Folafolaga Aloaia 2

Faatomuaga

I le vaitaimi o le seneturi lona 20, sa salalau atu ai le galuega faafaifeautalai i le lalolagi atoa. Sa tatalo taitai o le Ekalesia mo le taitaiga e uiga i vaega e faatapulaa i le faauuina i le perisitua ma sauniga o le malumalu mo tagata o le Ekalesia e tupuga mai i Aferika. Sa oo mai se faaaliga mulimuli i le Peresitene o le Ekalesia o Spencer W. Kimball ma sa faailoa atu i ona fesoasoani i le Au Peresitene Sili ma sui o le Korama a Aposetolo e Toasefululua i le Malumalu o Sate Leki i le aso 1 o Iuni, 1978. I se tusi na tusia i le aso 8 o Iuni, 1978, sa latou faasilasilaina atu ai le faaaliga.

Folafolaga Aloaia 2

Ua faaali mai e le Alii e faapea, o le perisitua ma faamanuiaga o le malumalu e mafai ona faasafua atu i tagata agavaa uma o le Ekalesia

Vaai faalemafaufau e faapea o loo i ai sau uo o se tagata o le Au Paia o Aso e Gata Ai, ma o loo tauivi ma nisi o fesili e uiga i aoaoga faavae, aiaiga faavae, po o faatinoga a le Ekalesia.

Tali le fesili lenei i lau api talaaga mo le suesueina o tusitusiga paia: O le a se mea e te uunaia lau uo e fai?

I le saunoaga lenei a Peresitene Dieter F. Uchtdorf o le Au Peresitene Sili, ia faailoga vaega e sili ona fesoasoani ia te oe:

“Ae faapefea masalosaloga ma fesili? E faapefea ona outou iloa e moni le talalelei? E le afaina le i ai o ni fesili e uiga i le Ekalesia po o ona aoaoga faavae? Au uo talavou pele, o i tatou o ni tagata fai fesili aua ua tatou iloa o le fesili e taitaiina atu ai i le mea moni. O le ala lena na amata ai le Ekalesia—mai se alii talavou na i ai ni ana fesili. O le mea moni, ou te le mautinoa pe mafai faapefea e se tagata ona iloa le upumoni e aunoa ma le faia o fesili. I tusitusiga paia, e seāseā ona e tau i se faaaliga e le’i oo mai o se tali i se fesili. Soo se taimi lava e tulai mai ai se fesili ma lē mautinoa e Iosefa Samita le tali, sa alu o ia i le Alii, ma o le tali o faaaliga matagofie ia o loo i le Mataupu Faavae ma Feagaiga. E masani lava, o le poto na maua mai e Iosefa sa sili mamao atu nai lo le uluai fesili. E mafua lena mea, ona e le gata ina mafai e le Alii ona tali i fesili tatou te fesiligia ae, o le mea e sili atu ona taua, e mafai ona Ia tuuina mai tali i fesili na tatau ona tatou fesiligia. Ia tatou faalogologo i na tali.

“O le taumafaiga faafaifeautalai a le Ekalesia ua faavae lea i tagata sailiili faamaoni e fesiligia ni fesili faamaoni. O le fesili o le amataga lea o se molimau. E ono lagona e nisi le matamuli po o le le agavaa ona o loo i ai ni a latou fesili sailiili e uiga i le talalelei, ae e le tatau ona latou manatu faapena. O le faia o fesili e le o se faailoga lea o le vaivai; ae o se teuteuala mo le tuputupu a’e.

“Ua poloaiina i tatou e le Atua e saili i tali i a tatou fesili (tagai i le Iakopo1:5-6) ma na pau le mea o loo fai mai ai, ia tatou saili atu ‘ma le loto faamaoni, ma le manatu moni i ai, ma le faatuatua ia Keriso’ (Moronae 10:4). A tatou faia faapea, o le a mafai ona faaali mai ia i tatou le moni o mea uma ‘i le mana o le Agaga Paia’ (Moronae 10:5).

“Aua le fefefe; ia fesili atu. Ia fia iloa, ae aua le masalosalo! Ae ia uumau pea e le aunoa i le faatuatua ma le malamalama ua uma ona e maua. Auā e le atoatoa la tatou vaai i le olaga nei, e le o mea uma o le a talafeagai i le taimi lenei. …

“… O le sailia o tali i a outou fesili e mafai ona e latalata atili atu ai i le Atua, ma faamalosia ai lau molimau nai lo le faamaluelueina. E moni o ‘le faatuatua … e le o le maua lea o se malamalama atoatoa i mea’ (Alema 32:21), ae a o faatino lou faatuatua, o le faaaogaina o mataupu faavae o le talalelei i aso uma i lalo o soo se tulaga, o le a e tofo ai i fua suamalie o le talalelei, ma e ala i lenei fua o le a e iloa ai e uiga i lona moni (tagai i le Mataio 7:16–20; Ioane 7:17; Alema 32:41–43)” (“O Le Ataata i Totonu o le Vai” [saunoaga i le faeasaite a le Ofisa o Aoga a le Ekalesia, 1 Nov., 2009], LDS.org).

O le tala lenei o loo faapupula mai ai le auala na saili ai ni tagata se toalua, o Helvécio ma Rudá Martins, ia maua ma malamalama i upumoni e ala i le faia o fesili:

“I se po lagilelei o Aperila i le 1972 … sa mafaufau ai Helvécio Martins i le sailiga a lona aiga mo le upumoni. E tele ni lotu sa la sailiili i ai ma lona toalua o Rudá, ae e leai se tasi na foliga mai e faamalieina o latou manaoga faaleagaga. ‘Sa ma talanoa ma le Atua i lena po, ma ole atu mo se fesoasoani,’ o lana tala mai lea” (Elder Helvécio Martins o le Fitugafulu,” Ensign, Me 1990, 106).

I ni nai aso mulimuli ane, na oo atu ai faifeautalai i lo latou aiga i Rio de Janeiro, Pasila. Na faamatalaina e Elder Martins, “O le taimi lava na tuvae ai na alii talavou e toalua i totonu o le matou falemautotogi, sa vave lava ona mou ese uma lo’u pogisa ma le le mautonu faaleagaga, ae sa suia i se toafimalie ma le toafilemu lea ua ou iloa nei na oo mai i le uunaiga a le Agaga Paia” (i le Mark Grover, The Autobiography of Elder Helvécio Martins [1994], 43).

A o talanoa Helvécio ma Rudá, o e e tupuga mai i Aferika, ma faifeautalai, na fesili ai Helvécio e uiga i le matafaioi a tagata uli i le Ekalesia. Na aoaoina e le au Martins e faapea, i lena vaitaimi, o aiaiga faavae o le Ekalesia na faatapulaaina ai alii uli e tupuga mai Aferika mai le faauuina i le perisitua. O lenei mea na oo ai ina laua fai atu nisi fesili i faifeautalai.

Afai sa e i ai i le tulaga o le aiga o Martins, o a ni fesili atonu sa i ai ia te oe ina ua e iloa e uiga i le tapulaa o le perisitua?

O le faamatalaga lenei o le folasaga lea i le Folafolaga Aloaia 2 i le lomiga o le 2013 o tusitusiga paia. A o e faitauina le faamatalaga, vaavaai mo tali i fesili atonu na i ai i tagata taitoatasi, e uiga i le faatapulaaina o le perisitua.

“O loo aoao mai le Tusi a Mamona, ‘ua tutusa tagata uma i le Atua,’ e aofia ai le ‘uliuli pe paʼepaʼe, e pologa pe saoloto, o tane ma fafine’ (2 Nifae 26:33). I le talafaasolopito o le Ekalesia, ua papatisoina ai tagata o ituaiga uma, ma tagatanuu i le tele o atunuu, ma ua ola o ni tagata faamaoni o le Ekalesia. I le taimi o le soifuaga atoa o Iosefa Samita, e toalaiti lava ni alii uli o le Ekalesia sa faauuina i le perisitua. I le amataga o lona talafaasolopito, sa taofia ai e taitai o le Ekalesia le toe tuuina atu o le perisitua i luga o alii e tupuga mai i Aferika. E leai ni faamaumauga a le Ekalesia o tuuina mai ai ni malamalamaaga sa’o ma loloto e uiga i le amataga o lenei faiga. Sa talitonu taitai o le Ekalesia, sa manaomia se faaaliga mai le Atua e sui ai lenei faiga ma sailia ai ma le agaga tatalo se taitaiga. Sa oo mai le faaaliga i le Peresitene o le Ekalesia Peresitene o Spencer W. Kimball, ma sa fofogaina atu i isi taitai o le Ekalesia i le Malumalu o Sate Leki i le aso 1 o Iuni, 1978. O le faaaliga na aveesea uma ai tapulaa e faatatau i vaega o tagata lea sa masani ona faatatau i le perisitua.”

Tali le fesili lenei i lau api talaaga mo le suesueina o tusitusiga paia: O a fesili e uiga i le faatapulaa o le perisitua e mafai ona taliina e ala mai i lenei faamatalaga?

Ia matau le laina lenei i le faamatalaga o loo i luga: “E leai ni faamaumauga a le Ekalesia o tuuina mai ai ni malamalamaaga sa’o ma loloto e uiga i le amataga o lenei faiga.” E ui e ono fautua mai e nisi o tagata ni mafuaaga sa le faauuina ai mo se taimi ia alii e tupuga mai i Aferika i le perisitua, ae o na mafuaaga atonu e le sa’o. O le faamatalaga i le folasaga o le Folafolaga Aloaia 2 ua fai ma tulaga aloaia o le Ekalseia.

A o e faitau i le palakalafa lenei, vaavaai mo mea na faia e le aiga o Martins ina ua latou aoao e uiga i le talalelei toefuataiina:

Sa papatisoina le aiga o Martins i le aso 2 o Iulai, 1972, ma sa auauna ma le faamaoni i le Ekalesia. Ina ua maua e lo la atalii matua, o Marcus, lona faamanuiaga faapeteriaka, sa folafola mai ai o le a ia talai atu le talalelei. E ui lava o le faatapulaa o le perisitua i lena vaitaimi na taofia ai Marcus mai le auauna atu i se misiona talai, ae sa amataina e ona matua se teugatupe mo faifeautalai. I le 1975 sa faasilasila mai ai e le Ekalesia, o le a fausia se malumalu i São Paulo, Pasila. Ina ia fesoasoani i le sailiga tupe, sa faatau atu ai e Sister Martins ana asoa, mama, ma teuga. Sa auauna faamaoni Uso Martins o se tasi o le komiti faalauiloa mo le malumalu. Sa faia e le aiga o Martins nei osigataulaga e ui lava ina latou talitonu latou te le maua le avanoa e maua ai sauniga o le perisitua i le malumalu.

Tali le fesili lenei i lau api talaaga mo le suesueina o tusitusiga paia: Aisea e te manatu ai sa naunau le aiga o Martins ina ia papatisoina ma auauna atu ma le faamaoni i le Ekalesia, e ui lava sa latou aafia i le faatapulaa o le perisitua i le taimi lena?

Faatusatusa lau tali ma le faamatalaga lenei na tuuina mai e Elder Martins: “Na matou mauaina le upumoni, ma e leai se mea o le a taofia i matou mai le ola ai. … A ta’u atu e le Agaga ia te oe e moni le talalelei, …e mafai faapefea ona e teenaina?” (i le “Elder Helvécio Martins O le Fitugafulu,” 106).

Ona na maua e le aiga o Martins se molimau e ala i le Agaga Paia, sa faapea ona mafai ona latou agai i luma, faalagolago i le Alii, e ui lava i mea sa latou le malamalama i ai.

E faaopoopo atu i le aiga o Martins, e faitau afe tagata e tupuga mai i Aferika i atunuu eseese, na latou iloa le moni o le talalelei toefuataiina i le tele o tausaga a’o lumanai le faaaliga i le 1978. Na maua e taitai o le Ekalesia i le Aai o Sate Leki le anoanoai o tusi mai tagata liliu mai sa le’i papatisoina i Nigeria ma Ghana na talosagaina le auina atu o faifeautalai i Aferika. Mo le tele o tausaga, sa mafaufau ai ma le agaga tatalo ia taitai o le Ekalesia i le mataupu, ae sa lagonaina sa le’i oo i le taimi e auina atu ai faifeautalai i Aferika, lea sa le mafai ai e tagata o le ekalesia i le lotoifale ona pulefaamalumalu pe faatino ia sauniga.

O leFolafolaga Aloaia 2 o loo i ai le faasilasilaga aloaia o se faaaliga na maua e Peresitene Spencer W. Kimball i le aso 1 o Iuni, 1978. Faitau le parakalafa muamua o loo i lalo o le fuaitau “Uso Pele e,” ma vaavaai mo mea na fai mai taitai o le Ekalesia na latou molimauina.

O a mea na musuia ai taitai o le Ekalesia a o latou molimauina le faateleina o le galuega a le Alii?

Faitau le parakalafa e amata atu i le “I le matou iloa lelei o folafolaga.” Vaavaai mo auala na faataunuu ai e taitai o le Ekalesia manaoga sa musuia ai i latou.

Na faapefea ona faataunuu e Peresitene Kimball ma isi taitai o le Ekalesia o latou manaoga musuia?

O lenei parakalafa e fesoasoani tatou te malamalama ai e saili e perofeta le taitaiga a le Alii i le faatonutonuina o le Ekalesia. Atonu e te manao e tusi le mataupu faavae lenei i au tusitusiga paia.

Ia matau o le amataga o lena parakalafa lona lua e amata i le fasifuaitau, “I le matou iloa lelei o folafolaga na faia e perofeta.” Ua aoao i tatou i lenei fuaitau e faapea, na silafia e taitai o le Ekalesia, e i ai se taimi o le a maua ai e alii agavaa uma le avanoa e maua ai le perisitua. Mo le tele o tausaga a o lei oo i le 1978, sa soalaupuleina ma tatalo ai le Au Peresitene Sili ma le Korama a Aposetolo e Toasefululua, e uiga i le faatapulaaina o le perisitua. Na lagona e taitai o le Ekalesia, sa manaomia se faaaliga ina ia mafai ona sui ai le faatapulaaina, lea sa faatuina mo le silia ma se seneturi. Sa mo se taimi o mamafa lenei fesili i le mafaufau o Peresitene Kimball, ma sa masani ona alu na o ia i le malumalu e tatalo e uiga i ai.

Faitau parakalafa o loo i le Folafolaga Aloaia 2 e amata i le “Ua faafofogaina e ia a matou talosaga” ma le “Matou te folafola atu,” ma vaavaai mo le tali a le Alii i tatalo a Peresitene Kimball, o ona fesoasoani i le Au Peresitene Sili, ma sui o le Korama a Aposetolo e Toasefululua. Atonu e te manao e faailoga mea ua e maua.

O nei parakalafa e fesoasoani tatou te malamalama ai e faatonutonu e le Alii Lana Ekalesia e ala i faaaliga i Ana perofeta. Atonu e te manao e tusi lenei aoaoga faavae i au tusitusiga paia.

Sa i ai se aafiaga loloto o lenei faaaliga i tagata i le lalolagi atoa. Faitau le tali mai a Helvécio Martins ma lona faletua, o Rudá, ina ua laua faalogo e uiga i le faaaliga: “Sa le mafai ona taofiofi o’u lagona ootia. Sa ma o atu ma Rudá i lo matou potumoe, tootutuli i lalo, ma tatalo. Sa ma fetagisi a’o ma faafetai atu i lo tatou Tama oi le Lagi mo se mea na tupu lea sa na ona matou moemiti i ai. Na oo moni mai lava le aso, ma i o maua olaga i le tino” (Autobiography, 69–70).

Sa faamauina le aiga o Martins i le malumalu. O le la atalii o Marcus o le uluai tagata o le Ekalesia e tupuga mai i Aferika ua faia se misiona, i le mavae ai o le faaaliga e faamuta ai le faatapulaaina o le perisitua. Sa avea Martins Helvécio ma se taitai perisitua i le lotoifale ma na iu lava ina valaauina o ia e auauna atu o se tasi o le Korama Lona Lua a Fitugafulu.

E lei leva ona maua mai le faaaliga e faamutaina ai le faatapulaaina o le perisitua, ae auina atu loa faifeautalai i Aferika. Talu mai lena taimi ua fausia ai Malumalu i lena konetineta, ma ua faitau selau afe tagata iina ua mauaina sauniga o le talalelei mo i latou lava ma mo o latou tuaa ua maliliu.

Atonu e fesiliga oe pe aisea na le faauuina ai e le Ekalesia ia alii e tupuga mai i Aferika i le perisitua mo se taimi. Mafaufau pe faapefea ona e taliina lenei fesili. Mo nisi faamatalaga, alu i le LDS.org, filifili Autu o le Talalelei, ma saili mo le ituaiga tagata ma le perisitua.

E talafeagai le faamalamalama atu i isi, tatou te le iloa pe aisea na amata ai le faatapulaaina o le perisitua. E le gata i lea, e mafai ona e faasoa atu ma molimau atu e uiga i upumoni ua tatou iloa, e pei o i latou ua e aoaoina i lenei lesona. I lau api talaaga mo le suesueina o tusitusiga paia, tusi ai pe faapefea ona e taliina fesili pe aisea na le faauuina ai e le Ekalesia ia alii e tupuga mai i Aferika i le perisitua mo se taimi. A o faia lau tali, atonu e te manao e faaaoga le faataitaiga a le au aiga o Martins, faapea foi ma le folasaga i le Folafolaga Aloaia 2 i le lomiga o le 2013 o tusitusiga paia.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Folafolaga Aloaia 2 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: