Mataupu Faavae ma Feagaiga 35

Faatomuaga

I totonu o le ono masina o le faatulagaina o le Ekalesia, e to’a fa faifeautalai, e aofia ai Parley P. Pratt, na malaga i sisifo e talai atu i Tagatanuu Moni o Amerika. A o latou agai atu i tuaoi i sisifo o Misuri, sa latou afe i le eria i Katelani, Ohaio, lea sa nofo ai Parley mo se taimi. Sa latou faasoa atu le latou savali i le uo a Elder Pratt, o se faifeau lauiloa e igoa ia Sini Rikitone. I se taimi e le’i umi, ae papatisoina le silia ma le 100 tagata, na aofia ai Sini Rikitone ma le toatele o tagata o lana aulotu, na sili atu ma le faaluaina o le aofai o tagata auai o le Ekalesia. Na iloa e Sini ma lona toalua, o Fipe, o le auai i le Ekalesia o le a avea o se osigataulaga tele mo i laua. Sa ia iloa o ana tupe maua mai le avea ma se faifeau ma lona igoa ta’uleleia i le lotoifale o le a mafatia ai, ae sa naunau o ia e mulimuli i le upumoni.

Ina ua tuua e toeaiina Katelani ae faaauau le latou faigamalaga, sa o atu Sini Rikitone ma lana uo o Eteuati Paterika i Niu Ioka e feiloai ma le Perofeta o Iosefa Samita. E lei leva ona la taunuu, ae maua e le Perofeta le faaaliga o loo faamaumauina i le Mataupu Faavae ma Feagaiga 35. I lea faaaliga, na tuuina mai ai e le Alii ia Sini Rikitone ni tiutetauave patino i totonu o le Ekalesia na faatoa toefuataiina.

Mataupu Faavae ma Feagaiga 35:1–12

Ua ta‘u mai e le Alii ia Sini Rikitone ua saunia o ia mo se galuega tele atu

I lau api talaaga mo le suesueina o tusitusiga paia, tali ai le fesili lenei: O le a se mea na tupu ia te oe ua fesoasoani e te iloa ai o loo silafia e le Atua oe?

O le faaaliga o loo tusia i le Mataupu Faavae ma Feagaiga 35 ua faaalia ai na silafia e le Alii ia Sini Rikitone, ma sa Ia fetalai mai ia Sini e uiga i lana matafaioi i le fesoasoani lea i le Perofeta o Iosefa Samita. Faitau le Mataupu Faavae ma Feagaiga 35:1–3, ma vaavaai mo le faamaoniga na silafia e le Alii ia Sini Rikitone. Atonu e te manao e faailoga mea ua e maua.

Toe faitau le Mataupu Faavae ma Feagaiga 35:3, ae sui le igoa o Sini i lou igoa. O le a le mea ua aoao mai e le Alii e uiga i Lona silafiaina o i tatou?

Na molimau mai Elder Neal A. Maxwell o le Korama a Aposetolo e Toasefululua, e uiga i le silafia e le Atua o i tatou taitoatasi: “Ou te tautino atu e silafia outou taitoatasi e le Atua … ua loa tausaga (tagai i le MF&F 93:23). Ua loa tausaga o alofa o Ia ia te oe. … Na te silafia foi o outou igoa ma mea uma tou te tiga ma olioli ai!” (“Ia Outou Manatua le Finagalo Alofa o le Alii,” Ensign, Me 2004, 46).

O se tasi o mataupu faavae e mafai ona tatou aoao mai le Mataupu Faavae ma Feagaiga 35:3 o le e silafia i tatou e le Alii ma o loo i ai se galuega mo i tatou taitoatasi e fai. Pe na i ai se taimi na e mafaufau ai po o le a se galuega faapitoa o loo i ai i le Alii mo oe e fai i i lou olaga?

A o le’i ona iloa e uiga i le Ekalesia toefuataiina a Iesu Keriso, na faia e Sini Rikitone se galuega lelei i le avea ai ma se faifeau o se isi ekalesia. Ina ua uma ona auai i le Ekalesia toefuataiina a le Alii, sa mafai ona ia faia “se galuega tele” (MF&F 35:3) mo le malo o le Alii. E mafai ona faia e tagata o isi faatuatuaga ni mea lelei se tele. O lo tatou tiutetauave le faasoa atu ia i latou o le atoatoaga o le talalelei a Iesu Keriso, ina ia mafai ona latou faia “se galuega tele.” E faapena foi, e mafai ona ia i tatou le talitonuga mautinoa e silafia i tatou e le Alii, ma a o tatou taumafai e mulimuli ia te Ia, o le a Ia fesoasoani ia i tatou ia ausia le galuega e tatau ona tatou faia.

I le avea ai o se teuteuala mo Iesu Keriso, na saunia ai e Ioane le Papatiso loto o le toatele o tagata mo Lona afio mai. Faitau le Mataupu Faavae ma Feagaiga 35:4–6, ma vaavaai mo auala na pei ai Sini Rikitone o Ioane le Papatiso. Atonu e te manao e faailoga mea e te maua.

E ui ina i ai ni itu sa pei ai Sini Rikitone o Ioane le Papatiso, ae sa ese mai o ia ia Ioane le Papatiso, aua ina ua papatisoina e Sini ia tagata i lana aulotu sa i ai muamua, sa le’i ia te ia le pule mai le Atua e faia ai (tagai i le MF&F 35:5–6).

Faitau le Mataupu Faavae ma Feagaiga 35:7–11, ma vaavaai mo mea e mafai ona tutupu i olaga o i latou o e talitonu ma faaali le faatuatua i le Atua i aso e gata ai.

Tali fesili nei i lau api talaaga mo le suesueina o tusitusiga paia:
1. O le a le mea e mafai ona tatou aoao mai i le Mataupu Faavae ma Feagaiga 35:7–11, e uiga i le mea ua folafola mai e le Alii e faaali mai ia i latou e mulimuli ia te Ia i le faatuatua? (O le upu Nuuese i le fuaiupu e 7, e faatatau ia i latou e le o i ai le atoatoaga o le talalelei. O le upu Papelonia i le fuaiupu e 11 e faatatau i le lalolagi.)
2. Aisea e te manatu ai o vavega e latalata le sootaga i le faatuatua ia Iesu Keriso? (Ia mafaufau, o vavega e mafai ona maaleale e pei o se suiga o le loto po o le faamagaloga o agasala, ma e oo mai e tusa ai ma le finagalo o le Alii.)

Mataupu Faavae ma Feagaiga 35:13–19

Ua folafola mai le Alii e fesoasoani i e lotomaualalalo e fai Lana galuega

Vaai faalemafaufau e faapea, sa e tuufaatasia se au taaalo (mafaufau i se taaloga e te masani ai). I le avanoa ua saunia, faamatala ai malosiaga ma tomai o le a e manao ia i ai i au tama taaalo.

Faitau le Mataupu Faavae ma Feagaiga 35:13, ma vaavaai po o ai e filifilia e le Alii e faataunuu ai Lana galuega. Ia matau uiga o i latou e filifilia e le Alii e fesoasoani ia te Ia, e le masani ai i tulaga o le lalolagi. “O mea vaivai o le lalolagi” e faatatau i auauna a le Alii. O le upu soli po o le vavae o loo i lenei fuaiupu e faatatau i le vavaeeseina, o le faiga masani lea e tuueseese ai le saito mai lona au ma le pa’u. O le fuaiupu lenei, o loo faatatau i le vavaeeseina ma le faapotopotoina o tagata o e ua saunia e talia le talalelei mai ia i latou e le’i saunia e talia. O se tasi o auala e faia ai lenei mea, e ala lea i faifeautalai e faafesootaia tagata ma saunia i latou e osia ma tausia feagaiga paia.

E tusa ai ma le Mataupu Faavae ma Feagaiga 35:13, ua tatou aoao ai e valaauina e le Atua i latou o e vaivai e faataunuu ai Lana galuega e ala i le mana o Lona Agaga.

Tali le fesili lenei i lau api talaaga mo le suesueina o tusitusiga paia: Aisea e te manatu ua ta’ua ai e le Alii ia Ana auauna e “vaivai,” “le aoaoina”, ma “inosia”?

Faitau le Mataupu Faavae ma Feagaiga 35:14–15, ma vaavaai mo folafolaga a le Alii ia i latou o e fesoasoani i Lana galuega. Atonu e te manao e faailoga mea e te maua. E mafai foi ona e faapatinoina nei fuaiupu e ala i le toe faitauina ma tuu i ai lou igoa.

I lau api talaaga mo le suesueina o tusitusiga paia, tali se lua po o fesili uma nei:
1. E mafai faapefea e le iloa e faaaoga e le Alii mea vaivai o le lalolagi e faataunuu ai Lana galuega e ala i le mana o Lona Agaga, ona fesoasoani i se tagata talavou na lagonaina le popole e uiga i le auauna atu i se misiona?
2. E mafai faapefea e lenei malamalama ona fesoasoani i se tamaitai talavou sa talosagaina e aoao se vasega o le Ekalesia ae [ona] lagonaina le le atoatoa?
3. E mafai faapefea ona fesoasoani lenei malamalama ia i tatou uma pe a tatou lagona le uunaiga e faasoa atu le talalelei i se tasi?

Na fautuaina e Peresitene Thomas S. Monson i latou o e atonu e lagona le vaivai po o le le agavaa e fesoasoani i le galuega a le Alii: “[O] nisi o outou e matamumuli i o outou natura, pe manatu ane ia te outou lava faapea e le gafatia ona talia o se valaauga. Manatua, o le galuega lenei e le o sau galuega na o oe po o sa’u galuega na o au. O le galuega a le Alii, ma a tatou i ai i le feau a le Alii, ua ia i tatou le aia tatau mo le fesoasoani a le Alii. Manatua o le a faagafatia e le Alii le tua e tauamo ai le avega e tuu i ai” (“Ia Aoao, Ia Faia, Ia Avea Ai,” Ensign po o le Liahona, Nov. 2008, 62).

O le Perofeta o Iosefa Samita o le a manatu i ai ni isi e vaivai i aoaoga aloaia ma nisi o ona tomai. O Sini Rikitone, i se faatusatusaga, sa lelei le aoaoina ma talenia i le tele o itu. Faitau le Mataupu Faavae ma Feagaiga 35:17–19, ma vaavaai mo le fautuaga a le Alii ia Sini Rikitone e uiga i le Perofeta o Iosefa.

Tali fesili nei i lau api talaaga mo le suesueina o tusitusiga paia:
1. Aisea o le a taua ai le fautuaga o loo i le Mataupu Faavae ma Feagaiga 35:17–19 i se faifeau na lelei ana aoaoga e pei o Sini Rikitone ona malamalama i ai?
2. E mafai faapefea ona aoga ia i tatou ona manatua lenei fautuaga e uiga i o tatou taitai o le Ekalesia i le taimi nei?

Mataupu Faavae ma Feagaiga 35:20–27

Ua poloaiina Sini Rikitone e tusitusi mo Iosefa Samita, e talai atu le talalelei, ma ia tausi ana feagaiga

O i ai ni ou valaauga faapitoa po o tiute i le Ekalesia? Faitau le Mataupu Faavae ma Feagaiga 35:20–24, ma vaavaai mo tiute patino na valaauina Sini Rikitone e faatino.

Na valaauina e le Alii ia Sini e faatumu le matafaioi o le tusiupu a’o faaauau e le Perofeta o Iosefa Samita lona faaliliuga o le Tusi Paia. O lenei faaliliuga sa le mai i se tasi gagana i le isi. Na faia e le Perofeta ni faasa’oga ma faafouga musuia i le Tusi Paia mo se umi e 16 tausaga. Ua tatou ta‘ua nei faafouga o le Faaliliuga a Iosefa Samita. O le tele o nei faasa‘oga e mafai ona maua i vaefaamatalaga ma le faaopoopoga o le lomiga a le AAG o le Tusi Paia. O le Tusi a Mose ma le Iosefa Samita—Mataio i le Penina Tau Tele o ni vaega foi o le Faaliliuga a Iosefa Samita.

Matau i le Mataupu Faavae ma Feagaiga 35:23 na ta’u mai ai e le Alii ia Sini Rikitone, e ese mai i le tusitusi mo Iosefa Samita, e tatau foi ona ia talai atu le talalelei, e faaaoga ai lona malamalama i tusitusiga paia e lagolago atu ai i upu a le Perofeta.

I le Mataupu Faavae ma Feagaiga 35:24, o a faamanuiaga na folafola mai e le Alii ia Sini Rikitone pe afai na te tausia ana feagaiga? O se tasi o mataupu faavae e mafai ona tatou aoaoina mai lenei fuaiupu o le, pe a tatou tausia poloaiga ma faamamalu a tatou feagaiga, o le a fesoasoani le Alii ia i tatou ia faataunuuina Lana galuega.

Toe vaai i tua i mataupu faavae e tolu na faailoa atu i le lesona lenei. Tali fesili nei i lau api talaaga mo le suesueina o tusitusiga paia:
1. E faapefea ona fesootai mataupu faavae e tolu na faailoa atu i lenei lesona i le tasi ma le isi?
2. O le a se taimi na e lagonaina ai pe molimauina ai le fesoasoani a le Alii na tuuina mai ia te oe po o se tasi e te iloa a’o faia le galuega a le Alii?

O le faaiuga, faitau le Mataupu Faavae ma Feagaiga 35:26–27. Mai mea ua e aoaoina i le taimi o au suesuega o le Mataupu Faavae ma Feagaiga 35 i le aso, aisea e te manatu ai sa i ai se mafuaaga na si’i a’e ai e Sini Rikitone lona loto ma fiafia? O a ni mafuaaga o i ai e si’i a’e ai lou loto ma fiafia?

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mataupu Faavae ma Feagaiga 35 ma faamaeaina lenei lesona i le (aso).

O fesili, mafaufauga, ma manatu faaopoopo ou te fia faasoa atu i lo’u faiaoga: