saunoa Peresitene Heber J. Grant e uiga i faamanuiaga faaleagaga e oo mai ia i tatou pe a tatou totogiina le sefuluai: “O le manuia e o’o mai ia i latou o e tausia le tulafono o le sefuluai. “Pe a ou ta’ua le uluola ou te le o mafaufau i ai i se tulaga tau tupe ma sene lava ia. … Ae o le mea ua ou faitaulia o le uluola moni, e avea ma le mea e tasi o isi mea uma lava lea e tele sona taua i alii ma tamaitai soifua uma, o le tuputupu ae lea i se iloa o le Atua, ma i se molimau, ma i le mana e ola ai i le talalelei ma ia musuia ai o tatou aiga ia faia lea lava mea e tasi. O ituaiga manuia moni lea” (Aoaoga a Peresitene o le Ekalesia: Heber J. Grant [2002], 131, 32).
Aoao mai foi Peresitene Grant i se tasi o auala e mafai ona faamanuiaina ai i tatou i mea tautupe pe a tatou totogiina le sefuluai: “Afai tatou te tuuina atu le vaegamea e tusa ma mea ua tatou maua, afai tatou te totogiina a tatou sefuluai, e tusa po o lea lava le itiiti o le tupe maua, … o le a faateleina e le Atua lo tatou Tama Faalelagi le iva tala mai le sefulu, po o le fasefululima sene o lo o totoe mai limafesulu sene taitasi, ma o le a lava foi ma totoe le poto e te maua e faaaogaina ai i le auala sili ina ia leai se tupe e leiloa ona o lou faamaoni” (Aoaoga: Heber J. Grant, 132).
-
-
Ua ou suesueina le Mataupu Faavae ma Feagaiga 117–20 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: