Iunite 18: Aso 3

Mataupu Faavae ma Feagaiga 85–86

Faatomuaga

O leMataupu Faavae ma Feagaiga 85 o se vaega o se tusi musuia na auina atu e le Perofeta o Iosefa Samita ia William W. Phelps i le aso 27 o Novema, 1832. I lenei tusi na faamalamalama atu ai e le Perofeta e faapea, na finagalo le Alii ia tausia se faamaumauga sa’o o i latou o e sa tausia le tulafono o le faapaiaga i Misuri. Mulimuli ane, i le aso 6 o Tesema, 1832, na maua ai e Iosefa Samita le faaaliga ua faamaumauina i le Mataupu Faavae ma Feagaiga 86 a’o galue o ia i le toe faafouina musuia o le Tusi Paia. O lenei faaaliga ua tuuina mai ai isi faamalamalamaga o le faataoto i le saito ma le titania, ma le matafaioi a le perisitua i le fesoasoani ai i le Alii e faapotopoto e amiotonu i aso e gata ai.

Mataupu Faavae ma Feagaiga 85

O le failautusi a le Alii e tausia se talafaamaumau o tagata o le Atua

Vaai faalemafaufau e faapea o loo e i ai i se au taalo e i ai le gafatia e avea ai ma au sili ona lelei. Ina ua mavae ni nai aso o taaalo faatasi ma lenei au, ua e matauina se tasi o tagata o le au o se tagata taalo manatu faapitoa, o nisi o le au sa le taaalo lelei i o latou tulaga, ae o isi sa le amanaiaina le faiaoga. Aisea e ono faigata ai ona manumalo lau au? O le a se mea atonu e tatau ona suia ina ia mafai ona lelei le taaalo a le au?

Sa i ai se tulaga faapea sa aliae i le 1832, a o faasolo taunuu atu pea le toatele o tagata o le Ekalesia i Misuri. O le toatele o le Au Paia i Misuri sa ola e tusa ai ma tulafono a le Alii na faatulagaina mai mo le fausiaina o Siona. Ae peitai, sa i ai se vaega o tagata o le Ekalesia sa le usita‘ia poloaiga a le Alii ma sa malaga atu i Misuri e aunoa ma le aumaia o se tusi faamaonia mai o latou taitai (lea sa manaomia i tulafono na faatulaga mai e le Alii MF&F 72:17–18 25). O se tusi faamaonia o se fasi pepa na sainia e le Epikopo o le Ekalesia po o Toeaina pule faamalumalu e toatolu o le Ekalesia, e tau atu ai sa agavaa le tagata, ma o loo lelei lona tulaga ma mafai ona maua se tofiga faatausimea. E ui ina sa poloaiina tagata uma o le Ekalesia i Misuri e tuuto atu a latou meatotino i le Ekalesia, ae o nisi na taunuu atu e aunoa ma ni punaoa e tuuto atu, o lea na faateteleina ai luitau na feagai ma tagata. E na o le toatasi le tagata sa tuuto atu lona fanua ae na toe poloai e toe faafoi atu ina ua ia tuua le Ekalesia. O isi i Misuri sa mumusu e tuuto atu a latou meatotino i le Ekalesia.

1. Tali fesili nei i lau api talaaga mo le suesueina o tusitusiga paia:

   1. E faapefea ona faapei amioga a nisi o tagata o le Ekalesia i se tagata le lelei o se au?

   2. Aisea atonu na faigata ai ona faatu le aai o Siona i lalo o nei tulaga?

Faitau le folasaga o le vaega o le Mataupu Faavae ma Feagaiga 85 ina ia malamalama ai i le auala na tali atu ai le Perofeta o Iosefa Samita i nei faigata i Misuri.

Ioane Uitimera

O le tusi a Iosefa Samita na tuuina atu ai ni faatonuga mo le failautusi a le Alii, o Ioane Uitimera, o le sa nofo i Misuri. Faitau le Mataupu Faavae ma Feagaiga 85:1–2, ma vaavaai mo le mea na faatonuina e le Alii le failautusi o le Ekalesia i Misuri e fai. (A o e suesueina nei fuaiupu, atonu e fesoasoani le iloaina o tagata liliuese o i latou o e ua liliu ese, pe o ese mai le Ekalesia ma faafitia le faatuatuaga.)

Faitau le Mataupu Faavae ma Feagaiga 85:3-5, ma vaavaai mo mafuaaga na le tusia ai igoa o isi tagata i faamaumauga a le Ekalesia. I le fuaiupu e 3 o le fuaitau “latou o e lē mauaina o latou tofi e ala i le faapaiaga” e faatatau lea i tagata o le Ekalesia o e sa mumusu e ola i le tulafono o le faapaiaga e pei ona sa poloaiina ai e le Alii.

E pei lava ona sa tausia faamaumauga i le popofou o le Ekalesia, o loo tausia foi faamaumauga i o tatou aso ina ia faasaoina ai se faamaumauga o igoa o le au faamaoni, faapea foi ma se tala o a latou galuega. O se tasi o mataupu faavae ua tatou aoao mai i le tusi a le Perofeta o le afai tatou te ola i tulafono a le Atua, o le a tusia o tatou igoa i faamaumauga a le Ekalesia o ni tagata faamaoni.

2. I lau api talaaga mo le suesueina o tusitusiga paia, tusi e uiga i mea e tatau ona e faia ina ia faamaumauina ai lou igoa o se tagata faamaoni o le Ekalesia. (A uma ona e faia lenei galuega atofaina, ia faatusatusa mea na e tusia i tali ua faailoa mai i le faaiuga o le lesona lenei.)

O le ta’uaina o “se ua silisili ma le malosi” (MF&F 85:7) o le e faatulagaina tatau le fale o le Atua, ma le ta’ua o se tasi “e tuu atu lona lima e faasagatonu le ‘atolaau” (MF&F 85:8) na faaoga e le toatele o tagata liliu ese e ta’uamiotonu ai lo latou o ese mai le Ekalesia. Sa latou fai mai, o nisi o Peresitene o le Ekalesia ua le fiafia i ai le Atua ma ua teenaina, ma o i latou, “o se ua silisili ma le malosi” ua valaauina e le Atua e faatulaga sa’o ia mea. O faaupuga faapena na feteenai ma le uiga o le mau. I se faamatalaga aloaia na tuuina atu i le 1905, na soalaupuleina ai e le Au Peresitene Sili, o (Iosefa F. Samita, John R. Winder, ma le Anthon H. Lund) ia tulaga na aumaia ai lenei faaaliga, ma i latou o e na faatatau atu i ai nei fuaitau e lua:

“O le mea muamua lava, e tatau ona matauina, o le autu o lenei tusi atoa [o le tusi a le Perofeta ia William W. Phelps], ma o sona vaega foi na taliaina mulimuli ane o se faaaliga [MF&F 85], ua faatatau lea i mataupu a le Ekalesia i Misuri, o le faapotopotoina o le Au Paia i lena laueleele ma le mauaina o o latou tofi i lalo o le tulafono o le faapaia ma le faatausimea; ma sa taulimaina tonu e le Perofeta le mataupu i le mea o le a oo i ai i latou o e e le mauaina o latou tofi e ala i le faatulagaga po o galuega mai le epikopo. …

“O le taimi lea sa i ai nei tulaga o le fouvale, lotoleaga, faamaualuga, le talitonu ma le loto maaa, i totonu o le usoga i Siona—i le Itumalo o Jackson, Misuri—lea sa faapea ona auai uma ai Epikopo Paterika, na faapea ona tusia ai upu o le faaaliga na aumai mai le tusi ia William W. Phelps, i le aso 27 o Novema, 1832. O le ‘tagata sa valaauina ma tofiaina e le Atua’ e ‘vaevae atu i le Au Paia o lo latou tofi’—o Eteuati Paterika—sa le toe faaaogaina i le taimi lena, na lafoaia lona lava tiute, ae tuu atu ‘lona lima e taofiofi ai le atolaau’; o lea, na faapea ona lapataia ai o ia e uiga i le faamasinoga a le Atua o loo faamalumalu mai, ma sa faia se valoaga e faapea, o se isi, ‘o se ua silisili ma le malosi,’ o le a auina mai e le Atua e suitulaga ia te ia, e faia lana au epikopo—o se tasi ua i ai le agaga ma le mana o lena tofi maualuluga ua tuu atu ia te ia, lea o le a ia maua ai le mana e ‘faatulaga tatau ai le fale o le Atua, ma faatulaga i vaega le tofi o le Au Paia’; i se isi faaupuga, o se tasi o le a faia le galuega na tofia i ai Epikopo Eteuati Paterika, ae na te le’i ausiaina. …

“… Ma talu ai ona o lona salamo ma le osigataulaga ma puapuaga, e le masalomia lava le maua e Epikopo Eteuati Paterika se tuuitiitia o le faamasinoga taufaamata’u faasaga ia te ia o le pau ‘e ala i le u fanafana o le oti, e pei o se laau e taia i le emo manino o le uila,’ o lea la, o le auina mai o le isi e faatumu ai lona tulaga—’o se ua silisili ma le malosi e faatulaga tatau le fale o le Atua, ma faavasega i vaega tofi o le Au Paia—e mafai foi ona faapea o le maliu ma le mea atoa na tupu o le valoaga ua tapunia” (i le James R. Clark, comp., Messages of the First Presidency of The Church of Jesus Christ of Latter-day Saints, 6 vols. [1965–75], 4:112, 115, 117.)

Mafaufau e faapea o loo i ai ni au fuafuaga e auai atu i se gaoioiga iloga (mo se faataitaiga, o le faaipoipoga o se tagata lauiloa po o se taumafataga o se pati ma se tasi ua leva ona e fia feiloai i ai). O le a sou lagona pe afai ua e taunuu atu i le fuafuaga ae sa le mafai ona faatagaina oe i totonu, ona sa le’i i ai lou igoa i le lisi o le au valaaulia?

Faitau le Mataupu Faavae ma Feagaiga 85:9–11, ma vaavaai mo le fetalaiga a le Alii i le mea o le a tupu i na uluai Au Paia o o latou igoa sa misi mai le tusi faamanatu a le Alii, po o le tusi o le tulafono a le Atua. (Manatua o nei suafa e faatatau i le tala tusitusia o le faatuatua ma galuega a le uluai Au Paia.)

O faamaumauga e tausia iinei i le lalolagi ma i le lagi. O le a tatou maua tala tusitusia o a tatou amioga uma ma o tatou faatuatua i le ola ai i tulafono a le Atua. Mafaufau loloto i ou uiga faaalia agai i le usiusitai i tulafono a le Atua.

Mataupu Faavae ma Feagaiga 86

Na faamalamalama atili mai e le Alii le faataoto i le saito ma titania

O se faataoto o se tala o faaaoga ai faatusatusaga e aoao mai ai se upumoni. Faitau le faataoto i le saito ma titania i le Mataio 13:24–30.

O le a lou manatu i le mea e faatusa i ai le saito?

O le a lou manatu i le mea e faatusa i ai titania?

E mafai ona siaki au tali i fesili o loo i luga i le tagai i le Mataio 13:38.

3. Tali le fesili lenei i lau api talaaga mo le suesueina o tusitusiga paia: Aisea na manao ai le tagata i le faataoto e faatali le liaieseina o titania?

O titania o se ituaiga o vao oona. E toeitiiti lava tutusa foliga o le saito ma le titania, pe a tatupu, ae e mafai ona iloa i latou i le taimi e tutupu tetele ai. Afai e taumafai se tagata selesaito e se’i ese muamua le titania a’o lei matutua le saito ma le titania, o le a faapea ona tele le saito e faaleagaina ai.

4. Faitau le Mataupu Faavae ma Feagaiga 86:1–6, ma vaavaai mo uiga o le fanua, o le au lulu fatu, ma le fili. Tali le fesili lenei i lau api talaaga mo le suesueina o tusitusiga paia: E faavae i le faamalamalamaga a le Alii o faatusa, e faapefea ona e aoteleina le uiga o le faataoto?

Sa toe iloilo ma faasa’o e le Perofeta o Iosefa Samita le lomiga musuia o le Tusi Paia i le taimi na ia mauaina ai le faaaliga lenei. E tusa ai ma le Mataio 13:30, na faailoa mai e le Alii e faapea, o titania o le a faapotopotoina muamua ma fusi faatasi ina ia susunuina, ona sosoo ai lea ma le faapotopotoina o le saito i totonu o le fale o le faatoaga (tagai i le Faaliliuga a Iosefa Samita, Mataio 13:29 [i le Mataio 13:30, vaefaamatalaga e].

Faitau le Mataupu Faavae ma Feagaiga 86:7, ma vaavaai mo se malamalamaaga e tuuina mai e lenei faaaliga e uiga i le faatulagaga o le faapotopotoina. O le a lou manatu, e faapefea ona faapotopotoina e e amiotonu i aso e gata ai?

Mafaufau pe faapefea ona faatatau faifeautalai o loo aoaoina tagata e uiga i le talalelei toefuataiina, i le faataoto i saito ma titania.

E mafai foi ona tatou fesoasoani i le faapotopotoina o e amiotonu e ala i le faasoaina atu o le talalelei i isi. E faapotopotoina mai tagata i le lafu pe a latou talia Keriso ma papatisoina. O le manatuaina o le tele o auala ua faamanuiaina ai i tatou i le avea ai ma tagata o le Ekalesia a le Alii, e mafai ona faateleina ai lo tatou naunau e faasoa atu na faamanuiaga i isi.

Faitau le Mataupu Faavae ma Feagaiga 86:8–10, ma faailoa mai ni auala ua faamanuiaina ai i tatou i le avea ai ma tagata o le Ekalesia a le Alii. Atonu e te manao e faailoga mea ua e maua.

O le fuaitau “o outou o suli tatau i le tulafono” i le fuaiupu e 9 o lona uiga o tagata o Le Ekalesia a Iesu Keriso o le Au Paia o Aso e Gata Ai o se vaega o le feagaiga na osia e le Atua ma Aperaamo, lea na folafola mai ai ia Aperaamo, o le a olioli ana fanau i faamanuiaga o le perisitua ma o le a faasoa atu na faamanuiaga i isi (tagai i le Aperaamo 2:9–11).

Mafaufau loloto i le fesili lenei: Na faapefea ona faamanuiaina oe e ala i le perisitua?

A o mafaufau loloto i le fesili o loo i luga, atonu sa e mafaufau i sauniga na mafai ona e maua e ala i le perisitua, e aofia ai sauniga faaola o le papatisoga ma le meaalofa o le Agaga Paia. Faitau le Mataupu Faavae ma Feagaiga 86:11, ma faailoa mai auala e tatau ona tatou fesoasoani atu ai i isi.

O le fuaitau “o se malamalama i Nuuese,” o lona uiga o le faia o se faataitaiga amiotonu mo i latou o e e le o maua faamanuiaga o le talalelei. O lefuaiupu e 11 o loo aoao mai e mafai ona tatou aumaia le faaolataga i isi e ala i le fesoasoani ia i latou ia maua faamanuiaga o le perisitua. Atonu e te manao e tusi le mataupu faavae lenei i autafa o au tusitusiga paia.

Mafaufau loloto i aafiaga i se taimi na e faia pe na faia ai e se tasi e te iloa se faataitaiga amiotonu mo se isi tagata, pe fesoasoani foi i se isi tagata ia maua faamanuiaga o le perisitua.

5. I lau api talaaga mo le suesueina o tusitusiga paia, tusi e uiga i le mea o le a e faia e avea ai ma “se malamalama” i le isi, ina ia mafai ona latou maua sauniga ma faamanuiaga o le perisitua.

6. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Mataupu Faavae ma Feagaiga 85-86 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lo’u faiaoga:

Faatusatusa manatu nei ma manatu na e tusia mo le galuega faatino lona 2 i le api talaaga mo le suesueina o tusitusiga paia: Ina ia faamaumauina o tatou igoa i le tusi o le tulafono a le Atua, po o le tusi faamanatu, e ao ona tatou papatisoina ma maua isi sauniga e manaomia, e pei o le faamauga, faauuina i le perisitua mo alii, ma sauniga o faaeega paia ma faamauga e faataunuuina i totonu o le malumalu. O lo tatou faamaoni i le auai atu i sauniga a le Ekalesia ma le totogiina o sefuluai e faamaumauina foi i faamaumauga a le Ekalesia.