Iunite 28: Aso 2
Mataupu Faavae ma Feagaiga 130:12–21
Faatomuaga
O lenei lesona o loo aofia ai aoaoga faavae na aoao mai e le Perofeta o Iosefa Samita i se sauniga a le Ekalesia i Ramese, Ilinoi, i le aso 2 o Aperila, 1843. O nei aoaoga ua faamaumauina i le Mataupu Faavae ma Feagaiga 130. Na aoao mai le Perofeta e uiga i mea e tutupu i le lumanai, e aofia ai le Afio Mai Faalua o Iesu Keriso. Sa ia aoao mai foi e uiga i lo tatou gafatia e faatumau le malamalama ma le atamai pe a tatou oti, ma faamalamalama mai le auala e mafai ona tatou maua ai faamanuiaga a le Atua.
Mataupu Faavae ma Feagaiga 130:12-17
Ua aoao mai Iosefa Samita e uiga i le Afio Mai Faalua
Pe sa e manao ea e iloa le taimi tonu o le a tupu ai le Afio Mai Faalua o Iesu Keriso?
E toatele foi isi ua mafaufau i lena lava mea e tasi. I le vaitaimi o Iosefa Samita, na tautino mai ai se faifeau Kerisiano lauiloa na igoa ia William Miller o le Afio Mai Faalua o le Faaola o le a tupu i le aso 3 o Aperila, 1843. I se tasi aso a o le’i oo i le aso o le Afio Mai Faalua na valoia e Miller, sa talanoa atu ai le Perofeta o Iosefa Samita i le Au Paia i Ramese, Ilinoi, ma ta’ua ai sa tatalo o ia ina ia iloa le taimi o le Afio Mai Faalua.
Faitau le Mataupu Faavae ma Feagaiga 130:14–17, ma vaavaai mo le mea na aoaoina e Iosefa Samita ina ua ia tatalo e uiga i le taimi o le Afio Mai Faalua o Iesu Keriso.
Ia matau sa le’i faaalia mai e le Alii ia Iosefa Samita le aso tonu o le Afio Mai Faalua. E le gata i lea, na Ia faatonuina Iosefa e: “aua le toe faalavelave mai ia te aʼu i lenei mataupu” (MF&F 130:15). Vaai i le mau faasino i le Mataupu Faavae ma Feagaiga 130:15, vaefaamatalaga a. o nei fuaitau o loo faamamafa atili mai ai e leai se tasi e iloaina le aso tonu o le a toe afio mai ai le Faaola.
I le faamatalaga lenei, vase upu o le saunoaga a Elder M. Russell Ballard o le Korama a Aposetolo e Toasefululua, na saunoa mai ai po o ai e iloa le taimi o le a tupu ai le Afio Mai Faalua:
“Ua tofia au o se tasi o Aposetolo e avea ma molimau faapitoa a Keriso i nei taimi ofoofogia, ma le faigata, ae ou te le iloa po o afea e toe afio mai ai o Ia. E tusa ai ma le mea ua ou iloa, e leai se tasi o o’u uso o le Korama a le Toasefululua pe oo lava foi i le Au Peresitene Sili e silafia. Ma ou te fautua atu ma le lotomaualalo e faapea, afai matou te le iloa, o lona uiga e leai se tasi na te iloa, e tusa lava po o le a le malosi o a latou finauga po o le a le talafeagai o a latou taumatematega. Na fetalai mai le Faaola e faapea, ‘e uiga i lena aso, ma le itula, e leai se tasi na te iloaina; e leai, e le iloa e agelu a le Atua i le lagi, ae na o lo’u Tamā lava’ [Iosefa Samita—Mataio 1:40].
“Ou te talitonu a fetalai mai le Alii ‘e leai se tasi’ e iloa, o le uiga tonu lena o Lana fetalaiga e leai se tasi e iloa. E tatau ona tatou matua faaeteete i soo se tasi e tautino mai [ua ia maua] se faatagaga faapitoa i folafolaga faalelagi” (“When Shall These Things Be?” Ensign, Tes. 1996, 56).
Mai le Mataupu Faavae ma Feagaiga 130:14–17 ma le saunoaga a Elder Ballard, ua tatou aoao ai e na o le Atua e silafia le taimi tonu o le a tupu ai le Afio Mai Faalua.
-
Tali le fesili lenei i lau api talaaga mo le suesueina o tusitusiga paia: E mafai faapefea e le manatuaina o lenei upumoni ona fesoasoani ia te oe, ia aua ne’i taitaiseseina e ni folafolaga sese?
Mataupu Faavae ma Feagaiga 130:18-19
Ua aoao mai Iosefa Samita e uiga i le taua o le mauaina o le poto ma le malamalama i lenei olaga
Vaai faalemafaufau e faapea, o le a e tuua le fale ma alu atu i se mea e te le’i oo muamua i ai. Ua faatagaina oe e ave na o mea o le a ofi i totonu o se atopau e tasi. O a ni mea o le a e teuina i lau atopau?
Ae faapefea pe afai o lou taunuuga o le lalolagi o agaga (le nofoaga lea e o i ai o tatou agaga pe a tatou oti)? O fea o mea sa e filifili e teu i totonu o lau atopau o le a mafai ona e alu ma ave pe a e oti?
Faitau le Mataupu Faavae ma Feagaiga 130:18–19, ma vaavaai mo mea e mafai ona tatou o ma ave mai i lenei olaga pe a tatou oti.
E tusa ai ma fuaiupu 18–19, o le a le mea o le a ia i tatou pe a tatou oti? Ia tali i lenei fesili, faauma le mataupu faavae lenei: O le ma le tatou te maua i lenei olaga o le a tutu faatasi ma i tatou i le toetutu.
Na fesoasoani mai Elder Neal A. Maxwell o le Korama a Aposetolo e Toasefululua, ina ia tatou malamalama i le uiga o le upu atamai o loo i nei fuaiupu: “Afai tatou te mafaufau loloto i le mea tonu o le a tu faatasi ma i tatou i le toetu, e foliga manino mai o lo tatou atamai o le a tutu faatasi ma i tatou, o lona uiga e le na o le tulaga o lo tatou atamai, ae faapea foi i lo tatou gafatia ona maua ma faaaoga ia upumoni. O a tatou taleni, uiga, ma tomai o le a tutu faatasi ma i tatou; e mautinoa foi i o tatou gafatia e aoao ai, o le tulaga o le loto pulea, ma lo tatou gafatia ona galulue“ (We Will Prove Them Herewith [1982], 12).
-
-
E tusa ai ma le Mataupu Faavae ma Feagaiga 130:19, e mafai faapefea ona tatou maua le malamalama ma le atamai sili atu?
-
O le a se taimi na e maua ai malamalama po o le atamai e ala i le filiga ma le usiusitai? O le a se aafiaga na e maua?
-
Ia matau, e tusa ai ma le fuaiupu e 19, o i latou o e e maua le malamalama ma le atamai e tele atu i lenei olaga, o le a i ai se tulaga e lelei ai i le lalolagi a sau. O lona uiga o mea tatou te aoaoina i lenei olaga, i le faaletino ma le faaleagaga, o le a fesoasoani ia i tatou i le faavavau atoa. O le a mafai ona tatou galulue i le malamalama tatou te maua i lenei olaga ina ia avea atili ai e faapei o le Tama Faalelagi.
-
Mataupu Faavae ma Feagaiga 130:20-21
Ua faamalamalama mai e Iosefa Samita le auala tatou te maua ai faamanuiaga
Vaai faalemafaufau e faapea ua e manao e faaleleia atili lau tusitusi, ona e filifili loa lea e te tamoe i maila e tolu, i aso e lima o le vaiaso, mo se masina se tasi. O le a faapefea ona aafia lau tusitusi i lenei toleniga?
Afai e te manao e faaleleia atili lau tusitusi, o le a se mea e tatau ona e faia?
E pei lava ona tatau ona tatou malamalama i auala e maua ai taunuuga tatou te mananao i ai, e manaomia ona tatou malamalama i le auala e maua ai faamanuiaga e finagalo le Tama Faalelagi e tuu mai ia i tatou.
Faitau le Mataupu Faavae ma Feagaiga 130:20–21, ma vaavaai pe faapefea ona tatou maua faamanuiaga e finagalo le Tama Faalelagi e tuu mai ia i tatou. Atonu e fesoasoani le iloa o le upu faavae o lona uiga “e tusa ai” ma o le fuaitau “folafola le maaveesea” o lona uiga o se tulafono tamau ma e le toe suia.
E faavae i luga o mea ua e aoaoina i fuaiupu 20–21, faauma le mataupu faavae lenei: Afai tatou te fia maua se , o lona uiga e tatau ona tatou .
Ina ia fesoasoani ina ia e malamalama atili i lenei mataupu faavae, faatumu le siata lenei. Faitau le mau, ona faailoa mai lea o le tulafono ma se faamanuiaga e o faatasi ai o loo faamatalaina i fuaitau taitasi.
|
Fuaitau o Mau |
Tulafono |
Faamanuiaga |
|---|---|---|
-
-
Tali le fesili lenei: O a ni faamanuiaga na e maua ona sa e usitaia se tulafono?
-
Mafaufau i ni faamanuiaga e te manao e maua. Tusi po o le a le tulafono po o ni tulafono o le a manaomia ona e usitaia, ina ia e maua ai na faamanuiaga. (E mafai ona e faaaogaina fesoasoaniga mo le suesueina o tusitusiga paia, e pei o le Taiala i Tusitusiga Paia po o le Taiala i Autu, e fesoasoani e te maua ai tulafono e fesoasoani e aumaia ai faamanuiaga. E taua le manatua o nisi o tulafono ma faamanuiaga e matua patino lava a o isi e sili atu ona faalauaitele. E taua foi le manatua, o nisi o faamanuiaga folafolaina e mafai ona oo mai pe a mavae le olaga lenei.)
-
Toe faamanatu aoaoga faavae ma mataupu faavae ua e tau i ai i le Mataupu Faavae ma Feagaiga 130. Mafaufau loloto i nei aoaoga faavae ma mataupu faavae a’o e faitau i le saunoaga lenei a Peresitene Polika Iaga, e faatatau i le tomai o le Perofeta o Iosefa Samita e faamatala mai mea a le Atua: “O le maualuga o le mamalu o uiga o le Uso o Iosefa Samita sa ia mafai ai ona faafaigofieina mea faalelagi ina ia malamalama ai i latou e le lava lo latou malamalama. Ina ua ia talai atu i tagata—ma faaali atu i ai mea a le Atua, o le finagalo o le Atua, o le ata o le faaolataga, o faamoemoega o Ieova, o lo tatou sootaga ma ia ma le aiga Atua uma, na ia faaitiitia aoaoga ina ia fetaui i tulaga o tane, fafine, ma tamaiti, ma faafaigofie e pei o se auala teuteuina lelei. Ua tatau ai ona faatalitonuina soo se tagata e faalogo ia te ia i lona mana ma le pule paia, aua e leai se isi tagata e mafai ona aoao atu e pei ona ia faia, ma e leai se tagata e mafai ona ia faaalia mai mea a le Atua, ae ala mai i faaaliga a Iesu Keriso” (Aoaoga a Peresitene o le Ekalesia: Polika Iaga [1997], 354).
-
-
Ua ou suesueina le Mataupu Faavae ma Feagaiga 130:12–21 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: