Iunite 24: Aso 2
Mataupu Faavae ma Feagaiga 110
Faatomuaga
I le aso Sa, 3 Aperila, 1836, sa faia ai se sauniga faamanatuga i le Malumalu o Katelani. I le taimi o le sauniga sa o ese mai ai le Perofeta o Iosefa Samita ma Oliva Kaotui mai le faapotopotoga e tatalo. Ina ua tutu a’e i luga mai le tatalo, na faaali mai Iesu Keriso ia i laua ma talia le malumau fou na faatoa faapaiaina. Ona faaali mai ai lea o Mose, Elaia ma Elia, ma na toefuatai mai ai ki o le perisitua. O le Mataupu Faavae ma Feagaiga 110 o se tala lea o nei faaaliga vaaia.
Mataupu Faavae ma Feagaiga 110:1–10
Ua faaali mai le Alii ma talia le Malumalu o Katelani
Pe ua e matauina le faaupuga o loo tusia i fafo o malumalu uma lava? E faitauina faapea “E Paia i le Alii—o le Maota o le Alii.”
Ona o le malumalu o se maota o le Alii, e mafai ona e mafaufau i se taimi na asiasi mai ai le Alii i se tasi [o malumalu]?
O se tasi o asiasiga a’o lei leva ona uma le faapaiaga o le Malumalu o Katelani. Faitau le folasaga o le vaega o le Mataupu Faavae ma Feagaiga 110, ma vaavaai po o ai na i ai, ae o le a foi le mea sa latou faia a’o le’i tupu lenei aafiaga paia.
Faitau le faamatalaga a le Perofeta o Iosefa Samita i le faaaliga vaaia i le Mataupu Faavae ma Feagaiga 110:1–3. Taumafai e vaai faalemafaufau i le mea na tupu, ma vaai faalemafaufau pe mata o le a sou lagona pe ana faapea sa e i ai iina. Ona faitau lea o le Mataupu Faavae ma Feagaiga 110:4–5, ma sue po o le a le fetalaiga a le Alii ia Iosefa Samita ma Oliva Kaotui. Atonu e te manao e faailoga fuaitau e taua ia te oe.
-
I lau api talaaga mo le suesueina o tusitusiga paia, tusi e uiga i le mea e manatu e anoa i le Mataupu Faavae ma Feagaiga 110:4–5, ma faamatala pe aisea.
O leMataupu Faavae ma Feagaiga 110:5 o loo i ai faatonuga a le Alii mo Iosefa ma Oliva ia sii i luga o laua ulu ma olioli. Faitau le Mataupu Faavae ma Feagaiga 110:6–10, ma faailoa mai mafuaaga na tatau ai ona olioli Iosefa ma Oliva, faapea foi ma le Au Paia. Mafaufau e faailoga mea e te mauaina.
O se tasi o mafuaaga na tatau ai ona olioli le Au Paia o loo maua i fuaiupu e 7-8. Ua aoao mai e nei fuaiupu le mataupu faavae lenei: Afai tatou te usitai i poloaiga a le Alii ma tausi mama i Lona maota, o le a faaali mai o Ia lava ia i tatou i totonu o Ona malumalu.
-
-
E mafai faapefea ona faaali mai e le Alii o Ia lava i tagata i le malumalu? (O le upu faaalia o lona uiga e faaali mai pe faailoa mai, e pei ona talanoaina i le taimi o lau suesuega o le Mataupu Faavae ma Feagaiga 109.)
-
E mafai faapefea ona tatou tausia le maota o le Alii ia mama ma le faaeleeleaina?
-
Aisea e te manatu ai, e finagalo le Alii ia tatou usiusitai ma mama ona faatoa mafai lea ona Ia faaali mai o Ia lava ia i tatou i totonu o Lona maota?
-
Toe faamanatu le Mataupu Faavae ma Feagaiga 110:9–10, ma faailoa mai po o ai o le a faamanuiaina e ala i le toefuataiga o faamanuiaga o le malumalu.
-
-
E faapefea ona faamanuiaina le lalolagi e ala i malumalu ma le galuega o le faaolataga mo e o ola ma e ua oti?
-
Ua faapefea ona faamanuiaina e le malumalu lou olaga?
-
Mataupu Faavae ma Feagaiga 110:11-16
Ua faaali mai Mose, Elaia ma Elia, ma ua toefuatai mai ki o le perisitua ia Iosefa Samita ma Oliva Kaotui
Tagai i le Mataupu Faavae ma Feagaiga 110:11–13 po o ai na faaali taitoatasi mai i le Perofeta o Iosefa Samita ma Oliva Kaotui ina ua mavae le faaaliga vaaia o le Faaola. Atonu e te manao e faailoga nei igoa.
Mose
Elia
E te iloa o ai Mose ma Elia ma nisi o mea taua na laua faia a’o i ai i laua i luga o le fogaeleele? Ina ia aoao atili e uiga i nei perofeta e toalua o le Feagaiga Tuai, su’e o la’ua igoa i le Bible Dictionary po o le Taiala i Tusitusiga Paia.
O Elaia atonu o se perofeta sa soifua i aso o Aperaamo. E faaopoopo atu i se igoa, o Elaia o se faalagiga e faauigaina o le teuteuala po o le tagata na toefuataia mai se mea. (Tagai i le Taiala i Tusitusiga Paia, Elaia,” scriptures.lds.org; Bible Dictionary, “Elias.”)
O avefeau taitasi e toatolu o e sa faaali mai i le Malumalu o Katelani na tuuina mai ki o le perisitua ia Iosefa Samita ma Oliva Kaotui.
-
|
Mose |
Elaia |
Elia |
|---|---|---|
O le faamatalaga lenei o le a fesoasoani e te malamalama ai i ki po o le pule e te faailoaina mai i le Mataupu Faavae ma Feagaiga 110:11–16.
“O ki o le faapotopotoina o Isaraelu”
Na tuuina atu e le Alii le igoa o Isaraelu ia Iakopo, o le atalii o Isaako ae o le atalii o le atalii o Aperaamo (tagai i le Kenese 32:28). O fanau a Iakopo, o e na oo ina ta’ua o malo o Isaraelu, sa o ni tagata o le feagaiga a le Atua. I le aluga o taimi, na faasalalauina solo le nuu o Isaraelu ma a latou fanau i le lalolagi atoa, o le tele lava ona o lo latou amioletonu. Ua folafola mai le Alii e faapotopoto mai Lona nuu o le feagaiga (tagai i le 1 Nifae 15:13–14; 3 Nifae 5:24; 16:5; 29:1, 3). O e tupuga mai ia Iakopo ma isi tagata uma e faapotopotoina mai i le malo o le Alii e ala i le galuega faafaifeautalai. O ki o le perisitua na toefuatai mai e Mose e faalauteleina ai le galuega faafaifeautalai i le Ekalesia i le lalolagi atoa.
Na faamalamalama mai e Elder Russell M. Nelson o le Korama a Aposetolo e Toasefululua e faapea: “O le galuega faafaifeautalai e taua tele i le faapotopotoina o Isaraelu. … I le tele o atunuu, ua sailia ai e o tatou faifeautalai i latou ua faataapeapeina o Isaraelu” (“O Le Faapotopotoina o Isaraelu ua Faataapeapeina,” Ensign po o le Liahona, Nov. 2006, 81).
Na aoao mai Peresitene Spencer W. Kimball e faapea: “O le faapotopotoina o Isaraelu e aofia ai le auai i le ekalesia moni ma lo latou o mai i se malamalama i le Atua moni. … O le mea lea, o soo se tagata, o lē e taliaina le talalelei toefuataiina, ma o lē ua saili e tapuai i le Alii i lana lava gagana ma faatasi ma le Au Paia i atunuu o loo latou nonofo ai, ua usitaia le tulafono o le faapotopotoina o Isaraelu, ma ua avea ma sui e mauaina faamanuiaga folafolaina uma mo le Au Paia i nei aso mulimuli” (The Teachings of Spencer W. Kimball, ed. Edward L. Kimball [1982], 439).
Atonu e te manao e tusi le galuega faafaifeautalai i luga o le siata, i le koluma i lalo o le ulutala “Mose.”
“O le tisipenisione o le talalelei a Aperaamo”
O le tisipenisione o le talalelei a Aperaamo, na tuuina atu i le Perofeta o Iosefa Samita ma Oliva Kaotui e Elaia, na toefuataiina ai folafolaga na faia e le Alii ia Aperaamo. Na faamalamalama mai e Elder Bruce R. McConkie o le Korama a Aposetolo e Toasefululua e faapea: “Ua toe aumaia e Elaia ‘le talalelei a Aperaamo,’ o le feagaiga sili faa-Aperaamo lea e maua ai e tagata faamaoni folafolaga o le uluuluola e faavavau, ma ua folafolaina mai e faapea, e ala mai i le faaipoipoga faaselesitila ona faatoateleina a latou fanau e faavavau, e pei o le tele o oneone i le matafaga po o fetu foi i le lagi. Ua tuuina mai e Elaia le folafolaga—na maua e Aperaamo, Isaako ma Iakopo—e faapea o le a faamanuiaina tupulaga uma e ala mai i tagata o ona po nei ma a latou fanau. Ma o lenei ua matou faaavanoaina atu faamanuiaga a Aperaamo, Isaako, ma Iakopo mo i latou uma e taliaina” (O Ki o le Malo,” Ensign, Me 1983, 22).
Atonu e te manao e tusi faaipoipoga faaselesitila ma le manuia e faavavau i luga o le siata, i le koluma i lalo o le ulutala “Elaia.”
“O ki o lenei tisipenisione”
Ina ia fesoasoani ia e malamalama i ki o le perisitua na toefuatai mai e Elia, faitau faamatalaga nei:
Na aoao mai Peresitene Iosefa Filitia Samita: “O lenei mana faamau na faaee mai i luga o Elia, o le mana lea e fusia ai tane ma ava, ma fanau i matua mo le taimi nei ma le faavavau. O le mana faamau lea e i ai i sauniga uma o le Talalelei. … O lenei mana e fusia ai pe faamauina ai sauniga uma e faatatau i le faaolataga, ma o le misiona a Elia o le a oo mai, e toefuatai mai” (Elijah the Prophet and His Mission [1957], 5).
Na faamalamalama mai e Elder David A. Bednar o le Korama a Aposetolo e Toasefululua faapea:
“I le avea ai ma tagata o le Ekalesia toefuataiina a Keriso, ua ia te i tatou le tiutetauave o le feagaiga e sailia o tatou augatama ma tuuina atu mo i latou ia sauniga faaola o le talalelei. ‘E le mafai ona atoatoa i latou e aunoa ma i tatou’ (Eperu 11:40 …). Ma ‘e le mafai foi ona tatou atoatoa e aunoa ma o tatou aiga ua maliliu’ (MF&F 128:15).
“O mafuaaga ia tatou te faia ai sailiga o talafaasolopito o aiga, fausia malumalu, ma faia sauniga sui mo e ua maliliu. O mafuaaga na na auina mai ai Elia e toefuatai mai le mana o faamauga e fusifusia ai i le lalolagi faapea foi ma le lagi” (“O Le a Liliu Atu Loto o Fanau i o Latou Tama,” Ensign po o le Liahona, Nov. 2011, 25–26).
E tusa ai ma nei faamalamalamaga, o le a le mana po o le pule na toefuatai mai e Elia? (Atonu e te manao e tusi lau tali i luga o le siata i le koluma i lalo o le ulutala “Elia.”)
Ina ua sau Elia i le Malumalu o Katelani, na ia faataunuuina le valoaga a Malaki e faapea, o le a oo mai Elia “a o lei oo mai le aso o Ieova e sili ma le matautia” e “faaliliuina loto o matua i fanau, ma loto o fanau i o latou matua” (Malaki 4:5-6).
-
Na saunoa Peresitene Iosefa Filitia Samita e faapea, o le Malumalu o Katelani “na fausia muamua lava mo le toefuataiga o ki o le pule. I le mauaina o nei ki, [sa] faapea ona faaali mai ai le atoatoaga o sauniga o le talalelei” (Doctrines of Salvation, comp. Bruce R. McConkie, 3 vols. (1954–56), 2:242). O nei ki o loo i ai i le taimi nei i le Peresitene o le Ekalesia ma le Korama a Aposetolo e Toasefululua.
Faauma le faamatalaga lenei: Mai i le Mataupu Faavae ma Feagaiga 110:11–16, ua tatou aoao ai o ki o le galuega faafaifeautalai, aiga e faavavau, ma galuega o le malumalu e fesoasoani ia tatou saunia ai mo le .
Ua e ola i se taimi e mafai ona e faia le galuega faafaifeautalai, talafaasolopito o aiga ma galuega faalemalumalu, ma i le taimi e mafai ona e tulimatai atu i le mauaina o faamanuiaga o le malumalu, e aofia ai sauniga o le faamauga. Mafaufau e fai se sini ina ia auai i nei taumafaiga i le sauniuniga mo le Afio Mai Faalua o le Alii. E mafai foi ona e faatuina se sini patino o ala o le a e saunia ai mo se faaipoipoga faaselesitila. Ole atu i le Tama Faalelagi e fesoasoani ia te oe e faataunuu au sini.
-
Ua ou suesueina le Mataupu Faavae ma Feagagaia 110 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: