O Le Liliuese Tele

Faatomuaga

Na faatuina e Iesu Keriso Lana Ekalesia i le taimi o Lana galuega i le lalolagi. Na faamalamalama mai e Peresitene Henry B. Eyring o le Au Peresitene Sili: “Sa faaauau pea ona faaaoga e le au Aposetolo, ina ua mavae le Afio Ae o le Keriso, ia ki sa Ia tuua ia i latou. Ae ona o le le usiusitai ma le leai o se faatuatua o tagata o le ekalesia, na maliliu ai le au Aposetolo e aunoa ma le tuuina atu o ki i a i latou na suitulaga ia i latou. Tatou te ta‘ua lena mea matautia na tupu ’o le Liliuese,’” (“O Le Ekalesia Moni ma Ola,“ Ensign po o le Liahona, Me 2008, 21). Ona o le faateteleina o lenei liliuese, sa le toe i ai ai le pule o le perisitua i tagata. O le malamalama e uiga i le Liliuese Tele e fesoasoani tatou te malamalama lelei ai i le manaomia o le Toefuataiga o le talalelei a Iesu Keriso i nei aso e gata ai.

Sa Faatuina e Iesu Keriso Lana Ekalesia a’o i ai o Ia i le Lalolagi

I le siata lenei, ia faafetaui le vaega i le masini po o se vaega o le masini e fetaui i ai:

O le a le aoga o nei masini pe a leai ia vaega sa e faafetauia i ai i latou? Ia faatusatusa lenei mea i le Ekalesia a le Alii. Pe e i ai ni vaega taua lea afai e aveesea mai le Ekalesia a Iesu Keriso, o le a le mafai ai ona faagaoioia pe i ai foi le [Ekalesia]?

I lau api talaaga mo le suesueina o tusitusiga paia, tusi le ulutala Elemene Taua o le Ekalesia a Iesu Keriso. A e tau i elemene eseese i le taimi o lenei lesona, ia lisi i latou i lalo o le faaulutala lea.

Faitau le Efeso 2:19–22, ma faailoga le faavae lea na faatuina ai e Iesu Keriso ia Lana Ekalesia i le taimi o Lana auaunaga i le olaga nei. Aisea e te manatu ua ta’ua ai aposetolo ma perofeta o le “faavae” o le Ekalesia? O ai le maatulimanu?

Tusi le upumoni lenei i lau lisi o elemene taua o le Ekalesia a Iesu Keriso i lau api talaaga mo le suesueina o tusitusiga paia: O aposetolo ma perofeta ua fausia ai le faavae o le Ekalesia a Iesu Keriso.

O le a le mea o loo tupu i le ata lenei?

Faitau le Ioane 15:16, ma vaavaai mo se isi elemene o le Ekalesia a Iesu Keriso lea e taua mo le faaolataga o fanau a le Atua.

A o lei Afio Ae le Faaola, na Ia tuuina atu i Ana Aposetolo le pule e taitai ai le Ekalesia ma galulue ai i le suafa o le Atua mo le faaolataga o Ana fanau. O lenei pule o le perisitua ua aofia ai ki o le perisitua, po o le aia tatau, e taitai ai le Ekalesia ma faatino ai sauniga e tatau mo le faaolataga. Faaopoopo le upumoni lenei i le lisi i lau api talaaga mo le suesueina o tusitusiga paia: O le pule o le Perisitua e tatau lava ona i ai ina ia maua ai feagaiga ma sauniga o le faaolataga.

Na faamatalaina e Elder D. Todd Christofferson o le Korama a Aposetolo e Toasefululua se isi elemene taua o le Ekalesia moni: “O upumoni ma aoaoga faavae ua tatou maua ua oo mai ma o le a faaauau pea ona oo mai e ala i faaaliga faalelagi. O nisi o faatuatuaga ua leva … e ono feteenai ai manatu i mataupu faaleaoaoga faavae. … Tatou te faatauaina ia suesuega ia e faaleleia ai le malamalama, ae i le Ekalesia i aso nei, e pei lava o le ekalesia anamua, o loo faamautuina le aoaoga faavae a Keriso po o le faasa’oina o mea sese faaleaoaoga faavae, o se mataupu lea o faaaliga faalelagi ia i latou ua faaee i ai e le Alii le pule faa-aposetolo” (“The Doctrine of Christ,” Ensign po o le Liahona, Me 2012, 86).

E tusa ai ma [le saunoaga a] Elder Christofferson, o le a le matafaioi taua e tasi a aposetolo ma perofeta?

O se aoaoga faavae, o se upumoni taua e faavavau o le talalelei a Iesu Keriso. Aisea e te manatu ai e taua le aoaoina atu ma malamalama lelei o aoaoga faavae moni i le Ekalesia a le Alii?

Ia aofia ai le upumoni lenei i lau lisi i lau api talaaga mo le suesueina o tusitusiga paia: O aposetolo ma perofeta e faatulagaina aoaoga faavae sao e ala i faaaliga faalelagi.

E ui lava ina tele aoaoga faavae o le talalelei a Iesu Keriso, ae ua fautuaina oe ia e maua se malamalama loloto atu o Aoaoga Faavae Autu nei i lou aafiaga atoa i le seminare. O le faia o lena mea o le a fesoasoani e faamalosia ai lau molimau ma saunia ai oe e aoao atu le talalelei i isi.

Aiga Atua
Ata o le Faaolataga
Togiola a Iesu Keriso
Tisipenisione, Liliuese, ma le Toefuataiga
Perofeta ma Faaaliga
Perisitua ma Ki o le Perisitua
Sauniga ma Feagaiga
Faaipoipoga ma le Aiga
Poloaiga

Filifili se tasi o le Aoaoga Faavae Autu o loo i luga. I lau api talaaga mo le suesueina o tusitusiga paia, tusi se faamalamalamaga i le pogai e taua ia te oe lena aoaoga faavae.

Vaavaai mo nei aoaoga faavae i au suesuega o le Mataupu Faavae ma Feagaiga i le tausaga lenei, ma saili ia faateleina lou atamai ma lou malamalama i ia aoaoga faavae.

Ina ia fesoasoani ia te oe ia iloa se isi elemene taua o le Ekalesia a le Alii, ia vaai i ata nei ma mafaufau i mea e tutusa ai.

O se sauniga o se faatinoga paia ma aloaia e faatinoina e se tasi ua i ai le pule tatau o le perisitua ma le faatagaga e faia ai le sauniga. Aisea e te manatu ai o sauniga o se vaega taua o le Ekalesia a Iesu Keriso? (Ina ia fesoasoani i lou taliina o le fesili lenei, faitau le Ioane 3:5. Ona e mafaufau lea pe o le a se mea semanu e tupu pe ana e le mauaina sauniga o le papatisoga ma le faamauga, ma maua le meaalofa o le Agaga Paia.)

O se feagaiga o “se maliega i le va o le Atua ma le tagata, ae e le tutusa o laua [matafaioi] e faatino i le maliega. O le Atua e tuu maia tuutuuga mo le feagaiga, ae o tagata e malilie ia fai mea ua na Ia poloaiina ai i latou e fai. Ona folafola lea e le Atua i tagata faamanuiaga patino mo lo latou usiusitai” (Guide to the Scriptures, “Covenant,” scriptures.lds.org). O se sauniga o le auala lea tatou te osi feagaiga ai ma le Atua, ma e oo mai faamanuiaga mai le tausia o na feagaiga.

E o faatasi sauniga faaola uma o le perisitua ma feagaiga, o ni maliega paia ia ma le Atua. Faaopoopo le upumoni lenei i le lisi i lau api talaaga mo le suesueina o tusitusiga paia: I totonu o Le Ekalesia a Iesu Keriso o le Au Paia o Aso e Gata Ai, e mafai ona tatou maua sauniga e tatau mo lo tatou faaolataga.

A’o i ai o Ia i le lalolagi, sa faatulaga ai e Iesu Keriso elemene taitasi ua e aoaoina e uiga i vaega taua o Lana Ekalesia. Ina ua maliu o Ia, ma toetu mai, ma afio ae i le lagi, sa faaauau pea ona Ia taitaia ma taiala Ana Aposetolo e ala i faaaliga. I lalo o le taitaiga a le au Aposetolo, sa vave ona sosolo atu le Ekalesia anamua ma na papatisoina ai le faitau afe o tagata. Na faatuina faapotopotoga o le Au Paia i le tele o le Malo o Roma (na aofia ai malo o ona po nei o Sepania, Take, Eleni, Italia, Suria, ma isi vaega o Europa, Asia ma Aferika). Sa valaauina toeaina, epikopo, tiakono, ositaulaga, aoao, ma fai evagelia (peteriaka) ma tuu atu ia i latou e le au Aposetolo le pule tatau o le perisitua.

Na Tupu le Liliuese Tele i le vaitaimi o Seneturi na Sosoo ma le Galuega a le Alii i la le Tino

E ui lava i taumafaiga a le au Aposetolo, na feagai le Ekalesia anamua ma faamata’uga mai i totonu o le Ekalesia ma mai i fafo atu. Faitau fuaitau nei o mau ma faailoa mai nisi o nei taufaamata’uga:

Aisea e te manatu ai na lamatia tele nei taufaamatau’ga i le Ekalesia? Tusi ou manatu i lau api talaaga mo le suesueina o tusitusiga paia.

Na saunoa Peresitene Boyd K. Packer, Peresitene o le Korama a Aposetolo e Toasefululua, e uiga i le maliliu ai o tagata maoae lea na tupu i le Ekalesia i le Feagaiga Fou i lenei vaitaimi:

“Na fasiotia e Herota ia Iakopo i Ierusalema. O Peteru ma Paulo na maliliu i Roma. Fai mai le talitonuga e faapea o Filipo na malaga i Sasae. E sili atu ona tele isi mea nai lo nei mea tatou te le iloa.

“Sa latou taapeape solo; sa latou aoao atu, molimau atu, ma faatuina le Ekalesia. Ma na maliliu i latou mo o latou talitonuga, ma ina ua maliliu i latou, o lea na oo mai ai seneturi pogisa o le liliuese” (O Le Toasefululua,” Ensign po o le Liahona, Me 2008, 84).

O le a le mea e tupu i se fale pe a aveeseina le faavae?

O le pa ‘ ū o le Ekalesia anamua ua ta’ua o le Liliuese Tele. E tupu le liliuese pe a o ese tagata mai upumoni o le talalelei ma teena auauna faamaonia a le Alii.

Na faamalamalama atili mai e Peresitene Packer, le mea sili ona taua na leiloa mai le Liliuese Tele: “O le mea sili ona taua na leiloa i le Liliuese o le pule lea na umia e le Toasefululua—o ki o le perisitua. Mo le Ekalesia ina ia avea ma Lana Ekalesia, e tatau ona i ai se Korama a le Toasefululua o e umia ki ma faaee atu ia ki i isi“ (“The Twelve,” 84).

Tusi i lau api talaaga mo le suesueina o tusitusiga paia, ni tali i fesili nei:
1. O le a faapefea ona aafia isi elemene taua o le Ekalesia i le leai o se pule o le perisitua?
2. Aisea na le mafai ai ona toe faaleleia le Ekalesia e aunoa ma perofeta ma aposetolo, pule o le perisitua, ma le malamalama sa‘o e uiga i aoaoga faavae a Iesu Keriso?

Sa saunoa mai Peresitene Packer e uiga i lenei vaitaimi o le talafaasolopito: “A o mavae atu seneturi, sa emo le sulu ma taupulapula lona mumu. Sa suia pe na lafoaiina sauniga. Sa motusia le laina, ma na leai se pule e faaee atu ai le meaalofa o le Agaga Paia. Sa nofoia e Tausaga Pogisa o le liliuese le lalolagi” (“The Cloven Tongues of Fire,” Ensign, Me 2000, 8).

Tali le fesili lenei i lau api talaaga mo le suesueina o tusitusiga paia: Aisea e te manatu ai e taua ona malamalama i le Liliuese Tele ma ona aafiaga?

A o e suesue i le Mataupu Faavae ma Feagaiga ma Iosefa Samita—Talafaasolopito i le taimi o le kosi lenei o le seminare, o le a e aoao ai, na manaomia se toefuataiga o le upumoni ma le pule o le perisitua e faatoilalo ai aafiaga o le Liliuese Tele. O le Toefuataiga, o le toe faatulagaina lea e le Atua o upumoni ma sauniga o Lana talalelei i tagata i le lalolagi. O le talalelei a Iesu Keriso sa leiloa mai le lalolagi ona o le liliuese lea na sosoo ma le galuega a Aposetolo a Keriso i le lalolagi. O lena liliuese na tatau ai le toefuataiga o le talalelei” (Taiala i Tusitusiga Paia, “Toefuataiga o le Talalelei,” scriptures.lds.org).

A o e suesue o le a e iloa ai le auala na toefuatai mai ai i le laloagi ia elemene taua taitasi o le Ekalesia a Iesu Keriso e ala i le Perofeta o Iosefa Samita. Ua toe faatuina ai e le Alii ia Lana Ekalesia mo le faamoemoega o le ofoina mai o le faaolataga i le lalolagi.

Faamalamalama atu i se tagata o le aiga po o se uo (faafesagai) ia elemene taua o le Ekalesia a Iesu Keriso ma le tulaga sa leiloloa ai mai le Ekalesia anamua. Faamalamalama atu pe aisea e taua ai le malamalama i le Liliuese Tele. I lau api talaaga mo le suesueina o tusitusiga paia, tusi ai pe na faapefea mai la oulua talanoaga ma auala na tali mai ai le tagata o lou aiga po o lau uo.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le lesona o le Ata o le Faaolataga ma faamaeaina i le (aso).

O fesili, mafaufauga, ma mamanatu faaopoopo ou te fia faasoa atu i lou faiaoga: