Iunite 13: Aso 4
Mataupu Faavae ma Feagaiga 59
Faatomuaga
I le aso 7 o Aokuso, 1831, na maua ai e le Perofeta o Iosefa Samita le faaaliga o loo i le Mataupu Faavae ma Feagaiga 59 aʼo i ai i le Itumalo o Jackson, Misuri. I le faaaliga lenei ua faatulagaina ai e le Alii Ona faamoemoega mo le Au Paia o ē na faatoa taunuu atu i Siona, e aofia ai le faamamaluina lelei o le aso Sapati. Na faamautuina mai ai foi e le Alii e faapea, o i latou o e tausia Ana poloaiga o le a maua faamanuiaga faaletino ma faaleagaga.
Mataupu Faavae ma Feagaiga 59:1–4
Ua faamatala mai e le Alii faamanuiaga o le a Ia tuuina mai i luga o le Au Paia faamaoni i Siona
O Polly Knight, o le tina o Newel Knight, na malaga faatasi ma se vaega o le Au Paia i se malaga e toeitiiti 900 maila mai Katelani, Ohaio, i le Itumalo o Jackson, Misuri. Sa faapea ona ma’i tigaina ai i le ala e agai atu i Misuri ia Tuafafine Knight, ae sa le ioe e taofi o ia mai le malaga, ma faailoa atu o lona naunautai lava ina ia taunuu i le laueleele o Siona ma ia lagomau ai iina. Na tusia e lana tama tama o Newel e faapea, i se tasi taimi i la latou malaga sa ia “faatauina mai ai ni laupapa e fai ai se pusamaliu ina ne’i maliu o ia [Tuafafine Knight] ae matou te le’i oo i le nofoaga matou te taunuu i ai—ona sa vave tele ona vaivai o ia. Ae sa tuuina mai ia te ia e le Alii le manaoga o lona loto, ma sa ola o ia e tuvae i lena laueleele” (Scraps of Biography: Tenth Book of the Faith-Promoting Series [1883], 70; tagai foi i le History of the Church, 1:199). Na maliu Tuafafine Knight i totonu o le lua vaiaso talu ona taunuu i le Itumalo o Jackson, Misuri (Siona).
-
I le aso na maliu ai Polly Knight, na maua ai e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 59. Mafaufau e faapea na talosagaina oe e tuuina atu se tautalaga i le falelauasiga o Tuafafine Knight. Faitau le Mataupu Faavae ma Feagaiga 59:1–2, ma sue ni fuaitau e mafai ona e faasoa atu i lau lauga e ono aoga i ana uo ma e pele ia te ia. I lau api talaaga mo le suesueina o tusitusiga paia, tusi ai ia le itiiti ma se lua o ni na fuaitau ma faamalamalama pe faapefea ona faatatau ia Polly Knight.
Ia matau o le fuaiupu 1 na faaupu mai e le Alii le faaaliga i le Au Paia o e, e pei o Polly Knight, na usiusitai i Ana poloaiga e o mai i le laueleele o Siona ma le manatu tasi i Lona mamalu. Atonu e te manao e faailoga le fuaitau lenei i au tusitusiga paia. Ina ia fesoasoani ia e malamalama atili i le uiga o le ia manatu tasi i le mamalu o le Atua, faataitai le gaoioiga lenei:
Faaofuofu lou lima i se moto matagataga (tau lava ina ia fesilia’i lou limatua ma tamailima). Moeiini mata tasi, ma vaai i le ata o le Faaola o loo i le itulau lenei e ala i le tamai ava na faia e lou lima. Ona pupula lea o le isi ou mata ma tilotilo atu i le ata i ou mata e lua. Ia matau mea uma lava o loo mafai ona au atu i ai lau vaai pe a e faaaogaina mata e lua. O le a le eseesega pe a e vaai atu i le ata i le mata e tasi?
I le faaaogaina o le mea ua e aoaoina i le gaoioiga e fai ma tala faatusa, o le a sou manatu i le uiga o le manatu tasi i le mamalu o le Atua?
Faitau le Mataupu Faavae ma Feagaiga 59:3–4, ma vaavaai mo faamanuiaga folafolaina faaletino (faalelalolagi) ma faaleagaga ia i latou o e usitai i le Alii ma le manatu tasi i Lona mamalu. Ia matau i le fuaiupu e 4 ua folafola mai le Alii e faamanuia i lana Au Paia faamaoni i “poloaiga e lē itiiti.” Aisea e te manatu o le a folafola mai ai e le Alii lenei faamanuiaga ae ua manatu nisi o tagata o poloaiga e le o se faamanuiaga? Mafaufau loloto pe o faapefea ona faamanuiaina lou olaga i le mulimuli i poloaiga.
-
I le laina o au tusitusiga paia, atonu e te manao e tusi ai le mataupu faavae lenei: Afai tatou te tausia poloaiga ma le manatu tasi i le mamalu o le Atua, o le a faapea ona faamanuiaina i tatou i le faaletino ma le faaleagaga. Vaavaai mo nisi o faataitaiga o lenei mataupu faavae a o faaauau ona e suesue i le Mataupu Faavae ma Feagaiga 59.
Mataupu Faavae ma Feagaiga 59:5-8
Ua tuuina mai e le Alii poloaiga i le Au Paia
Sa faaauau pea e le Alii lenei faaaliga e ala i le tuuina mai i le Au Paia i Siona o nisi o poloaiga. Faitau le Mataupu Faavae ma Feagaiga 59:5, ma faailoga le uluai poloaiga na tuuina mai e le Alii: E tatau ona tatou alolofa i le Atua ma o tatou loto, manatu, mafaufau, ma malosi atoa.
-
-
O le a sou manatu i le uiga o le alofa i le Alii ma o tatou loto, manatu, mafaufau, ma malosi atoa?
-
O a nisi o amioga po o uiga e mafai ona e vaaia i tagata o e alolofa i le Alii ma o latou loto, manatu, mafaufau, ma malosi atoa?
-
Mafaufau pe mafai faapefea e lenei poloaiga ia alofa i le Atua ma o tatou loto, manatu, mafaufau ma malosi atoa, ona aafia ai le ala tatou te tali atu ai i poloaiga uma a le Atua. Faasoa atu i se tagata o le aiga po o se uo, e uiga i se taimi na uunaia ai e lou alofa i le Alii se faaiuga na e faia. Atonu e te manao e fesili atu i le tagata e te talanoa i ai, pe faapefea ona uunaia e le alofa atu i le Alii le ala e tali atu ai i Ana poloaiga.
O leMataupu Faavae ma Feagaiga 59:6–8 o loo aofia ai ni poloaiga faaopoopo na tuuina mai e le Alii i le Au Paia i le taimi lenei. A o e faitauina nei fuaiupu, mafaufau loloto pe mafai faapefea e le tausia o nei poloaiga ona mafai ona tatou faaali atu lo tatou alolofa i le Alii.
I le Mataupu Faavae ma Feagaiga 59:6, na ta’ua ai e le Alii le fasioti tagata ma fetalai mai e le tatau ona tatou “faia soo se mea faapena.” E faapefea ona avea le faapau pepe “e pei o le” fasioti tagata? (Tagai i le Faamaoni i le Faatuatua: O Se Tusitaiala o le Talalelei [2004], 60.)
Mataupu Faavae ma Feagaiga 59:9-19
Ua aoao mai le Alii i le Au Paia e uiga i le aso Sapati
Na tuuina mai e le Alii se poloaiga e mafai ona fesoasoani i le Au Paia e faamuamua le Atua i o latou olaga ma faaloloto ai o latou sootaga ma Ia. Faitau le Mataupu Faavae ma Feagaiga 59:9–10, ma faailoa mai le poloaiga na faamamafaina mai e le Alii i nei fuaiupu.
I le fuaiupu e 9, ua folafola mai ai e le Alii se faamanuiaga tele ia i latou o e tausia le aso Sapati ia paia. Toe faamanatu le fuaiupu e 9, ma faailoa mai le folafolaga na tuuina mai e le Alii. Atonu e aoga le iloa o le “lē pisia mai le lalolagi” e faatatau i le mama mai agasala o le lalolagi. O le faaaogaina o mea o loo aoao mai i lenei fuaiupu, faauma le mataupu faavae lenei i au lava upu: Afai tatou te , o le a fesoasoani ia i tatou e .
E faatatau i lenei poloaiga o le tausia o le aso Sapati ia paia, na saunoa ai Elder Mark E. Peterson o le Korama a Aposetolo e Toasefululua: “O lo tatou tausia po o le le tausia o le Sapati o se fuafaatatau mautinoa lea o o tatou uiga faaalia i le Alii lava ia ma e faatatau i ona mafatiaga i Ketesemane, lona maliu i luga o le satauro, ma lona toetu mai le oti. O se faailoga e iloa ai pe o i tatou o ni Kerisiano i amioga uma, pe o lo tatou liua e matuai papau lava, ma le faamanatuina o lana taulaga togiola e matuai laitiiti lava pe leai foi se taua ia i tatou” (“The Sabbath Day,” Ensign, Me 1975, 49).
E faapefea ona e faaali atu i le Alii lou alofa ia te Ia i le aso Sapati?
-
O leMataupu Faavae ma Feagaiga 59:9–15 e fesoasoani tatou te malamalama ai i le faamoemoega o le Sapati ma mea e mafai ona tatou faia e tausia ai ia paia. Faitau ma le totoa fuaiupu e 9–15, ma vaavaai mo manatu i auala e mafai ona tatou tausia ai le paia o le aso Sapati. Mo se faataitaiga, i le fuaiupu e 9 atonu e te faailoa mai faapea o le “alu atu i le fale tatalo” (alu i le lotu) o se vaega taua o le tausia o le Sapati ia paia. Vaai po o a isi manatu e mafai ona e maua a’o e suesue i nei fuaiupu. (Atonu e aoga le iloa o le fuaitau “avatu ai au tapuaiga” i le fuaiupu e 10 o lona uiga o le tapuai po o le faaalia o lo tatou alofa ma le faamaoni. O le vaefaamatalaga 12e o loo faamalamalama mai ai foi o le upu taulaga e faatatau i le ositaulaga o “taimi, taleni, po o mea ua maua, i le galuega a le Atua ma uso a tagata”; o le upu o mea ua maua e masani lava e faatatau i tupe po o punaoa e foai atu i le Ekalesia.)
-
I le Mataupu Faavae ma Feagaiga 59:15–19, o loo folafola mai ai e le Alii ni faamanuiaga ia i latou o e e faamamaluina Lona aso paia.
-
Mataupu Faavae ma Feagaiga 59:20-24
Ua fofoga mai e le Alii ni faamanuiaga faaletino ma faavavau i luga o e faamaoni
O a nisi o auala ua faamanuiaina ai e le Atua oe talu ai nei? O le fea o ou faamanuiaga e aupito sili ona e faafetai ai? Faitau le Mataupu Faavae ma Feagaiga 59:20–21, ma faailoa mai po o a ni lagona o le Atua i le faamanuiaina o i tatou ma pe faapefea ona tatou tali atu i ai. O le a le uiga ia te oe o le iloa, e fiafia le Atua pe a Ia faamanuiaina oe?
Ua aoao mai leMataupu Faavae ma Feagaiga 59:21 e faapea, tatou te faatiga i le Atua pe a tatou le faaali atu lo tatou agaga faafetai ia te Ia ma tausi Ana poloaiga. O le tiga ma le toasa o le Atua o loo faamatalaina i lenei fuaiupu o le faamaoniga lea o Lona alofa mo i tatou. E le fiafia o Ia pe a tatou le loto faafetai pe le usiusitai, aua o nei uiga tatou te taumamao ai ma Ia.
Mafaufau loloto i ni auala e mafai ona faaleagaina ai la tatou sootaga ma le Atua, pe a tatou le faafetai atu ia te Ia mo o tatou faamanuiaga.
Sa faaiuina e le Alii lenei faaaliga e ala i le toe faailoa mai o Lona finagalo e faamanuia i tatou i lenei olaga ma i le olaga a sau. Faitau le Mataupu Faavae ma Feagaiga 59:23-24, ma faailoa mai pe o le a faapefea ona faamanuia e le Alii i latou o e tausia Ana poloaiga.
I le taimi o totoe o le aso lenei po o taeao, mafaufau loloto i le tele o auala ua faamanuiaina ai e le Atua oe ona o le tausia o Ana poloaiga. Vaavaai mo avanoa e faaali ai lou alofa ma le agaga faafetai ia te Ia.
-
Ua ou suesueina le Mataupu Faavae ma Feagaiga 59 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: