Mataupu Faavae ma Feagaiga 19:1–22

Faatomuaga

Ia Iuni 1829, na faafaigaluegaina ai e Iosefa Samita le lomitusi o Egbert B. Grandin e lolomi kopi e 5,000 o le Tusi a Mamona i se tau e $3,000. Ae ui i lea, sa le’i amataina e Grandin le lolomiina pe faatauina mai foi le tailolomi seia oo ina ia faamaonia le totogi mo le galuega. I le faaaliga o loo i le Mataupu Faavae ma Feagaiga 19, lea atonu na tuuina mai i le taumafanafana o le 1829, na poloaiina ai e le Alii ia Matini Harisi e “foai atu se vaega o au meatotino … [ma] totogi le ʼaitalafu na e konakalate ai ma le lomitusi” (MF&F 19:34–35). O le faaaogaina o se vaega o lana faatoaga e fai ma puipuiga, na faamaonia ai e Matini Harisi lava ia le totogi o le tau mo le lolomiina pe afai e le atoa le tau i le faatauga o le Tusi a Mamona.

Na faamatalaina e Peresitene Iosefa Filitia Samita le faaaliga lenei, ma lana aoaoga e uiga i le Togiola, o “se tasi o faaaliga maoae ua tuuina mai i lenei tisipenisione; o loo i ai ni nai [faaaliga] e sili atu le [taua] nai lo o lenei” (Church History and Modern Revelation, 2 vols. [1953], 1:85).

Mataupu Faavae ma Feagaiga 19:1-3

Ua tautino mai e le Faaola na Ia faataunuuina le finagalo o le Tama

Faitau le Mataupu Faavae ma Feagaiga 19:1-3, ma vaavaai mo le fetalaiga a le Faaola po o ai o Ia ae o le a le mea na Ia faia. Faailoga upu ma fasifuaitau o loo aoao mai ai na faataunuuina e Iesu Keriso le finagalo o Lona Tama ma o Iesu Keriso o le a faamasinoina i tatou e tusa ai ma a tatou galuega.

I lau api talaaga mo le suesueina o tusitusiga paia, faamatala ai pe na faapefea ona fesoasoani ia Matini Harisi le iloaina o nei upumoni e uiga i le Faaola, [na te] lagona ai le toafilemu ma tuuina atu ai ia te ia le malosi e fai ai le finagalo o le Alii.

Mataupu Faavae ma Feagaiga 19:4-12

Ua faamalamalama mai e Iesu Keriso le faasalaga e faavavau ma le iu

Na faamalamalama mai e le Alii nisi o upumoni e mafai ona fesoasoani ia i tatou ia malamalama lelei ai i Lana taulaga togiola. Faitau le Mataupu Faavae ma Feagaiga 19:4, ma vaavaai mo upu e faauma ai le faamatalaga faale-aoaoga faavae lenei: E tatau i tagata uma a le o lea . Atonu e te manao e faailoga le fasifuaitau lenei i au tusitusiga paia.

Faitau le Mataupu Faavae ma Feagaiga 19:5. Na faapefea ona faamatala e le Faaola mafatiaga o i latou o e e le salamo ma o le a, faapea ai, ona [latou] maua Ana faamasinoga? E faapefea e le iloa o lenei upumoni ona tuuina mai se mafuaaga faaopoopo tatou te salamo ai i a tatou agasala?

Vaai i le Mataupu Faavae ma Feagaiga 19:6–7, ma vaavaai mo fasifuaitau o loo faaaoga i nisi taimi e faamatala ai le tulaga o i latou o e le salamo. Faailoga fasifuaitau “mafatiaga e le gata” ma le “malaia faavavau.” O le a se mea e te mafaufau i ai pe a e faitauina nei fasifuaitau e lua?

Sue i le Mataupu Faavae ma Feagaiga 19:8-12 mo faamatalaga e fesoasoani e te malamalama ai, pe aisea e le faatatau ai nei fasifuaitau i le umi o le taimi o le a mafatia ai tagata mo a latou agasala.

Na e matauina o “Lē Gata” o se suafa lea mo le Atua? O lona uiga o le “faasalaga e le gata” po o le “faasalaga faavavau” o le “faasalaga lea a le Atua.” O le a lou manatu i le uiga o le “Faasalaga a le Atua.”?

O le faamalamalama mai e Elder James E. Talmage o le Korama a Aposetolo e Toasefululua: “E i ai se faitotoa e sau ai i fafo faapea foi ma se faitotoa e ulufale ai i seoli. O seoli e le o se nofoaga e auina atu i ai e se faamasino saua ni pagota e faapuapuagatia ai ma ia faasalaina mo na o lona mamalu; ae o se nofoaga ua saunia mo le aoaoina, le a’oaiina o i latou o e sa le mafai ona aoaoina iinei i le lalolagi ia mea sa tatau ona latou aoaoina. E moni, tatou te faitau e uiga i le faasalaga tumau-faavavau, mafatiaga e le gata, ma le malaia faavavau. O se faaupuga taufaamata’u lena; ae o lona alofa mutimutivale, ua faamanino mai ai e le Alii le uiga o na faaupuga. Ua ia fetalai, ‘O le faasalaga faavavau,’ o le faasalaga a le Atua, aua o ia e faavavau; ma o lena tulaga po o le vaega po o le avanoa o le a i ai pea mo le tagata agasala ua tatau i ai ma manaomia moni sea ituaiga o faasalaga; ae o lenei manatu e le faapea o le tagata mafatia po o le tagata agasala lava ia o le a faia ia tumau ma puapuagatia e faavavau ma tumau. E leai se tagata o le a tuuina i seoli i se umi e sili atu nai lo o le umi e tatau ai, e saunia ai o ia mo se mea e sili atu le lelei. A oo loa o ia i lena tulaga, o le a matala faitotoa o le falepuipui ma o le a i ai olioliga i au faafeiloai o e taliaina o ia i totonu o se tulaga e sili atu ona lelei. E le’i faaitiitia lava e le Alii le mea ua ia fetalai mai ai i tisipenisione na muamua atu e uiga i le faagaoioiga o ana tulafono ma lana talalelei, ae ua ia faamanino mai ia te i tatou lona agalelei ma le alofa mutimutivale e ala i mea uma, aua o lona mamalu ma lana galuega le aumai o le tino ola pea ma le ola e faavavau o le tagata” (i le Conference Report, Ape. 1930, 97.)

Na tuuina mai e Peresitene Iosefa Filitia Samita malamalamaaga lenei: “O le faasalaga e tasi e mulimuli i taimi uma i le solitulafono e tasi, e tusa ai lea ma tulafono a le Atua o le e faavavau ma e le gata, o le ala lena ua ta’ua ai o le faasalaga e le gata, ma le faasalaga faavavau, aua o le faasalaga lea ua tamau e le Atua e tusa ai ma le tulafono e le masuia. E mafai ona oo se tagata i le puapuaga e le gata, ma pe ua ia totogiina le sala mo lana solitulafono, e faasaolotoina o ia, ae e tumau lava le faasalaga ma faatalitali i le isi tagata solitulafono, ma faapena ai lava e faavavau” (Doctrines of Salvation, tuufaatasia Bruce R. McConkie, 3 vols. [1954–56], 2:228).

Na tuuina mai e Peresitene J. Reuben Clark, o le Au Peresitene Sili se vaaiga faaopoopo e ala i le aoao mai e uiga i le natura moni o le Atua. A o e faitauina lana faamalamalamaga, mafaufau pe faapefea ona fesoasoani le malamalama i le natura o le Atua ia tatou malamalama e uiga i le faasalaga a le Atua.

“E le mafai ona ou lagolagoina le aoaoga faavae o ona po nei e faapea, e le faasala le Atua, aua e le mafai ona ou tiai ese uma ia tusitusiga paia o loo i ai, ina ia mafai ona oo atu i lena faaiuga [, ae] ou te manatu a oo i le taimi e afio mai ai le Alii e tuuina mai o tatou taui … ma o tatou faasalaga … o le a ia tuuina mai le faasalaga e sili ona maualalo e manaomia e le tulafono mo a tatou solitulafono. Ou te talitonu o le a ia aumaia i totonu o lona faamasinotonu le alofa atoa e le muta, ma faamanuiaga ma le alofa mutimutivale ma le agalelei ma le malamalama ua ia te ia. …

“Ma i le isi itu, ou te talitonu pe a oo mai i le faia o taui mo a tatou amio lelei, ia o le a tuuina mai ia i tatou le tulaga aupito maualuga e mafai ona tuuina mai, ma le manatu i le sala na tatou solia” (“As Ye Sow … ,” Brigham Young University Speeches of the Year [May 3, 1955], 6–7).

Mataupu Faavae ma Feagaiga 19:13–22

Ua fetalai le Faaola e uiga i Lona puapuagatia mo agasala

E finagalo le Faaola ia faamanuiaina ma faaleleia atili o tatou olaga e ala i Lana taulaga togiola. Faitau le Mataupu Faavae ma Feagaiga 19:13–17, ma faatumu le faamatalaga lenei: O i latou o e filifili e le salamo o le a .

Ua faamanatu mai e Elder Neal A. Maxwell o le Korama a Aposetolo e Toasefululua ia i tatou, o loo i ai sa tatou filifiliga e fai: “O le a tatou iu ane a le o le filifilia o le ala na soifua ai Keriso, po o le ala na Ia mafatia ai! O le, a le o le ‘mafatia e pei lava o A’u’ (MF&F 19:16-17), po o le manumalo ‘e pei o [Ia] foi ona … manumalo (Faaaliga 3:21)” (“Overcome … Even As I Also Overcame,” Ensign, Me 1987, 72).

Mafaufau loloto i au lava filifiliga. Pe o latou taitaiina atu oe i se olaga e sili atu ona pei o Keriso, pe o latou taitai atu oe i se lumanai o le puapuagatia mo au lava agasala?

O le tele o tala i puapuaga o Iesu Keriso o loo tuuina mai e se tagata e ese mai lo o Ia lava (tagai i le Mataio 26:36–39; Luka 22:39–44). O leMataupu Faavae ma Feagaiga 19 o loo i ai le tala patino a le Faaola i Ona puapuaga.

Faitau le Mataupu Faavae ma Feagaiga 19:15, 18–19, ma tali fesili nei i lau api talaaga mo le suesueina o tusitusiga paia:
1. Na faapefea ona faamatalaina e le Faaola le puapuaga na Ia oo i ai i Ketesemane?
2. O a ni ou lagona e uiga i le puapuagatia o le Faaola mo le tau o au agasala?
3. E mafai faapefea e lou iloaina o puapuaga o le Faaola ona fesoasoani e uunaia ai Matini Harisi e salamo i ana agasala, e pei ona faatonuina ai o ia e fai i le faaaliga lenei?
Faitau le Mataupu Faavae ma Feagaiga 19:20, ma tali fesili nei i lau api talaaga mo le suesueina o tusitusiga paia:
1. Aisea e te manatu ai o le aluese mai o le Agaga o le a taitai atu ai i puapuaga?
2. Aisea e aoga ai le manatua o taimi na tatau ai ona tatou puapuagatia i taunuuga o a tatou agasala?

Mafaufau i tua i taimi na e puapuagatia ai ona o au agasala ma lagonaina ai le manaomia ona salamo. A o e mafaufau loloto i na taimi, ia mafaufau i le taimi na e lagonaina ai le mafutaga a le Agaga ma le taimi na e lagonaina ai le aluese o le Agaga. O le a le mea na e faia ina ia e toe olioli ai i le mafutaga a le Agaga?

Faaaoga le Mataupu Faavae ma Feagaiga 19:13–16, 20 e tali ai le fesili lenei i lau api talaaga mo le suesueina o tusitusiga paia: E faapefea ona avea le poloaiga a le Alii ina ia salamo ma se faamaoniga o Lona alofa mo i tatou?

I se taimi o le vaiaso a sau, ia faasoa atu lau molimau i se tagata o le aiga po o se uo e uiga i se tasi o aoaoga faavae po o mataupu faavae na aoaoina a o suesue i le Mataupu Faavae ma Feagaiga 19:1-22. Mafaufau e ofo atu e faasoa atu lou aafiaga i lou faiaoga i le isi taimi e te lua feiloai ai.

Mau Tauloto—Mataupu Faavae ma Feagaiga 19:16–19

Galue i le taulotoina o le Mataupu Faavae ma Feagaiga 19:16–19 e ala i le tusi o upu uma o le mau tauloto i luga o se fasi pepa. Faaaoga lau pepa e faitau leotele ai le fuaitau mo ni nai taimi. Ona ufiufi (pe tapeese) lea o ni nai upu po o fasifuaitau o loo i luga o lau pepa. Faaauau pea ona taulotoina le fuaitau o le mau tauloto, ma tauloto ia vaega o loo ufiufiina mai mea o loo e manatua. Toe fai lenei faagasologa seia oo ina e mautinoa ua mafai ona e taulotoina atoa le mau.

I lau api talaaga mo le suesueina o tusitusiga paia, tusi uma ai ni mea e mafai ona e taulotoina o le fuaitau o le mau tauloto lenei.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mataupu Faavae ma Feagaiga 19:1–22 ma faamaeaina lenei lesona i le (aso).

O fesili, mafaufauga, ma manatu faaopoopo ou te fia faasoa atu i lo’u faiaoga: