Iunite 16: Aso 2
Mataupu Faavae ma Feagaiga 75
Faatomuaga
I se konafesi a le Ekalesia sa faia i le aso 25 o Ianuari, 1832, sa maua ai e le Perofeta o Iosefa Samita ni faaaliga se lua, o loo maua uma i le Mataupu Faavae ma Feagaiga 75. O le faaaliga muamua, o loo tusia i fuaiupu 1-22, na tuuina mai i se vaega o toeaina o e na auina atu o latou igoa mo le galuega faafaifeautalai. Sa faatonuina e le Alii nei toeaina e uiga i o latou tiute faafaifeautalai ma totofi atu ia i latou ni soa i le misiona. O le faaaliga lona lua, o loo tusia i fuaiupu 23–36, na tuuina mai i se vaega lona lua o toeaina o e sa fia iloa le finagalo o le Alii e faatatau ia i latou. Na faatonuina e le Alii nei toeaina ina ia mautinoa e i ai mea e tuuina atu [mo le tausiga] o o latou aiga ma ia talia se valaau e talai atu le talalelei.
Mataupu Faavae ma Feagaiga 75:1–5
Ua fofoga mai le Alii ia i latou o e mananao e talai atu le talalelei
Toe fia ni tausaga ona mafai lea ona e auauna atu i se misiona talai? A o e mafaufau e uiga i le avanoa e auauna atu ai i se misiona talai, o a ni faamanuiaga ua e faamoemoe o le a e maua e ala i le faasoaina atu o le talalelei i isi? I le avanoa ua saunia, tusi ai nisi o na faamanuiaga:
E pei ona tusia i le Mataupu Faavae ma Feagaiga 75, ua folafola mai e le Alii ni faamanuiaga se tele ia i latou o e ua Ia valaauina e talai atu le talalelei. Sa ia avatu foi ia te i latou ni faatonuga e fesoasoani ai ia te i latou ia faamanuiaina. Faitau le Mataupu Faavae ma Feagaiga 75:1–4, ma vaavaai mo le mea na finagalo le Alii i toeaina e fai a’o latou talai atu le talalelei. Atonu e te manao e faailoga mea ua e maua i au tusitusiga paia.
-
I lau api talaaga mo le suesueina o tusitusiga paia, tusi ai pe aisea e te manatu e taua ai i faifeautalai ona talai atu le talalelei i le ala na faamatalaina mai e le Alii i nei fuaiupu.
Faitau le Mataupu Faavae ma Feagaiga 75:5, ma vaavaai mo le mea na folafola mai e le Alii i toeaina pe afai o le a latou faamaoni i le folafolaina atu o Lana talalelei. Atonu e aoga le iloa o le upu fusisaito e faatatau i au o saito e oti ma nonoa i ni fusi. O le i ai o ni “fusisaito e tele” o lona uiga o se seleselega tele. O le a sou manatu, o le a le mea ua faatusa i ai “fusisaito” i le galuega faafaifeautalai?
Fusisaito i se fanua
E faaopoopo atu i faamanuiaga o le mauaina o fua o a tatou galuega a o tatou faasoa atu le talalelei i isi, ua folafola mai e le Alii faamanuiaga e faavavau i le Mataupu Faavae ma Feagaiga 75:5. E mafai faapefea e folafolaga a le Alii i le fuaiupu e 5 ona faamalosiauina oe e faasoa atu le talalelei i isi?
-
Mataupu Faavae ma Feagaiga 75:6-22
Ua valaau ma faatonu e le Alii ia soa a faifeautalai
Ina ua uma ona tuuina mai e le Alii o faatonuga ma folafolaga i toeaina o e o le a faia ni misiona, sa Ia tuuvaegaina i latou i ni soa ma tuu atu i soa taitasi ni faatonuga faapitoa.
Faitau le Mataupu Faavae ma Feagaiga 75:6–12 e iloa ai le uluai soa ma le folafolaga na tuuina mai e le Alii ia i laua pe afai la te faamaoni i le folafolaina atu o le Talalelei.
Atonu e fesoasoani lou iloaina, i le aso 29 o Oketopa, 1831, na maua ai e William E. McLellin se valaauga e auauna atu i se misiona i le Iunaite Setete i sasae, ma na valaauina Samuelu H. Samita e avea ma ana soa (tagai i le MF&F 66:5–8). O le taimi muamua sa usitai ai William i lenei valaauga. Sa vave ona uma lana misiona, ma toe foi atu ai i Katelani, Ohaio, i le faaiuga o Tesema 1831. E pei ona faamaumauina i le Mataupu Faavae ma Feagaiga 75:6–12, na aoai e le Alii ia William E. McLellin ona o ana muimuiga, aveesea valaauga e auauna atu i setete i sasae, ma valaauina Orson Hyde e sui ia te ia e avea ma soa a Samuelu Samita. Ae peitai, sa toe tuuina mai ma le alofa e le Alii se isi valaauga ia William e folafola atu le talalelei i le Iunaite Setete i saute faatasi ai ma Luka Johnson e avea ma ana soa. Sa taliaina e William le valaauga e auauna atu, ae na te le’i faaauauina ma le faamaoni. E lei umi ae ona tautino mai ua ma’i tele mo le faaauauina o lana misiona. Ina ua ia tuua lana misiona, sa ia malaga atu i Hairama, Ohaio, ma faaipoipo ia Emiline Miller.
Faitau le Mataupu Faavae ma Feagaiga 75:11, 13–14, ma vaavaai mo le folafolaga na toe folafola mai e le Alii i na soa faifeautalai taitasi pe afai o le a latou faamaoni i le folafolaina atu o le talalelei. Atonu e te manao e faailoga ia fuaitau o loo i nei fuaiupu o loo faamautinoa mai ia i tatou e faapea, afai tatou te faamaoni i le folafolaina atu o le talalelei, o le a faatasi le Alii ma i tatou.
-
-
O Gordon B. Hinckley o se faifeautalai i Egelani, o loo talai i le Paka o Hyde i Lonetona
E mafai ona tatou feagai ma luitau i a tatou taumafaiga ina ia faamaoni i le folafolaina atu o le talalelei. I se tusiga e uiga ia Peresitene Gordon B. Hinckley, na tusia ai e Elder Jeffrey R. Holland o le Korama a Aposetolo e Toasefululua, e uiga i se tauiviga na feagai ma Peresitene Hinckley a o avea o se faifeautalai talavou i Egelani:
“Sa mauaina e Elder Hinckley nisi o faafitauli e masani ma faifeau e fou i tulaga faapea i se aai fou. E le i malosi lelei o ia faaletino, ma a o alu atu o ia i lana fonotaga faalenuu … , sa ia toe manatu ma faapea mai: ‘Sa ou fefe. Sa ou laa atu i luga o lena tulaga laitiiti ma tilotilo atu i lena faapotopotoga o tagata ua faatasi mai. … Sa foliga pau ma mata’ua, ae peitai sa taufetoitoi lava ma tuuina atu le savali e tatau ona faia.’
“Ua maualalo le agaga ma fetaiai ma le leai o se alualu i luma i le galuega talai, sa tusi atu loa Gordon i lona tama, ma faapea atu: “Ua ou faamaimauina lo’u taimi ma au tupe. Ou te le iloa po o le a le aoga o lo’u nofo ai iinei.’ I se taimi tatau ai na oo mai ai se tali malu ma le manino mai i lona tama. O lena tusi o loo faapea mai: ‘Mo Gordon. Ua ou mauaina lau tusi [o le aso lea]. E na o le tasi lava la’u fautuaga. Aua e te toe manatu ia te oe ae alu e galue. Ma le alofa tele, o Lou tama.’
“Na saunoa mai Peresitene Hinckley i lena taimi, “Sa ou mafaufau loloto i lana tali, ma o le taeao na sosoo ai i la matou vasega o tusitusiga paia na matou faitau ai i le saunoaga matautia a le Faaola: “Aua ai se fia faasaogalemuina lona ola, e maumau ai ia te ia; ao le faamaumau lona ola ona o a’u ma le talalelei, e faasaoina e ia” (Mareko 8:35).
“‘O lena fuaitau faigofie, lena folafoalga, ua pai mai ia te au. Sa ou tootuli i ou tulivae ma faia se feagaiga ma le Alii o le a ou taumafai e faagalo ia te au lava ma ou alu atu ou te galue. Ua ou faitauina lena aso o se faaiuga i lou olaga. O mea lelei uma ua tutupu ia te a’u talu mai lena taimi e mafai ona ou fesootai i tua i le faaiuga sa ou faia i lena taimi’” (“O Le Susuga a Gordon B. Hinckley: O Lo o Tulai mai o Ia ma le Lototele ma le Malosi,” Ensign, Iuni 1995, 8.)
E pei ona faamaumauina i le Mataupu Faavae ma Feagaiga 75:15–22, na faatonuina e le Alii ia faifeautalai e faamanuia aiga o e taliaina i latou. Sa Ia aoaoina foi i latou i le mea e fai pe a teena i latou e tagata latou te faasoa atu i ai le talalelei. O le tutuina ese o le efuefu o o latou vae o se molimau e faasaga ia i latou o e teena i latou, ua le o toe faia e faifeautalai i aso nei.
Mataupu Faavae ma Feagaiga 75:23-29
Ua faamalamalama mai e le Alii le auala e tatau ona lagolagoina ai aiga o i latou o e na Ia valaauina e faia ni misiona
O faaaliga lona lua o loo i le Mataupu Faavae ma Feagaiga 75, ua faamaumauina i fuaiupu e 23–36, na tuuina mai i se vaega ese o toeaina. I tausaga popofou o le Ekalesia, o le toatele o alii na valaauina e faia ni misiona sa i ai a latou ava ma fanau o e sa faalagolago ia i latou mo le tausiga. O le taliaina o le valaau e auauna atu o se osigataulaga tele mo le aiga atoa. O se popolega masani mo le toatele o toeaina o le, po o le a le mea o le a tupu i o latou aiga pe a latou taliaina se valaau e talai atu le talalelei i se nofoaga e mamao mai le aiga.
Faitau le Mataupu Faavae ma Feagaiga 75:24–28, ma vaavaai mo faatonuga a le Alii i toeaina o e sa manaomia e talai atu le talalelei ae na i ai ni aiga e tausi.
I nei fuaiupu na fetalai mai ai le Alii, e tatau i le Ekalesia ona fesoasoani atu pe a talia e se tama po o se tane le valaau e alu e auauna atu i se misiona. Ia matau i le fuaiupu e 26 le mea na faatonuina e le Alii ia toeaina e fai, pe afai na mafai ona latou maua se nofoaga o le a mafai ona tausiaina ai o latou aiga.
I le fuaiupu e 28, na ta‘u mai e le Alii i toeaina o e sa le mafai ona maua nisi fesoasoaniga mo o latou aiga, na tuusaunoaina i latou mai le malaga, ma sa Ia faamautinoa mai ia te i latou, o le a le aveesea ai lo latou avanoa o le mauaina o le ola e faavavau. Sa faamoemoeina lava nei toeaina e galulue i le Ekalesia i le lotoifale.
Faitau le Mataupu Faavae ma Feagaiga 75:29, ma vaavaai mo le fautuaga na tuuina mai e le Alii i nei alii uma. Atonu e aoga le iloa, o se tagata paie, o se tagata e le naunau e galue, ma o le “ia filiga i mea uma” o lona uiga ia faifai pea, faatauanau, mataala, ma galue malosi.
Atonu e te manao e faailoga faatonuga a le Alii o loo i le fuaiupu e 29 lea o loo aoao mai ai le mataupu faavae lenei: Ua poloaiina i tatou e le Alii ina ia tatou filiga i mea uma.
-
Mataupu Faavae ma Feagaiga 75:30-36
Ua tofia e le Alii toeaina e avea ma soa faifeautalai
I le faaiuga o le faaaliga lona lua ua faamaumauina i le Mataupu Faavae ma Feagaiga 75, na tofia e le Alii lenei vaega o toeaina i ni soa faifeautalai.
-
Ua ou suesueina le Mataupu Faavae ma Feagaiga 75 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: