Iunite 11: Aso 2
Mataupu Faavae ma Feagaiga 45:16–75
Faatomuaga
I le faagasologa o le talafaasolopito, e toatele tagata na i ai ni manatu eseese e uiga i le Afio Mai Faalua o Iesu Keriso. Sa tonu lenei mea ia Mati 1831 ina ua maua le faaaliga o loo i le Mataupu Faavae ma Feagaiga 45. I lenei faaaliga na tuuina mai ai e le Alii ni fetalaiga auiliili, e uiga i ni mea faapitoa e tutupu ma faailoga e o mai faatasi ma Lona Afio Mai Faalua, e aofia ai le faatuina o le Ierusalema Fou (po o Siona). Na faatonuina foi e le Alii le Perofeta o Iosefa Samita e amata ona galue i se faaliliuga o le Feagaiga Fou, e saunia ai le Au Paia mo mea e oo mai.
Mataupu Faavae ma Feagaiga 45:16-46
Na faaali mai e le Faaola le tele o faailoga ma mea e tutupu ia e muamua mai i Lona Afio Mai Faalua
E faapefea ona e iloa ua latalata mai se afa? Aisea e aoga ai le iloa po o a na faailoga?
O i latou o e iloa faailoga o se mea e tupu ua latalata mai, e mafai ona saunia i ai. O a ni faailoga ua e iloa e te mataala i ai e faapea, o mea e tutupu o loo i lalo ua oo mai pe o loo agai mai?
-
O aso mulimuli
-
O Le Afio Mai Faalua o Iesu Keriso
E pei ona faaalia i le Mataupu Faavae ma Feagaiga 45:16, o tagata i vaitaimi o le galuega a Iesu Keriso i le tino, e pei foi o i latou i le taimi o Iosefa Samita ma aso nei, sa fia iloa atili e uiga i mea e tutupu e tau atu i le Afio Mai Faalua o le Faaola. I le Mataupu Faavae ma Feagaiga 45 na faamatalaina mai ai e le Alii ia faailoga ina ia tatou nofouta ai i le oo mai o lenei mea. O le tele o fuaitau i le Mataupu Faavae ma Feagaiga 45 o mea na faaali mai e le Alii i Ona soo o e sa nonofo faatasi ma Ia i Lana galuega i le tino (tagai i le Mataio 24).
-
Ina ia iloa faailoga na fetalai mai le Faaola o le a muamua mai i Lona Afio Mai Faalua, tusi mau faasino nei i lau api talaaga mo le suesueina o tusitusiga paia; tusi mau faasino taitasi i laina eseese ma tuu se avanoa e tusi ai i lalo ia faailoga: MF&F 445:18–21; MF&F 45:22–27; MF&F 45:28–31, 33; MF&F 45:40–43. Ona faitau lea o fuaiupu i mau faasino taitasi, ma vaavaai mo faailoga o le a muamua mai i le Afio Mai Faalua, ma tusi faailoga i autafa o le mau faasino. Afai e te filifili e faia lena mea, ia tusi ni ata o mea e te faitauina nai lo o le tusia o faailoga.
O nisi o nei faailoga o le Afio Mai Faalua ua uma ona tutupu. Mo se faataitaiga. sa faatamaiaina le malumalu i Ierusalema e le au Roma i le T.A.70 (tagai i le MF&F 45:18–21). O le fuaitau “aso o Nuuese” i le Mataupu Faavae ma Feagaiga 45:25 e faatatau i le taimi na tuuina atu muamua ai le talalelei i Nuuese, po o i latou e le tupuga mai Iutaia, o le taimi lea o loo tatou ola ai i le aso.
Faitau le Mataupu Faavae ma Feagaiga 45:34, ma vaavaai po o a ni lagona o le au soo i le taimi o le galuega a le Faaola i le tino, ina ua Ia ta’u atu ia i latou nei mea. Aisea e te manatu e ono i ai ni lagona talitutusa o tagata i aso nei e faatatau i faailoga o le Afio Mai Faalua o le Faaola?
Faitau le Mataupu Faavae ma Feagaiga 45:38, ma vaavaai mo mea o le a tatou iloa pe a tatou vaaia le faataunuuina o faailoga.
Faitau le Mataupu Faavae ma Feagaiga 45:32, 39. A o e suesue i nei fuaiupu, faailoa mai mea o le a faia e soo o Iesu Keriso i o tatou aso, ina ia saunia ai mo Lona Afio Mai Faalua. Vaai i le fuaiupu e 39, vaefaamatalaga a e iloa ai le isi upu mo le “fefe.”
E faavae i mea na e aoaoina, o le a le folafolaga a le Alii ia i latou o e tutu i nofoaga paia ma faaaloalo ia te Ia? Faauma le mataupu faavae lenei: Afai tatou te tutu i nofoaga paia ma vaavaai mo faailoga, o le a tatou .
E masani ona tatou mafaufau i “nofoaga paia” o nofoaga o le Ekalesia, e pei o malumalu po o le falelotu. A o e faitauina le faamatalaga lenei, e vaavaai mo se isi auala tatou te tutu ai i nofoaga paia:
“O ‘nofoaga paia’ e mafai ona tele atu lona faatatauga i le o faapefea ona ola se tagata nai lo o le o fea o ola ai. Afai tatou te ola agavaa mo le mafutaga faifai pea a le Agaga Paia, ua tatou tutu i se nofoaga paia. …
“O se nofoaga paia o soo se nofoaga lea e fiafia ai se tagata i le Agaga o le Atua” (Mataupu Faavae ma Feagaiga Tusi Lesona a le Tagata o le Vasega, 2nd ed. [Church Educational System manual, 2001], 196).
-
-
E mafai faapefea ona tatou ola i le lalolagi i le taimi nei ma tutu pea i nofoaga paia?
-
E faapefea ona mata’u, pe faaaloalo se soo o Iesu Keriso ia te Ia i aso taitasi? Faamatala se tagata e te iloa o faia lenei mea.
-
Mataupu Faavae ma Feagaiga 45:47-59
Ua faaali mai e le Faaola faailoga ma mea ofoofogia o le a i ai i Lona faaali mai i tagata Iutaia
Pe a toe foi mai Iesu Keriso, o le a Ia faia ni asiasiga i ni vaega faapitoa. Ona Ia faaali mai lea i le mana, silisili ese, ma le mamalu tele, i se tulaga o le a vaai ai le lalolagi atoa ia te Ia. I le taimi o se tasi o Ana asiasiga, o le a tu ai o Ia i luga o le Mauga o Olive i Ierusalema a o osofaia tagata Iutaia. Faitau le Mataupu Faavae ma Feagaiga 45:48, ma vaavaai mo le mea o le a tupu i lenei mauga ma le lalolagi pe a tu ai i luga le Faaola.
Faatumu le siata lenei e ala i le faitauina o fuaiupu ma tali fesili i au lava upu:
|
MF&F 45:49–50: O le a le mea o le a tupu i malo o le lalolagi i le Afio Mai Faalua? |
MF&F 45:51–53: Aisea o le a fetagisi ai tagata Iutaia pe a toe foi mai le Alii? |
|---|---|
Afai e te le’i iloa le faataoto i taupou e toasefulu, faitau le Mataio 25:1-13. O a ni auala na popoto ai taupou e toalima? Faitau le Mataupu Faavae ma Feagaiga 45:56–57, ma vaavaai mo auala ia atamai ai i au sauniuniga mo le Afio Mai Faalua. Mafaufau e faailoga mea e te maua.
Tusi se mataupu faavae “Afai-Ona” e faamalamalama ai se mea e tatau ona tatou faia ina ia atamamai ai ma saunia mo le Afio Mai Faalua:
Na saunoa Elder Dallin H. Oaks o le Korama a Aposetolo e Toasefululua, e uiga i le faataoto lenei, ma mea e faatusa i ai taupou e toasefulu: “O le matua taufaamata’u lava o le savali o lenei faataoto. O taupou e toasefulu, e faasino i tagata o le ekalesia a Keriso, aua sa valaaulia uma lava i le tausamaaga o le faaipoipoga, ma sa iloa foi e tagata uma mea sa manaomia, ina ia mafai ai ona ulufale atu pe a sau le faatoafaiava Ae sa na o le afa o i latou sa saunia ina ua sau o ia” (“Sauniuniga mo le Afio Mai Faalua,” Ensign po o le Liahona, Me 2004, 8).
Sa faaaoga e Peresitene Spencer W. Kimball le faataoto i taupou e toasefulu, e aoao mai ai e uiga i auala e mafai ona tatou saunia ai mo le Afio Mai Faalua o le Faaola:
“Ou te talitonu o Taupou e Toasefulu e faatusa i tagata o le Ekalesia a Iesu Keriso ae le o isi tagata uma o le lalolagi. Sa talia e taupou uma, popoto ma valea, le valaaulia i le ‘aiga o le faaipoipoga; sa latou iloaina le polokalama ma sa lapataiina i le aso taua o le a oo mai. …
“I le vaeluapo! I le itula tonu lava e sili ona pogisa, i le taimi e le’i mafaufauina, na sau ai le faatoafaiava. Pe a tumu le lalolagi i faigata ma manaomia le fesoasoani, ae e foliga mai ua te’a le taimi ma ua le aoga le faamoemoe, o le a afio mai ai Keriso. O taimi aupito pogisa o le olaga, o taimi ia e oo mai ai le lagi e ofo mai lona olioli mo le vaivai o tagata. Ae a faalogoina loa le alaga, e leai se taimi mo sauniuniga. …
“Na fesili atu le au valea i isi e faasoa mai a latou suauu, ae o le saunia faaleagaga, e le mafai ona tufatufaina i se taimi vave. Na tatau ona o le au popoto, ina ne’i alu le faatoafaiava ae le faafeiloaia. Sa latou manaomia a latou suauu uma mo i latou lava; sa le mafai ona latou laveaia le au valea. Sa i ai i le tagata le tiutetauave mo ia lava.
“Sa le o se manatu faapito po o le agaleaga lea mea. O le ituaiga suauu e manaomia e faamalamalama ai le ala ma faasusulu i le pogisa e le mafai ona faasoaina. E mafai faapefea e se tagata ona faasoa atu le usiusitai i mataupu faavae o le sefuluai; se mafaufau toafilemu ona o le ola amiotonu; se faaputuga o le malamalama? E mafai faapefea ona faasoa atu e se tasile faatuatua poo molimau? E mafai faapefea e se tasi ona faasoa atu uiga faaleatua po o le ola mama, po o le aafiaga o se misiona? E mafai faapefea ona faasoa e se tasi avanoa o le malumalu? E tatau i tagata taitoatasi ona maua lena ituaiga suauu mo ia lava.
“Sa le’i tetee taupou valelea i le faatauina mai o suauu. Sa latou iloa e tatau ona i ai ni suauu. Ae sa latou faatuai, ma le le iloa o le taimi e sau ai le faatoafaiava.
“I le faataoto, e mafai ona faatau mai suauu i le maketi. I o tatou olaga, o le suauu o le saunia e faaputuputu i lea mataua ma lea mataua i le ola ai amiotonu. O le auai i sauniga faamanatuga e faaopoopo ai le suauu i a tatou lamepa, o lea mataua ma lea mataua i le aluga o tausaga. O le anapogi, tatalo faaleaiga, faiaoga o aiga, pulea o tuinanau o le tino, talai atu o le talalelei, suesuesina o tusitusiga paia—o faatinoga taitasi o le tuuto ma le usiusitai o se mataupu e faaopoopoina i la tatou faleteuoloa. O galuega o le agalelei, totogiina o taulaga ma sefuluai, mafaufauga ma amioga mama, faaipoipoga i le feagaiga mo le faavavau—o nei foi mea, e taua lo latou saofaga i le suauu lea e mafai ona tatou toe utuina ai a tatou lamepa ua fai ifo le mumu i le vaeluaga o le po” (Faith Precedes the Miracle [1972], 253–56).
-
Sa molimau mai Peresitene Boyd K. Packer o le Peresitene o le Korama a Aposetolo e Toasefululua, i le taua o le mauaina o le Agaga i taimi o faafitauli:
“Ua tatou ola i se vaitaimi o faaletonu—o le matua faaletonu lava. Tatou te faamoemoe, tatou te tatalo, mo aso e sili atu ona lelei. Ae e le o le mea lena e i ai. Ua ta’u mai e valoaga ia i tatou lena mea. I le avea ai o i tatou o se nuu, o ni aiga, po o ni tagata taitoatasi foi, o le a tatou le tuusaunoa mai i tofotofoga o le a oo mai. …
“E le tatau ona tatou matatau i le lumanai. Ua ia i tatou mafuaaga e tele tatou te olioli ai ae itiiti, ni mafuaaga e matatau ai. Afai tatou te mulimuli i uunaiga a le Agaga, o le a tatou saogalemu, po o le a lava le mea e tulai mai i le lumanai. O le a faaali mai ia i tatou le mea e ao ona fai” (“O Laulaufaiva e Peiseai o le Afi ua Vaevaeina,” Liahona, Iulai 2000, 9).
Mataupu Faavae ma Feagaiga 45:60-61
Ua faatonu e le Alii le Perofeta o Iosefa Samita e amata lana faaliliuga o le Feagaiga Fou
Faitau pe sii mai le Mataupu Faavae lona valu o le Faatuatua. O le a le mea o loo ta’u mai e le fuaitau “e tusa ma mea ua tonu ona faaliliuina” e uiga i le Tusi Paia? Sa liliu atu Iosefa Samita i fuaitau o le Tusi Paia ina ua ia saili ia iloa po o le fea ekalesia e auai. Sa fiafia o ia i le Tusi Paia ma maua ai se faamafanafanaga tele mai i ana upu. Ae peitai, a o ia suesue i ai, sa ia matauina ni mea sese ma feteenaiga ma lagonaina e i ai nisi o faamatalaga na misi pe le atoatoa, ma sa ia faamatala mai, “sa iloa mai ai o le tele o vaega taua e uiga i le faaolataga o le tagata ua aveeseina mai le Tusi Paia, po ua leiloa ao lei tuufaatasia” (Aoaoga a Peresitene o le Ekalesia: Iosefa Samita [2007],231; tagai foi i le Bible Dictionary, “Bible”).
Sa ia fai mai foi: “Ou te talitonu i le Tusi Paia i le faitauina mai i tusitusiga a uluai tusiupu. O le au faaliliu le magafagafa, o le au tusitusi faatamala, po o ositaulaga taufaasese ma le le faamaoni ua latou faia mea sese e tele” (Aoaoga: Iosefa Samita,219; tagai foi i le 1 Nifae 13:25–29).
Po o se vaitaimi o le tautoulu i le 1830, na poloaiina ai e le Alii le Perofeta o Iosefa Samita e faaliliu le Tusi Paia. O lenei “faaliliuga” sa le mai i se tasi gagana i le isi, pe sa i ai foi i le Perofeta se uluai tusitusiga faaletusi paia e galulue mai. Nai lo o lena, na te faitauina ma suesue i fuaitau mai le lomiga a King James o le Tusi Paia ma fai ai faasa’oga ma faaopoopoga e pei ona sa musuia ai e le Agaga. Faatasi ai ma lona lomiga musuia, ua faamanuiaina ai e le Faaliliuga a Iosefa Samita (FIS) le lalolagi e ala i le faamaninoina o anotusi o aoaoga faavae o loo i le Tusi Paia, ae maise lava e faatatau i le misiona a Iesu Keriso ma le natura o le Atua.
Ina ua tuuina mai le faaaliga o loo i le Mataupu Faavae ma Feagaiga 45 i le aso 7 o Mati, 1831, sa galue Iosefa Samita i lana toefaafouga musuiaina o le Feagaiga Tuai. O le aso na sosoo ma le aso na maua ai e Iosefa le faaaliga lenei, sa ia amata faaliliuina ai le Feagaiga Fou. Faitau le Mataupu Faavae ma Feagaiga 45:60–61 ia iloa ai pe aisea.
Mataupu Faavae ma Feagaiga 45:62-64
Ua muai lapataiina le Au Paia e faapotopoto i atunuu i sisifo
Na faatonuina e le Alii le Au Paia anamua e siitia atu agai i sisifo, “i fafo mai laueleele i sasae” (MF&F 45:64). Vaai i le faafanua lenei e vaai faalemafaufau ai i lenei eria.
Faitau le Mataupu Faavae ma Feagaiga 45:62–64 e faailoa mai ai se mafuaaga pe aisea na poloaiina ai e le Alii Lana Au Paia e faapotopoto atu i “itu-laueleele i sisifo” (MF&F 45:64).
O le a le mea na fetalai mai le Alii sa “i o outou faitotoa lava” (MF&F 45:63)?
Mafaufau loloto po o le a sou manatu i le uiga o le faatusa “i o outou faitotoa lava”.
I le 1831 o le tuaoi i sisifo o le Iunaite Setete sa tau atu lava i le faatausiusiuga o Misuri. O le a taiala i se taimi mulimuli ane e le Alii le Au Paia i talaatu lava i sisifo—i se nofoaga ua ta’ua nei o Iuta. A o ustaia e le Au Paia le fautuaga a le Alii, sa taitaiina ese mai i latou mai mala na fesootai ma le Taua a le Malo i Amerika (1861–65).
Mataupu Faavae ma Feagaiga 45:65-75
Ua faamatala mai e le Alii le Ierusalema Fou (Siona)
Ana mafai ona e nofo i soo se mea lava, o fea e te fia nofo ai? Aisea?
Faitau le Mataupu Faavae ma Feagaiga 45:65–67, ma vaavaai mo le igoa o le laueleele o le tofi o le Au Paia, ma mafuaaga pe aisea o le a avea ai ma nofoaga moomia mo i latou e ola ai.
-
Na aoao mai e nei fuaiupu e faapea, o le Ierusalema Fou o le a avea ma se nofoaga o le filemu ma le saogalemu, ma o le a i ai iina le mamalu o le Alii. I le Mataupu Faavae ma Feagaiga 45:67, matau po o le a le mea o le a i ai iina e faaopoopo atu i le mamalu o le Alii. O le a le mea na fetalai mai le Alii sa o se taunuuga o le i ai foi iina o le “mataʼu o le Alii”?
Faitau le Mataupu Faavae ma Feagaiga 45:68–71, ma vaavaai po o ai o le a faapotopoto mai i le Ierusalema Fou (Siona).
-
-
Ua ou suesueina le Mataupu Faavae ma Feagaiga 45:16–75 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: