Iunite 3: Aso 2
Mataupu Faavae ma Feagaiga 4
Faatomuaga
Ia Fepuari 1829, na asiasi atu ai Iosefa Samita le Matua ma lona faletua o Lusi, i lo la atalii o Iosefa Samita le Itiiti i Haramoni, Penisilevania. Sa fia iloa e Iosefa Samita le Matua se mea na finagalo le Alii na te faia e fesoasoani ai i le galuega o le Toefuataiga. I le taimi o lena asiasiga na maua ai e Iosefa Samita le Itiiti se faaaliga. O lenei faaaliga, sa mo le tama o le Perofeta, o le faaaliga muamua o se faasologa o ni faaaliga na tuuina mai i tagata taitoatasi o e sa naunau e fesoasoani i le Alii i Lana galuega (tagai foi i le MF&F 6; 8–9; 11–12; 14–16; 23;25).
Mataupu Faavae ma Feagaiga 4:1–3
Ua valaauina Iosefa Samita le Matua e galue i le galuega a le Atua
Pe sa e manao e auauna atu i le Atua ma fia iloa Lona finagalo e faatatau i le ala e sili ona lelei e fesoasoani ai i le faiga o Lana galuega? Sa manao le tama o Iosefa Samita e fesoasoani i le Alii i Lana galuega, ae na te le’i iloa le mea na finagalo le Alii na te faia. Sa fai atu i lona atalii, le Perofeta, e fesili i le Alii mo ia. O le Mataupu faavae ma Feagaiga e 4 o le tali lea a le Alii. I le faaaliga lenei, sa ia faataatia mai ai uiga ua Ia faamoemoe mai ia i latou o e mananao e fesoasoani ia te Ia i Lana galuega. Ia matau a o e faitauina le vaega lenei, ia mea na aoaoina ai e le Alii ia Iosefa Samita le Matua, e uiga i le ala e tatau ona tatou auauna atu ai ia te Ia.
I le taimi na maua mai ai le faaaliga lenei, sa le’i faatulagaina i le taimi lena le Ekalesia, e le’i uma foi le faaliliuga o le Tusi a Mamona, ma sa le’i toefuataiina mai foi le perisitua i le taimi lena. Faitau le Mataupu Faavae ma Feagaiga 4:1, ma vaavaai pe na faapefea ona faamatalaina e le Alii le Toefuataiga o le talalelei lea na faatoa amata ona faaali mai. Atonu e te manao e faailoga le upu na faaaoga e le Alii e faamatala ai le Toefuataiga o le talalelei i le aso e gata ai. O a ni auala na “ofoofogia” ai le Toefuataiga o le talalelei?
Faitau le Mataupu Faavae ma Feagaiga 4:2, ma vaavaai mo mea ua poloai mai e le Alii ia i latou o e o atu, pe amata, i Lana galuega. Faauma i le mataupu faavae lea e faavae i le Mataupu Faavae ma Feagaiga 4:2: Afai tatou te auauna atu i le Atua ma o tatou loto, manatu, mafaufau, ma le malosi atoa, e mafai ona tatou .
Atonu foi e te manao e faailoga upu po o fasifuaitau o loo aoao mai ai lenei mataupu faavae i le Mataupu Faavae ma Feagaiga 4:2.
-
Tali fesili nei i lau api talaaga mo le suesueina o tusitusiga paia:
-
O le a lou manatu i le uiga o le faia o se mea “ma lou loto, mafaufau, manatu, ma le malosi atoa”?
-
E mafai faapefea e le malamalama ma le faaaogaina o lenei mataupu faavae ona fesoasoani ia te oe a o e auai i le galuega a le Alii?
-
Faitau le Mataupu Faavae ma Feagaiga 4:3, ma vaavaai mo mea e tatau ona ia i tatou, o le a faapea ona fesoasoani tatou te manuia ai i le fesoasoani atu i le galuega a le Atua. Atonu e te manao e faailoga mea ua e mauaina.
Ua matele ina manatu nisi o le Mataupu Faavae ma Feagaiga e 4 o se valaau i le galuega faifeautalai faamisiona. Ae peitai, o Iosefa Samita le Matua, o le sa tuuina mai i ai le faaaliga, sa le’i valaauina o se faifeautalai faamisiona. E ui i lea, sa ia mulimuli i le fautuaga i le Mataupu Faavae ma Feagaiga 4:2-3 i lona olaga atoa, ma auauna atu ma le tautino i le po o fea lava ma i soo se taimi lava na valaauina ai o ia. Sa avea o ia ma se tasi o Molimau e Toavalu o le Tusi a Mamona, ma o se tasi o tagata muamua na papatisoina ina ua faatulagaina aloaia le Ekalesia i le aso 6 o Aperila, 1830. Sa auauna atu foi o ia o se Peteriaka muamua o le Ekalesia ma sa avea ma Fesoasoani Lagolago i le Au Peresitene Sili. Mafaufau i ni isi auala, e faaopoopo atu i le galuega faifeautalai faamisiona, e mafai ona e fesoasoani atu ai i le Alii i Lana galuega. Mo se faataitaiga, o le upusii lenei mai le tamaitusi Mo le Malosi o le Autalavou e faatatau i le autu o le auauna atu, ua tuuina atu ai ni manatu e uiga i auala e mafai ona e faatinoina ai lou manao e fesoasoani i le galuega a le Alii i le taimi nei:
“O le auauna atu i isi o se tasi o uiga aupito taua o se soo o Iesu Keriso. O se soo e naunau e tauave avega a isi tagata ma faaamafanafana ia i latou e manaomia se faamafanafanaga. E tele taimi o le a faafetauia ai e le Tama Faalelagi manaoga o isi e ala atu ia te oe.
“E tele auala e auauna atu ai i isi. O nisi auaunaga sili ona taua e mafai ona e tuuina atu o totonu lea o lou lava aiga. E mafai foi ona e auauna atu i ou tofiga faale-Ekalesia, aoga, ma le nuu. E mafai ona e auauna atu i le faia o galuega o le malumalu ma talafaasolopito o aiga. E mafai ona e auauna atu i le taimi nei e ala i le faasoa atu o le talalelei i isi ma pe a avea ma se faifeautalai faamisiona i le lumanai. E masani lava o auaunaga anoa e faaalia i galuega agalelei faigofie o aso uma. Saili atu i aso taitasi mo le taitaiga a le Agaga Paia ia iloa ai po o ai e auauna atu i ai ma pe faapefea foi ona faafetaiaia o latou manaoga. Mulimuli i faataitaiga a le Faaola a o e auauna atu i isi” (Mo le Malosi o le Autalavou [tamaitusi, 2001], 32).
-
Mataupu Faavae ma Feagaiga 4:4
Ua saunia le fanua mo le seleselega
I le Mataupu Faavae ma Feagaiga 4:4 na faatatau atu le Alii i tagata o le lalolagi o se faatoaga saito. Faitau le Mataupu Faavae ma Feagaiga 4:4, ma faailoga le fetalaiga a le Alii e uiga i Lona fanua (po o tagata o le lalolagi). Atonu e fesoasoani ina ia e malamalama atili i lenei fuaiupu, le iloa o saito e pei o le sana po o le karite e sui o latou lanu a’o tutupu a’e. Pe a laitiiti le saito, e lanumeamata, ae a matua ua suia i le sesega. Afai ua saunia le saito mo le seleseleina, e masani ona faamatalaina ua “sinasina.” E faaaoga se naifi tele ma pi’o e ta’u o se selesaito mo le seleseleina o le saito.
-
-
O le a sou manatu i le uiga o le fasifuaitau “ua sinasina le fanua ua saunia e selesele”?
-
O le a sou manatu i le uiga o le, e sasau atu lau selesaito ma lou malosi?
-
O le a le taui o loo ta‘ua i le Mataupu Faavae ma Feagaiga 4:4 mo i latou o e sasau atu a latou selesaito ma lo latou malosi?
-
O le upumoni e tasi e mafai ona tatou aoaoina mai i lenei fuaiupu e uiga i le taunuuga o a tatou galuega e auauna atu i le Alii o le a o tatou galulue ma le filiga e aumai isi ia Iesu Keriso, e mafai foi ona tatou maua le faaolataga mo i tatou lava.
-
Mataupu Faavae ma Feagaiga 4:5–7
Ua faataatia mai e le Alii ia agavaa ma uiga taua mo i latou o e auauna atu ia te Ia
Mafaufau i ni galuega, matata, po o ni faiva se lua po o se tolu. O a ni tulaga o agavaa ma uiga talafeagai o le a manaomia e se tagata ina ia faamanuiaina ai i ia vaega uma taitasi?
Su’e mai se fua o se mea taumafa e sili ona e fiafia i ai, ma faitau le lisi o mea e manaomia o loo i ai. O le a le mea e tupu pe afai e te taumafai e kuka lena mea taumafa ae e le’i tuua i ai se tasi pe lua o mea e manaomia? O le Mataupu Faavae ma Feagaiga 4:5–6 o loo i ai se lisi o “mea e manaomia” po o uiga auaumama e agavaa ai se tagata e fesoasoani i le galuega a le Alii. Faitau ia fuaiupu, ma mafaufau e faailoga ia uiga paia taitasi o loo lisiina mai ai. Atonu foi e te manao e faailoga ia upu po o fasifuaitau o loo aoao mai ai lenei mataupu faavae: A o tatou taumafai e atiina ae ni uiga paia, o le a fesoasoani tatou te agavaa ai e lagolago i le galuega a le Alii.
Mafaufau pe mafai faapefea e le atiina ae o nei uiga paia taitasi ona fesoasoani e te lagolago lelei atu ai i le Alii i Lana galuega.
-
Faitau le Mataupu Faavae ma Feagaiga 4:7, ma vaavaai mo auala e mafai ona e sailia ma atiina ae ai nei uiga auaumama. Mafaufau loloto i le uiga o le ia “ole atu” ma ia “tu‘itu’i atu.” E mafai faapefea ona fesoasoani le tatalo i lo tatou atiina ae o uiga auaumama paia?
-
Ua ou suesueina le Mataupu Faavae ma Feagaiga 4 ma faamaeaina lenei lesona i le (aso).
O fesili, mafaufauga, ma manatu faaopoopo ou te fia faasoa atu i lou faiaoga: