Iunite 30: Aso 4
Paionia o Taavaletosolima, 1856–60
Faatomuaga
Sa galulue le Au Paia o e na taunuu atu i le Vanu o Sate Leki i le 1847, e atinae mea tau faatoaga ma isi punaoa mo isi e malaga atu i le lumanai. Ia Setema 1851, na toe fofogaina ai e Peresitene Polika Iaga ma ona fesoasoani i le Au Peresitene Sili, le valaau mo le Au Paia uma e nonofo i Aioua ma faataamilo i le lalolagi atoa e faapotopoto atu i le Vanu o Sate Leki. E toatele le Au Paia o Aso e Gata Ai na tali atu i le valaau a Peresitene Iaga i osigataulaga maoae. Na auina atu sui o le Korama a Aposetolo e Toasefululua e vaaia femalagaaiga, ma i le 1852 e silia ma le 1852 le Au Paia sa uia le auala i le Vanu o Sate Leki nai lo se isi lava tausaga. E le gata i lea, e toatele le Au Paia na malaga atu i le Vanu o Sate Leki i vaega o taavaletosolima i le va o le 1856 ma le 1860.
Ua Usitai le Au Paia i le Fautuaga e Faapotopoto Atu i le Vanu o Sate Leki
Vaai faalemafaufau e faapea, sa talosagaina oe e malaga i le 1,300 maila (e tusa e 2,090 kilomita) e savali ma toso se taavaletoso, ma sa na o le 17 pauna (e tusa ma le 7.7 kilokalama) ia meatotino patino sa faatagaina ona e aumaia. Mata e te ofo atu mo lenei malaga?
I le va o le 1856 ma le 1860, na toeitiiti 3,000 le Au Paia na filifili e malaga i sisifo e sopoia fanua valevalenoa o le Iunaite Setete e agai i Iuta, ma toso a latou meatotino i ni taavaletosolima. O le tele o vaega o taavaletosolima sa utaina sapalai, aitema patino, ma ni meaai i totonu o taavaletosolima ae savavali mai le Aai o Aioua, i Aioua, agai i Aai o Sate Leki, Iuta. O vaega mulimuli e tolu na amataina la latou malaga i Florence, Nebraska.
Afai e mafai, ao mai nisi o aitema mai lou fale e te mafaufau e te alu ma ave pe ana faapea o oe o se tasi o painoia i taavaletosolima. Fua ni aitema i luga o se fua e maua ai se malamalamaaga o le tele o mea e mafai ona e aveina i le 17-pauna (pe a ma le 7.7-kilokalama).
A o e suesue i lenei lesona, mafaufau loloto i le fesili lenei: E te manatu aisea na naunau ai le Au Paia e faia ni osigataulaga e tele ina ia oo atu i Iuta?
O le toatele o tagata o le Ekalesia, e aofia ai i latou o loo nonofo i fafo atu o le Iunaite Setete, na mananao e faapotopoto faatasi ma le Au Paia i Iuta. Ae peitai, o le toatele sa le’i lava ni tupe po o ni sapalai e oo atu ai iina. O le mafuaaga lenei, na faavaeina ai e Peresitene Polika Iaga i le 1849 le Tupe Faaagaga mo [Tagata] Malaga mai Fafo. O le tupe na tuuina atu ai i tagata malaga mai fafo se nonogatupe e fesoasoani ia i latou e totogi ai femalagaaiga ma sapalai. Ona o le eseese o faafitauli tautupe, o lea na uma ai le tupe i le 1855, ma sa popole Peresitene Iaga ina ne’i le lava e fesoasoani ai i le Au Paia o e sa mananao e malaga mai i le 1856. Sa ia fautuaina mai, o tagata e malaga mai fafo o e manaomia le fesoasoani mai le tupe, e tatau ona malaga mai e faaaoga ai taavaletosolima nai lo o taavale solofanua. O taavaletosolima sa sili atu le taugofie ma o le a mafai ai e le toatele atu o le Au Paia ona malaga mai.
E ui ina sa faigata le malaga, e 8 mai le 10 vaega taavaletosolima i le va o le 1856 ma le 1860, na faamaeaina ma le manuia le malaga, o le fua o tagata na maliliu na pe a ma le 3 pasene, lea e talitutusa ma se vaega masani o taavale solofanua. Ae i le 1856, o vaega lona fa ma le lima sa tuai ona amata [malaga mai] ma oo ai i ni faafitauli matuia. O i latou ia o le vaega taavaletosolima a Uili, sa taitaia e James G. Uili, ma le vaega taavaletosolima a Matini, sa taitaia e Eteuati Matini. Ina ua mavae ona malaga i le toeitiiti 1,000 maila (e tusa e 1,600 kilomita) i sisifo mai Aioua, sa oo vaega i le matuai faaitiitia leaga o meaai ma sapalai. Sa fetaiai uma foi ia kamupani ma matagi ogaoga o le taumalulu ma faapea ona taofia ai le agai pea o la latou malaga. Sa tuga le mafatia o nei Au Paia i le matuai malulu ma le kiona.
I le aso 19 o Oketopa, 1856, sa tatau ai i tagata o le vaega o taavaletosolima a Matini ona sopoia se vaitafe tele i le taimi o se matagi o le taumalulu. E toatele tagata o le vaega, e aofia ai ma Arona Siakisone, sa vaivai ma mama‘i, ma o le sopoiaina o le vaitafe sa afaina leaga ai i latou. Sa faamatalaina e Elisapeta Siakisone le mea na tupu i lona toalua i ni nai aso mulimuli ane:
“Pe tusa o le iva, na ou moe ai. … Sa ou moe seia oo i le, na foliga mai ia te a’u, o le vaeluaga o le po. Sa matuai o’u maalili lava. Sa maatiati le tau. Sa ou faalogologo pe ou te lagonaina le manava o lo’u toalua—sa matuai taoto lelei o ia. Sa le mafai ona ou lagonaina o ia. Sa oo ina ou fefe. Sa tuu lo’u lima i luga o lona tino, ae i lo’u maniti sa ou iloa ai na faamaonia lava o’u popolega sili ona leaga. Ua maliu lo’u toalua. … Sa ou valaau atu mo se fesoasoani i isi tagata sa matou faleie faatasi. Sa leai se fesoasoani na mafai ona latou tuuina mai ia te a’u. … Ina ua ao, sa sauni nisi o alii o le vaega e tapena lona tino mo le falelauasiga. … Sa latou auiina o ia i se palanikeke ma tuu o ia i totonu o se faaputuga faatasi ma le toa sefulutolu o isi o e na maliliu, ona ufi lea o ia i le kiona. Sa matuai malo le eleele o lea sa le mafai ai ona latou eliina se tuugamau” (Leaves from the Life of Elizabeth Horrocks Jackson Kingsford [1908], 6–7; tagai foi i le history.lds.org).
-
Pe a faapea e mafai ona e tusia se tusi mo Elisapeta Jackson e faitau i lenei taimi faigata, o le a sau tala e fai atu ia te ia e faamalosiau ai e aua le fiu? Tusi se tusi puupuu ia Elisapeta i lau api talaaga mo le suesueina o tusitusiga paia.
Vaavaai mo faamaoniga o le faatuatua o Elisapeta i le vaega o totoe o lana tala:
“Sa tuua o ia iina e moe filemu seia oo ina iliina le pu a le Alii, ona feala ai lea o e na maliliu ia Keriso ma tulai a’e i le taeao o le uluai toetu. Ona toe faatasia ai lea o o tatou loto ma ola, ma o le faavavau o le a tuuina mai ia i tatou le ola e faavavau faavavau lava.
“O le a ou le taumafai e faamatala o’u lagona i lo’u oo i le tuua o se fafine ua oti lana tane ma se fanau e toatolu, i lalo o ni tulaga sili ona faigata. E le mafai ona ou faia. Ae ou te talitonu ua tusia e le Agelu o Faamaumauga i faamaumauga o loo teuina i luga e faapea, o o’u puapuaga mo le Talalelei, o le a faapaiaina ia te a’u mo lo’u lelei” (Leaves, 7; tagai foi i le history.lds.org).
-
-
Mai le tala a Elisapeta, o le a se tasi o faamoemoega mo lo tatou mafatia ma osigataulaga mo le talalelei?
-
O le fuaitau “faapaiaina ia te au mo lo‘u lelei” o lona uiga, o mafatiaga o Elisapeta o le a faapaiaina ma mamalu mo lona manuia. E ui lava atonu e te le puapuagatia e pei ona sa i ai o ia, ae o a ni auala atonu e te puapuagatia ai mo le talalelei? E ono mafai faapefea ona faamanuiaina oe e ala i nei aafiaga?
-
I nai aso na sosoo ai ina ua mavae le maliu o Aaron Jackson, sa tulei atu ai i luma le vaega a Matini pe a ma le 10 maila (e tusa ma le 16 kilomita). E toatele tagata na maliliu i lenei taimi. I se tasi po i le vaega lenei o le malaga, sa leai se tasi sa lava se malosi na i ai e faatutu ai faleie. Sa saofai Elisapeta Siakisone i luga o se papa faatasi ma se tasi o lana fanau sa sii i ona vae, ma sa tofu ona itu ma se tamaitiiti. Sa nofo ai lava i lena tulaga seia oo i le taeao. Sa oo ina lotovaivai Elisapeta. Ona, oo lea i le po o le aso 27 o Oketopa, sa ona maua ai se aafiaga sa faapea ona tuuina atu ai ia te ia le faamoemoe o le laveai:
“O le a faigofie lava ona malamalama e faapea, i nei ituaiga o tulaga faigata, sa oo ina ou ātu lava. Sa tusa ma le ono pe fitu afe maila lo’u mamao mai lo’u atunuu moni, i se atunuu togavaoa, papa, ma mauga, i se tulaga mativa, na lilofia le eleele i le kiona, o vai na lilo i le aisa, ae o a’u ma ni tamaiti se toatolu ua leai se tama, ma le tau leai o se mea e puipui ai i latou mai afā faalealofa. Ina ua ou taoto e moe i lena po, o le aso 27 lea o Oke., sa faapea ona ou maua ai se faaaliga mataina. I la’u miti, ua tutu mai lo’u toalua i o’u autafa ma fai mai — ‘Se fiafia, Elisapeta, ua tuuina mai le laveai’” (Leaves, 8; tagai foi i le history.lds.org).
Na faataunuuina le miti a Elisapeta. Na taunuu mai le vaega muamua o le au laveai mai le Aai o Sate Leki, i le vaega o taavaletosolima a Matini le aso na sosoo ai.
I le aso 4 o Oketopa, 1856, i vaiaso a o le’i taia e afā o le taumalulu ia vaega o taavaletosolima, sa lipoti atu ai e tagata malaga ia Peresitene Polika Iaga e faapea, sa i ai lava ia vaega o paionia i laufanua valevalenoa ma le faitau selau o maila le mamao. O le aso na sosoo ai, i se sauniga o le Aso Sa, na saunoa ai Polika Iaga e uiga i le laveaiina o nei paionia i taavaletosolima:
“E toatele o tatou uso ma tuafafine o loo i luga o laufanua valevalenoa ma ni taavaletosolima, ma atonu e toatele ua i ai nei i latou i le fituselau maila [pe a ma le 1,100 kilomita] le mamao ese atu ma lenei nofoaga, ma e tatau ona aumaia iinei, ma ua tatau ona tatou auina atu se fesoasoani ia i latou. …
“O la’u tapuaiga lena; o le faatonuga lena a le Agaga Paia ua ia te a’u, ina ia laveai tagata. … O le faaolataga lenei ua ou sailia, ina ia laveai o tatou uso o le a faapea ona fano, pe matuai mafatia, pe afai tatou te le auina atu ia i latou se fesoasoani.
“Ou te valaau atu i Epikopo i lenei aso, ou te le faatali seia oo a taeao, po o le aso e sosoo ai, mo ni manu malolosi se 60, ma le 12 po o le 15 o taavale solofanua … [faapea foi] ma le 12 tone o falaoamata ma ni tagata tietie solofanua lelei se 40, e ese mai ia i latou e faatonutonuina solofanua. …
“Ou te tau atu ia te outou, o la outou faatuatuaga, tapuaiga, ma galuega faalelotu, o le a le mafai ona faasaoina ai se agaga se toatasi o outou i le malo selesitila o lo tatou Atua, seiiloga tou te faia ia mataupu faavae e pei ona ou aoao atu nei ia te outou. Ia o atu ma aumai nei na tagata o loo i laufanua valevalenoa” (“Remarks,” Deseret News, Oke. 15, 1856, 252).
O le a se mataupu faavae e tasi na aoao atu e Peresitene Polika Iaga i le Au Paia?
E toatele alii ma tamaitai na tali atu i le valaaulia a le perofeta e fesoasoani atu i le Au Paia mafatia. I totonu o aso e lua o le lauga a Peresitene Iaga, na o ese atu ai alii e saili i le au malaga, ma aveina ni taavale solofanua na tutumu i sapalai.
-
-
E faapefea ona avea lenei taumafaiga laveai ma se taulaga mo le Au Paia i le Vanu o Sate Leki?
-
O a nisi o osigataulaga e mafai ona tatou faia, e fesoasoani ai ia i latou e i ai manaoga faaletino?
-
O a nisi o osigataulaga e mafai ona tatou faia, e fesoasoani ai ia i latou e i ai manaoga faaleagaga?
-
I le aso 21 o Oketopa, 1856, na taunuu atu ai taavale solofanua laveai muamua i le vaega o taavaletosolima a Uili. Sa tumau ai iina nisi o nei taavaletoso, ae o le toatele o i latou sa faaauau atu e fesoasoani i le vaega taavaletosolima a Matini. I le aso 23 o Oketopa, sa faapea ona malaga ai le vaega a Uili i le pe a ma le 15 maila [24 kilomita] i tulaga ogaoga o matagi kiona. O maila muamua e 3 [5 kilomita] na aofia ai le 600 futu [180-mita] o le a’e i se mauga lea na ta’ua o Tuasivi Papa.
Na faamatalaina e Peresitene James E. Faust o le Au Peresitene Sili, le lototoa o fanau laiti paionia i le vaega a Uili:
“E sefulutolu uso o le Vaega a Uili sa fano mai le malulu, saviligia, ma le matelaina, na tanuina i se tuugamau e tasi i le Rock Creek Hollow. … O le toalua o i latou sa tanu i Rock Creek Hollow o ni fanau lotototoa laiti lava: O Potili [Motiseni], e sefulutasi tausaga le matua], mai Tenimaka, ma Semi Kekiuti, e sefulutasi tausaga le matua mai Sikotilani.
“Sa tofia Potili na te vaaia ni tamaiti laiti a o latou sopoia le Tuasivi Papa. Ina ua latou taunuu atu i le tolauapiga, atonu na auina atu o ia e ao mai ni fafie. Sa maua atu ua malo ma maliu faalagolago i le uili o lana taavaletoso, a’o uumau ni laau.
“Sei ou faamatala atu ia te oe e uiga ia Semi Kekiuti. O Semi e sau mai Glasgow, i Sikotilani. I le malaga i sisifo, sa o mai ai faatasi Semi ma lona tina ua maliu lana tane, ma ona uso e toatolu, o Tomasi, e sefuluiva tausaga ma e pipili ma na tatau ona tietie atu i le taavaletosolima. O le tiute faapitoa o Semi i luga o le auala, o le vaai o lona uso laitiiti e fa tausaga o Iosefa, a o tosoina e lona tina ma lona uso matua o Ropati le taavale tosolima. A o latou a’ea’e atu i le Tuasivi Papa, sa toulu le kiona ma sa agi se matagi matua malulu lava. E [luasefulu] itula na faimalaga ai le au malaga i le sefululima maila. Ina ua vaivai tele le alii laitiiti o Iosefa e savali, sa fafa loa o ia e Semi, lona uso matua. O le tuua ai e le vaega autu, sa savavali lemu atu ai Semi ma Iosefa i le tolauapiga. Ina ua taunuu atu tama e toalua i le mea o tafu ai le afi, sa palasi ai Semi, ‘o le sa faataunuuina ma le faamaoni lana tiute, ma oti ai ona o le malulu ma le fosi-o le malosi’” (“O Se Tofi e Le Mafaatauina,” Liahona, Ian. 1993, 106).
Na faamalamalama mai e Peresitene Thomas S. Monson le auala e mafai ona tatou ola ai i le mataupu faavae o le fesoasoani ia i latou e manaomia le fesoasoani i o tatou aso. A o e faitau i le mea sa ia aoaoina mai, vaavaai mo ni auala faaopoopo e mafai ona tatou fesoasoani ai i isi i aso nei.
“I tausaga a’o avea au ma se Pulega Aoao, sa ou faamamafaina ai se manaomia o le ‘laveai’ o o tatou uso ma tuafafine mai le tele o tulaga eseese lea atonu e taofia ai mai ia i latou faamanuiaga uma e mafai ona tuuina mai e le talalelei. Talu mai ona avea ma Peresitene o le Ekalesia, ua ou lagonaina ai se naunautai faateleina mo i tatou ina ia punouai i lenei taumafaiga laveai. A o aapa atu tagata faamaoni o le Ekalesia ma le alofa ma le agaga malamalama, e toatele ua faapea ona toe malolosi atoatoa ma ua olioli i faamanuiaga faaopoopo i o latou olaga. O loo tele lava mea e faia i lenei tulaga, ma ou te uunaia tagata uma ia faaauau pea ona aapa atu e laveai. Na fetalai mai le Alii, ‘Pe a liua mai oe, ona e faamalosi ai lea i lou uso’ (Luka 22:32)” (“Reach Out to Rescue”; LDS.org).
-
Faaalu sina taimi e mafaufau ai po o ai o siomia oe, o ono manaomia le fesoasoani faaleagaga pe faaletino. E mafai faapefea ona e fesoasoani ia i latou?
O le tala lenei e mafai ona fesoasoani ia te oe e faailoa ai nisi o faamanuiaga na maua e nei Au Paia, ona sa latou onosaia ma le faatuatua o latou mafatiaga:
I le 1856, na atoa ai le tupe a Francis ma Betsy Webster e malaga atu ai i Iuta i se taavale solofanua, ae peitai, sa laua foai atu le la tupe i le Faaagaga mo Femalagaaiga. O le la foai na mafai ai e ni tagata taitoatasi se toaiva ona malaga i taavaletosolima. O Uso ma Tuafafine Webster, o e sa faatalitali mo le [fanau mai] o se la pepe, sa malaga atu i le Aai o Sate Leki faatasi ma le vaega taavaletosolima a Matini, ma sa mafatia faatasi ma isi tagata o le vaega.
O ni tausaga mulimuli ane, a’o nofo Uso Webster i se vasega o le Aoga Sa, sa ia faalogo atu i nisi o tagata o le Ekalesia o faitio i taitai o le Ekalesia ona o le faalavelave i taavaletosolima. O le le mafai ona taofiofia o ia lava, sa ia tu a’e ai ma molimau atu e uiga i faamanuiaga o le avea ai ma se tasi i le vaega taavaletosolima a Matini:
“Ou te fai atu ia te outou e tuu loa lenei faitioga ona o loo outou talanoaina se mataupu e leai se mea tou te iloa e uiga i ai. O mea moni lauiloa faalealofa e leai se taua iinei, aua e leai se faauigaga sa’o o fesili e aofia ai. O se mea sese le auina atu o le vaega taavaletosolima i le faaiuga o le vaitau? Ioe. Ae sa ou i ai i lena vaega ma sa i ai foi lo’u toalua. … Sa matou mafatia e sili atu i soo se mea e mafai ona outou vaai faalemafaufau i ai, ma na maliliu le toatele ona o le malulu ma le fiaaai. Ae na tou faalogo ea i se tagata sa sao mai o lena vaega o fai atu se upu faitio? … O i matou uma lava, sa matou o mai ma le malamalama atoatoa o loo soifua le Atua aua sa oo ina matou masani ia te ia i o matou mafatiaga ogaoga [manaoga ogaoga].
“Na ou tosoina mai la’u taavaletosolima i taimi sa matuai ou lelava ma vaivai ai ona o ma’i ma le leai o se meaai, lea sa tau le mafai ai ona tuu le vae e tasi i luma o le isi. Sa ou tilotilo atu i luma ma vaaia se faaputuga oneone po o se auala matie ma faapea ifo, e mafai ona ou alu atu tau lava o le mamao lena, ma o iina e tatau ona ou fati ai aua e le mafai ona ou toso a‘e i ai la’u uta. Sa ou alu i luga o lena oneone, ma ina ua ou taunuu atu i ai, sa amata ona tulei a’u e le taavaletoso. E tele taimi na ou tilotilo atu ai i tua e vaai po o ai sa tuleia la’u taavaletoso, ae sa leai se tasi na vaai i ai o’u mata. O le taimi lena na ou iloaina ai, sa i ai iina agelu a le Atua.
“Pe na ou faanoanoa ona sa ou filifili e sau e ala i le taavaletosolima? Leai. E le o le taimi lena po o se taimi e tasi o lo’u olaga talu mai lena taimi. O le tau sa matou totogiina ina ia masani ai ma le Atua, sa o se faamanuiaga le totogiina, ma ou te faafetai ona sa faamanuiaina a’u e sau i Siona i le Vaega o Taavaletosolima a Matini” (i le William R. Palmer, “Pioneers of Southern Utah,” The Instructor, Me 1944, 217–18).
O le mataupu faavae e tasi e mafai ona tatou aoao mai i le molimau a Francis Webster o le, afai tatou te onosaia ma le faamaoni ia puapuaga, e mafai ona tatou masani ma le Atua.
-
-
O a ni uiga faaalia po o ni amioga na e vaaia ia i latou o e na onosaia ma le faamaoni ia puapuaga?
-
O a ni auala ua e masani ai ma le Atua e ala i tofotofoga na feagai ma oe?
-
-
Ua ou suesueina le lesona “Paionia o Taavaletosolima, 1856-60” ma faamaeaina i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: