Iunite 31: Aso 3

Folafolaga Aloaia 1 ma le Faaauau Pea o le Atiina A’e o le Galuega o le Malumalu

Faatomuaga

E pau le taimi e faatagaina ai autaunonofo, pe a poloaiina ai e le Alii e faatutu mai ni fanau e faataunuu ai Ona faamoemoega (tagai i le Iakopo 2:27–30). Ina ua uma ona maua e le Perofeta o Iosefa Samita le faaaliga na faatonuina ai o ia e aoao atu le mataupu faavae o faaipoipoga autaunonofo, sa ulu atu o ia i ni faaipoipoga e tele, ma sa ia faatagaina nisi o tagata o le Ekalesia e fai autaunonofo i le amataga o le vaitaimi o le1840. I tausaga na mulimuli ane ai, sa oo ai le Ekalesia i le tetee o tagata lautele ona o lenei faiga. “Ina ua mavae le mauaina o le faaaliga, na fofogaina ai e Peresitene Wilford Woodruff le … Manefeso [Folafolaga Aloaia 1], lea na taliaina e le Ekalesia o se poloaiga ma faamauina i le aso 6 o Oketopa, 1890. O lenei mea na iu ai i le faamutalia o le faiga o faaipoipoga autaunonofo i le Ekalesia” (Folafolaga Aloaia 1, folasaga). I lena lava vaitaimi, sa galulue ai ma le filiga le Au Paia e fausia malumalu, lea na latou mauaina ai sauniga faaola mo i latou lava ma mo e ua maliliu.

Ua Faaali Mai e le Alii ua Tatau i le Au Paia o Aso e Gata Ai ona Taofia le Faiga o Faaipoipoga Autaunonofo

E mafai ona e mafaufau i nisi o faataitaiga o ni tagata amiotonu o e na molia pe faafalepuipuiina mo le faia o le mea na poloaiina i latou e le Atua e fai?

E toatele alii o le Au Paia o Aso e Gata Ai, sa pueina ma faafalepuipuiina ona sa faaauau pea ona latou usiusitai i le poloaiga e fai faaipoipoga autaunonofo ina ua uma ona pasia e le malo o le Iunaite Setete ia tulafono e le faatagaina ai faaletulafono lea faiga. Sa faapea foi ona tapueina nisi o tamaitai, na matele lava ona latou te le’i faailoaina nofoaga sa i ai a latou tane, o e na lalafi e aloese ai ma le tapueina.

A o e faitau i le parakalafa lenei, faailoga nisi o faigata sa oo i uluai tagata o le Ekalesia a o latou usitaia le faatonuga a le Alii ia latou faia ni faaipoipoga autaunonofo:

Ia Aokuso 1852, i le avea ai ma se vaega o se konafesi i le Aai o Sate Leki, na fofogaina faalauaitele ai e tatitai o le Ekalesia e faapea, i lalo o le poloaiga a le Atua, sa faia ai e nisi o tagata o le Ekalesia ni faaipoipoga autaunonofo. E toatele taitai faalelotu ma faaupufai i le Iunaite Setete na tetee i lenei faiga o faaipoipoga, lea sa latou manatu i ai e le mama ma le talafeagai. Sa tauemuina le Au Paia o Aso e Gata Ai i lauga faalauaitele, tusi, mekasini ma nusipepa. Sa pasia e le Konakeresi a le Iunaite Setete ia tulafono e taofia ai le saolotoga a tagata o le Ekalseia ma afaina ai le tamaoaiga o le Ekalesia e ala i le faatapulaaina o le aofai o fanua e mafai ona anaina e le Ekalesia. O nei tulafono na iu lava ina oo atu i le pueina ma le faafalepuipuiina o alii, o e sa sili atu ma le tasi le ava. Sa teena foi e nei alii “le aia tatau e palota ai, le aia tatau o le le faalauaiteleina i o latou aiga, ma le olioli i isi mea e saoloto ai faalemalo” (O Lo Tatou Tupuaga: O Se Talafaasolopito Otooto O Le Ekalesia a Iesu Keriso o le Au Paia o Aso e Gata Ai [1996], 97). E oo ane i le 1890, ua faitau selau tagata faamaoni o le Au Paia o Aso e Gata Ai sa tuli o latou faasalaga i le falepuipui mo le faiga o faaipoipoga autaunonofo. O isi sa lalafi ina ia aloese ai mai le pueina ma le faafalepuipuiina. I nei tulaga, e toatele aiga sa mafatia mai le popolevale, faanoanoa, mativa, ma le fia aai.

Peresitene Wilford Woodruff

O nei tulaga faigata na taitai atu ai Peresitene Wilford Woodruff e saili ma le agaga tatalo le taitaiga a le Alii e faatatau i le Au Paia sa faia faaipoipoga autaunonofo. I le 1889, na faatonuina ai e Peresitene Woodruff ia taitai o le Ekalesia e faamutaina le aoaoina atu o le mataupu faavae o faaipoipoga autaunonofo. Ae peitai, sa lomia e nisi o tagata ia lipoti e faapea, sa faaauau lava ona faalauiloa e le Ekalesia le faiga o faaipoipoga autaunonofo. O nei lipoti na atili aumai ai le tetee e faasaga i le Ekalesia. I le 1890, na tuuina mai ai e Peresitene Woodruff se Manefeso, lea ua ta‘ua nei o le Folafolaga Aloaia 1 i le Mataupu Faavae ma Feagaiga.

I parakalafa muamua e tolu o le Folafolaga Aloaia 1, na tautino mai ai e Peresitene Woodruff e faapea, o lipoti na faapea mai sa uunaia pea lava e le Ekalesia le faiga o faaipoipoga autaunonofo sa le sa‘o lea.

Faitau parakalafa lona fa ma le lima o le Folafolaga Aloaia  (amata mai i le “Talu ai ona ua faia”) ma le faamatalaga o loo sosoo mai ai a Peresitene Lorenzo Snow, o lē sa avea i lena taimi ma Peresitene o le Korama a Aposetolo e Toasefululua. Vaavaai mo le, ma faailoga le mea sa faatonuina e Peresitene Woodruff le Au Paia e fai.

E tusa ai ma le saunoaga a Peresitene Lorenzo Snow, aisea na taua ai le ala mai i le Peresitene o le Ekalesia le taitaiga e taofia ai le toe faia o ni isi lava faaipoipoga autaunonofo?

E taua ona malamalama o le Peresitene o le Ekalesia, ua na o le pau lea o le tagata i le lalolagi ua umia ki o sauniga o le faamauga. E pau lava le taimi e mafai ona faatagaina ai faaipoipoga autaunonofo, e ala lea i ki o le perisitua ua tuuina mai i le Peresitene o le Ekalesia (tagai i le MF&F 132:7, 48).

Faitau le parakalafa muamua o le “O ni Upusii mai ni Saunoaga e tolu a Peresitene Wilford Woodruff e uiga i le Manefeso,” o loo sosoo ane i le tusiga o le Manefeso. Vaavaai mo se, ma faailoga se mataupu faavae na aoao mai e Peresitene Woodruff i le Au Paia.

1. Tali fesili nei i lau api talaaga mo le suesueina o tusitusiga paia:

   1. O le a le mataupu faavae na aoao mai e Peresitene Woodruff i le Au Paia?

   2. Aisea e te manatu e taua ai ona tatou maua se molimau e faapea, o le a lē faatagaina lava e le Alii le Peresitene o le Ekalesia e taitai ese le Ekalesia?

Sa mafaufau nisi o tagata o le Ekalesia pe aisea na faatonuina ai i latou e ola i le mataupu faavae o faaipoipoga autaunonofo ona toe faatonuina lea e taofi. Na faatonuina e le Alii ia Peresitene Woodruff e fai i le Au Paia se fesili. Faitau parakalafa lona tolu, fa, ma le lima “O ni Upusii mai ni Saunoaga e tolu a Peresitene Wilford Woodruff” (amata i le “Sa ou maua ni faaaliga”), ma vaavaai mo le fesili na fai atu e Peresitene Woodruff i le Au Paia.

Sa i ai le Au Paia i se tulaga matautia o le aveesea o le Malumalu o St. George Iuta, o le Malumalu o Logan Iuta, o le Malumalu o Manti Iuta, ma le Malumalu o Sate Leki lea na toeitiiti maea. O le a le galuega taua o le a taofia pe afai e faoa e le malo o le Iunaite Setete ia malumalu?

Sa i ai le Au Paia i se tulaga matautia o le aveesea o malumalu

Faitau le parakalafa lona fitu “O ni Upusii mai ni Saunoaga e tolu a Peresitene Wilford Woodruff” (amata i le “… Sa ou vaai tonu lava”), vaavaai mo le mea na semanu e fai e Peresitene Woodruff pe ana le poloaiina o ia e le Atua e faatonu taitai o le Ekalesia e faamuta le faiga o le faatinoina o faaipoipoga autaunonofo.

O le a se mea e mafai ona tatou aoao mai i le saunoaga a Peresitene Woodruff “sa ou tusia le mea na fetalai mai le Alii ia te a’u ia tusia”?

O se tasi o aoaoga faavae e mafai ona tatou aoaoina mai i lenei vaega o le, e faatonutonu mai e le Alii Lana Ekalesia e ala i faaaliga i le Peresitene o le Ekalesia.

2. Faamaea ni gaoioiga se lua po o gaoioiga uma nei i lau api talaaga mo le suesueina o tusitusiga paia:

   1. Mafaufau i ni taimi na e molimauina ai le taitaiga e le Alii o Lana Ekalesia e ala i faaaliga i le Peresitene o le Ekalesia. Faamatala ni faataitaiga se lua ua e mafaufauina.

   2. Tusi ni fuaiupu se 2-3 e uiga i ni auala na faia ai e lenei aoaoga faavae ni aafiaga i au faaiuga sa fai.

   3. Fesili atu i se tagata o le aiga po o se uo pe faapefea ona ia iloa, e taitaia e le Alii ia Lana Ekalesia e ala i faaaliga i le Peresitene o le Ekalesia. Tusi e uiga i ni mea sa e aoaoina mai i le talanoaga.

Sa faaauau pea e se vaega toaitiiti o le Au Paia o Aso e Gata Ai ona faia faaipoipoga fou autaunonofo ina ua uma ona tuuina atu le Manefeso. I le 1904, sa faalauiloa atu ai e Peresitene Iosefa F. Samita se folafolaga aloaia, “e faapea ua faasaina ai faaipoipoga [autaunonofo] uma, ma afai o le a faaauau pea e se taitai [Perisitua] po o se tagata o le Ekalesia ona faatinoina pe ulu atu i soo se faaipoipoga faapena, o ia lena o le a faapea [manatulia] ona solitulafono e faasaga i le Ekalesia … ma faapea ona tape ai le igoa [mai le Ekalesia]” (i le Conference Report, Ape. 1904, 75). O lenei aiaiga faavae o loo faaauau pea i aso nei. Mo nisi faamatalaga, alu i le LDS.org, filifili le Autu o le Talalelei, ma saili mo autaunonofo.

O le faamatalaga lenei, lea ua avea o se folasaga i le Folafolaga Aloaia 1 i le lomiga o le 2013 o tusitusiga paia, e mafai ona fesoasoani ia te oe e tali i fesili e uiga i le faiga e le Au Paia o Aso e Gata Ai o faaipoipoga autaunonofo i le vaitaimi o le 1800.

Ata pue o Peresitene Iosefa F. Samita (ogatotonu) ma lona aiga

“Ua aoao mai le Tusi Paia ma le Tusi a Mamona e faapea, o le tasi o le toalua [o le tagata] o le tulaga faatonuina lea a le Atua mo faaipoipoga sei vagana ai ua Ia fofogaina mai se isi tulaga e ese ai (tagai i le 2 Samuelu 12:7-8 ma le Iakopo 2:27, 30). I le mavae ai o se faaaliga ia Iosefa Samita, sa faapea ona amataina ai le faiga o faaipoipoga autaunonofo i tagata o le Ekalesia i le amataga o le vaitaimi o le 1840 (tagai i le vaega 132). Mai le vaitaimi o le 1860 i le vaitaimi o le 1880, sa pasia ai e le malo o le Iunaite Setete ni tulafono e faasaina ai lenei faiga faalelotu. Na iu lava ina lagolagoina nei tulafono e le Faamasinoga Maualuga a le I.S. Ina ua mavae le mauaina o le faaaliga, sa faapea ona tuuina mai e Peresitene Wilford Woodruff le Manefeso lenei, lea sa taliaina e le Ekalesia o se poloaiga ma ua faamauina i le aso 6 o Oketopa, 1890. O lenei mea na oo atu ai i le faamutaina o faaipoipoga autaunonofo i le Ekalesia.”

3. E faavae i luga o mea ua e aoaoina i le aso, o le a faapefea ona e tali atu pe afai e fesili atu se tasi ia te oe, pe fai e le Au Paia o Aso e Gata Ai ia faaipoipoga autaunonofo? Tusi lau tali i lau api talaaga mo le suesueina o tusitusiga paia.

Agai Pea i Luma le Galuega o le Malumalu

Ina ua uma ona tuuina mai le Manefeso, sa gata ai foi ma le faamata’u a le malo tele o le aveeseina o malumalu ma meatotino a le Ekalesia. Ua aunoa ma lena faalavelave, sa faapea ona mafai e le Au Paia ona tuuina atu se taulaiga sili atu i le galuega o le malumalu. I le 1893, ina ua mavae le 40 tausaga talu ona faataatitia maatulimanu o le Malumalu o Sate Leki, sa faapaiaina ai loa e Peresitene o Wilford Woodruff lena malumalu, ma oo ai le aofaiga o malumalu na faaaogaina i le fa.

Ia Aperila 1894, i le tasi o le tausaga talu ona mae‘a le faapaiaga o le Malumalu o Sate Leki, na fofoga mai ai e Peresitene Woodruff e faapea, na ia mauaina se faaaliga e faamanino mai ai le faiga o sauniga o faamauga, po o faamauga e faavavau. A o lei oo mai lenei faaaliga, sa masani ona faia e tagata o le Ekalesia, e tusa ai ma le malamalama sa ia i latou, le faamauina o i latou lava po o le “vaetamaina,” i taitai o le Ekalesia nai lo i o latou lava matua. E faavae i luga o le faaaliga fou, lea sa ia molimau mai o le “finagalo lea o le Alii i lenei nuu,” na faatonuina ai e Peresitene Uitilafi le Au Paia “ia saili o latou gafa i le mamao e mafai ona latou faia, ma ia faamauina i o latou tama ma tina. Ia faamauina fanau i o latou matua, ma faasolo atu lenei fesootaiga ia oo atu i le mamao e mafai ona oo i ai” (Aoaoga a Peresitene o le Ekalesia: Wilford Woodruff [2004], xxxiv–xxxv).

E faavae i luga o le faamatalaga lenei a Peresitene Woodruff, ua tatou aoao ai i le mataupu faavae lenei: E mafai ona faamauina i tatou i tagata o o tatou aiga, e aofia ai latou o e na muamua mai ia i tatou ma i latou o e o le a mulimuli mai ia i tatou, e ala i le sauniga o le faamauga.

O sauniga o le faamauga ina ia faatasia ai aiga mo le faavavau, e na o totonu lava o malumalu e faataunuuina ai.

4. Tali le fesili lenei i lau api talaaga mo le suesueina o tusitusiga paia: E mafai faapefea ona avea le sauniga o le faamauga ma se faamanuiaga ia te oe ma lou aiga i le taimi o lenei olaga ma le olaga a sau?

5. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Sa ou suesueina le lesona “Folafolaga Aloaia 1 ma le Atiina Ae Faifai Pea o le Galuega o le Malumalu” ma faamaeaina i le (aso).

   O fesili, mafaufauga ma manatu faaopoopo ou te fia faasoa atu i lo’u faiaoga: