O Le Taua a Iuta ma le Fasiotiga Tagata i Mountain Meadows

Faatomuaga

I le vaitaimi o le 1850, o le feteenai ma le le lelei o le fesootaiga i le va o le Au Paia o Aso e Gata Ai ma taitai o le malo o le Iunaite Setete, na oo atu ai i le Taua a Iuta i le 1857–58. Ia Setema 1857, na tulai mai ai foi feteenaiga i le va o nisi o le Au Paia o Aso e Gata Ai ma tagata malaga o se solo o taavale solofanua na ui atu i Iuta. O le faaosofia i le ita ma le mata’u, na fuafua ma faatino ai e nisi o le Au Paia o Aso e Gata Ai i Iuta le tagatavaleina o le tusa ma le 120 o tagata na faimalaga atu i Kalefonia. O lenei faatinoga limatete ua faaigoaina o le Fasiotiga Tagata i Mountain Meadows. Mo nisi faamatalaga, alu i le LDS.org, filifili Autu o le Talalelei, ma saili mo le Fasiotiga Tagata i Mountain Meadows.

Ua Tupu le Feteenai i le va o le Au Paia o Aso e Gata Ai ma le Malo o le Iunaite Setete

I le aso 24 o Iulai, 1857, sa faatasi ai Peresitene Polika Iaga ma se vaega o le Au Paia e faamanatu le 10 tausaga talu ona latou taunuu atu i le Vanu o Sate Leki, ae latou mauaina se faamaoniga o tala fou na oo muamua atu e faapea, na faatonuina e le malo o le Iunaite Setete se autau e o atu i le Aai o Sate Leki. I tausaga ua mavae, o feeseeseaiga ma le le lelei o le fesootaiga na iu ai ina faatetele le feteenai i le va o le Au Paia o Aso e Gata Ai ma taitai o le malo o le Iunaite Setete. Sa mananao le Au Paia ia puleaina i latou e taitai e filifilia e i latou lava, ma na [latou] teena tagata na tofia e le malo o e sa le tutusa o latou tulaga faatauaina. O lena mea na oo ai ina manatu nisi o taitai o le malo, ua latou tetee e faasaga i le malo o le Iunaite Setete. E aunoa ma le faatagaga mai le Konakeresi, sa auina atu ai e le Peresitene o le Iunaite Setete o James Buchanan le tusa ma le 1,500 o le vaegaau i le Aai o Sate Leki e faamalosia tagata Iuta e talia ia taitai fou.

Ana faapea na avea oe ma se Au Paia o Aso e Gata Ai i le 1857 ma faalogo na o atu se autau toatele i le tou nuu, o a ni atugaluga atonu sa i ai ia te oe? Ia manatua o loo olaola pea i mafaufau o le toatele o le Au Paia o Aso e Gata Ai le tutuliga faamalosi o i latou mai Ohaio, Misuri, ma Ilinoi. O le toatele na aveesea meatotino taua ma fanua, ae o nisi o tagata o le Ekalesia na fasiotia ai pe na maliliu ai foi ona o aafiaga e fesootai i nei sauaga. O tala e uiga i le agai atu o le vaegaau, na alia’e ai ni popolega ina ne’i toe tulai mai ni mea faapena i Iuta.

I lauga i le Au Paia, sa faamatalaina ai e Peresitene Iaga ma isi taitai o le Ekalesia na vaegaau na o atu o ni fili. O Peresitene Iaga, o lē ua leva ona talosagaina le Au Paia e faaputu kuranuma, ua faafouina ana faatonuga ina ia lava ni a latou mea e ai pe afai e manaomia ona latou sosola ese mai le vaegaau. I le avea ai ma kovana o le Teritori o Iuta, sa ia faatonuina ai foi le autau a le teritori e sauniuni e puipui le teritori. (O se autau o se vaega o tagatanuu o e e mafai ona faatulagaina mo auaunaga faamiliteli i taimi o faalavelave faafuasei.)

Ua Tulai Mai feteenaiga i le va o Nisi o le Au Paia o Aso e Gata Ai ma Tagata Malaga o se Solo o Taavale Solofanua

Na ui atu i Iuta se solo o taavale solofanua a tagata malaga na agai atu i sisifo mai Arkansas i Kalefonia, i le taimi tonu sa tapena ai le Au Paia o Aso e Gata Ai e puipui le teritori mai le vaegaau na o mai a le Iunaite Setete. A o e faitauina parakalafa nei, vase lalo o mafuaaga o lagona le lelei i le va o nisi o tagata o le solo a taavale solofanua ma nisi o le Au Paia o Aso e Gata Ai.

Sa le fiafia nisi o le solo o taavale solofanua ona sa faigata ona latou faatauina mai ni sapalai sa latou manaomiaina tele ma ni kuranuma mai le Au Paia, o e na faatonuina e sefe a latou kuranuma. Sa faapea foi ona feteenai tagata malaga ma le Au Paia o e sa le mananao i solofanua o le solo o taavale solofanua ma povi e ai punaoa o meaai ma vaiinu na manaomia e le Au Paia mo a latou lava manu.

Sa alia’e ni feeseeseaiga i le Aai o Cedar, o le nofoaga mulimuli lea i Iuta e ui atu ai i Kalefonia. Sa tupu ni fefinauaiga i le va o nisi o tagata o le solo o taavale solofanua ma nisi o le Au Paia o Aso e Gata Ai. Na taufaamata‘u ane nisi o tagata o le solo o taavale solofanua o le a au faatasi ma fitafita na o mai a le malo e faasagatau i le Au Paia. E ui lava ina sa otegia e le kapeteni o le solo o taavale solofanua ana soa mo le faia o nei faamata’uga, ae sa manatu lava nisi o taitai o le Aai o Cedar ma tagata na nonofo ai, o tagata malaga o ni fili. Na pe a na’o se itula talu ona taunuu le vaega o taavale solofanua ae toe o ese mai le taulaga, ae na mananao lava nisi sa nonofo ma taitai i le Aai o Cedar e tuliloa ma faasala alii sa faatiga ia i latou.

Mafaufau i ni taimi sa e aafia ai i se feeseeseaiga ma se isi tagata po o se vaega o tagata. Faitau le 3 Nifae 12:25, e vaavaai ai mo se mataupu faavae na aoao mai e Iesu Keriso e mafai ona taiala ai i tatou pe a tatou feteenai ma isi.

O le a sou manatu i le uiga o le “vave ona e ioe faatasi ma lou fili”? Na aoao mai Elder David E. Sorensen o le Fitugafulu e faapea, o le uiga o le fuaitau ia “vave ona faaleleia o tatou feeseeseaiga, ina ne’i faateteleina le malosi o le lagona i lena taimi ma oo ai ina mafatia i la le tino po o lagona, ma tatou nofo pologa ai i lo tatou ita” (“O Le Loto Faamagalo E Suia ai le Oona Matuitui i le Alofa,” Ensign po o le Liahona, Me 2003, 11).

E faavae i aoaoga a le Alii i 3 Nifae 12:25 ma le faamalamalamaga a Elder Sorenson, ua tatou aoao ai afai tatou te foia feeseeseaiga ma isi i le ala a le Alii, o le a mafai ona tatou aloese mai aafiaga leaga o finauga.

Tali fesili nei i lau api talaaga mo le suesueina o tusitusiga paia:
1. Pe na fesoasoani faapefea le usitaia o le mataupu faavae o loo i le 3 Nifae 12:25 i le Au Paia o Aso e Gata Ai o e sa le fiafia i tagata o le solo o taavale solofanua?
2. Na faapefea ona fesoasoani le foai o faafitauli i le ala a le Alii, ia te oe po o se tasi e te iloa e aloese ai mai aafiaga leaga o le faafinau?

Talu ai sa le’i foia e nisi o tagata sa nonofo i le Aai o Cedar o latou feeseeseaiga ma tagata malaga mai i le ala a le Alii, sa faapea ona atili matuia ai le faafitauli. A o faaauau ona e suesue, mafaufau i mea e matautia ai le tali atu i le ita po o le tauimasui.

Sa talosagaina e Isaac Haight, o le pulenuu o le Aai o Cedar, taitai o le autau a tagata o le aai, ma o le peresitene o le siteki, le faatagaga mai le faatonu o le autau a tagata o le aai, o le sa nofo i le pitonuu lata ane o Parowan, e valaau ai le autau a tagata o le aai e faafetaiai le au faatiga mai le solo o taavale solofanua. Na fautuaina e le faatonu o le autau a tagata o le aai o William Dame, ia Isaac Haight e aua le amanaiaina taufaamatauga a tagata malaga. Nai lo le mulimuli i lenei fautuaga, sa filifili Isaac Haight ma isi taitai o le Aai o Cedar e tauanau nisi o tagata Initia i le lotoifale e osofaia le solo o taavale solofanua ma gaoi a latou povi o se auala e faasala ai le au malaga. Sa talosagaina e Isaac Haight ia John D. Lee, o se tagata o le Ekalesia i le lotoifale ma o se taitai i le autau a tagata o le aai, e taitaia lenei osofaiga, ma sa taupulepule le toalua lea e tuuaia tagata Initia mo le galuega.

O le a le mea sa tatau ona faia e taitai o le Aai o Cedar ina ua fautuaina i latou e William Dame, e aua le faaaogaina le autau a tagata o le aai? O le a le mea na taitai atu i latou e fai ona o le teenaina o le fautuaga?

O se mataupu faavae e tasi tatou te aoao mai i le faataitaiga a nei taitai o le Aai o Cedar o le, afai tatou te lē amana‘iaina fautuaga e fai le mea sa’o, o le a atili ai ona tatou lilifa atu i le faia o filifiliga le lelei. Vaavaai mo faamaoniga o lenei mataupu faavae a o faaauau ona e aoao e uiga i mea na faia e nei taitai. A o e faitau i parakalafa nei, vase lalo o ni auala sa faaauau ai e taitai o le Aai o Cedar ona faia ni filifiliga le lelei, i le mavae ai o le le amanaiaina o le fautuaga na latou mauaina:

Na faailoa atu e Isaac Haight le fuafuaga e osofaia ai le solo o taavale solofanua i se aufono o taitai i le lotoifale i le Ekalesia, nuu, ma le autau o tagata o le nuu. Sa teena malosi e nisi o tagata o le aufono le fuafuaga ma fesiligia Haight pe na ia logoina Peresitene Polika Iaga e uiga i le mataupu. O le fai mai na te le’i logoina, na malie ai Haight e auina atu se avefeau, o James Haslam, i le Aai o Sate Leki ma se tusi e faamatala ai le tulaga ma fesili i ai i se mea e tatau ona fai. Ae ui i lea, ona o le Aai o Sate Leki e tusa ma le 250 maila (pe a ma le 400 kilomita) le mamao mai le Aai o Cedar, o le a manaomia ai e le avefeau pe a ma se vaiaso le alu atu i le solofanua mo ni taimi umi ina ia taunuu ai i le Aai o Sate Leki ma toe foi mai i le Aai o Cedar ma faatonuga a Peresitene Iaga.

E le’i leva lava ona auina atu e Isaac Haight lana tusi i le avefeau, ae osofaiaina loa e John D. Lee ma se vaega o tagata Initia le tolauapiga a tagata malaga i se nofoaga na ta’ua o Mountain Meadows. Sa taitai e Lee le osofaiga ae sa natia lona tagata moni ina ia foliga ai sa na o tagata Initia sa aafia ai. O nisi o le au malaga sa fasiotia pe faamanualia, ae o e na totoe sa tutulieseina tagata na osofaia i latou, ma faamalosia ai Lee ma tagata Initia e toe foi. Sa vave ona toso mai e tagata malaga a latou taavale solofanua i se li’o fufusi, po o se pa, mo le puipuiga. E lua isi osofaiga faaopoopo na sosoo ai i aso e lima na faia ai le taofiga o le solo o taavale solofanua.

I se tasi taimi, sa iloa atu ai e tagata o le autau o le Aai o Cedar ni alii se toalua o le au malaga sa i fafo mai o le li’o o taavale solofanua. Sa tafana atu i laua e tagata o le autau a le nuu, ma fasiotia ai le toatasi. Sa sola le isi alii ma momoli atu le tala i le tolauapiga a taavale solofanua e faapea, sa aafia ai tagata papae i osofaiga e faasaga ia i latou. Na maua nei i latou o e sa taupulepuleina ia osofaiga i lo latou taufaasese. Ana faataga le au malaga e o atu i Kalefonia, o le a salalau atu le tala e faapea, o le Au Paia o Aso e Gata Ai sa nafa ma le osofaiga o le solo o taavale solofanua. Sa fefefe le au taupulepule leaga ona o lenei tala o le a aumaia ai taunuuga le lelei i o latou luga ma o latou tagata.

Tali fesili nei i lau api talaaga mo le suesueina o tusitusiga paia:
1. I le taimi lenei, o a ni filifiliga sa avanoa ia i latou na nafa ma le osofaia o le au malaga?
2. O le a se mea sa tatau ona latou faia? Aisea?

I le faia o a latou filifiliga le lelei, na faatinoina ai e nei alii ni mea sa le tusa ai ma o latou tiutetauave faaleperisitua. Faitau le Mataupu Faavae ma Feagaiga 121:36-37, ma faailoga le lapataiga a le Alii i e umia le perisitua o e faia ni amioga amioletonu.

Mafaufau e uiga i le mea e te faia pe a uma ona e faia se mea sese. E te ta‘uta’u atu mea sese sa e faia ma maua ai taunuuga, pe e te taumafai e nana le agasala e ala i le taufaasese?

Sa Fuafua Nisi o le Au Paia o Aso e Gata Ai e Faatino le Fasiotiga Tagata i Mountain Meadows

O tagata o le Ekalesia sa aafia ai i osofaiga e faasaga i le au malaga, sa filifili e taumafai e nana a latou agasala. I se taumafaiga e taofia le tala mai le salalau atu e faapea sa aafia le Au Paia o Aso e Gata Ai i osofaiga o le solo o taavale solofanua, sa faia ai e Isaac Haight, John D. Lee, ma isi itaitai o le Ekalesia i le lotoifale ma le autau a tagata o le nuu, se fuafuaga e fasioti tagata uma na totoe o le au malaga vagana ai tamaiti laiti. O le faataitaia ai o lenei fuafuaga, na oo atu ai John D. Lee i le au malaga ma faapea atu, o le a puipui i latou e le autau a tagata o le nuu mai nisi osofaiga e ala i le taitai saogalemu atu o i latou e toe foi i le Aai o Cedar. A o savavali atu le au malaga agai i le Aai o Cedar, sa liliu ane le autau a le nuu ma tafana i latou. Sa tulioso mai nisi o tagata Initia mai nofoaga sa lalafi ai, e auai i le osofaiga. Mai le pe a ma le 140 o le au malaga o e sa avea ma vaega o le solo o taavale solofanua, sa na o le 17 le fanau laiti sa faasaoina.

maa faailoga — O le maafaamanatu e manatua ai le faalavelave i Mountain Meadows

O le lua o aso talu ona uma le fasiotiga tagata, ae taunuu loa James Haslam i le Aai o Cedar ma le savali o le tali a Peresitene Iaga, ua faatonuina ai taitai i le lotoifale e tuu le solo o taavale solofanua e o ma le filemu. “Ina ua faitau e Haight upu a Iaga, sa tagilotulotu o ia e pei o se tamaitiiti ma na pau lava upu na mafai ona fai mai, ‘Ua tuai tele, ua tuai tele’” (Richard E. Turley Jr., “The Mountain Meadows Massacre,” Ensign, Sete. 2007, 20).

O filifiliga a nisi o taitai o le Au Paia o Aso e Gata Ai ma e na nonofo i le Teritori i Iuta i saute, na oo atu ai i le faalavelave matautia o le Fasiotiga Tagata i Mountain Meadows. I se faatusatusaga, sa foiaina e taitai o le Ekalesia ma taitai o le teritori i le Aai o Sate Leki le feteenaiga ma le malo o le Iunaite Setete e ala i talanoaga ma soalaupulega filemu i le 1858. I le taimi o lenei feteenaiga—lea na ta’ua mulimuli ane o le Taua a Iuta—sa auai fitafita a le Iunaite Setete ma autau a tagata o le nuu o Iuta i gaoioiga soonafai ae sa le’i tau lava.

O le saunoa ai e uiga i le Fasiotiga Tagata i Mountain Meadows, fai mai Peresitene Henry B. Eyring o le Au Peresitene Sili: “O le talalelei a Iesu Keriso ua tatou taliaina, e inoino ma e le fiafia i le fasiotia faalealofa o alii, tamaitai ma tamaiti. E moni lava, na te lagolagoina le filemu ma le faamagalo atu. O le mea sa faia [i Mountain Meadows] i tausaga ua leva e tagata o le tatou Ekalesia, ua faatusa i se o ese leaga mai ma le leai o se alofaga mai aoaoga ma amioga faa-Kerisiano (“150th Anniversary of Mountain Meadows Massacre,” Sete. 11, 2007, mormonnewsroom.org/article/150th-anniversary-of-mountain-meadows-massacre).

O le Fasiotiga Tagata i Mountain Meadows, na le gata ina iu ai i le maliliu o le tusa ma le 120 o tagata na aafia ai, ae na afua ai foi le tele o mafatiaga i fanau na sao mai ai ma isi tagata o aiga o e na aafia ai. Sa puapuagatia ai foi Initia Paiute mai le tuuaia ma le le tonu mo le solitulafono. E le gata i lea, o nisi o i latou “o e na faatinoina le fasiotiga tagata, sa galulue mo taimi atoa na totoe o o latou olaga i lalo o se lagona leaga tele o le ta’usalaina ma le faia soo o miti taufaafefe e uiga i mea na latou faia ma vaaia” (Richard E. Turley Jr., “The Mountain Meadows Massacre,” 20).

Faauma galuega atofaina nei i lau api talaaga mo le suesueina o tusitusiga paia:
1. Fai se aotelega o mea sese na faapea ona oo atu ai i le Fasiotiga Tagata i Mountain Meadows.
2. Tusi se mataupu faavae po o se lesona e mafai ona tatou aoaoina mai lenei faalavelave e uiga i le filifili e nana a tatou agasala.
3. Tali i fesili nei: O le a se mea e mafai ona e faia i le lumanai, ina ia mautinoa ai e te mulimuli i fautuaga a ou taitai ma aloese ai mai le nanaina o ni agasala e te ono faia? O a ni faamanuiaga e mafai ona e aafia ai mai le tauaveina o tiutetauave mo au mea sese ae le o le taumafai e nana au agasala?

Afai ua e amata uia se auala o mea sese ma agasala, e mafai ona e taofia le lototiga ma le faanoanoa i le lumanai e ala i le liliu atu i le Alii i le taimi nei ma salamo i au agasala.

Talu ai ona o nisi o le Au Paia o Aso e Gata Ai i le lotoifale sa nafa ma le fuafuaina ma le faataunuuina o le Fasiotiga Tagata i Mountain Meadows, ua faatagaina ai e nisi o tagata lenei mea na tupu e faa-aafia ai i se auala le lelei o latou manatu e uiga i le Ekalesia. Sa i ai se mea faapea na tupu i le Tusi a Mamona, ina ua solia e le atalii faifeautalai o Alema le tulafono o le legavia, ma sa le talitonu ai isi tagata i upu a Alema, ona o le amio a lona atalii (tagai i le Alema 39:11).

Tali le fesili lenei i lau api talaaga mo le suesueina o tusitusiga paia: Aisea e taua ai le iloa o amioga sese a nisi o tagata o le Ekalesia e le iloa ai le moni o le talalelei?

Faitau le Helamana 5:12, ma vaavaai mo se mea e mafai ona tatou faia e atinae ma tausia ai a tatou molimau ina ia oo i taimi o faigata, e pei ona tatou aoao i taimi sa le ola ai tagata o le Ekalesia e tusa ai ma aoaoga a Iesu Keriso, o le a le maluelue ai o tatou faatuatua. Fai se aotelega o mea e te maua:

O le mataupu faavae e tasi e mafai ona tatou aoao mai i le Helamana 5:12 o le, e mafai ona tatou atiina ae ni molimau malolosi e ala i le fausiaina o lo tatou faatuatua i le faavae o Iesu Keriso.

O le faataitaiga lenei o loo faapupula atu ai lenei mataupu faavae: “O James Sanders o le atalii o se tama … o se tasi o le fanau sa faasaoina mai le fasiotiga tagata [ma o se tagata foi o le Ekalesia]. ‘Ou te lagona pea le tiga; ou te lagona pea le ita ma le faanoanoa ona o le tupu o le fasiotiga tagata,‘ o le tala lea a Uso Sanders. ‘Ae ou te iloa o tagata o e na faia lenei mea o le a tali atu i le Alii, ma o lena mea e aumai ai ia te a’u le toafilemu.’ Fai mai o [ia] o le iloaina sa fasiotia ona augatama i le fasiotiga tagata, ‘sa le’i aafia ai lo’u faatuatua aua e faavae ia Iesu Keriso, ae le o se tagata i le Ekalesia’” (Richard E. Turley Jr., “The Mountain Meadows Massacre,” 21).

Tali fesili nei i lau api talaaga mo le suesueina o tusitusiga paia:
1. E mafai faapefea e lo tatou faatuatua ia Iesu Keriso ona faamalosia i tatou, pe a tatou iloa ni taimi sa le ola ai tagata o le Ekalesia e tusa ai ma aoaoga a le Faaola?
2. O a nisi o mea e te faia e fesoasoani e te fausia ai lou faatuatua i luga o le faavae o Iesu Keriso?
3. O le a se mea se tasi o le a e faia i lenei vaiaso ia lelei atili ai le fausia o lou faatuatua i luga o le faavae o Iesu Keriso? (E mafai ona e tusia ia sili atu ma le tasi se mea o le a e faia.)
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le lesona “O Le Taua a Iuta ma le Fasiotiga Tagata i Mountain Meadows” ma faamaeaina i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: