Iunite 13: Aso 2

Mataupu Faavae ma Feagaiga 57

Faatomuaga

Ia Iuni 1831, na poloaiina ai e le Alii ia Iosefa Samita ma isi toeaina e tauaofia i se konafesi a le Ekalesia i Misuri (tagai i le MF&F 52). O le usiusitai i le poloaiga, sa malaga ai le Perofeta o Iosefa Samita ma isi i le pe tusa ma le 900 maila mai Ohaio i Misuri. Ina ua taunuu Iosefa i Misuri, sa ia mauaina ai le faaaliga lenei ua faamaumauina i le Mataupu Faavae ma Feagaiga 57. I le faaaliga lenei na faaali mai ai e le Alii le nofoaga mo le aai o Siona, ua faataunuuina ai se folafolaga sa Ia faia i se taimi muamua atu i le Au Paia (tagai i le MF&F 52). Na faatonuina foi e le Alii le tele o tagata e uiga i o latou matafaioi i le faatuina o Siona.

Mataupu Faavae ma Feagaiga 57:1–6

Ua faaali mai e le Alii le tulaga o le aai o Siona

Faitau le saunoaga lenei a le Perofeta o Iosefa Samita ina ia malamalama atili ai i ona lagona e uiga i le faavaeina ma le fausiaina o Siona:

“O le feiloaiga ma o tatou uso o [Oliver Kaotui, Pita Uitimera le Itiiti, Ziba Peterson, ma Frederick G. Williams, o i latou uma sa o atu i Misuri o ni faifeautalai], o e na leva ona faatalitali mo lo matou taunuu mai, sa o se feiloaiga fiafia, ma sa maligi loimata o le toatele o le usoga. Sa foliga mai e lelei ma manaia mo le usoga le faapotopoto faatasi i le lotogatasi. Peitai sa tele o matou manatunatuga, o le o mai e pei ona sa matou o mai ai mai se setete o tagata i sasae na maualuga le faafaileleina, ae ua tutu nei i luga o tuaoi po o tapulaa o le itulagi i sisifo o le Iunaite Setete, ma vaavaai atu i le vao tele o i latou o e sa nonofo i le pogisa; o se tulaga masani le matauina o le faalumaina, leai o se atamai, taufeai, ma le lotoleaga o se nuu lea na toeitiiti a seneturi e maotua ai o latou olaga, ma lagona le misi alofa ia i latou o e na feofeoai solo e aunoa ma faamanuiaga o se nuu ua maualuga le atinaega, alualu i luma, po o tapuaiga, ioe, o se alaga i le gagana a Perofeta e faapea: ’O afea ea e fuga mai ai le vaomatua e pei o le rosa? O afea ea e faatu ai Siona i lona mamalu, ma o fea e tu ai Lou malumalu, lea o le a omai i ai atunuu uma i aso e gata ai?’ Sa vave ona mapu lo matou atuatuvale ina ua maua mai le [faaaliga lenei: MF&F 57]“ (i le History of the Church, 1:189).

Mafaufau i se taimi sa e faatalitali ai ma le naunautai mo se mea, e pei o le faamanatuina o se aso malolo po o se aso fanau, auauna atu i se misiona, asiasi atu i le malumalu, mauaina o se meaalofa, po o le asiasi atu i se tasi e pele ia te oe. O a ni ou lagona na i ai a’o latalata mai le mea sa e faatalitali i ai? Aisea na matua taua ai lenei mea ia te oe? Na faapefea ona atagia i au amioga ia lou fiafia mo lenei mea na tupu?

O le toatele o le Au Paia anamua sa faatalitali ma le naunautai e fia iloa le nofoaga tonu o le aai o Siona. A o lei tuuina mai le faaaliga i le Mataupu Faavae ma Feagaiga 57, sa latou faitau i le Tusi a Mamona e uiga i se Ierusalema Fou o le a faatuina i le konetineta o Amerika (tagai i le 3 Nifae 20–21; Eteru 13). E ala i faaaliga na tuuina mai i le Perofeta o Iosefa Samita, na iloa ai e le Au Paia o le a faatuina Siona i se mea o Misuri (tagai i le MF&F 52:2, 5, 42).

Ia manatua e tolu vaega autu o tagata o le Ekalesia sa valaauina e malaga atu i le toeitiiti 900 maila i Misuri: o le Perofeta ma se vaega toaitiiti o toeaina (tagai i le MF&F 52-53), o se vaega o faifeautalai na valaauina e talai atu i le ala (tagai i le MF&F 52), ma le Au Paia mai Kolesavile, Niu Ioka, na taitaiina e Newel Knight (tagai i le MF&F 54).

Faitau le Mataupu Faavae ma Feagaiga 57:1–3, ma faailoga po o fea o le a faatuina ai le aai o Siona.

E tusa ai ma na fuaiupu, o fea sa tu ai le aai o Initipenei e faatatau i Siona?

Toe faitau le Mataupu Faavae ma Feagaiga 57:3, ma faailoga le mea na fetalai le Alii e tatau ona faatuina i Initipene, po o le nofoaga tutotonu o Siona.

Atonu e te manao e tusi le mataupu faavae lenei i le laina o au tusitusiga paia: O le malumalu o loo i le nofoaga tutotonu o Siona.

1. Tali fesili nei i lau api talaaga mo le suesueina o tusitusiga paia:

   1. Aisea e te manatu na taua ai ona faatu se malumalu i le nofoaga tutotonu o Siona?

   2. Aisea atonu e taua ai le i ai o le malumalu i le totonugalemu o o tatou olaga?

Mafaufau e uiga i mea e mafai ona faasalaveia ai tagata taitoatasi mai le mauaina o faamanuiaga o le malumalu. O le a se mea atonu e tupu i tagata o e filifili e faaogatotonu o latou olaga i mea faalelalolagi?

2. I lau api talaaga mo le suesueina o tusitusiga paia, tusi ai se manulauti ma se faailoga lapotopoto i le ogatotonu . Faailoga le ogatotonu o lau manulauti i le upu malumalu. Ona tali lea o fesili nei:

   1. E mafai faapefea ona ese lou olaga pe afai na sili atu ona atoatoa lou faaogatotonuina i mea faaleagaga, e pei o le malumalu?

   2. E mafai faapefea e le tuuina o le malumalu i le ogatotonu o o tatou olaga, ona fesoasoani e faatotonugalemu o tatou olaga ia Iesu Keriso?

Faitau faamatalaga nei e faamatala ai faamanuiaga e mafai ona e maua a o e faatutotonuina lou olaga i le malumalu. A o e faitauina, faailoga soo se tasi o nei faamanuiaga ua e mauaina.

“Ia te outou o loo agavaa ma mafai ona auai atu i le malumalu, ou te fautuaina outou ina ia o soo i ai. O le malumalu o se nofoaga e mafai ona tatou maua ai le filemu. O iina tatou te maua ai se tuuto faafouina i le talalelei ma se tautinoga malosi e tausi poloaiga” (Thomas S. Monson, “Seia Tatou Toe Feiloai,” Ensign po o le Liahona, Me 2009, 113).

“O nisi taimi ua matua lofituina o tatou mafaufau i faafitauli, ma le anoanoai o mea e alalaga mai ia tatou gauai atu i le taimi lava lea, e faapea ona le mafai ai ona tatou mafaufau lelei ma vaavaai lelei. I le malumalu e foliga mai e aluese atu ai le pefu o mea faalavefau, e foliga mai e siitia ai le puao ma le faanenefu, ma mafai ona tatou ‘vaaia’ mea sa le mafai ona tatou vaaia muamua ma maua ai se auala i o tatou faafitauli lea tatou te le’i iloaina muamua” (Boyd K. Packer, “The Holy Temple,” “The Holy Temple,” Ensign, Oct. 2010, 35).

“A o tatou pa‘i atu i le malumalu ma fiafia i le malumalu, o le a atagia i o tatou olaga lo tatou faatuatua. A o tatou o atu i le maota paia, a o tatou manatua feagaiga tatou te faia ai i totonu, o le a mafai ona tatou onosaia tofotofoga uma ma faatoilaloina faaosoosoga taitasi. E aumai e le malumalu le faamoemoega mo o tatou olaga. Na te aumaia le filemu i o tatou agaga” (Thomas S. Monson, “Blessings of the Temple,” Ensign, Oct. 2010, 15).

“Afai o i tatou o ni tagata e toaaga i le malumalu, o le a avea i tatou o ni tagata lelei atu. … Ou te iloa e pisi lava o outou olaga. Ou te iloa e tele naua a outou mea e fai. Ou te iloa e tele a outou mea e fai. Ae ou te fai atu ia te outou se folafolaga, afai o le a e alu i le maota o le Alii, o le a faamanuiaina oe, o le a sili atu ona lelei le olaga mo oe” (Gordon B. Hinckley, “Excerpts from Recent Addresses of President Gordon B. Hinckley,” Ensign, July 1997, 73).

“Ia avea i tatou o ni tagata e auai i le malumalu--ma tagata e fiafia i le malumalu. Ia tatou faanatinati soo atu i le malumalu pe a faatagaina ai e taimi ma mea e maua ma tulaga faaletagata lava ia. Ia tatou o atu e le gata mo o tatou lava tuaa ua maliliu ae ia tatou o atu foi mo faamanuiaga patino o le tapuai i le malumalu mo le faapaiaina ma le saogalemu lea o loo tuuina mai e na puipui paia ma mamalu. O le malumalu o se nofoaga o le matagofie, o se nofoaga o faaaliga, o se nofoaga o le filemu. O le maota o le Alii. E paia i le Alii. E tatau ona paia ia te i tatou” (Howard W. Hunter, “The Great Symbol of Our Membership,” Ensign, Oct. 1994, 5).

3. Tali fesili nei i lau api talaaga mo le suesueina o tusitusiga paia:

   1. O fea o faamanuiaga ua ta‘ua i le faamatalaga o loo i luga ua oo ia te oe?

   2. O faapefea ona uunaia lou olaga e nei faamanuiaga?

Mafaufau loloto i mea e mafai ona e faia ia avea atoatoa ai le malumalu ma totonugalemu o lou olaga. Fai se sini ia e tumau pe ia agavaa mo se pepa faataga o le malumalu ma ia auai atu i le malumalu e le aunoa pe a faatagaina ai e ou tulaga.

O leMataupu Faavae ma Feagaiga 57:4–6 ua faamaumauina ai e faapea, ua poloaiina e le Alii le Au Paia e faatau mai fanua i totonu ma latalata i le Itumalo o Jackson, Misuri, lea o le a mafai ai ona latou amata faatuina Siona ma fausia se malumalu.

Mataupu Faavae ma Feagaiga 57:7-16

Ua faatonu e le Alii tagata taitoatasi e uiga i a latou matafaioi i le faatuina o Siona

Vaai faalemafaufau e faapea sa e i ai faatasi ma le Au Paia i Misuri i le taimi na faaali mai ai e le Alii le tulaga o Siona, ma sa faatonuina oe e nofo ai pea iina e fesoasoani e faatulaga le aai o Initipene. O le a sou lagona i le iloaiona sa ia te oe se tiutetauave taua faapena? O le a faapefea ona e amata fausiaina se aai i le Alii? O ai o le a e manao e fesoasoani atu ia te oe i le fausiaina?

4. Faitau le Mataupu Faavae ma Feagaiga 57:7–13. I lau api talaaga mo le suesueina o tusitusiga paia, lisi ai igoa o alii e toafa na tofiaina e le Alii e fesoasoani e faatuina siona, ma mea sa Ia tofiaina i latou taitoatasi e fai.

O tagata taitoatasi o e sa fautuaina e nonofo i Misuri sa i ai ni meaalofa ma ni taleni na manaomia e fesoasoani ai e faatu Siona. Atonu e te manao e tusi le mataupu faavae lenei i le laina o au tusitusiga paia: E tatau ona tatou faaaogaina o tatou malosiaga taitoatasi e fesoasoani e fausia ai le malo o le Alii, pe a Ia valaau mai ia i tatou e faia o lena mea.

Mafaufau i tagata e te iloa o e na atinaeina le Ekalesia e ala i le faaaogaina o o latou lava malosiaga, meaalofa faaleagaga, po o tomai.

5. Tali fesili nei i lau api talaaga mo le suesueina o tusitusiga paia:

   1. O a ou malosiaga?

   2. E mafai faapefea ona e faaaogaina ou malosiaga e faamanuia ai lou aiga ma le Ekalesia?

6. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Mataupu Faavae ma Feagaiga 57 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lo’u faiaoga: