Iunite 2: Aso 1
Iosefa Samita—Talafaasolopito 1:1–20
Faatomuaga
I le 1838, na amata ai ona galue Iosefa Samita i lana talafaasolopito aloaia. O totonu o loo ia faamatalaina ai lona aiga ma nofoaga sa latou mau ai. Sa ia taua foi e uiga i le “vavao uiga ese” e uiga i mea tau lotu sa i ai i Niu Ioka i sisifo i le 1820 (Iosefa Samita—Talafaasolopito 1:5). O lenei naunautai i mea taulotu na taitai atu ai o ia e “manatunatu mamafa ma le mautonu tele” ona o le “faanunununu ma le fefinauai i totonu o lotu eseese” (Iosefa Samita—Talafaasolopito 1:8).
A o suesue i tusitusiga paia, sa faitau ai Iosefa i le Iakopo 1:5 (tagai i le Iosefa Samita—Talafaasolopito 1:11), o loo apoapoai mai ia i latou o e manaomia le poto e “ole atu i le Atua.” Sa tusia e Iosefa: E leai lava se mau o tusitusiga paia na oo mai i le loto o se tagata ma le mana tele nai lo o lenei mau i loʼu loto i lea taimi. Sa foliga ua ulu mai ma se mana tele i lagona uma o loʼu loto. Sa ou mafaufau ma saga mafaufau pea i ai, i lo’u iloa afai e i ai se tagata ua ia manaomia le poto mai le Atua, o a’u lava, ona sa ou le iloa le mea e tatau ona fai, ma e vagana ai e mafai ona ou maua o se poto atili atu nai lo lena sa i ai ia te a’u i le taimi lena, o le a ou le iloaina lava aua sa matua eseese lava malamalama o faiaoga o mea taulotu o ituaiga eseese i mau e tasi sa lepetia ai le faamoemoe atoa o le liliu atu i le Tusi Paia e tali ai le fesili” (Iosefa Samita—Talafaasolopito 1:12). Sa ia filifili e ole atu i le Atua i le tatalo mo ni tali i ana fesili. I le tali i lana tatalo, na faaali mai ai le Atua le Tama ma Lona Alo o Iesu Keriso, ia te ia.
Iosefa Samita—Talafaasolopito 1:1-4
Ua amata ona tusi e Iosefa Samita lana talafaasolopito
Na faasoa mai e Peresitene Thomas S. Monson, o lē sa avea ma se peresitene o le misiona i Kanata, le aafiaga lenei e uiga i ni ana faifeautalai e toalua:
“Na o atu ni [faifeautalai] e toalua i le maota o Mr. Elmer Pollard, ma o lona lagonaina o le alofa mo faifeautalai na toeitiiti malo i le aisa, na ia valaaulia ai i laua i totonu. Sa la tuuina atu le la savali ma fesili atu pe mafai ona latou faia se tatalo. Na ia malie i ai, ae o ia e faia le tatalo.
“O lana tatalo sa faia na tete’i ai faifeautalai. Na fai mai o ia, ‘Le Tama Faalelagi, faamanuia nei faifeautalai e toalua le laki, ma taitaiseseina, ina ia la toe foi atu i o laua aiga, ae aua le maimauina o la’ua taimi e ta’u mai ai i tagata Kanata e uiga i se savali e ese le manaia ae matuai laitiiti se mea ua la iloa e uiga i ai.’
‘Ao la tulai ae mai o la tulivae, sa fai atu Mr. Pollard i faifeautalai e aua ne’i o la’ua toe foi atu i lona fale. A o la tuumuli, sa ia fai atu ma le taufaifai ia te i laua, ‘E le mafai ona oulua ta’uina mai ia te au e te lua talitonu moni o Iosefa Samita o se perofeta a le Atua!’ ma sa ia atoina le faitotoa” (“The Prophet Joseph Smith: Teacher by Example,” Ensign, Nov. 2005, 69).
Ana faapea o oe o se tasi o faifeautalai, o le a sau tala e te fai atu ai ia Mr. Pollard e uiga i le Perofeta o Iosefa Samita?
Na tusia e le Perofeta o Iosefa Samita le tala e uiga i lona soifuaga o loo maua i le Iosefa Samita—Talafaasolopito i le 1838, mo le faamoemoega o le lolomiina o se talafaasolopito aloaia o le Ekalesia. Faitau le Iosefa Samita—Talafaasolopito 1:1-2, ma vaavaai mo mafuaaga na tuuina mai e Iosefa Samita mo le tusiaina o lenei talafaasolopito aloaia.
O le Iosefa Samita—Talafaasolopito o loo aofia ai le tala auiliili a le Perofeta i le Uluai Faaaliga. O loo i ai ni nai tala ua lauiloa o le Uluai Faaaliga—o le fa o ia tala sa tusia pe na faalauina e Iosefa Samita, ma isi na tusia e i latou o e na toe faamatalaina le aafiaga o Iosefa i a latou lava upu. O nei tala e eseese taimi na saunia ai, mo au faalogologo eseese, ma mo faamoemoega eseese. O nei tala uma e ioe faatasi i le upumoni taua e faapea, o Iosefa Samita na tatala moni mai le lagi ia te ia ma vaai ai i avefeau faalelagi, e aofia ai le Atua le Tama ma le Alii o Iesu Keriso. Ona o le tala i le 1838 sa o se vaega o le talafaasolopito aloaia a Iosefa Samita ma le molimau i le lalolagi, sa faapea ona aofia ai i totonu le Penina Tau Tele.
Iosefa Samita—Talafaasolopito 1:5-13
I le lotolotoi o le fenumia’i faalelotu, sa naunau ai Iosefa Samita e fesili atu i le Atua po o le fea o lotu e sa’o
Sa soifua Iosefa Samita i le vaitaimi sili o le fiailoa ma le vavao i mea tau lotu. Faitau le Iosefa Samita—Talafaasolopito 1:5–7, ma vaavaai mo upu po o fasifuaitau o loo faamatala ai le tulaga na feagai ma Iosefa. Atonu e te manao e faailoga nei upu i au tusitusiga paia. A ua uma loa, faitau le Iosefa Samita—Talafaasolopito 1:8, 10, ma vaavaai mo faamatalaga a Iosefa Samita e uiga i ona lagona i le aluga o lenei vaitaimi.
-
I lau api talaaga mo le suesueina o tusitusiga paia, otooto le Iosefa Samita—Talafaasolopito 1:5–7 e ala i le mafaufau e faapea, e tatau ona e faamalamalama atu le tulaga ma faigata a Iosefa i se tasi e le’i faalogo lava e uiga ia Iosefa Samita. Ia aofia ai ia le itiiti ifo ma le tolu ni manatu e te lagona e tatau ona e faamamafa atu e uiga ia Iosefa Samita.
Toe mafaufau i tua i se tulaga na mafua ai ona e fai atua ni fesili, ma mafaufau loloto i mea sa e faia e foia ai ou atugaluga. Faitau le Iosefa Samita—Talafaasolopito 1:11, ma vaavaai mo le nofoaga na maua ai e Iosefa Samita tali i ana fesili. Faaalu se taimi e toe fai leotele pe tauloto ai le Iakopo 1:5 e pei ona sii mai i le fuaiupu e 11.
O le tasi o mataupu faavae o loo i ai i le Iakopo 1:5 na fesoasoani ia Iosefa Samita e maua ai tali i ana fesili o le, afai tatou te ole atu i le Atua i le faatuatua, o le a Ia tali mai i a tatou tatalo. Faailoga upu po o fasifuaitau o loo aoao mai ai lenei mataupu faavae i le Iosefa Samita—Talafaasolopito 1:11. O le malamalama e tali mai le Atua i a tatou tatalo i Lana lava taimi ma [Lana] ala, mafaufau loloto pe faapefea ona e iloa ua moni lenei mataupu faavae i lou lava olaga.
Na faamatalaina e Iosefa le ala na aafia ai o ia i lenei fuaitau o tusitusiga paia. Faitau le Iosefa Samita—Talafaasolopito 1:12-13, ma faailoa mai fasifuaitau o loo faamatala ai le aafiaga ma le tali a Iosefa ina ua uma ona faitau i le Iakopo 1:5. O i ai se mau na pai atu ma le malosi i lou loto? E tusa ai ma le Iosefa Samita—Talafaasolopito 1:13, o le a le mea na manao Iosefa Samita e foia? O le a le mea na ia filifili e tatau ona ia faia?
Iosefa Samita—Talafaasolopito 1:14–20
Ua vaai Iosefa Samita i le Atua le Tama ma Lona Alo, o Iesu Keriso
Iosefa Samita—Talafaasolopito 1:15–20 o se fuaitau o le mau tauloto. Atonu e te manao e faailoga i se ala e iloagofie ai.
Afai e mafai ona maua se tusi o viiga a le AAG, faitau upu “O le Talosaga Muamua a Iosefa Samita” (Viiga, nu. 14). Ona faitau lea o le Iosefa Samita—Talafaasolopito 1:14 – 15.
Aisea e te manatu na taumafai ai Satani e taofi Iosefa Samita mai le tatalo? Ina ia iloa le mea na faia e Iosefa Samita ina ua feagai ma lenei “aafiaga ofoofogia”, faitau le Iosefa Samita—Talafaasolopito 1:16. O le a sou manatu i le uiga o le saunoaga a le Perofeta ina ua ia fai mai sa ia faaaogaina “[lona] malosi atoa e valaau atu ai i le Atua”? Mafaufau loloto i le mea e mafai ona aoao ai oe i le faataitaiga a Iosefa Samita i le ala e tali atu ai pe a e fetaiai ma se tulaga faigata po o faaosoosoga a Satani.
O se tasi o mea aupito sili ona taua na tutupu i le talafaasolopito o le tagata o loo tusia i le Iosefa Samita—Talafaasolopito 1:17. A o e faitauina le fuaiupu lenei, taumafai e vaai faalemafaufau i lenei mea paia na tupu. O le tasi o upumoni taua tatou te aoaoina mai lenei fuaiupu o le, na vaai Iosefa Samita i le Atua le Tama ma Lona Alo o Iesu Keriso. Sa ia talanoa foi ma i Laua ma maua mai faatonuga ia te i Laua. O le Uluai Faaaliga a Iosefa Samita o le mea faavae na tupu o le Toefuataiga o le talalelei i aso e gata ai.
-
Toe faamanatu le Iosefa Samita—Talafaasolopito 1:15-17, ma faailoa mai upumoni faaopoopo e mafai ona tatou aoaoina mai le tala e uiga i le faaali mai o le Tama ma le Alo ia Iosefa Samita.
O se faaosoosoga po o se tofotofoga, o nisi taimi e mafai ona oo mai a’o le’i tupu po o le mavae foi o se aafiaga faaleagaga. Na oo atu ia Iosefa Samita se tofotofoga ae o le a oo tonu mai lava le Uluai Faaaliga. Mo Mose, na oo tonu mai lava le tofotofoga ina ua uma ona la talanoa ma le Atua (tagai i le Mose 1:9–12). Na aoaoina e Iosefa Samita afai tatou te sailia ma le faatauanau le fesoasoani a le Atua i taimi e taumafai ai Satani e faavaivaia i tatou, e mafai ona laveaiina i tatou e le Atua.
-
-
E faapefea ona fesoasoani ia te oe le iloaina, e mafai ona tatou maua le fesoasoani a le Atua e faatoilalo ai faigata ma le lotovaivai?
-
O a isi mataupu faavae e mafai ona e aoaoina mai le aafiaga o Iosefa i le Iosefa Samita—Talafaasolopito 1:15-16 e mafai ona fesoasoani ia te oe e faatoilalo ai faaosoosoga?
-
-
O nisi o aoaoga faavae e faatatau i le aiga Atua o loo maua i le Iosefa Samita—Talafaasolopito 1:15-17 o: o loo soifua le Atua le Tama ma Lona Alo o Iesu Keriso. O le Tama Faalelagi ma Lona Alo o Iesu Keriso, o ni tagata mavaevae ma eseese.
Na fesili atu Iosefa Samita i le Alii e fia iloa po o le fea o lotu uma e tatau ona ia auai. Faitau le Iosefa Samita—Talafaasolopito 1:18–20, ma faailoga le tali na maua e Iosefa i lenei fesili.
Manatua le tala i faifeautalai na faasoa atu i le amataga o le lesona? Na faamatalaina e Peresitene Monson le mea na faia e faifeautalai ina ua uma ona ato mai e le tamaloa le faitotoa ia i la’ua:
“E le’i mamao atu le savaliga a faifeautalai, ae faapea mai le soa laitiiti lea ma le fefe, ‘Elder, ta te lei tali atu ia Mr. Pollard.’
“Na tali atu le soa sinia: ‘Ua teena i ta’ua. Ta agai i luma.’
“Ae peitai, sa tauanau atu pea le faifeautalai talavou, ma sa faapea ona toe foi atu ai le toalua lea i le faitotoa a Mr. Pollard. Na tali mai e Mr. Pollard le tuitui ma fai mai ma le ita tele, ‘Faapea lava a’u na ou fai atu ia te oulua alii e aua ne’i oulua toe foi mai!’
“Ona fai atu lea o le soa laitiiti, faatasi ai ma le lototele uma sa mafai ona ia maua, ‘Lau susuga Pollard, ina ua ma tuua lou faitotoa, na e fai mai, ma te le’i talitonu moni o Iosefa Samita o se perofeta a le Atua. Ou te manao e molimau atu ia te oe, lau susuga Pollard, ua ou iloa o Iosefa Samita o se perofeta a le Atua, ma e ala mai i musumusuga sa ia faaliliuina ai faamaumauga paia ua ta‘ua o le Tusi a Mamona, ma sa vaai o ia i le Atua le Tama ma Iesu le Alo.’ Ona tuua lea e faifeautalai o le faitotoa.
“[Sa molimauina mulimuli ane e Mr. Pollard:] ‘O lena afiafi, sa le mafai ona maua se moe. Sa ou feminoia’i ma feliuliua’i solo. Sa ou faalogoina pea i lo’u mafaufau ia upu, “O Iosefa Samita o se perofeta a le Atua. Ua ou iloaina. … Ua ou iloaina. … Ua ou iloaina.” Sa tau le mafai ona ou faatali mo le oo mai o taeao. Sa ou telefoni atu i faifeautalai, e faaaoga ai le la numera lea sa lolomiina i luga o le tamai kata o loo i ai Mataupu Faavae o le Faatuatua. Sa la’ua toe foi mai, ma o le taimi lena, na matou auai ma lo’u to’alua, ma lo’u aiga i le lesona o ni tagata sailiili faamaoni o le upumoni. O se taunuuga la, ua matou taliaina uma le talalelei a Iesu Keriso’” (“The Prophet Joseph Smith,” 69).
Afai e te le’i faia, faitau le Iosefa Samita—Talafaasolopito e oe lava ma ole atu i le Tama Faalelagi e fesoasoani ia e iloa e moni le tala a Iosefa Samita o le Uluai Faaaliga po o le, ia faateleina lou talitonuga maumaututu e moni. Atonu foi e te manao e vaavaai mo ni avanoa e faasoa atu ai le savali o le Uluai Faaaliga i se isi tagata.
-
Mau Tauloto—Iosefa Samita—Talafaasolopito 1:15-20
Faaalu se taimi e taumafai ai e tauloto le fuaitau lenei o le mau tauloto. Afai e te lagona e le mafai ona e taulotoina fuaiupu uma, atonu e te manao e vaevae le fuaitau i ni vaega laiti po o le tauloto o fuaiupu e 16-17 pe na o se vaega faapuupuu o fuaiupu. O se tasi lenei o auala e fesoasoani ia te oe e tauloto ai nei fuaiupu: Toe fai ma saga fai se fuaitau seia oo ina mafai ona e fai taulotoina. Faaopoopo atu i ai se fasifuaitau lona lua, ma toe fai ia fasifuaitau seia oo ina mafai ona e taulotoina ia fasifuaitau e lua. Faaopoopo i ai se fasifuaitau lona tolu, ma faapena ai lava. Ia faatopetope a’o e taulotoina fasifuaitau ua uma ona e iloaina, ae faagesegese pe a e taulotoina fasifuaitau fou.
-
Ua ou suesueina le Iosefa Samita—Talafaasolopito 1:1–20 ma faamaeaina lenei lesona i le (aso).
O fesili, mafaufauga, ma manatu faaopoopo ou te fia faasoa atu i lou faiaoga: