Iunite 17: Aso 1
Mataupu Faavae ma Feagaiga 76:81–119; 77
Faatomuaga
O lenei lesona e suesue ai le faaaliga i le malo telesitila na faaali mai i le Perofeta o Iosefa Samita ma Sini Rikitone, e pei ona faamaumauina i le Mataupu Faavae ma Feagaiga 76. O lenei faaaliga na tuuina atu i Hairama, Ohaio, i le aso 16 o Fepuari, 1832. Na faamatalaina e Iosefa ma Sini mea na la aoaoina e uiga ia i latou o e o le a mautofi i le malo telesitila ma taunuuga o le teenaina o le talalelei ma le molimau ia Iesu Keriso. Sa laua faamatalaina foi mea e eseese ai le malo telesitila mai isi malo o le mamalu, ma faamalamalama mai mea e ao i tagata taitasi ona fai ina ia agavaa ai e vaai ma malamalama mo i latou lava ia mealilo o le malo o le Atua. Mulimuli ane, ia Mati 1832, na faamaumau ai e Iosefa Samita ia tali a le Alii i ana fesili e uiga i le Tusi o Faaaliga. O lenei faaaliga o loo maua i le Mataupu Faavae ma Feagaiga 77.
Mataupu Faavae ma Feagaiga 76:81–112
Ua faaali mai e le Alii ia Iosefa Samita ma Sini Rikitone se faaaliga i le malo telesitila
Vaai faalemafaufau o loo fai se lua talanoaga faalelotu ma se uo, o se tagata e ese lana lotu Kerisiano. Fai mai lau uo, “I le lotu i le Aso Sa ua te’a, na ta’u mai ai e la’u faifeau ia i matou, pe a tatou feoti, o le a tatou o, a le o i le lagi, o seoli. Ou te manatu e le o lava la’u amio lelei ou te alu ai i le lagi i le taimi nei, ae ou te manatu foi ou te le leaga tele e tatau ai ona ou alu i seoli. O le a le aoaoga a le tou lotu e uiga i le lagi ma seoli?”
Vaai i le “Mataupu Faavae ma Feagaiga 76: ata o le Otootoga o le Faaaliga” mai le lesona o le Iunite 16: Aso 3 i le taiala suesue lenei. Ia matau o le malo o le mamalu mulimuli na vaai i ai le Perofeta o Iosefa Samita ma Sini Rikitone i le faaaliga o le malo telesitila. Faitau le Mataupu Faavae ma Feagaiga 76:81–83, 103, ma vaavaai mo upu ma fuaitau e faamatala ai tagata o le a mautofi i le malo telesitila. Atonu e te manao e faailoga mea e te maua.
I le fuaiupu e 103, o faataulaitu o tagata o e saili e pulea ma faaaoga le mana e ala i le fesoasoani o punavai amioleaga. Ofaitaaga o tagata o e auai i le faitaaga ma le isi agasala o feusuaiga.
O se tasi o vaega e iloilo ai po o le fea o malo o le mamalu e mautofi ai se tagata, o le auala e tali atu ai o ia i le talalelei ma le molimau ia Iesu Keriso. Faitau mau faasino i le siata lenei. I le avanoa ua saunia, faamatala le auala e tali atu ai tagata e nonofo i nei malo i le lumanai, i le talalelei ma le molimau ia Iesu Keriso.
|
Malo |
Tali i le Talalelei ma le Molimau ia Iesu Keriso |
|---|---|
|
Selesitila (MF&F 76:50–51) | |
|
Terasitila (MF&F 76:74, 79) | |
|
Telesitila (MF&F 76:82, 101) |
-
Tali fesili nei i lau api talaaga mo le suesueina o tusitusiga paia:
-
O a ni auala o loo e saili e faamalosi ai lau molimau e uiga ia Iesu Keriso?
-
Aisea e te manatu ai, o le tali a se tagata i le talalelei ma le molimau ia Iesu Keriso, e i ai se aafiaga taua i le po o fea le malo o le a ia mautofi ai?
-
E mafai faapefea ona e toa i lau molimau ia Iesu Keriso?
-
Faitau le Mataupu Faavae ma Feagaiga 76:84–85, 104–6, ma faailoga fuaitau o loo aoao mai ai le upumoni lenei: O i latou o e o le a mautofi i le malo telesitila, e ao ona puapuagatia muamua i seoli a’o lei togiolaina i latou e le Faaola.
O le a fesoasoani le iloa o loo faaaoga e tusitusiga paia le faaupuga seoli i ni auala se lua. Muamua, o seoli o le vaega o le lalolagi o agaga e nofoia e tagata amioleaga ma o se tulaga moni ae le tumau le mafatia ma le puapuagatia faaleagaga (tagai i le Mataupu Faavae ma Feagaiga 76:84–85, 104–6). O le “afi e faavavau,” o se faaupuga faafaatusa e faatatau i le tiga o le mafatia ma le puapuagatia o le a tupu i seoli. Lona lua, o nisi taimi e faaaoga ai e tusitusiga paia le upu seoli e faatatau i le pogisa i fafo, lea e faatatau i ai i nisi o taimi i le tulaga tumau o le mafatia ma le puapuagatia e faaauau pea mo atalii o le malaia, pe a uma ona latou toe tutu ma faamasinoina, faapea foi mo Satani ma e e mulimuli ia te ia mai le muai olaga. (Tagai Bible Dictionary, “Hell”; Taiala i Tusitusiga Paia, “Seoli,” scriptures.lds.org.)
Na aoao mai Elder James E. Talmage o le Korama a Aposetolo e Toasefululua le vaega lenei e uiga i le seoli:
“E i ai se faitotoa ulufale ma se faitotoa ulufafo i seoli. … O se nofoaga ua saunia mo le aoaoina, le aoaiina o i latou o e sa le’i aoaoina iinei i le fogaeleele mea na tatau ona latou aoaoina” (i le Conference Report, Ape. 1930, 97).
“E faatatau i le umi o le faasalaga, e mafai ona tatou mautinoa, o le a iloiloina e tusa ai ma le agasala; ma o le manatu e uiga i faasalaga uma mo solitulafono e faapea e le muta [e le uma] e sese [tagai i le MF&F 19:6–12; 76:36, 44]. E ui ina tele se aafiaga o lenei olaga i le faavavau, ma e ui foi ina mautinoa o i tatou lava e nafa ma le le faaaogaina o avanoa e salamo ai, o loo i ai i le Atua le pule e faamagalo ai pe a mavae le oti. Ae o loo talanoa mai tusitusiga paia e uiga i le faasalaga e faavavau ma e le muta. Soo se faasalaga e faauuina e le Atua e faavavau, aua e faavavau o Ia [tagai MF&F 19:10–12]. E a Ia le fuafuaga o le faasalaga e le gata, aua o le a i ai pea o se nofoaga po o se tulaga ua saunia mo agaga le usiusitai; ae o le faatinoina o le faasalaga o le a i ai se iuga i tulaga uma o le salamo ma le toe faaleleia” (The Articles of Faith, lona 12 ed. [1924], 60 – 61).
O a fasifuaitau mai le Mataupu Faavae ma Feagaiga 76:85, 106 ua aoao mai o seoli o le a avea o se tulaga le tumau mo i latou o e o le a mautofi i le malo telesitila?
Na faamalamalama mai e Peresitene Iosefa Filitia Samita le taunuuga o le mafatia i seoli mo i latou o e o le a mautofi i le malo telesitila: “O lenei mafatiaga o le a avea ma auala o le faamamaina, po o le faaatoatoaina, ma o le ala lea, o le a aumaia ai e amioleaga i se tulaga ia mafai ai ona latou maua le tino ola pea, e ala i le togiola a Iesu Keriso. O le a toe faatasia o latou agaga ma tino, ma o le a latou nonofo i le malo telesitila. Ae o le a le oo mai lenei toetutu seia oo i le iuga o le lalolagi” (Doctrines of Salvation, comp. Bruce R. McConkie, 3 vols. [1954–56], 2:298).
I le Mataupu Faavae ma Feagaiga 76:106–8, tatou te iloa ai o e amioleaga o le a puapuagatia mo a latou agasala seia oo ina faamaea e Iesu Keriso Lana galuega ma auina atu le malo o le Atua i luga o le fogaeleele i Lona Tama, lea o le a tupu pe a mavae le Meleniuma. Ma o le a faapaleina ai Keriso ma le mamalu.
Faitau le Mataupu Faavae ma Feagaiga 76:111 ma le Mataupu Faavae ma Feagaiga 137:9, ma vaavaai po o le a le mea o le a iloa ai le malo o le mamalu tatou te mautofi ai.
O le mataupu faavae e tasi e mafai ona tatou aoaoina mai i nei fuaiupu e faapea, o le malo o le mamalu tatou te mautofi ai, o le a fuafua lea i a tatou galuega i lenei olaga ma manaoga o o tatou loto.
E mafai ona fesoasoani le saunoaga lenei a Elder Russell M. Nelson o le Korama a Aposetolo e Toasefululua, e te malamalama atili ai i lenei mataupu faavae: “O le a faamasinoina outou taitoatasi e tusa ma au galuega ma moomooga o lou loto [tagai i le MF&F 137:9]. O le a le manaomia ona e totogiina le sala a se isi. O lou tulaga faaiu i le malo selesitila, terasitila, po o le telesitila, e le maua i se se’i. Ua faailoa mai e le Alii tulafono le masuia mo ia malo taitasi. E mafai ona e iloa mea ua aoao mai e tusitusiga paia, ma fua faatatau i ai lou olaga [tagai i le Ioane 14:2; 1 Korinito 15:40–41; MF&F 76:50–119; 98:18]” (“O Le Tumau i le Lotolotoi o Suiga,“ Ensign, Nov. 1993, 35).
-
Faitau le Mataupu Faavae ma Feagaiga 76:86–89, 98, 112, ma vaavaai mo upu po o fuaitau e faamatala ai le tulaga o le a i ai le ola pea mo i latou o e mautofi i le malo telesitila. Atonu e te manao e faailoga mea e te maua.
A o faamatalaina e le Perofeta o Iosefa Samita ma Sini Rikitone i latou e nonofo i le malo telesitila, sa la faaaofia ai se faamatalaga o le faatusatusaga o malo e tolu o le mamalu i le tasi ma le isi. Faitau le Mataupu Faavae ma Feagaiga 76:91–98, ma vaavaai po o le a le faatusatusaga o mamalu o malo i le tasi ma le isi.
O a ni auala e ese ai le mamalu o le malo selesitila mai mamalu o malo terasitila ma le telesitila?
O le eseesega i mamalu i le va o le malo selesitila, terasitila, ma le telesitila, e mafai ona faaalia i le eseesega o le malamalama o le la, masina, ma fetu pe a tilotilo atu i ai mai le lalolagi. Pe a tilotilo atu i ai mai le lalolagi, o fetu aupito sili ona malamalama e tusa ma le faa100 taimi e malosi ai le malamalama nai lo o fetu e aupito taupulapula le malamalama. O le masina e pe a ma le 30,000 taimi e malosi ai lona malamalama nai lo le fetu aupito sili ona malamalama. O le la e pe a ma le 400,000 taimi e malosi ai le malamalama nai lo o le masina ua atoa. O nei eseesega i le malamalama e fesoasoani e faapupula ai le eseesega na matauina e Iosefa ma Sini i le va o le malo o le mamalu. E pei ona mafai ona e iloa mai i le Mataupu Faavae ma Feagaiga 76:94–95, o faamanuiaga e maua e i latou o e agavaa mo le mamalu selesitila e sili atu ona tele nai lo o faamanuiaga e maua e i latou o e mautofi i le malo telesitila.
Mataupu Faavae ma Feagaiga 76:113-19
Ua faamalamalama mai e Iosefa Samita ma Sini Rikitone, mea e ao ona fai e tagata taitasi ina ia agavaa ai e vaai ma malamalama mo i latou lava i mealilo o le malo o le Atua
O leMataupu Faavae ma Feagaiga 76:113–19 o loo i ai le faamalamalamaga a le Perofeta o Iosefa Samita ma Sini Rikitone e faapea, sa poloaiina i laua e aua ne’i tusia uma mea na faaali mai ia te i la’ua. Sa laua faamalamalama mai foi mea e tatau ona faia e isi e agavaa ai e vaai ma malamalama mo i latou i mealilo o le malo o le Atua. Faitau le Mataupu Faavae ma Feagaiga 76:116, ma vaavai pe faapefea ona agavaa se tagata e vaai ma malamalama i mea lilo o le malo o le Atua e ala i le mana o le Agaga Paia.
E tusa ai ma le fuaiupu e 116, o le a le mea e tatau ona fai e se tagata e agavaa ai e vaai ma malamalama i mealilo o le malo o le Atua e ala i le mana o le Agaga Paia?
-
-
O le a le mea na faaali mai e le Alii e uiga i le lagi ma seoli i le Mataupu Faavae ma Feagaiga 76?
-
O a ni eseesega i le va o malo taitasi o le mamalu ma le pogisa i fafo?
-
O a eseesega i filifiliga na faia e i latou o e mautofi i malo eseese ma le pogisa i fafo?
-
-
O se taunuuga o mea ua ou aoaoina mai le suesueina o le Mataupu Faavae ma Feagaiga 76:
-
Ou te talitonu pe iloa …
-
Ou te manao …
-
O le a ou …
-
Mataupu Faavae ma Feagaiga 77
Ua faaali mai e le Alii tali i fesili a Iosefa Samita e uiga i le tusi o Faaaliga
Susue i le Mataupu Faavae ma Feagaiga 77, ma matau le ese o le faatulagaga o fuaiupu mai fuaiupu o isi vaega i le Mataupu Faavae ma Feagaiga. Faitau le folasaga o le vaega o le Mataupu Faavae ma Feagaiga 77, ma vaavaai mo le mea na fai e le Perofeta o Iosefa Samita i le taimi na ia mauaina ai le faaaliga lenei.
Mai ia Mati 1831 e oo ia Iulai 1833, na faia ai e le Perofeta o Iosefa Samita ni faasa’oga musuia i le Feagaiga Fou. (O le tele o nei faasaoga ua lisiina i le lomiga a le Au Paia o Aso e Gata Ai o le Tusi Paia Lomiga a King James, o ni vaefaamatalaga i le FIS ma i le vaega o le Faaliliuga a Iosefa Samita i le faaopoopoga, ma upu na suia ua tusia i le faatusilima.) A o galue ai i le tusi o Faaaliga, sa fesili ai le Perofeta i le Alii e faatatau i uiga o nisi o fuaiupu. O fesili a Iosefa ma tali a le Alii o loo faamaumauina i le Mataupu Faavae ma Feagaiga 77. Toe iloilo nisi o nei fuaiupu, ma matau le ala e muamua ai F taitasi i se fesili na fesili ai Iosefa Samita i le Alii, ae o F taitasi [foi] e muamua i tali a le Alii.
O le aafiaga a Iosefa Samita i le mauaina o le faaaliga i le Mataupu Faavae ma Feagaiga 77 ua tatou aoao ai, e faaali mai e le Alii le faaliliuga sa’o o mau e ala i Ana perofeta. E mafai foi ona tatou aoao ai afai tatou te ole atu i le Alii, e mafai ona fesoasoani mai o Ia ia tatou malamalama i tusitusiga paia.
Atonu foi e aoga le malamalama, i le Mataupu Faavae ma Feagaiga 77:6, o le 7,000 tausaga e faaatau lea i le i ai o le lalolagi i le faaletino, o lona uiga talu mai le Pau o Atamu. E le o faapea mai o le matua [tausaga] o le lalolagi.
-
Ua ou suesueina Mataupu Faavae ma Feagaiga 76:81–119;77 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: