Iunite 18: Aso 1

Mataupu Faavae ma Feagaiga 84:1–42

Faatomuaga

Ia Setema 1832, sa toe foi atu ai faifeautalai i Katelani, Ohaio, ina ua uma ona talai atu le talalelei i le itu i sasae o le Iunaite Setete. I le taimi o le latou feiloaiga fiafia, na maua ai e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 84. E lua aso na ia mauaina ai le faaaliga: o le aso 22 ma le 23 o Setema. (O loo i ai ni faamaoniga o le talafaasolopito e faapea o le fuaiupu 1–41 na maua i le aso 22 o Setema ae o fuaiupu e 42–120 na maua i le aso 23 o Setema.) O lau suesuega o le Mataupu Faavae ma Feagaiga 84 ua vaevaeina i ni lesona se lua. O le lesona muamua lenei ua taulai atu i faatonuga a le Alii e uiga i le perisitua ma le auala e mafai e le perisitua ona saunia ai i tatou e maua mea uma o loo i ai i le Tama Faalelagi.

Mataupu Faavae ma Feagaiga 84:1-30

Ua tautino mai e le Alii, o le a fausia se malumalu ma faamalamalama mai faamoemoega o le perisitua

Mafaufau i se malumalu ua e asiasi i ai pe e te fia asiasi i ai. E faapefea ona e faamatala atu i se uo e auai i se isi tapuaiga le eseesega i le va o le malumalu ma se isi maota i le nuu?

Faitau le Mataupu Faavae ma Feagaiga 84:2–5, ma faailoga upu po o se fuaitau na faaaoga e le Alii e fesoasoani ai i le Au Paia ia malamalama i le taua o le fausiaina o se malumalu.

Sa toe ta’u mai i nei fuaiupu le valoaga o le a fausia le aai o Ierusalema Fou ma se malumalu i le Itumalo o Jackson, Misuri. Ae peitai, mulimuli ane, i le 1841 na ta’u mai e le Alii i le Au Paia sa le manaomia i lena taimi ona latou fausia le aai po o le malumalu i Misuri ona o sauaga matuia mai fili o le Ekalesia (tagai i le MF&F 124:49). O le fuaitau “tupulaga lenei” i le Mataupu Faavae ma Feagaiga 84:5 e faatatau i le valoaga e uiga i le fausia o Ierusalema Fou ma le malumalu—lea o le a tupu pea ma o le a faataunuuina lava i se taimi i le lumanai (tagai i le Mose 7:62).

O leMataupu Faavae ma Feagaiga 84 ua tuuina mai ai se avanoa e aoao ai e uiga i faamanuiaga taua e mafai ona e maua i le malumalu. A o lei faaauauina au suesuega o le vaega lenei, o le a fesoasoani le toe faamanatu o nisi o upu autu e faatatau i mataupu faavae na aoao mai e le Alii i le faaaliga lenei. I le siata lenei, faitau ma le totoa ia uiga faaleaoaoga faavae o loo i le taumatau. Faafetaui uiga taitasi i le upu talafeagai o loo i le tauagavale.

Upu	Uiga
Feagaiga Sauniga faaola Perisitua Mekisateko Perisitua Arona	O le perisitua maualuga atu pe sili atu, lea e taitai i mea faaleagaga O le perisitua sauniuni, lea e umia ki o le auaunaga a agelu ma o le talalelei o le salamo ma le papatisoga O se maliega paia i le va o le Atua ma le tagata O se gaoioiga paia e taua mo le faaeaga ma e i ai faatasi ma feagaiga

(Tagai i tali mo le gaoioiga faafetaui i le faaiuga o le lesona lenei.)

Faitau le lisi lenei o sauniga ma faamanuiaga faaleperisitua, ma tuu se togi faasao i le koluma i talane o mea faapea o sauniga faaola:

	Papatisoga
	Faamauga
	O le faaigoaina ma le faamanuiaina o tamaiti
	Faaeeina atu o le Perisitua Mekisateko (mo alii)
	Faauuina o e mama’i
	O le faaeega paia o le malumalu
	O le faamauga o le faaipoipoga

O le aitema taitasi o loo i le lisi, vagana ai le faaigoaina ma le faamanuiaina o tamaiti ma le faauuina o e mama’i, o se sauniga faaola. O sauniga o le perisitua o le faaigoaina ma le faamanuiaina o tamaiti ma le faauuina o e mama’i, e faamanuia ai olaga o i latou e talia ia [sauniga], ae e le manaomia mo le faaolataga.

I le Mataupu Faavae ma Feagaiga 84:6–19, ua tatou iloa ai sa umia e Mose le Perisitua Mekisateko, po o le “perisitua tele” (MF&F 84:19). E mafai ona ia su’e agai i tua lona pule o le perisitua i le Atua. I le avea ai ma se tagata amiotonu na umia le perisitua, o le manao o Mose, ia fesoasoani i isi tagata ia faalatalata atili atu i le Atua e ala i sauniga faaola o le perisitua.

Faitau le Mataupu Faavae ma Feagaiga 84:19–22, ma vaavaai mo faamanuiaga e mafai ona tatou maua e ala mai i le Perisitua Mekisateko.

Matau i le fuaiupu e 20 e faapea i sauniga o le Perisitua Mekisateko, ua faaali mai ai le mana o le faaleatua. Sei vagana ai le papatisoga, o sauniga taitasi o loo i le siata na muamua e tatau lava ona faataunuuina i le pule o le Perisitua Mekisateko. E faapefea ona e lagonaina le faaalia mai o le mana o le faaaleatua i nei sauniga?

O le lua o sauniga faaola o le Perisitua Mekisateko—o le faaeega paia o le malumalu ma le faamauga o le faaipoipoga—e na o totonu lava o le malumalu e mafai ona maua mai ai. E tusa ai ma le Mataupu Faavae ma Feagaiga 84:22, aisea e taua ai ona tatou maua ia sauniga faaola o le Perisitua Mekisateko?

O lefuaiupu e 22 e mafai ona faatatau i le vaaia o le Atua i lenei olaga, ae o le faaiuga, e faatatau i lo tatou mafai ona nonofo i le afioaga o le Tama Faalelagi mo le faavavau. Atonu e te manao e tusi le mataupu faavae lenei i le laina o au tusitusiga paia i talane o fuaiupu e 21-22: Ina ia avea e faapei o le Atua ma nonofo i Lona afioaga, e tatau ona tatou maua sauniga faaola o le Perisitua Mekisateko.

1. I lau api talaaga mo le suesueina o tusitusiga paia, tusi e uiga i le auala ua fesoasoani ai mataupu faavae ua e aoaoina i au suesuega o le Mataupu Faavae ma Feagaiga 84 ina ia e malamalama i le taua o le perisitua ma le taua o malumalu.

A o e faitau i le saunoaga lenei a Elder Russell M. Nelson o le Korama a Aposetolo e Toasefululua, mafaufau pe aisea e taua ai ona e maua sauniga faaola uma o le talalelei—e aofia ai sauniga na e na o totonu lava o le malumalu e maua ai: “O le malumalu o se faamoemoega lea o gaoioiga uma, lesona uma, ma laasaga uma e agai ai i luma le Ekalesia. O a tatou taumafaiga uma i le talaiina atu o le talalelei, faaatoatoaina le Au Paia, ma le faaolaina o e ua maliliu e tau atu i le malumalu paia. O sauniga o le malumalu e matuai taua lava. E le mafai ona tatou toe foi atu i le mamalu o le Atua e aunoa ma na sauniga” (“Ia Saunia mo Faamanuiaga o le Malumalu,” Liahona, Oke. 2010, 41).

Faitau le Mataupu Faavae ma Feagaiga 84:23 e iloa ai le mea na saili Mose e fai. Ia manatua o le upu faapaia o lona uiga ia faamama ma fai ia paia. O le isi mea e sosoo ai, faitau le Mataupu Faavae ma Feagaiga 84:24–25, ma faailoa mai pe na faapefea ona tali atu le fanauga a Isaraelu i taumafaiga a Mose e aoao i latou. O a ni taunuuga o a latou amioga?

E pei ona e mauaina, na aveese mai i le fanauga a Isaraelu le avanoa e maua ai sauniga faaola o le Perisitua Mekisateko. Ae ui i lea, sa le’i tuua e le Alii le taumafai e fesoasoani ia i latou ia alualu i luma. Sa Ia faatagaina le perisitua maualalo, po o le Perisitua Arona, e faaauau pea ma i latou. Faitau le Mataupu Faavae ma Feagaiga 84:26–28, ma faailoa mai po o a auala na faaauau ai ona faamanuia e le Alii le fanauga a Isaraelu. A o e suesue ai, atonu e te manao e faailoga ia faamanuiaga e mafai ona tatou maua e ala mai i le Perisitua Arona.

Atonu e fesoasoani ona malamalama, i le fuaiupu e 28 o le fuaitau “sa papatisoina o ia aʼo i ai lava o ia i lona tamaitiiti” e faasino i le papatisoga o Ioane i le valu o ona tausaga. O le fuaitau “sa faauuina e le agelu a le Atua i lenei mana i le taimi na valu ai aso o lona matua” o lona uiga sa vaetofia Ioane “e faasaʼosaʼo le ala o le Alii [ma] e saunia ai [tagata] mo le afio mai o le Alii.” E le o faasino i le taimi na maua ai e Ioane le Perisitua Arona. O le faauuga o Ioane i le perisitua Arona na faia ina ua maea lona papatisoga. (Tagai i le Bruce R. McConkie, The Mortal Messiah: From Bethlehem to Calvary, 4 vols. [1979–81], 1:384–85.)

O le Perisitua Arona e saunia ai i tatou mo le mauaina o sauniga ma faamanuiaga o le Perisitua Mekisateko. Mo se faataitaiga, pe a uma le papatisoga, o se sauniga lea o le Perisitua Arona, tatou te maua le meaalofa o le Agaga Paia e ala i le pule o le Perisitua Mekisateko. A o tatou aai ma feinu i le faamanatuga, o se sauniga o le Perisitua Arona, tatou te faafouina ai feagaiga e fesoasoani e faapaia ai i tatou ma maua ai le mafutaga faifai pea a le Agaga Paia, ma fesoasoani ia i tatou e saunia ai e maua sauniga ma osia feagaiga i le malumalu. O le auaunaga a se alii talavou i le avea ai o se tasi e umia le Perisitua Arona, e saunia ai o ia e maua le Perisitua Mekisateko.

2. Tali le fesili lenei i lau api talaaga mo le suesueina o tusitusiga paia: O le a se mea e mafai ona e faia i le taimi nei e saunia ai e maua sauniga faaola uma o le talalelei?

Mataupu Faavae ma Feagaiga 84:31-42

Ua aoao mai e le Alii le tautoga ma le feagaiga o le perisitua

A o e suesue e uiga i le tautoga ma feagaiga o le perisitua, ia manatua “o se tautoga o se tautinoga mautinoa lea o le a faamaoni ma tumau se tasi i ana folafolaga. O se feagaiga o se folafolaga paia i le va o ni tagata se toalua. O le Perisitua Arona e na ona taliaina i se feagaiga. O e umia le Perisitua Mekisateko e mauaina le perisitua e ala i se tautoga e le ta’ua e faapena foi ma le feagaiga. Pe a faamaoni e umia le perisitua ma faalauteleina o latou valaauga e pei ona faatonuina e le Atua, na te faamanuia i latou. O e faamaoni e oo i le iuga ma faia mea uma na te fai atu ai ia te i latou, o le a latou maua mea uma o i ai i le Tama (MF&F 84:33–39)” (Taiala i Tusitusiga Paia, “Tautoga ma le Feagaiga a le Perisitua” scriptures.lds.org). O le “feagaiga” o le maliega a le tagata ma le Atua, ae o le “tautoga” o folafolaga paia a le Atua ia i latou o e tausia le feagaiga.

Ua aoao mai leMataupu Faavae ma Feagaiga 84:31–32 o i latou e umia le perisitua i aso e gata ai (“o atalii o Mose ma Arona”) o le a galulue i le maota o le Alii (o le malumalu) ma faatumulia i le mamalu o le Alii. O leMataupu Faavae ma Feagaiga 84:33–44 o loo i ai le tautoga ma le feagaiga o le perisitua. Ua tatou aoao mai i le mataupu faavae lenei: Afai e faalautele e i latou o e maua le perisitua o latou valaauga, o le a faapaia i latou e le Atua ma tuu atu ia i latou mea uma ua ia te Ia.

3. Tusi le faamatalaga lenei i lau api talaaga mo le suesueina o tusitusiga paia: Ua folafola mai le Alii e … Ona suesue lea i le Mataupu Faavae ma Feagaiga 84:33–44, ma faailoa mai ia le itiiti ma le lima ni folafolaga ua tuu mai e le Alii ia i latou o e ulu atu i le tautoga ma le feagaiga o le perisitua. (E mafai ona siaki au tali i tali o loo i le faaiuga o le lesona lenei.)

Na aoao mai e Peresitene Gordon B. Hinckley le mea lenei e uiga ia i latou e umia le perisitua e faalauteleina o latou valaauga:

“Tatou te faalautele lo tatou perisitua ma lo tatou valaauga pe a tatou auauna atu ma le filiga ma le naunautai i tiute ua valaauina ai i tatou e taitai tatau. …

“E faalautele lo tatou valaauga, ma faalautele le malosi o lo tatou perisitua pe a tatou aapa atu i e ua puapuagatia ma faamalosi i e ua vaivai. …

“E faalautele lo tatou valaauga pe a tatou savavali ma le faamaoni ma le amiotonu” (“Ia Faalauteleina o Tatou Valaauga,” Liahona, Iul 1989, 63).

O tagata uma o le Ekalesia o e maua valaauga, ma ua vaetofia, e maua faamanuiaga e ala mai i le Perisitua Mekisateko e faalautele ai o latou valaauga o le Ekalesia. Sa tuuina mai e Peresitene Thomas S. Monson se faamalamalamaga faigofie e uiga i le auala e mafai ai e i tatou taitoatasi ona faalautele o tatou valaauga: “E faapefea la ona faalauteleina e se tasi se valaauga? E faigofie lava e ala lea i le faatinoina o le auaunaga e fitoitonu i ai” (“Mana o le Perisitua,” Ensign, Nov. 1999, 51).

4. I lau api talaaga mo le suesueina o tusitusiga paia, tali ai fesili nei e faatatau i le uiga o le faalautele o se valaauga:

   1. E faapefea ona faalautele e se tasi e umia le perisitua ia lona valaauga i le perisitua?

   2. O faapefea ona faamanuiaina oe ona ua faalauteleina e se tagata ia lona valaauga?

O le tiute o i latou uma e umia le perisitua o le, ia saunia i latou lava ma isi ia maua sauniga faaola o le talalelei ma ola i feagaiga e faatatau i ai, ina ia mafai ona latou maua le ola e faavavau faatasi ma le Tama Faalelagi.

5. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia;

   Ua ou suesueina le Mataupu Faavae ma Feagaiga 84:1–42 ma faamaeaina lenei lesona i le (aso).

   O fesili, mafaufauga, ma manatu faaopoopo ou te fia faasoa atu i lo’u faiaoga:

Tali i le gaoioiga faafetaui: (1) i, (2) o, (3) a, (4) e.

O tali e mafai ona i ai mo le galuega faatino 3, faailoa mai o folafolaga a le Alii ia i latou o e ulu atu i le tautoga ma feagaiga o le perisitua (mai le MF&F 84:33–44): O le Alii o le a (1) faapaia i tatou e ala i le Agaga (tagai i le fuaiupu e 33); (2) faafou o tatou tino (tagai i le fuaiupu e 33); (3) faitau faatasi i tatou i le fanau a Aperaamo—i se isi faaupuga, e tuuina mai ia i tatou faamanuiaga na folafola mai ia Aperaamo ma ana fanau (tagai i le fuaiupu e 34); (4) faia i tatou o Lana ʼau filifilia, po o tagata filifilia (tagai i le fuaiupu e 34); (5) tuu mai ia i tatou mea uma ua i ai i le Tama (tagai i le fuaiupu e 38); ma le (6) tuu atu i Ana agelu le tiute e faatatau ia i tatou (tagai i le fuaiupu e 42).