Mataupu Faavae ma Feagaiga 88:1–40

Faatomuaga

Na ta‘ua e Peresitene Iosefa Filitia Samita e faapea, o le Mataupu Faavae ma Feagaiga 88 “o se tasi lea o faaaliga aupito sili ona taua ua tuuina mai i le Ekalesia, ma e mafai ona faaaluina aoga ni nai vaiaso e talanoaina ai” (Church History and Modern Revelation, 2 vols. [1953], 1:366). O le lesona muamua lenei o ni lesona se tolu o le a suesue ai le Mataupu Faavae ma Feagaiga 88. Sa maua e le Perofeta o Iosefa Samita lenei faaaliga i le silia ma le tolu aso—27–28 Tesema, 1832, ma le aso 3 Ianuari, 1833. O le vaega o le faaaliga ua aofia i le lesona lenei e aofia ai le aoaoga a le Alii e uiga i le malamalama o Keriso ma Lana faamalamalamaga o tulafono e pulea ai Ona malo ma i latou e nonofo ai.

Mataupu Faavae ma Feagaiga 88:1-13

Ua tautino mai e le Alii o Ia o le malamalama o loo i mea uma

Pe na e tatalo ea ina ia iloa le finagalo o le Alii e uiga i filifiliga sa e faia i lou olaga? Na maua e le Perofeta o Iosefa Samita le faaaliga i le Mataupu Faavae ma Feagaiga 88 ina ua uma ona tatalo taitoatasi ma le leo ia faitaulaga sili i se konafesi, ina ia iloa le finagalo o le Alii. Faitau le Mataupu Faavae ma Feagaiga 88:1–2, ma vaavaai mo le fetalaiga a le Alii e uiga i Ona lagona ma lagona o agelu pe a saili atu Ana auauna ia iloa Lona finagalo.

I le Mataupu Faavae ma Feagaiga 88:3–5, sa aoao ai e le Alii ia nei usoga e faapea, e mafai ona latou maua se faamautinoaga o le ola e faavavau e ala i le Agaga Paia, lea e igoa foi o le Fesoasoani ma le Agaga Paia o Folafolaga.

Sa aoao mai foi le Alii e uiga i le taua o le malamalama. Pe sa e i ai i se pouliuli atoa faaletino? E mafai faapefea e se aafiaga o le i ai i le pouliuli atoa ona fesoasoani e te talisapaia ai le faamanuiaga o le malamalama? O le a le mea ua faatusa i ai le malamalama i le talalelei a Iesu Keriso?

Faitau le Mataupu Faavae ma Feagaiga 88:6–13, ma vaavaai mo le mea na aoao mai e le Alii e uiga i le puna o le malamalama uma.

I le fuaiupu e 7, o le a le upu o loo faaaoga e faatatau atu ai i le upumoni ua “susulu atu”?

E tusa ai ma le fuaiupu e 12, o fea e sau ai le malamalama uma?

Ua aoao mai i nei fuaiupu e faapea, e ala mai i le Malamalama o Keriso, ua tuuina mai ai e le Atua le malamalama ma le ola i mea uma. Atonu e te manao e tusi lenei aoaoga faavae i le avanoa o i autafa o au tusitusiga paia. O le Malamalama o Keriso o le tulafono foi lea e pulea ai le atulaulau ma mea uma o i ai, ma ua “faapupulaina” o tatou malamalamaaga. O le faapupulaina o lona uiga ina ia ola. Atonu e te manao e tusi lenei faauigaga i au tusitusiga paia.

“O le Malamalama o Keriso … o se uunaiga mo le lelei i olaga o tagata uma lava (tagai i le Ioane 1:9; MF&F 93:2). I tusitusiga paia, o le Malamalama o Keriso e masani ona taua i nisi taimi o le Agaga o le Alii, o le Agaga o le Atua, o le Agaga o Keriso, po o le Malamalama o le Ola.

“O le Malamalama o Keriso e le tatau ona fenumiaia ma le Agaga Paia. E le o se peresona, e pei ona i ai le Agaga Paia. O lana uunaiga e taitaiina atu ai tagata ina ia latou maua le talalelei moni, papatiso, ma mauaina le meaalofa o le Agaga Paia (tagai i le Ioane 12:46; Alema 26:14–15).

“O le lotofuatiaifo o se faailoga o le Malamalama o Keriso, ua mafai ai e i tatou ona iloa le lelei mai le leaga. Ua aoao mai le perofeta o Mamona: “Ua foaiina mai le Agaga o Keriso i tagata uma lava, ina ia iloa ai e i latou le lelei ma le leaga; o lea ua ou faailoa atu ai ia te outou le ala e faamasino ai; aua o mea uma ua valaau atu ia faia le lelei, ma ua faaoleole atu ia faatuatua ia Keriso, ua aauina atu ai i le mana ma le mea foaifuaina mai a Keriso, o lea tou te iloa ai ma le malamalama atoatoa e mai le Atua ia. … O lenei foi, ou uso e, ona ua outou iloa le malamalama tou te faamasino atu ai, o lea malamalama foi o le malamalama o Keriso, ia outou nei outou faamasino atu ma le sese, aua o le faamasinoga tou te faamasino atu ai, e faamasinoina ai outou’ (Moronae 7:16, 18)” (Faamaoni i le Faatuatua: O Se Tusitaiala o le Talalelei [2004], 96).

Sa toe saunoa mai Peresitene Boyd K. Packer o le Korama a Aposetolo e Toasefululua, e uiga i le eseesega ma le fesootaiga i le va o le Malamalama o Keriso ma le Agaga Paia:

“O tagata uma i soo se mea lava ua i ai le Agaga o Keriso, ma talu ai ona o le Agaga o le Agaga Paia e mafai ona asiasi atu i soo se tasi, e maua le meaalofa o le Agaga Paia ‘e ala i le usiusitai i tulafono ma sauniga o le Talalelei’ (Mataupu Faavae o le Faatuatua 1:3), e ala i le gauai atu i le ‘papatisoga e ala i le faatofuina mo le faamagaloina o agasala; [ma le] faaee atu o lima mo le meaalofa o le Agaga Paia’ (Mataupu Faavae o le Faatuatua 1:4). E le otometi ona i ai e pei o le i ai o le Agaga o Keriso. O lenei meaalofa e tatau lava faaee atu e se tasi o loo i ai le pule (tagai i le Mataupu Faavae o le Faatuatua 1:5).

“O le mea lena poloaiina i tatou e fai, ina ia atiina ae le Malamalama o Keriso, lea e i totonu o tagata uma tatou te feiloai i ai, ma aumaia ai agaga i le tulaga lea e mafai ai e le Agaga Paia ona asiasia i latou. Ma a oo ai i le taimi talafeagai, e mafai ona latou maua, e ala i le sauniga, le meaalofa o le Agaga Paia, lea e tuuina atu i luga o tagata uma o le Ekalesia.

“O le taimi lava e maua ai e se tagata le meaalofa o le Agaga Paia ma mafai ona atiina ae faatasi ma le Malamalama o Keriso, lea ua uma lava ona latou maua, ona tatalaina ai lea o le atoatoaga o le talalelei i o latou malamalamaaga. E mafai foi e le Agaga Paia ona galue e ala i le Malamalama o Keriso.

“O le Malamalama o Keriso e mo le lalolagi atoa e pei o le susulu o le la lava ia. Soo se mea lava o i ai le tagata ola, o loo i ai foi le Agaga o Keriso. Ua tofusia ai tagata soifua uma lava. Na te lagolagoina mea uma e lelei. O ia o le musumusuga o mea uma o le a faamanuiaina ma manuia ai tagata uma. Na te faafaileleina le lelei” (“O Le Malamalama o Keriso,” Liahona, Ape. 2005, 13).

Ina ia fesoasoani i lou mafaufau e uiga i le auala o loo faamanuiaina ai oe i aso uma e le Malamalama o Keriso, tali ni fesili se lua pe sili atu i lau api talaaga mo le suesueina o tusitusiga paia:
1. I le Mataupu Faavae ma Feagaiga 88:7–10, ua tatou aoao ai o malamalama faaletino uma, e pei o le susulu o le la, o se vaega o le Malamalama o Keriso. E faapefea ona faamanuiaina e le malamalama faaletino lou olaga?
2. O lefaapupulaina po o le faapupula o lona uiga o le aumaia i le ola po o le faia ia ola. I le Mataupu Faavae ma Feagaiga 88:11, tatou te aoao ai o le Malamalama o Keriso, o se auala lea e mafai ona faapupulaina ai pe faia ia ola lo tatou malamalamaaga i mea. O le a se taimi na e lagonaina ai le faapupulaina o lou aoaoina po o le malamalama?
3. I le Mataupu Faavae ma Feagaiga 88:12–13, tatou te iloa ai o le Malamalama o Keriso e tuuina mai le ola i mea uma, lea e aofia ai manu vaefa, laau, ma e oo lava ia i tatou. O a ni auala ua faamanuiaina ai oe e ala i mea ola o loo siomia ai oe?
4. I le Mataupu Faavae ma Feagaiga 88:13, ua tatou iloa ai foi o le Malamalama o Keriso o le tulafono lea e pulea ai mea uma. E aofia ai tulafono faaletino, e pei o se kalave, ma tulafono faaleagaga ma poloaiga. E ala i le Malamalama o Keriso, o nisi taimi e ta’ua o lo tatou lotofuatiaifo, e mafai ai e i tatou taitoatasi ona iloatino le eseesega i le va o le sa’o ma le sese. O a ni auala e te aafia ai i tulafono faaletino ma faaleagaga i aso taitasi?
Tali le fesili lenei i lau api talaaga mo le suesueina o tusitusiga paia: E faapefea ona fesoasoani upumoni ua e aoaoina, e te talisapaia ai faatosinaga a le Atua i lou olaga i aso taitasi—i auala e iloa ma masani lava ona le iloaina? Ia aofia ai nisi o manatu e uiga i le auala o le a aafia ai lou olaga i aso taitasi i aso a sau.

Mataupu Faavae ma Feagaiga 88:14-40

Ua faamalamalama mai e le Alii o loo i ai tulafono e fesootai ma malo o le mamalu

Pe a e faamauluina se totinilima, e minoi lou lima, pe tuu atu le ola i le totinilima. Afai sa e aoaoina se tagata e uiga i le ata o le faaolataga, ma sa e faaaogaina se totinilima e faatusa i ai le tino faaletino ua tatou maua i le fanau mai, o le a le mea e mafai ona faatusa i ai lou lima?

Faitau le Mataupu Faavae ma Feagaiga 88:15, ma vaavaai mo le mea na ta’ua e le Alii o le tuufaatasiga o le agaga ma le tino.

Atonu e te manao e faailoga le aoaoga faavae e faapea, o le agaga ma le tino o le loto lea o le tagata.

Tali fesili nei i lau api talaaga mo le suesueina o tusitusiga paia: E mafai faapefea e mea e aafia ai o tatou tino faaletino ona aafia ai foi o tatou agaga? O a ni faataitaiga?

O le saunoaga lenei mai ia Peresitene Ezra Taft Benson e fesoasoani e faamalamalama le sootaga i le va o o tatou tino faaletino ma o tatou agaga:

“E le masalogia lava o le malosi po o le faaletonu o le tino, o le a afaina ai foi ma le agaga, aua ana leai semanu e le faaalia mai e le Alii le Upu o le Poto. E le’i tuuina mai lava e le Atua ni poloaiga faaletino—e afaina ai o tatou tino ma afaina ai foi o tatou agaga. …

“… O le agasala e tupu ai le vaivai. E le gata ina afaina ai le agaga a e afaina ai foi ma le tino. Ua tumu tusitusiga paia ma faatusa o le malosi faaletino lea e mafai ona maua e e amiotonu. I le tasi la itu, o agasala e le salamo ai e mafai ona iu ai i se ma’i faalemafaufau ma faaletino” (“I Ona Tulaga Aao,” Liahona, Fep. 1989, 6).

Ia matau, i nisi o fuaiupu o mau o le upu agaga ua faaaogaina faapitoa e faatatau i o tatou tino agaga (mo se faataitaiga, tagai i le Alema 40:15–23).

Tali le fesili lenei i lau api talaaga mo le suesueina o tusitusiga paia: E mafai faapefea e le malamalama i le sootaga i le va o lou tino ma lou agaga ona fesoasoani ia te oe e fai ai filifiliga amiotonu?

Mafaufau i nisi o aoaoga faavae ma mataupu faavae faaopoopo e mafai ona faaalia e ala i le faaaogaina o se lima ma se totinilima: vaai faalemafaufau i le aveeseina o lou lima mai se totinilima. O le a le mea e mafai ona faatusa i ai lenei faatinoga? O le a le mea e tupu i le agaga—i le agaga ma le tino—i le oti?

O le a le mea e faatusa i ai le uuina mai i luga o le totinilima ma toe faamaulu? O le a le mea e tupu i le agaga i le toetu?

Faitau le Mataupu Faavae ma Feagaiga 88:14, 16-17, ma vaavaai pe na faapefea ona faamatalaina ai e le Alii le Toetu.

Faauma le aoaoga faavae lenei o loo aoaoina i nei fuaiupu: O Iesu Keriso ua mafai ai e o tatou agaga ona .

I le fuaiupu e 17, i le uma ai ona tatou faitau e faapea, ua togiolaina e Iesu Keriso o tatou agaga, ua tatou aoao ai o i latou o e e lotomaualalo ma agamalu o le a mautofi i le lalolagi. Faitau le Mataupu Faavae ma Feagaiga 88:18–20, ma vaavaai mo le mea o le a tupu i le lalolagi a’o lei avea ma selesitila ma agaga togiolaina e mautofi ai.

E tusa ai ma le fuaiupu e 19, o le mafutaga a ai o le a maua i le lalolagi faapaiaina? Mafaufau loloto i mea e te fai atu i se tasi na fesili atu ia te oe le fesili lenei: O le a se mea e manaomia ona ou faia e agavaa ai e ola i le malo selesitila ma olioli i le mafutaga a le Tama Faalelagi?

E pei lava ona o le a maua e le lalolagi le mamalu pe a uma ona faapaiaina, o le a faapea foi ona suia o tatou tino ma maua le mamalu i le Toetu. Ae peitai, e le o tagata uma o le a tutusa le tulaga o le mamalu e maua.

Faitau le Mataupu Faavae ma Feagaiga 88:21–24, ma faailoa mai po o le a le mea e iloa ai le maualuga o le mamalu e maua e se tagata i le Toetu.

A o e suesueina le Mataupu Faavae ma Feagaiga 88:25–33, vaavaai mo upu ma fasifuaitau o loo lagolago ai le aoaoga faavae na aoao mai i fuaiupu e 21–24, e faapea i le Toetu, o le a tatou maua ai le mamalu e tusa ai ma le tulafono tatou te usitaia.

O lefuaiupu e 28 e faatatau ia i latou “o e o se agaga selesitila.” O i latou ia o tagata taitoatasi o e ola e tusa ai ma le tulafono o le malo selesitila. Ua tatou iloa mai le Mataupu Faavae ma Feagaiga 76 o le tulafono o le malo selesitila e aofia ai le osia ma le tausia o feagaiga o le talalelei (tagai i le MF&F 76:50–53, 69–70). O se tagata e ola i se tulafono faaselesitila i le lalolagi o le a maua se tino selesitila i le Toetu. Afai o se tagata e na o se tulafono terasitila po o le telesitila e usitai ai i le lalolagi, o le a maua e ia se tino o se mamalu e itiiti ifo, e tusa ai ma le tulafono sa ia usitaia.

Ina ia fesoasoani ia e malamalama pe aisea e avea ai tulafono a le Atua ma ni faamanuiaga ia i tatou, mafaufau e uiga i faamanuiaga e oo mai mai le usitaia o tulafono o taavale. I le isi itu, o a nisi o taunuuga mo le le usitaia o tulafono o taavale?

Faitau le Mataupu Faavae ma Feagaiga 88:34–35, ma vaavaai mo taunuuga o le ola ma le musu e ola i tulafono a le Atua.

Suesue i le Mataupu Faavae ma Feagaiga 88:40, ma faailoa mai uiga lelei o tagata o e o le a tosina atu i le malo selesitila. Ona tali lea o le fesili lenei, ma faauma le galuega atofaina lenei i lau api talaaga mo le suesueina o tusitusiga paia:
1. O a ni mea e mafai ona e faia e atiae ai pe faamalosia ai nei uiga auau mama i lou olaga?
2. Filifili se tasi o uiga auau mama ua faailoaina mai, ma tusi se sini faaletagata lava ia e atiina ae pe faamalosia ai lena tulaga lelei i lou olaga.

A o e faataunuuina lau sini ma ola i tulafono a Iesu Keriso, o le a faatumulia lou olaga i Lona malamalama.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mataupu Faavae ma Feagaiga 88:1–40 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: