Iunite 30: Aso 3
Mataupu Faavae ma Feagaiga 136:19–42
Faatomuaga
Ia Ianuari 1847, na maua ai e Peresitene Polika Iaga le faaaliga ua faamaumauina i le Mataupu Faavae ma Feagaiga 136 i Uinita Kuata, Nebraska. O lenei lesona e talanoaina ai le Mataupu Faavae ma Feagaiga 136:19–42, lea e aofia ai le fautuaga a le Alii i le Au Paia e uiga i le ala e galulue i la latou malaga, ofoina mai ia te i latou le faamautinoaga, ma faatonu i latou e tausi i poloaiga uma a le Atua.
Mataupu Faavae ma Feagaiga 136:19-29
Ua fautuaina e le Alii le Au Paia i le auala e galulue ai i la latou malaga
Mafaufau i se avanoa sa e maua e fegalegaleai ai ma isi tagata i se vaega. O a nisi o itu lelei o le galulue faatasi ma isi i lena vaega?
O le galulue i vaega e mafai ai ona tatou fesoasoani atu i le tasi ma le isi, peitai e mafai foi ona fatuina ai ni luitau.
Ina ua faamalosia le Au Paia e o ese ma Navu i le amataga o le 1846, ae amata ona malaga atu i sisifo, e toatele sa le’i saunia mo le malaga. O le taimi muamua sa taapeape solo le Au Paia i le tele o maila, lea sa faaitiitia ai lo latou gafatia ona fesoasoani i le tasi i le isi. I se faaaliga na maua e Peresitene Polika Iaga i Uinita Kuata, Nebraska, pe a ma le tasi le tausaga mulimuli ane, na faatonuina ai e le Alii le Au Paia e faatulaga i latou lava ina ia mafai ona fesoasoani le tasi i le isi a o latou faaauauina la latou malaga.
Toe faamanatu le Mataupu Faavae ma Feagaiga 136:2, 8–10, ma vaavaai mo faatonuga a le Alii e uiga i le auala na tatau ai i le Au Paia ona fesoasoani le tasi i le isi.
E ui lava o le galulue i vaega e mafai ai ona tatou fesoasoani le tasi i le isi, ae e mafai foi ona fatuina ai ni luitau. Mafaufau loloto e uiga i nisi o luitau e mafai ona tutupu pe a galulue i vaega.
Faitau le Mataupu Faavae ma Feagaiga 136:19–27, ma vaavaai mo le fautuaga a le Alii mo le Au Paia a o latou malaga ma galulue faatasi.
-
Tali fesili nei i lau api talaaga mo le suesueina o tusitusiga paia.
-
O le a le fautuaga na e faitau i ai o le a fesoasoani i le Au Paia ia malaga ma galulue faatasi?
-
Aisea e te manatu ai o le a aoga lenei fautuaga?
-
E mafai faapefea ona e faaaogaina lenei fautuaga a o outou fegalegaleai ma galulue faatasi ma isi tagata?
-
Toe faamanatu fuaiupu e 23-24. Manatua, na fautuaina e le Alii le Au Paia e “tuu le ʼonā” (MF&F 136:24) e ui lava na oo mai lenei faaaliga ae ua uma ona maua e le Au Paia le Upu o le Poto. Sa faasolosolo malie ona agai i luma le Au Paia i lo latou tausia o le Upu o le Poto. Ina ua tuuina mai le faaaliga o loo i le Mataupu Faavae ma Feagaiga 136, sa lei faasaina le Au Paia mai le inuina o meainu malolosi uma e pei ona tatou i ai i aso nei.
E tusa ai ma le Mataupu Faavae ma Feagaiga 136:24, o a mea e tatau ona faia e a tatou upu mo i latou e siomia i tatou? Ina ia tali lenei fesili, faauma le mataupu faavae lenei: O a tatou upu e tatau ona . Mafaufau e faailoga le fuaitau o loo aoao mai ai lenei mataupu faavae i au tusitusiga paia.
Atonu e fesoasoani le iloa o le faagaeetia o lona uiga, ia tuputupu a’e ai se tagata i le faaleagaga po o le faalelagona.
-
-
Tali le fesili lenei: Aisea e te manatu e taua ai i le Au Paia ona faaaoga upu faagaeetia a o latou malaga faatasi?
-
Faamatala se aafiaga i se taimi na e faalogo ai o faaaoga e se tagata ni upu na faagaeetia ai se isi tagata.
-
Mafaufau i upu e mafai ona e fai atu lea o le a faageetia ai i latou e siomia oe.
A o e faitau i tala nei o aafiaga a le Au Paia a o amata ona latou malaga atu agai i sisifo, mafaufau po o a ni ou lagona e ono i ai, ma pe aisea o le a naunau ai lava nei Au Paia faamaoni e oo i na ituaiga tofotofoga:
Na tusia e Mary Ann Weston Maughan: “Sa tofia i matou e tanu ni tagata se toalua o le matou vaega o e na maliliu i le taeao nei ona o le kolela, o alii na igoa ia Brown ma se tamaitiiti. O loo toatele lava le au mama’i o le tolauapiga. Sa matou iloa atu le Vaitafe o Palate i le aso atoa. Malaga mo le 15 maila, tolauapi i Salt Creek. E lei umi ae o mai nisi o le matou vaega ma se isi foi tamaitiiti ua maliu. Sa latou tanuina o ia ina ua goto le la i auvai o le alia. O loo mama’i lava le toatele. Matou te lagona lava le faanoanoa i le tanuina o a matou uo i le ala. Ua vevela tele le tau” (api talaaga a Mary Ann Weston Maughan, 3 vols., 21 Iuni, 1850, 2:1, Faletusi o Talafaasolopito o Aiga, Aai o Sate Leki; ua faalaugatasia le sipelaga, mataitusi tetele, ma ua faaonaponei faailoga).
Na tusia e Clarissa Young Spencer (o le afafine a Polika Iaga): “O se tasi o uiga faaalia tulaga ese o tama i le avea ai o se taitai, o le ala lea na ia vaaia ai le manuia faaletino ma faaleagafesootai o ona tagata, faapea ai ma le taialaina o i latou i o latou manaoga faaleagaga. I le savaliga umi agai atu i fanua valevalenoa a o savavali atu tagata uma vagana ai i latou na sili ona vaivai, i le tele o le vaega o le auala, e faapotopoto faatasi le Au Paia e si’o se afi o le tolauapiga mo faafiafiaga i le afiafi, pe afai lena sa lelei le tau. O iina e usuina ai ni pese, e tata e le au ta mitulini ni musika, ma o le a faagalo ai e alii ma tamaitai le vaivai i le savavali i le sefululima maila pe sili atu foi i se toafa e le’i asaina, pe a latou auai i le siva faatamilo. O lana ala lea sa fesoasoani ai i tagata uma ia faatumauina ai pea o latou ‘lagona lelei’” (faatasi ai ma Mabel Harmer, One Who Was Valiant [1940], 162)
E faavae i nei tala, e faapefea ona e faamatalaina aafiaga a nisi o paionia o le Au Paia o Aso e Gata Ai?
-
Mafaufau i ni taimi sa taliina ai e le Tama Faalelagi au tatalo e ala i le fesoasoani ia te oe ia e fiafia. Mafaufau e faasoa atu se aafiaga i se tagata o lou aiga po o sau uo.
Ia manatua e viia ma faafetai i le Alii pe a e fiafia ma tatalo mo se fesoasoani pe a e faanoanoa.
Mataupu Faavae ma Feagaiga 136:30-42
Ua faamalosiau le Alii i le Au Paia ma fautuaina i latou ia filiga i le tausiga o Ana poloaiga uma
Sa onosaia e le Au Paia ni tofotofoga tetele, ma sa latou iloaina o le latou malaga faaauau pea agai i Sisifo o le a avea foi o se luitau tele.
O le a se mea e te manatu sa fesoasoani i Au Paia e tumau pea i le faatuatua e oo lava i tulaga faigata faapena?
Faitau le Mataupu Faavae ma Feagaiga 136:30–40, ma vaavaai mo aoaoga faavae ma mataupu faavae atonu sa faamalosiauina ai le Au Paia.
Atonu e te faailoa mai nisi o aoaoga faavae ma mataupu faavae nei:
-
E le tatau ona tatou fefefe i o tatou fili, aua ua i ai i latou i aao o le Alii.
-
O o tatou tofotofoga e mafai ona saunia ai i tatou ia maua le mamalu o loo i ai i le Atua mo i tatou.
-
Afai tatou te faamaualaloina i tatou lava ma valaau atu i le Atua, o le a faapea ona aoao i tatou e le Agaga.
-
Afai tatou te faamaoni i le tausiga o upu uma ua tuuina mai e le Alii ia i tatou, o le a i ai se aso tatou te vaai ai i Lona mamalu.
-
Ua tuuina mai e le Alii ia i tatou Ana afioga e ala mai i Ana perofeta.
-
E mafai ona laveai i tatou e le Alii mai o tatou fili.
-
-
E te manatu, e faapefea ona fesoasoani nei aoaoga faavae ma mataupu faavae i le Au Paia ia tumau i le faamaoni?
-
E mafai faapefea ona fesoasoani nei aoaoga faavae ma mataupu faavae ia te oe, ia e tumau i le faamaoni i taimi o ou lava aafiaga faigata?
Mafaufau i le savali atoa e te manatu na aoaoina e le Au Paia mai fetalaiga a le Alii i le Mataupu Faavae ma Feagaiga 136:30–40.
E ui lava ina e faailoaina mai ni aoaoga faavae ma mataupu faavae eseese i nei fuaiupu, ae sa tuuina mai e le Alii le faamautinoaga i le Au Paia o le a lelei mea uma.
Faitau le Mataupu Faavae ma Feagaiga 136:41–42, ma vaavaai mo ni isi faamalosiauga ma fautuaga mai le Alii.
Faaaoga mea ua e aoaoina mai le fautuaga a le Alii i le fuaiupu e 42 e faauma ai le mataupu faavae lenei: Afai tatou te filiga , ona le oo mai lea o faamasinoga a le Alii i o tatou luga, o le a malosi lo tatou faatuatua, ma o le a iu ina le manumalo o tatou fili ia i tatou.
-
Na usitai le Au Paia i poloaiga a le Alii. Sa tuua e le vaega muamua o paionia ia Uinita Kuata i le aso 5 o Aperila, 1847. Sa latou malaga i le silia ma le 1,000 maila ma taunuu atu i le Vanu o Sate Leki i le faaiuga o Iulai, 1847. I le aso 24 o Iulai, 1847, a’o tagai ifo Peresitene Polika Iaga i le Vanu o Sate Leki, sa ia mauaina se faamautinoaga faaleagaga e faapea, ua maua e le Au Paia lo latou nofoaga fou. Sa tietie o ia i tua o le taavale solofanua a Uilifoti Uitilafi i le taimi lea ona sa gasegase o ia i le fiva.
Sa faamatalaina e Peresitene Uilifoti Uitilafi le tala lenei e uiga i le vaaia e Polika Iaga o le Vanu o Sate Leki: “Ina ua oo ina matou … iloa uma atu ai le vanu, sa ou liliuina la’u taavale solofanua, ia faasaga i le itu i sisifo, ona nofo a’e lea o Peresitene Iaga mai lona moega ma tagai faasolosolo atu i le laufanua. A o matou sioa atu i le vaaiga o loo i o matou luma, sa ufitia o ia i se faaaliga mo ni nai minute. Sa ia vaai muamua i le vanu i se faaaliga vaaia, ma o lenei la taimi sa ia vaaia ai le lumanai matagofie o Siona ma Isaraelu. … Ina ua mavae atu le faaaliga, sa ia faapea mai, ‘Ua lava lea. O le nofoaga tonu lenei. Faaauau pea.’ Ona ou aveina atu lea [o le taavale solofanua] i le nofoaga o le tolauapiga ua maea ona faatulagaina e i latou o e na muamua atu ia i matou” (Aoaoga a Peresitene o le Ekalesia: Wilford Woodruff [2004], 152).
Aisea atonu na taua ai mo Peresitene Polika Iaga ma le Au Paia ona maua le faamautinoaga o le Vanu o Sate Leki o le nofoaga tonu lea e faamautu ai? Aisea o le a taua ai ia te oe le maua o le faamautinoaga o loo e faia le mea ua finagalo le Alii e te faia?
Taumafai e tausi i poloaiga uma, ma faalogologo mo le faamautinoaga a le Alii i lou olaga.
-
Ua ou suesueina le Mataupu Faavae ma Feagaiga 136:19–42 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: