Iunite 1: Aso 4
Suesueina o Tusitusiga Paia
Faatomuaga
O lenei lesona o le a fesoasoani e te iloa ai auala ia e malamalama lelei ai i tusitusiga paia, faailoa mai aoaoga faavae ma mataupu faavae o loo i ai, ma faaaoga na upumoni i lou olaga. A o e faia lena mea, o le a avea tusitusiga paia ma se punavai sili o le taitaiga ma faaaliga i lou olaga.
Suesueina o Tusitusiga Paia i le Seminare
Pe na e fesoasoani i se tasi i le sailiga o se mea na leiloa? A o lei amata ona e vaavaai solo, pe na e maua se faamatalaga o foliga o le mea na e sailia? Afai e te le’i iloa lelei le mea na e sailia, pe na faamanuiaina lau sailiga, po o le a foi se lelei e te manatu e ono oo i ai lau sailiga?
I se auala e tutusa lava, e mafai ona atili anoa au suesuega i tusitusiga paia pe a e iloaina le mea o loo e sailia a’o e suesue.
-
I lau api talaaga mo le suesueina o tusitusiga paia, tusi i lalo le mea e te faamoemoe e maua pe a suesue au tusitusiga paia.
Na aoao mai e Peresitene Marion G. Romney o le Au Peresitene Sili, e uiga i se mafuaaga e tasi ua tusia ai tusitusiga paia, e mafai ona fesoasoani e te iloa ai le mea e te vaavaai i ai a’o e suesue i tusitusiga paia: “E le mafai e se tasi ona suesue faamaoni i tusitusiga paia e aunoa ma le aoaoina o mataupu faavae aua o tusitusiga paia ua tusia e faasaosao ai mataupu faavae mo lo tatou manuia” (“The Message of the Old Testament” [lauga i faiaoga o mataupu faalelotu a le OAE, 17 Aok. , 1979], 3, si.lds.org).
E tusa ai ma le saunoaga a Peresitene Romney aisea sa tusia ai tusitusiga paia?
O lea la, o le mea o loo tatou sailia a’o tatou suesue i tusitusiga paia, e tatau ona sili atu nai lo na o ni faamatalaga e uiga i mea na tutupu ma tagata i tusitusiga paia. E tatau ona tatou taumafai ia maua upumoni o le talalelei ia na faasaosaoina e perofeta anamua e ala i mea na tutupu, lauga, ma faaaliga na latou tusitusia i tusitusiga paia. O nei upumoni ua taua o aoaoga faavae ma mataupu faavae.
O aoaoga faavae, o upumoni taua ma e le masuia o le talalelei a Iesu Keriso, e pei o le e i ai i le Tama Faalelagi se tino o aano ma ivi. O mataupu faavae o upumoni po o tulafono tumau e mafai ona tatou faaaogaina e taiala ai i tatou i le faia o faaiuga ma le faaaogaina o aoaoga faavae i o tatou olaga. Na faamatalaina e Elder Richard G. Scott o le Korama a Aposetolo e Toasefululua, auala e mafai ai ona aoga ia i tatou mataupu faavae o le talalelei: “O mataupu faavae o upumoni mama, ua filifilia mo le faaaogaina i le tele o tulaga eseese. O se mataupu faavae moni e manino ai faaiuga e oo lava i tulaga e sili ona fenumiai ma fai faamalosi” (Acquiring Spiritual Knowledge,” Ensign, Nov. 1993, 86).
E tusa ai ma le saunoaga a Elder Scott, o le a le mea e faia e se mataupu faavae mo i tatou?
O se tasi o faataitaiga o se mataupu faavae na aoao mai i tusitusiga paia o loo maua i le Uluai Faaaliga a Iosefa Samita. Mai le aafiaga o Iosefa, e mafai ona tatou aoao ai e faafofoga ma tali mai le Atua i tatalo.
-
Malamalama i Talaaga ma Anotusi o Mau
Vaai faalemafaufau i se fualaau aina e i ai sona pa’u po o se pa’u pito i fafo, e pei o se faipula po o se moli.
O le fea le vaega o le fualaau aina e sili ona aoga? O le a le mea e ao ona e faia ae e te le’i aia le fualaau aina?
Afai o le vaega e sili atu ona taua pe aoga o le fualaau aina o loo i totonu, o le a la le faamoemoega o le pa‘u i fafo?
O le fualaau aina o loo i totonu o le pa’u, lea tatou te faaaogaina mo le mauaina o le malosi ma le tausiga, e mafai ona faatusaina i aoaoga faavae ma mataupu faavae o loo maua i tusitusiga paia. O le pa’u o loo siomia ai le fualaau aina e mafai ona faatusaina i mea na tutupu ma tagata o tusitusiga paia. E pei o le pa‘u i fafo e faasaoina ma fesoasoani i le feaveaiga o le fualaau aina o loo i totonu, o nei tala faaletusi paia e puipuia ma molimoli mai aoaoga faavae ma mataupu faavae o le talalelei ia i tatou i se auala e fesoasoani ia tatou malamalama, manatua, ma faatatau i latou i o tatou olaga.
Afai o i ai sau fualaau aina, fofoe ina ia e iloa ai le fua o loo i totonu (pe na ona mafaufau i auala eseese e te tau atu ai i le fua o se fa‘i po o se moli). O le galuega e manaomia e aveese ai le pa’u o loo i tua ae aliali mai le fualaau aina o loo i totonu, e tutusa lava ma le mea e ao ona tatou faia e tatala ai pe faailoa ai se fasifuaitau o mau. Ina ia fofoe ia matala tusitusiga paia ma aliali mai ai le fua o loo i totonu, e tatau ona tatou malamalama i le tulaga o le talafaasolopito o se faaaliga ma taumafai foi ia malamalama i mea na tutupu, tagata, ma uiga o upu. A o tatou faia faapea, o le a faigofie atu ona iloa ma malamalama i aoaoga faavae ma mataupu faavae o loo i totonu o tala i tusitusiga paia.
O nisi nei o metotia faigofie ma tomai e fesoasoani e te malamalama lelei ai i tusitusiga paia a o e suesue ai i latou. I le faaiuga o le lesona o le a e maua ai ni tomai ma ni metotia faaopoopo mo le suesueina o tusitusiga paia.
Tulaga i le talafaasolopito: O vaega taitasi o le Mataupu Faavae ma Feagaiga ua aofia ai se folasaga o le vaega lea e masani ona faamatalaina ai atugaluga, fesili, po o mea taua na tutupu na muamua mai i le faaaliga o loo i lena vaega. O le iloaina o nei faamatalaga e mafai ona fesoasoani e te malamalama ai i le faaaliga.
-
Uiga o upu: O nisi o upu na faaaoga i tusitusiga paia atonu e te le masani ai. O le Bible Dictionary, o le Taiala i Tusitusiga Paia, vaefaamatalaga i tusitusiga paia, ma se lomifefiloi masani e mafai ona fesoasoani ia te oe ia e malamalama i le uiga o na upu.
Mo se faataitaiga, faitau le Mataupu Faavae ma Feagaiga 121:1, 4. O le upu faapaologa e faatatau i se faleie po o se fale mo le puipuiga. E faapefea ona fesoasoani le iloaina o lenei mea e te malamalama lelei ai i le uiga o nei fuaiupu?
Mau fesootai: O se mau fuaitau e tasi e masani ona fesoasoani e faamatala pe faamanino ai le uiga o se fuaitau po o se manatu o loo maua i se isi fuaitau e ese mai. Mo se faataitaiga, faitau le Mataupu Faavae ma Feagaiga 10:55. O le fuaiupu lenei e foliga mai na pau lava le mea e manaomia ia maua ai le malo selesitila o le avea ma se tagata o le Ekalesia. Ia se’i faitau la i le Mataupu Faavae ma Feagaiga 10:67, ma matau mea o loo aoao mai ai e uiga i le avea ma tagata o le Ekalesia.
-
Iloiloina o Aoaoga Faavae ma Mataupu Faavae
A o faateleina lou malamalama i le afuaga o upu, tagata, ma mea na tutupu i tusitusiga paia, ua e saunia lelei e faailoa mai upumoni o le talalelei o loo i ai i totonu.
O nisi aoaoga faavae ma mataupu faavae e faigofie ona iloa ona o loo ta‘ua sa’o mai lava i tusitusiga paia. Faitau le Mataupu Faavae ma Feagaiga 130:22, ma faailoga ia aoaoga faavae ma mataupu faavae o loo ta‘ua sao mai i lenei fuaiupu. O loo i totonu o aoaoga faavae ua ta’ua i lenei fuaiupu ia upumoni e faapea, o le Tama ma le Alo e i ai tino o aano ma ivi e mafai ona pa’i i ai e pei o le tagata ae o le Agaga Paia o se peresona o Agaga.
E tele aoaoga faavae ma mataupu faavae e le o tuuina sao mai i anotusi o mau ae o loo faaali mai po o faamatala mai i isi fuaiupu. Ina ia faailoa nei aoaoga faavae ma mataupu faavae, e tatau ona tatou iloa upumoni o loo faaalia i fuaitau o mau ona ta‘u atu lea o na upumoni i le manino ma le faigofie. O lenei mea e masani ona manaomia ai le taimi ma le mafaufau toto’a.
Na tuuina mai e Elder Richard G. Scott le fautuaga lenei: “A o e sailia le malamalama faaleagaga, saili mo mataupu faavae. Tuueseese ma le faaeteete mai faamatalaga na faaaoga e faamatala ai. … E aoga lava se taumafaiga tele e faatulaga upumoni tatou te aoina mai i ni faamatalaga faigofie o mataupu faavae” (“Acquiring Spiritual Knowledge,” 86).
A o e aoao e faailoa mai aoaoga faavae ma mataupu faavae e le o tauina sao mai, atonu e mafai ona e faia ni fesili e pei o le: Aisea ua tusia ai lenei faamatalaga i tusitusiga paia? O le a le mea na manao le tusitala e aoao ma malamalama i ai le au faitau? O le a se mea e mafai ona ou aoaoina mai lenei mea, e mafai ona fesoasoani ia te au i lo‘u olaga? O le a se mea e mafai ona ou aoaoina mai lenei mea, e mafai ona fesoasoani ia te au e faasoa atu ai upumoni o le talalelei i isi?
-
O le Faaaogaina o Aoaoga Faavae ma Mataupu Faavae i Lou Olaga
Toe mafaufau i le fualaau aina lea na talanoaina i le amataga o le lesona lenei. O le a se aoga o le a toe i ai i le fualaau aina pe afai na le faaaogaina lava talu mai le taimi na fofoe ai lona pa’u?
Pe a tatou faatusatusaina le fua o loo i totonu o le pa’u i aoaoga faavae ma mataupu faavae tatou te mauaina i tusitusiga paia, o le a le mea e tatau ona tatou faia i nei upumoni i le taimi lava tatou te maua ai i latou?
O le taua o le galuega tatou te faia e aveese ai le pa’u, o le tausiga ma le malosi e mafai ona tatou maua mai le fua o loo i totonu. I le ala lava lea e tasi, o le taua o le suesueina o tusitusiga paia e oo mai a’o tatou aveina aoaoga faavae ma mataupu faavae tatou te maua ma faaaoga i o tatou olaga. O le tele o faaaliga i le Mataupu Faavae ma Feagaiga na tuuina mai mo tagata taitoatasi sa i ai fesili po o atugaluga, ae e mafai foi ona faatatau le fautuaga ma aoaoga i o tatou lava olaga. E ui lava o le tele o vaega o loo faasino atu i tagata o Le Ekalesia a Iesu Keriso o le Au Paia o Aso e Gata Ai, ae o le savali, lapataiga, ma apoapoaiga e mo le manuia o tagata uma.
-
Na tuuina mai e Peresitene Boyd K. Packer, Peresitene o le Korama a Aposetolo e Toasefululua le folafolaga lenei ia i latou o e suesue i tusitusiga paia ma faaaoga upumoni o loo i ai: “Afai ua [e] masani i faaaliga, e leai se fesili—patino pe faalautele, pe faapolokiki pe faalegaluega — e tatau ona tuu e le taliina. O iina o loo i ai le atoatoaga o le talalelei e faavavau. O iina tatou te maua ai mataupu faavae o le upumoni o le a foia ai fenumiaiga uma ma faafitauli uma ma gasu uma, o le a feagai ma le aiga o tagata po o soo se tasi lava e oo i ai” (“Aoao Atu Tusitusiga Paia,”[lauga i faiaoga o mataupu faalelotu a le OAE, 14 oke. , 1977], 3–4, si.lds.org).
Atonu e te manao e faailoga vaega o lana folafolaga e taua ia te oe.
Mafaufau e faatu se sini e fesoasoani ia te oe e faaaoga ai se tasi o upumoni ua e aoaoina i le taimi o lau suesuega o tusitusiga paia i aso nei.
-
Ua ou suesue le lesona “Suesue i Tusitusiga Paia” ma faamaeaina i le (aso).
O fesili mafaufauga ma manatu faaopoopo ou te fia faasoa atu i lou faiaoga:
Metotia ma Tomai Faaopoopo e Suesue ai Tusitusiga Paia
Sui le igoa: Ina ia fesoasoani i lou faaaogaina o mataupu faavae mai tusitusiga paia i lou olaga, ia sui tulaga lou igoa i le igoa o loo i mau. Faataitai le tomai lenei i le Mataupu Faavae ma Feagaiga 6:20.
Mafuaaga ma le aafiaga: Ina ia fesoasoani ia te oe i le faailoaina o aoaoga faavae ma mataupu faavae o loo i mau, vaavaai mo sootaga o le afai-ona ma le ona–o le mea lea. Faataitai le tomai lenei i le Mataupu Faavae ma Feagaiga 5:24.
Upu autu: O upu ma fuaiupu e pei o le “faauta,” “ma o lea,” “ona,” “e ui i lea,” po o le “o lea ua tatou vaai,” o ni valaaulia e taofi ma vaai mo ni savali faapitoa. Faitau le Mataupu Faavae ma Feagaiga 58:26, ma matau le auala e fesoasoani ai upu autu i lou faailoaina o aoaoga faavae ma mataupu faavae.
Lisi o mau: O mau e masani ona i ai ni lisi, e pei o lisi o uiga auaumama, faatonuga, po o lapataiga. A e mauaina ni lisi, mafaufau e faanumera ia elemene taitasi. Faataitai le tomai lenei i le Mataupu Faavae ma Feagaiga 4:5-6.
Faatusatusa: E masani ona faaali mai i mau ni manatu faatusatusa, mea na tutupu, ma tagata. O nei faatusatusaga e faamamafa ai mataupu faavae o le talalelei. Vaai mo faatusatusaga i fuaiupu taitasi, i mataupu, ma i isi mataupu ma tusi. Faataitai le tomai lenei i le Mataupu Faavae ma Feagaiga 50:23-25.
Vaaiga faatino: Vaavaai mo faamatalaga auiliili e mafai ona fesoasoani ia te oe e fatu ai se ata faalemafaufau o mea e te faitauina. Vaai faalemafaufau o loo e i ai i ni mea faapitoa na tutupu. E mafai ona fesoasoani lenei mea e faamalosia ai lau molimau i le moni o mea e te faitauina i tusitusiga paia. Faataitai le tomai lenei i le Mataupu Faavae ma Feagaiga 45:44-46.
Faafaailoga: O upu ma fasifuaitau e pei o “e pei o,” “o i latou o,” po o le “faatusaina i le” e mafai ona fesoasoani e te iloa ai faailoga. Vaavaai i tala atu o se faailoga e ala i le suesueina o lona natura ma mafaufau loloto i ona uiga. O Vaefaamatalaga, o le Bible Dictionary, ma le Taiala i Autu po o le Taiala i Tusitusiga Paia, e mafai ona fesoasoani e te faamatalaina ai nisi o faailoga. Faataitai le tomai lenei i le Mataupu Faavae ma Feagaiga 88:46, 51–61.
Mafaufau Loloto: O le mafaufau loloto e aofia ai le mafaufau, manatunatu loloto, faia o fesili, ma le iloiloina o mea ua e iloa ma mea ua e aoaoina. O le mafaufau loloto e masani ona fesoasoani ia i tatou e malamalama i le mea e tatau ona tatou faia e faaaoga ai mataupu faavae o le talalelei. Na aoao mai Peresitene Tavita O. MaKei, “O le manatunatu loloto o se tasi o faitotoa sili ona faalilolilo, ma e sili foi ona paia tatou te ui atu ai i le afioaga o le Alii” (Aoaoga a Peresitene o le Ekalesia: Tavita O. MaKei [2003], 32). Faitau le Mataupu Faavae ma Feagaiga 138:1–4 mo se faataitaiga o se tagata e faaaogaina lenei tomai.