Iunite 24: Aso 1
Mataupu Faavae ma Feagaiga 109
Faatomuaga
Na toeitiiti tolu tausaga o galulue le Au Paia e faamaea le Malumalu o Katelani. Ina ua ma’ea, sa faapea ona faaali mai e le Alii i le Perofeta o Iosefa Samita le tatalo lea na tatau ona osia i le faapaiaga o le malumalu. Sa faitau e le Perofeta le tatalo o se vaega o sauniga o le faapaiaga i le aso 27 o Mati, 1836. Sa ia talosagaina le Alii e talia le malumalu, ma faataunuuina folafolaga na Ia faia e faatatau i ai, e aofia ai le puipuiga ma faamanuiaga mo i latou o e o le a tapuai ai. Sa tatalo o ia mo le Au Paia o e sa sauaina i le Itumalo o Jackson, Misuri, ma sa ia tatalo foi mo i latou sa faasaua ia i latou. Sa ia tatalo foi mo tagata i le lalolagi atoa, aemaise lava o Isaraelu na faataapeapeina, ina ia liliu mai i le atoatoaga o le talalelei.
Mataupu Faavae ma Feagaiga 109:1–23
Na ole atu Iosefa Samita i le Alii e talia le Malumalu o Katelani ma faamanuia i latou e tapuai ai
E te iloa po o fea e i ai malumalu taitasi nei? Faafetaui le ata o malumalu taitasi i lona nofoaga. (OTali o loo maua i le faaiuga o le lesona lenei.)
|
|
|
|
|
|
|
|
|
|
|
|
|
|
|
-
Tusi le fesili lenei i lau api talaaga mo le suesueina o tusitusiga paia: Aisea e fau ai e le Au Paia o Aso e Gata Ai malumalu? Tusi ni nai tali i lenei fesili. Tuu ni avanoa e faaopoopo i ai ni tali mulimuli ane i le lesona.
E mafai ona e maua tali i le fesili e ala i le suesueina o le Mataupu Faavae ma Feagaiga 109, lea o loo i ai le tatalo na fofogaina e le Perofeta o Iosefa Samita i le faapaiaga o le malumalu i Katelani, Ohaio.
Ina ua mavae le toeitiiti tolu tausaga o galulue ma ositaulaga e fausia le Malumalu o Katelani, sa vaaia ai e le Au Paia le faataunuuga o le folafolaga a le Alii e faapea, afai latou te tausia Ana poloaiga, o le a latou “maua le mana e fausia ai” (MF&F 95:11). I le aso 27 o Mati, 1836, na auai ai tagata o le Ekalesia i le sauniga o le faapaiaga mo le malumalu, sa fofogaina ai e le Perofeta o Iosefa Samita le tatalo o le faapaiaga. Toeitiiti atoa le 1,000 o tagata sa auai i le sauniga o le faapaiaga. E toatele foi isi tagata sa fia auai, ae sa le mafai ona ofi i totonu o le fale. Na faatulagaina e le Perofeta mo i latou e auai i se fonotaga i se isi maota, ma sa toe faia ai le sauniga o le faapaiaga mo i latou i ni nai aso mulimuli ane.
Pe na e auai i se sauniga o le faapaiaga o se malumalu? Vaai faalemafaufau i le auai i le sauniga o le faapaiaga mo le Malumalu o Katelani: O le malumalu muamua lenei ua fausia talu mai anamua. Ua leva ona e tulimatai atu i lenei aso. E i ai se viiga amata mai se aufaipese. O le isi vaega na sosoo ai, sa tuuina mai e Sini Rikitone, o se fesoasoani i le Au Peresitene Sili, se lauga. Ina ua mavae se malologa puupuu, ua e maua le avanoa e lagolago ai taitai o le Ekalesia. Ona tulai lea o le Perofeta o Iosefa Samita ma faitau mai le tatalo o le faapaiaga.
Faitau le Mataupu Faavae ma Feagaiga 109:1–4, ma vaavaai mo le mafuaaga muamua na fausia ai e le Au Paia le malumalu. Ia matau foi, o aso nei, e pei o aso popofou o le Ekalesia, ua poloaiina ai e le Alii i tatou e fausia malumalu.
Faitau le Mataupu Faavae ma Feagaiga 109:5, ma vaavaai mo fuaitau o loo faamatala ai osigataulaga a le Au Paia e fausia le malumalu. Atonu e te manao e faailoga mea e te maua.
I le va o Iuni 1833 ma Mati 1836, na ositaulagaina ai e tagata o le Ekalesia ia taimi, tupe, ma meatotino e fesoasoani e fausia se maota mo le Alii. Sa ofofua atu e alii a latou galuega i le fausiaina. O tamaitai sa faia lavalava, tuuina atu mea e momoe ai, ma a’o toesea le toatele o alii i le Tolauapiga a Siona e fesoasoani i faafitauli i Misuri, sa faaauau e nisi o tamaitai le galuega o le malumalu. O nisi tagata o le Au Paia o Aso e Gata Ai, e pei o Ioane Tana ma Vienna Jacques, sa tuuina atu le tele o a latou tamaoaiga mo le fausiaina o le malumalu.
A o faagasolo pea le fausiaina, sa iloa e le Au Paia o le a latou manaomia se isi mea e faapiliki mo le pito i fafo o le malumalu. Sa fautuaina atu e faapea o se tamalii e galue i maa na igoa ia Artemus Millet sa i ai ni tomai manaomia e faamaea ai le pito i fafo e faaaoga ai le faiga e gaosi ai fasi maa ta’eta’ei. Ae o Artemus sa nonofo i Kanata, ma sa le o se tagata o le Ekalesia. Sa valaauina e Iosefa Samita ia Polika Iaga e alu i Kanata e aoao ma papatiso Artemus ma aumaia o ia i Katelani e fesoasoani i le fauina o le malumalu. Ona saunoa atu lea o le Perofeta, “Ma fai atu ia te ia e sau ma aumai se afe tala” (sii mai i le M. Russell Ballard, “What Came from Kirtland” [Brigham Young University devotional, Nov. 6, 1994], 8–9; speeches.byu.edu). Sa usitai Polika. Sa filifili Artemus e papatiso, ma i se osigataulaga tele, na ia tuua ai lona aiga i Kanata ina ia fesoasoani e fausia le malumalu.
Ata o le fola o le fogafale pito i lalo o le Malumalu o Katelani
O le tau aofai atoa o le malumalu sa tusa ma le $60,000—o se aofaiga tele naua i lena vaitaimi, ae maise lava pe a mafaufau atu i le matitiva o le Au Paia.
-
Mafaufau i le uiga o le, o le Alii o le a “faaali mai ai o ia lava i lona nuu” (MF&F 109:5). O le upu faaali o lona uiga e faaalia pe faailoa mai. I nisi o tagata, o lenei mea na aofia ai se faaali mai i le tino. Ia i latou uma e auai atu ma le agavaa i le malumalu, Na te faaali mai o Ia lava e ala i le uunaiga a le Agaga Paia ma aoaoga faavae o loo aoaoina iina e fesoasoani tatou te iloa ai o Ia. E mafai foi e le Alii ona faaali mai o Ia lava i Lona nuu i fafo o le malumalu, ae o malumalu o ni nofoaga ia e mafai ai e i latou ua agavaa ona lagona i taimi uma Lana uunaiga.
Faitau le Mataupu Faavae ma Feagaiga 109:12–13, ma vaavaai mo fasifuaitau e fesoasoani e te malamalama ai i auala e mafai e le Alii ona faaali mai o Ia lava ia te oe i le malumalu. Mafaufau e faailoga fuaitau e sili ona anoa ia te oe.
-
Mafaufau loloto pe faapefea e le lagona latalata atu i le Alii ona faatosinaina lou olaga pe a e i fafo atu o le malumalu. Ona suesue lea o le Mataupu Faavae ma Feagaiga 109:14–23, ma vaavaai mo faamanuiaga faaopoopo ua folafola mai ia i latou o e tapuai i le malumalu. Atonu e te manao e faailoga mea e te maua.
O se tasi o upumoni e mafai ona tatou aoaoina mai le Mataupu Faavae ma Feagaiga 109:22–23 o le mauaina o faamanuiaga o le malumalu tatou te maua ai le mana ma le fesoasoani a le Alii ao tatou auauna atu ia te Ia. I lau api talaaga mo le suesueina o tusitusiga paia, atonu e te manao e faaopoopo atu lenei mea i lau lisi o mafuaaga tatou te fausia ai malumalu.
O le a sou manatu i le uiga o le “faaauupegaina i [le] mana [o le Atua]” (MF&F 109:22)? Mafaufau i le saunoaga lenei a Elder Joseph B. Wirthlin o le Korama a Aposetolo e Toasefululua, ma faailoa mai le ituaiga mana e mafai ona oo mai ia te oe, a o e tapuai i le malumalu: “I le maota o le Alii, e mafai ona faia faaeega paia o tagata faamaoni o le Ekalesia ‘i le mana mai luga,’ [MF&F 95:8] o le mana e mafai ai ona tatou tetee atu i faaosoosoga; faamamaluina a tatou feagaiga; usiusitai i poloaiga a le Alii; ma tuuina atu molimau faamaoni ma le le fefe o le talalelei i aiga, uo, ma tuaoi” (“O Le Atinaeina o Uiga Paia,” Ensign, Nov. 1998, 27).
-
-
E faapefea ona avea lenei ituaiga mana o se faamanuiaga ia te oe ma lou aiga?
-
E faapefea ona avea o se faamanuiaga mo faifeautalai?
-
Mataupu Faavae ma Feagaiga 109:24-34
E tatalo le Perofeta ina ia puipui ma faamanuia e le Alii ia tagata e tapuai i le malumalu
Vaai i le ata o le meafaigaluega mo le palasa ma se pelu. O se meafaigaluega e faaaoga e palasaina va o piliki po o maa. E faapefea ona faaaoga ia meafaigaluega taitasi i le fausiaina o se malumalu?
I le taimi o le fauina o le Malumalu o Katelani, na faamata‘u atu tagata faatupu vevesi e faaleaga puipui o le malumalu. Sa faamatala e Peresitene Polika Iaga e uiga i le “au faigaluega i luga o puipui, e uuina le pelu i le tasi lima e puipui ai i latou mai le au faatupu vevesi, a’o latou faataatiaina le maa ma aveese le meafaigaluega o le palasa i le isi lima” (Discourses of Brigham Young, sel. John A. Widtsoe [1954], 415). E i ai taimi, o alii sa galulue i le malumalu i le ao sa tatau foi ona puipuia [le malumalu] i le po.
Faitau le Mataupu Faavae ma Feagaiga 109:24–28, ma vaavaai mo le ituaiga puipuiga na talosagaina e le Perofeta o Iosefa Samita mai le Alii.
I le fuaiupu e 24, matau le fuaitau “umia i le mamalu se igoa ma se tulaga.” O lenei fuaitau e faatatau i le manaomia o le agavaa e tapuai i le Alii i le malumalu ma ia faamaoni i feagaiga tatou te faia iina.
Mai mea na e faitauina i le Mataupu Faavae ma Feagaiga 109:24–28, faauma le mataupu faavae lenei: Afai tatou te agavaa ma tapuai i le Alii i le malumalu, ona . (Atonu o le a e maua ni auala se tele e faauma ai lenei faamatalaga. Mo se faataitaiga, e te ono vaai ai o se tasi o faamanuiaga o le tapuai i le malumalu o le, e “leai se auupega e gaosia e faasaga mai ia te i [tatou] e manumalo” [MF&F 109:25]. (Atonu e te manao e faaopoopo atu lenei mataupu faavae ma isi i lau lisi o mafuaaga tatou te fausia ai malumalu.)
I le Mataupu Faavae ma Feagaiga 109:29–34, tatou te faitau ai i le ala na tatalo ai le Perofeta o Iosefa Samita ina ia faafememea’iina i latou o e sa faasalalauina pepelo e uiga i le Au Paia, ma ina ia mafai e tagata o le Ekalesia ona tutula’i ae e fai le galuega a le Alii.
Mataupu Faavae ma Feagaiga 109:35-67
Ua tatalo Iosefa Samita mo taitai o le Ekalesia, mo le Au Paia i Misuri, mo e faasauā i le Au Paia, ma ia faapea ona faalogo malo o le lalolagi i faifeautalai
Sa tulimatai atu le Au Paia i le faaeeina i le mana ma le mamalu lea na folafola mai ia i latou o se taunuuga o le fausiaina o le Malumalu o Katelani. I le Mataupu Faavae ma Feagaiga 109:35–46, na augani atu le Perofeta o Iosefa Samita i le Alii ina ia faatumulia le malumalu i Lona mamalu, ma ia tuuina mai i Ana auauna le molimau ma le mana o le a latou manaomia e folafola atu ai le talalelei.
I le afiafi o le aso 27 o Mati, 1836, ina ua mae‘a le faapaiaga o le malumalu, sa fono ai korama o le perisitua i le malumalu. Na saunoa mai Iosefa Samita e faapea sa ia “tuuina atu ia te i latou faatonuga e faatatau i le agaga o valoaga, ma valaau atu i le faapotopotoga e tautala atu. …
“Sa tulai Uso George A. Smith ma amata ona vavalo, ina ua faalogoina se pao sa pei o le gogolo o se savili malosi, lea na faatumulia ai le Malumalu, ma sa tutu faatasi uma i luga le faapotopotoga, ona o le faagaeetia e se mana e le vaaia; sa amata ona tautatala le toatele i gagana eseese ma vavalo; o isi na vaai i ni faaaliga vaaia mamalu; ae sa ou vaaia le Malumalu na faatumulia i agelu, o lea mea moni sa ou folafolaina atu i le faapotopotoga. Sa taufetuli mai tagata o le pitonuu (i le faalogoina o se pao uigaese mai totonu, ma le vaaia o se malamalama susulu na pei o se afi faaniutu na faamalumalu i luga o le Malumalu), ma sa maofa i le mea sa tupu” (i le History of the Church, 2:428). O loo ta’u mai i le Feagaiga Fou se mea faapea na tupu i totonu o le Au Paia faamaoni o e faapotopoto a’o lei leva ona uma le Toetu o Iesu Keriso. O lena mea na tupu, lea e masani ona ta‘ua o le aso o le Penetekoso, o loo tusia i le Galuega 2. Atonu e te manao e fefaasinoa’i le Mataupu Faavae ma Feagaiga 109:36–37 ma le Galuega 2:2-3.
I le Mataupu Faavae ma Feagaiga 109:47–67, tatou te faitau ai sa tatalo Iosefa Samita mo le Au Paia o e na tutuli ese mai o latou fale i Misuri, ma sa tatalo o ia mo i latou o e sa sauaina i latou. Sa ia tatalo foi i le Alii ina ia faamaluluina loto o tagata o le lalolagi ina ia latou talia auauna o e o le a o atu mai le malumalu e talai atu le talalelei.
Mataupu Faavae ma Feagaiga 109:68-80
Ua tatalo le Perofeta mo le Ekalesia ma ina ia talia e le Alii le faapaiaga o le malumalu
Suesue i le Mataupu Faavae ma Feagaiga 109:68–69, 71–73, 78–80, ma vaavaai mo talosaga faaopoopo na faia e le Perofeta i le tatalo o le faapaiaga.
-
Afai e i ai sau tusi o viiga o le Ekalesia, susue i le “O Le Agaga o le Atua” (Viiga, nu. 2). O lenei viiga sa usuina i le faapaiaga o le Malumalu o Katelani, i le maea tonu ai o le tatalo o le faapaiaga (tagai i le faamatalaga o loo i lalo o le viiga). O loo faaauau pea ona usuina lenei viiga i faapaiaga o malumalu i le taimi nei. Faalogologo, faitau, pe usu le viiga.
-
Ua ou suesueina le Mataupu Faavae ma Feagaiga 109 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: