Iunite 22: Aso 1
Mataupu Faavae ma Feagaiga 101:43–101; 102
Faatomuaga
I le aso 16 ma le 17 o Tesema, 1833, na maua ai e le Perofeta o Iosefa Samita se faaaliga e faatatau i le Au Paia i Misuri o e na tuua o latou fale ina ia sosola ese mai sauaga. O le toatele o na tagata o le Au Paia na faamalosia e tuua a latou meatotino uma. O le faaaliga na maua e le Perofeta, ua tusia i le Mataupu Faavae ma Feagaiga 101, o loo aofia i ni lesona se tolu. O lesona lona tolu lenei o loo aofia ai le faataoto a le Alii i le tamalii ma laau olive, e aoao mai ai Lona finagalo e uiga i le laveaiina o Siona. O loo aofia ai foi le fautuaga a le Alii ia faaauau pea e le Au Paia ona faapotopoto faatasi ma saili le faamasinoga tonu mo i latou o e na faia soligatulafono e faasaga ia i latou.
Mataupu Faavae ma Feagaiga 101:43–62
Ua tuuina mai e le Alii le faataoto i le tamalii ma laau olive
O se faataoto o “se tala faigofie e faaaogaina e faailoa ma aoao ai se upumoni faaleagaga po o se mataupu faavae. E faavae se faataoto i le faatusatusaina o se meafaitino masani po o le mea na tupu i se upumoni” (Taiala i Tusitusiga Paia, “Faataoto,” scriptures.lds.org). Atonu e te manatua faataoto na aoao mai e le Faaola i le taimi o Lana galuega i le tino—o le faataoto i le Samaria agalelei, o le faataoto i le atalii faamaumau oa, o le faataoto i taupou e toasefulu, ma isi.
I le lesona o le aso, o le a e suesue ai i le faataoto i le tamalii ma laau olive, o se faataoto na tuuina mai e le Faaola e ala i le Perofeta o Iosefa Samita.
A o e suesue i lenei faataoto, mafaufau i le saunoaga lenei a Elder Dallin H. Oaks o le Korama a Aposetolo e Toasefululua: “O faataoto [a le Faaola] e tele ni ona uiga po o faatatauga e tusa ai ma le matua faaleagaga o le tagata faalogologo. E i ai se savali mo tamaiti ma le au faitofa o le talalelei“ (“Scripture Reading and Revelation,” Ensign, Jan. 1995, 8). Vaavaai mo uiga ma faatatau e tele o le faataoto lenei (tagai foi i le Bible Dictionary, Parables”
Na tuuina mai e le Alii i le faataoto i le tamalii ma laau olive e fesoasoani ai i Lona nuu ia malamalama i Lona “loto e faatatau i le laveaiina o Siona” (MF&F 101:43). Faitau le Mataupu Faavae ma Feagaiga 101:44–45, ma vaavaai po o le a le mea na faatonuina e le tamalii i le faataoto i ana auauna e fai.
Aisea na manao ai le tamalii e tutu ai ni leoleo i le tovine? Aisea na ia manao ai i se leoleo i luga o le olo?
Faitau le Mataupu Faavae ma Feagaiga 101:46–50, ma faailoa mai po o le a le lelei na muilmuli ai auauna a le tamalii i lana fautuaga. (A o e faitauina le fuaiupu e 50, atonu e aoga le iloa o le fuaitau “fefinauaʼi o le tasi ma le isi” o lona uiga na feeseeseai auauna o le tasi ma le isi, pe sa feteenai le tasi ma le isi.)
Aisea na le mafai ai e auauna ona fau le olo?
Faitau le Mataupu Faavae ma Feagaiga 101:51, ma vaavaai mo le mea na tupu ona sa le’i fauina e auauna le olo.
Faitau upu a le tamalii i ana auauna, i le Mataupu Faavae ma Feagaiga 101:52–54. E tusa ai ma le fuaiupu e 54, aisea na le fiafia ai le tamalii ona sa le’i fauina e ana auauna se olo?
E faapefea ona faatatau mea na tutupu ua faamatalaina i lenei faataoto i mea na tupu i le Au Paia i Misuri?
-
Tali le fesili lenei i lau api talaaga mo le suesueina o tusitusiga paia: E faapefea ona faatatau le olo i le faataoto i le malumalu lea sa le’i fausia e le Au Paia i le Itumalo o Jackson, Misuri?
-
Faitau le Mataupu Faavae ma Feagaiga 101:55, lea na tuu atu ai e le tamalii i le faataoto ni faatonuga i se tasi o auauna. Ona faitau lea o le Mataupu Faavae ma Feagaiga 103:21. O ai e faatusa i ai lenei auauna i le faataoto?
Faitau le Mataupu Faavae ma Feagaiga 101:56–62, ma vaavaai mo le mea na faatonuina e le tamalii le auauna e fai ona ua faaleagaina e le fili vaega o le tovine. Sa mulimuli Iosefa Samita i le faatonuga o loo i lenei faataoto. Sa ia faatulagaina se vaega na taua o le Tolauapiga a Siona e lavaeai le laueleele o Siona. Sa latou taunuu i Misuri i le ono o masina talu ona tuuina mai lenei faataoto. O le a e aoao atili e uiga i le Tolauapiga a Siona pe a e suesueina le Mataupu Faavae ma Feagaiga 103 ma le 105.
Mataupu Faavae ma Feagaiga 101:63-75
Ua apoapoai mai le Alii i le Au Paia ina ia faaauau pea le galuega o le faapotopotoina
E ui lava ina faate’a ese mai le Au Paia mai le Itumalo o Jackson, Misuri, ae na poloaiina i latou e le Alii e faaauau pea ona fausia Lona malo. Faitau le Mataupu Faavae ma Feagaiga 101:63–64, ma vaavaai mo le mea na folafola mai e le Alii Ia o le a faaauau pea ona Ia faia.
I le faaaliga lenei na ta’ua ai e le Alii le faataoto i le saito ma titania, lea na Ia faamatalaina ai le faapotopotoina o Lona nuu (tagai foi i le Mataio 13:24–30, 36–43). Faitau le Mataupu Faavae ma Feagaiga 101:65–66, ma sue ia elemene nei o le faataoto: falesaito, saito ma titania.
I aso anamua, o falesaito o ni nofoaga sa faaputu i ai saito ma teu ai mo le saogalemu. Na ofoina mai e Elder David A. Bednar o le Korama a Aposetolo e Toasefululua se tasi o uiga faafaatusa o le upu falesaito i lenei faataoto. Fai mai o ia, “O falesaito o malumalu paia” (“Taofia ma le Mamalu o se Igoa ma Tulaga,” Ensign po o le Liahona, Me 2009, 97). O titania o vao e foliga e pei o ni saito a’o laiti.
Ina ia fesoasoani ia e malamalama i lenei faataoto, atonu e te manao e tusi ia faauigaga nei i au tusitusiga paia: garners = malumalu paia; saito = o e amiotonu; titania = o e amioleaga.
I le faataoto, ua faaputu atu saito i le falesaito. O a ni auala tatou te faapotopoto atu ai i le malumalu?
Faatumu avanoa e faailoa mai ai se mataupu faavae o loo aoao mai e lenei faataoto: A o tatou potopoto atu i le , tatou te maua ai le puipuiga ma saunia ai i tatou lava mo le .
-
I le Mataupu Faavae ma Feagaiga 101:67–75, tatou te faitau ai e ui lava ina sa faate’a faamalosi ese le Au Paia mai le Itumalo o Jackson, Misuri, ae na fautuaina i latou e le Alii ia faaauau pea ona faatau mai fanua iina.
Mataupu Faavae ma Feagaiga 101:76-101
Ua fautuaina e le Alii le Au Paia e faaauau pea ona saili se auala e toe foi atu ai i o latou fale i Misuri
E le gata i le faatonuina o le Au Paia e faatau mai fanua, na fetalai mai foi le Alii ia i latou e “tagi atu mo le toe totogi mai” ona o amioga a i latou o e sa sauaina i latou (tagai i le MF&F 101:76). I se isi faaupuga, sa Ia ta‘u mai ia i latou e saili le faamasinoga tonu e ala i tulafono a le malo. Faitau le Mataupu Faavae ma Feagaiga 101:76–80, ma faailoa mai auala o tulafono o le a mafai ai e le Au Paia ona sailia le fesoasoani mai taitai o le malo.
E tusa ai ma nei fuaiupu, aisea e finagalo ai le Alii ia tausisia pea le Tulafono Maualuga o le Iunaite Setete?
-
-
Aisea ua avea ai le tali atu mo oe lava—le nafa ma a tatou lava amioga—o se vaega taua o le faitalia?
-
O le a sau tala e fai atu i se tasi e fai mai “ou te saoloto lava e fai le mea ou te manao ai”?
-
Faauma le aoaoga faavae lenei: Ua tuuina mai e le Atua ia i tatou le faitalia, o le mana e filifili ai, ae tatou te mo a tatou filifiliga.
Sa faaaoga e le Alii se faataoto lona tolu e faamalosiau ai le Au Paia e saili le fesoasoani mai o latou taitai faalemalo. O loo maua i le Mataupu Faavae ma Feagaiga 101:81–84. (O le isi faamatalaga o le faataoto lenei o loo maua i le Luka 18:1-8.) A o e faitauina le Mataupu Faavae ma Feagaiga 101:81–84, mafaufau pe na faapefea ona faatatau le faataoto i le Au Paia i Misuri. A o faaali mai le faataoto i le faaaliga lenei, o le fafine ua oti lana tane ua faatusa i tagata o le Ekalesia. O faamasino e mafai ona faatusa i taitai faalemalo o e o le a talosaga i ai le Au Paia mo se fesoasoani.
Faitau le Mataupu Faavae ma Feagaiga 101:85–88 e vaai ai le ala na faatatau ai e le Faaola le faataoto lenei i le Au Paia o e na tutuli ese mai o latou fale.
Sa mulimuli le Au Paia i le apoapoaiga a le Alii. Sa latou talosagaina Daniel Dunklin, o le kovana o Misuri, e tuuina mai le puipuiga a le militeli mo i latou ina ua latou toe foi atu i o latou fale. Sa musu o ia, ma fai mai sa le’i faatagaina o ia e le tulafono e faia se mea faapea. Sa latou talosagaina atu foi ia Andrew Jackson, le Peresitene o le Iunaite Setete, e toe aumai o latou fale ma meatotino ma faamautinoa lo latou puipuiga, ae sa le’i fesoasoani foi o ia ia i latou. I lea taimi, na manatu taitai o le malo o le Iunaite Setete, o faigamalo a setete sa tatau ona taulimaina faafitauli faapea. Sa talosagaina foi e le Au Paia le fono faitulafono a le setete o Misuri, ae sa mumusu foi na tagata o vaega faaupufai e fesoasoani.
Vaai vave i le Mataupu Faavae ma Feagaiga 101:89–91, ma vaavaai mo le fetalaiga a le Alii e uiga i le ala o le a tali ai taitai o le malo mo i latou lava pe afai latou te mumusu e fesoasoani i le Au Paia. Ona faitau lea o le Mataupu Faavae ma Feagaiga 101:92–95, ma vaavaai mo le mea na fetalai mai le Alii i le Au Paia e fai mo o latou taitai faalemalo.
-
A o e suesue i nei fuaiupu ma tusi e uiga i le fuaiupu e 92, faaalu se taimi e mafaufau loloto ai i le alofa ma le alofa mutimutivale o le Alii. Ia manatua e le finagalo o Ia e faasala tagata. E finagalo o Ia ia salamo tagata uma ina ia mafai ona Ia alofa mutimutivale ia te i latou.
I le Mataupu Faavae ma Feagaiga 101:96–101, tatou te faitau ai i le fautuaga a le Alii i le Au Paia, ina ia taofi pea i a latou meatotino i le Itumalo o Jackson, e ui lava sa le faatagaina i latou e nonofo ai iina. O nei fuaiupu o loo aofia ai se folafolaga mai le Alii e faapea, afai e ola agavaa le Au Paia, o le a i ai se aso e mafai ai ona latou nonofo iina.
Mataupu Faavae ma Feagaiga 102
Ua faatonu e le Alii le au fautua maualuga i taualumaga mo le foiaina o mataupu faigata
O leMataupu Faavae ma Feagaiga 102 o loo i ai faatonuga a le Alii, i auala e tatau ona faatautaia ai e peresitene o siteki, e lagolago i ai o latou fesoasoani ma tagata o le au fautua maualuga, ia faia fono aoai mo tagata o e ua solia agasala matuia. “O faamoemoega o fono aoa’i o le (1) laveaiina o agaga o e ua solitulafono, (2) puipuia o e ua ta’umamaina, ma le (3) malupuipuia o le mama atoatoa, amiotonu, ma le igoa ta’ulelei o le Ekalesia” (Faamaoni i le Faatuatua: O Se Tusitaiala o le Talalelei [2004], 74). Na faaali mai e le Alii Lona finagalo ia i latou o e pulefaamalumalu i fono aoai.
-
Sa ou suesueina le Mataupu Faavae ma Feagaiga 101:43–101;102 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: