Iunite 9: Aso 3
Mataupu Faavae ma Feagaiga 39–40
Faatomuaga
Ia Ianuari o le 1831, sa feiloai ai se faifeau lotu Porotesano e igoa ia James Covel (e masani ona sipela Covill i faamaumauga o talafaasolopito o le Ekalesia) ma Iosefa Samita i Feiete, Niu Ioka, ma “osifeagaiga ai ma le Alii o le a ia usiusitai i soo se poloaiga o le a tuuina mai e le Alii ia te ia e ala mai i … Lana auauna [le Perofeta o Iosefa Samita]” (Joseph Smith, in History of the Church, 1:143). Ona maua lea e Iosefa le faaaliga ua faamaumauina i le Mataupu Faavae ma Feagaiga 39.
I le faaaliga, sa faatonuina ai e le Alii ia James Covel ina ia papatisoina, ma ia talai atu le atoatoaga o le talalelei i Ohaio. Ae ui i lea, o le aso na sosoo ma le aso na ta’uina atu i ai le faaaliga, na aluese ai James mai Feiete e aunoa ma se faamatalaga. Ona tuu mai lea e le Alii se faaaliga ia Iosefa Samita ma Sini Rikitone, e faamatala mai ai le mafuaaga na le usitai ai James i le poloaiga na tuuina mai ia te ia. O lenei faaaliga o loo tusia i le Mataupu Faavae ma Feagaiga 40. (Tagai i le Documents, Volume 1: July 1828–June 1831, vol. 1 of the Documents series of The Joseph Smith Papers [2013], 233–37).
Mataupu Faavae ma Feagaiga 39:1–12
Ua valaaulia e Iesu Keriso ia James Covel ia maua Lana talalelei ma ia papatisoina
Vaai faalemafaufau e faapea, na tuuina atu e se matua po o se isi tagata e pele ia te oe se meaalofa matagofie. E mafai ona e mafaufau i soo se mafuaaga o le a e filifili ai ia le mauaina le meaalofa?
Faitau le Mataupu Faavae ma Feagaiga 39:1–3, ma vaavaai mo se meaalofa na tuuina mai e le Tama Faalelagi i Lana fanau ae sa filifili nisi ia le mauaina. O loo faaaoga e le Alii le fuaitau “oʼu lava” e faasino i tagata sa Ia auauna i ai i le olaga nei, i le vaitaimi “o le vaeluaga o taimi.”
O le meaalofa sa filifili nei tagata ia le maua o Iesu Keriso. A tatou filifili e maua le meaalofa o Iesu Keriso ma Lana Togiola, tatou te maua le tele o faamanuiaga faaopoopo ma meaalofa. Faitau le Mataupu Faavae ma Feagaiga 39:4, ma faailoa mai se meaalofa na fetalai le Faaola Na te tuuina mai ia i latou o e maua o Ia.
Mai lenei fuaiupu ua tatou aoao ai afai tatou te maua Iesu Keriso, o le a Ia tuuina mai ia i tatou le mana e avea ai ma Ana fanau. Mafaufau e faailoga upu o loo aoao mai ai lenei mataupu faavae i le fuaiupu e 4.
Faitau le faamatalaga lenei mai ia Peresitene Iosefa Filitia Samita, e fesoasoani e te malamalama lelei ai i le uiga o le avea ma atalii ma afafine o Iesu Keriso:
“E avea le Faaola ma o tatou Tama, i le tulaga o loo faaaoga ai lenei faaupuga i tusitusiga paia, aua ua ia ofoina mai ia i tatou le ola, ola e faavavau, e ala i le togiola na ia faia mo i tatou. …
“O lea ua avea ai i tatou ma fanau, atalii ma afafine o Iesu Keriso, e ala i a tatou feagaiga o le usiusitai ia te ia. Ona o lana pule paia ma le taulaga i luga o le satauro, ua avea ai i tatou o atalii ma afafine fanauina faaleagaga, ma o ia o lo tatou Tama” (Doctrines of Salvation, tuufaatasia e Bruce R. McConkie, 3 vols. [1954–56], 1:29).
-
E tusa ai ma aoaoga a Peresitene Samita, tusi i au lava upu i lau api talaaga mo le suesueina o tusitusiga paia, pe faapefea ona mafai ona avea i tatou ma fanau a Iesu Keriso.
E pei ona uma ona e aoaoina, e ao ona tatou filifili e maua Iesu Keriso ona tatou maua lea o le mana e avea ai ma Ona atalii ma afafine. Faitau le Mataupu Faavae ma Feagaiga 39:5–6, ma vaavaai mo mea e ao ona tatou faia e maua ai o Ia ma Lona mana e avea ai ma Ona atalii ma afafine.
Fai se aotelega, i au lava upu, o mea e tatau ona tatou faia e avea ai ma atalii ma afafine o Iesu Keriso:
E pei ona e aoaoina i le faatomuaga o lenei lesona, o le faaaliga i le Mataupu Faavae ma Feagaiga 39 sa faatatau i se faifeau lotu Porotesano na igoa ia James Covel, a’o lei umi ona ia iloa e uiga i le talalelei toefuataina a Iesu Keriso, ma sa osifeagaiga e usitai i soo se poloaiga na ia mauaina e ala mai i le Perofeta o Iosefa Samita.
-
Faitau le Mataupu Faavae ma Feagaiga 39:7–9. O le a le fetalaiga a le Alii e uiga i le tulaga o le loto o James Covel i le taimi na tuuina mai ai le faaaliga? (Atonu e te manao e faailoga le upu lenei i le fuaiupu e 8.) O a mafuaaga na tuuina mai e le Alii na mafua ai ona teena o Ia e James i le taimi ua fano? Afai sa e i ai i le tulaga o James, mata o a ni ou lagona ina ua uma ona e faalogo i nei upu? Aisea?
-
Afai o le a e …
Ona …
Faitau le Mataupu Faavae ma Feagaiga 39:10-12. A o e faitau, vaavaai mo mea na faatonuina e le Alii ia James Covel e fai. Tusi nei faatonuga i luga o le siata i lalo o le ulutala “Afai o le a e …” . E le gata i lea, vaavaai mo mea na folafola mai e le Alii ia James Covel o le a ia mauaina pe a usiusitai i le Alii. Tusi nei faamanuiaga folafolaina i luga o le siata i lalo o le ulutala “Ona …”.
Mafaufau i faamanuiaga na ofoina mai e le Alii ia James Covel. E ui ina sa avea James ma se faifeau mo le pe tusa ma le 40 tausaga, ae na ofoina mai e le Alii ia te ia le atoatoaga o le talalelei, lea na aofia ai tiutetauave ma faamanuiaga na te le’i mauaina muamua, e pei o le meaalofa o le Agaga Paia ma le faauuga i le perisitua.
Ia matau le upu afai i le Mataupu Faavae ma Feagaiga 39:10–11. Atonu e te manao e faailoga lenei upu i au tusitusiga paia. Mafaufau loloto i le taua o le upu afai i nei fuaiupu, ma le mea na ta’u mai e le Alii ia James Covel o le a manaomia ona ia faia ina ia mafai ona maua faamanuiaga folafolaina.
Mai nei fuaiupu e mafai ona tatou aoao ai o faamanuiaga folafolaina a le Alii e faalagolago lea i lo tatou faalogo i Lona siufofoga. Atonu e te manao e tusi lenei upumoni i au tusitusiga paia i talane o le Mataupu Faavae ma Feagaiga 39:10–11.
-
Mataupu Faavae ma Feagaiga 39:13-24
Ua valaauina James Covel e talai atu le atoatoaga o le talalelei i Ohaio
Faitau le Mataupu Faavae ma Feagaiga 39:13–14, ma faailoa mai po o fea na valaauina i ai e le Alii ia James Covel e talai atu ai le talalelei.
I le Mataupu Faavae ma Feagaiga 39:15–24 na tuuina mai e le Alii ni faatonuga ia James Covel e uiga i mea na tatau ona ia aoao atu. Faitau le Mataupu Faavae ma Feagaiga 39:22, ma mafaufau pe faapefea ona fesootai i mataupu faavae ua uma ona e aoaoina i le faaaliga lenei.
Mataupu Faavae ma Feagaiga 40
Ua faaali mai e le Alii le mafuaaga na teena ai e James Covel ia Ana afioga
O le aso na sosoo ma le aso na ta’u atu ai le faaaliga o loo i le Mataupu Faavae ma Feagaiga 39 na tuua ai e James Covel ia Feiete, Niu Ioka, e aunoa ma se faamatalaga. Na faaali mai e le Alii ia Iosefa Samita ma Sini Rikitone le pogai sa le usitai ai James i Ana faatonuga ma [le] maua faamanuiaga folafolaina. Faitau le Mataupu Faavae ma Feagaiga 40:1–3, ma vaavaai pe aisea na le’i faalogo ai o ia i le siufofoga o le Alii.
Faatusatusa le Mataupu Faavae ma Feagaiga 39:8 ma le 40:1 e iloa ai le auala na suia ai le loto o James Covel. Atonu e te manao e faailoga le upu sa i le Mataupu Faavae ma Feagaiga 40:1.
Faatusatusa le Mataupu Faavae ma Feagaiga 39:9 ma le 40:2. E tusa ai ma na fuaiupu, lisi ni mafuaaga se tolu na teena ai e James Covel le afioga a le Alii:
Na tuuina mai e Peresitene Iosefa Filitia Samita se faamalamalamaga atili: “Sa faatalitonuina [James Covel] i le upumoni, aua o loo manino na faaali mai e le Alii ia te ia mea sa na o ia lava ma le Alii na iloaina o le upumoni. Ae peitai, ina ua aluese o ia mai le uunaiga a le Agaga o le Alii, ma i ai se taimi e mafaufau ai i le mea moni e faapea, o le a le toe i ai ni ana fegalegaleaiga ma le lalolagi, ma lona avanoa ma le tulaga i ana aumea, sa toilalo ma teenaina e ia folafolaga ma faamanuiaga na ofoina mai e le Alii ia te ia” (Church History and Modern Revelation, 2 vols. [1953], 1:174).
O le a le mea e mafai ona faaosoosoina i tatou e tetee i afioga a le Atua i aso nei? Atonu e te manao e tusi le mataupu faavae lenei i au tusitusiga paia, i talane o le Mataupu Faavae ma Feagaiga 40 ma i lau api talaaga mo le suesueina o tusitusiga paia: O le fefe ma mea o le lalolagi e mafai ona taitaia i tatou e teena le afioga a le Atua.
-
-
Ua ou suesueina le Mataupu Faavae ma Feagaiga 39–40 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: