Mataupu Faavae ma Feagaiga 43–44

Faatomuaga

E pei ona tusia i le Mataupu Faavae ma Feagaiga 43, ia Fepuari 1831, na faatonuina ai e le Alii tagata o le Ekalesia e uiga i le matafaioi tulaga ese o le perofeta i le mauaina o faaaliga mo le Ekalesia, faapea foi ma le manaomia e toeaina o le Ekalesia ona talai atu le salamo e sauniuni ai mo mea o le a tutupu i le lumanai. O leMataupu Faavae ma Feagaiga 44 o loo i ai faatonuga a le Alii mo toeaina o le Ekalesia ina ia faapotopoto faatasi i se konafesi.

Mataupu Faavae ma Feagaiga 43:1–7

Ua tautino mai e le Alii o faaaliga ma poloaiga ua na o Lana perofeta faauuina e ala mai ai

Vaai faalemafaufau i ni tagata eseese se toalua o loo taumafai e taitai oe i le usuina o ni pese eseese se luai le taimi lava e tasi. Mata e mafai ona e usuina na pese uma e lua i le taimi lava lea e tasi? E faapefea ona e filifili po o ai le taitai musika e mulimuli i ai?

Ia Fepuari 1831, na fai mai ai se tagata faatoa liliu mai i Katelani, Ohaio, na faaigoa ia Mrs. Hubble, e faapea na ia maua ni faaaliga ma ni poloaiga mo le Ekalesia. Sa faaseseina nisi o tagata o le Ekalesia i ana faamatalaga. Na fesili le Perofeta o Iosefa Samita i le Alii e uiga i faamatalaga a Mrs. Hubble, ma o le tali na ia maua ai le faaaliga ua faamaumauina nei i le Mataupu Faavae ma Feagaiga 43.

Faitau le Mataupu Faavae ma Feagaiga 43:1–5, ma vaai po o ai na fetalai mai le Alii o le a mauaina faaaliga mo le Ekalesia atoa.

O nei fuaiupu sa fesoasoani i tagata o le Ekalesia ia malamalama e na o le Perofeta o Iosefa Samita na i ai le pule e maua ai poloaiga ma faaaliga mo le Ekalesia atoa. E fesoasoani foi nei fuaiupu ia i tatou e malamalama ai e na o le Peresitene lava o le Ekalesia o le a maua faaaliga mo le Ekalesia atoa. Atonu e te manao e tusi lenei aoaoga faavae i au tusitusiga paia i autafa o le Mataupu Faavae ma Feagaiga 43:3–4 po o lau api talaaga mo le suesueina o tusitusiga paia.

Tali le fesili lenei i lau api talaaga mo le suesueina o tusitusiga paia: Aisea e taua ai le iloa e na o le Peresitene o le Ekalesia (po o le Au Peresitene Sili) o le a mauaina faaaliga mo le Ekalesia atoa?

E pei lava ona sa faia e Mrs. Hubble ma isi ia ni faamatalaga sese na faaseseina ai nisi o le Au Paia i aso popofou o le Ekalesia, o loo i ai foi tagata faafoliga po o tagata taufaasese i aso nei o e o loo faalauiloaina ni manatu sese. Faitau le Mataupu Faavae ma Feagaiga 43:5–7, ma faailoa mai le mamanu na faaali mai e le Alii e fesoasoani ia i tatou, ia le faaseseina e tagata o e faalauiloa mai ni manatu sese pe faapea mai latou te maua faaaliga mo isi, ae e le o ia te i latou le pule e faia ai lena mea.

I le avanoa ua saunia, faamatala mai le mamanu na faaali mai e le Alii e puipui ai i tatou mai le faaseseina i aso nei:

O le saunoaga lenei mai ia Peresitene Iosefa Filitia Samita e fesoasoani tatou te malamalama ai o le “e sau i totonu e ala mai i le faitotoa” (MF&F 43:7) o le faia o se mea i le auala tatau ma faatagaina: “E finagalo le Alii ia tatou iloa na te faia mea uma i le ala tatau, ma soo se taimi na te valaauina ai se tasi e taitaia le Ekalesia, o lena tagata o le a sau i totonu e ala mai i le faitotoa ma ia faauuina e i latou e umia le pule. O le faiga lena mai lava i le amataga ma o le a faaauau ai pea lava seia oo i le iuga” (Church History and Modern Revelation, 2 vols. [1953], 1:138). O le “sau i totonu e ala mai i le faitotoa” o le ulufale mai lea e ala i le faiga ua taliaina ma iloa ai.

Mataupu Faavae ma Feagaiga 43:8-16

Ua poloaiina toeaina e faapotopoto e aoao, faamalamalama, ma ia faapaiaina

Fai se lisi i lau api talaaga mo le suesueina o tusitusiga paia, o fonotaga eseese e te auai ai o se tagata o le Ekalesia. I autafa o fonotaga taitasi, tusi ai le mea e te manatu o le faamoemoega o lea fonotaga.

Faitau le Mataupu Faavae ma Feagaiga 43:8, ma faailoga upu ma fasifuaitau o loo aoao mai ai le mataupu faavae lenei: A tatou potopoto faatasi, e tatau ona tatou aoao atu ma faamalamalama atu i le tasi ma le isi, ina ia mafai ona tatou iloa le auala e faatino ma taitai ai le Ekalesia. O le poloaiga ia faamalamalama i le tasi ma le isi, o lona uiga e tatau ona tatou atiina ae ma faamalosi faaleagaga e le tasi le isi. O le fasifuaitau “taitai ai laʼu ekalesia” i lenei fuaiupu e faatatau i tagata o le Ekalesia ua faatonuina i auala e faatino ai o latou tiute. O sauniga e faia e fesoasoani ai i tagata o le Ekalesia e tausia a latou feagaiga ma le faalauteleina o o latou valaauga, o lona uiga ia faatino ai tiutetauave o o latou valaauga.

Tusi i lau api talaaga mo le suesueina o tusitusiga paia, e uiga i se aafiaga na e lagonaina ai le faamalamalamaina—atiina ae ai ma le faamalosia faaleagaga—a o e auai i se sauniga a le Ekalesia.

Faitau le Mataupu Faavae ma Feagaiga 43:9–11, ma faailoa mai mea e tatau ona tatou faia pe a uma ona tatou aoao i tulafono ma poloaiga a le Alii. I le fuaiupu e 9, o le fuaitau “ma faapaiaina” o lona uiga e faia ia paia, po o le faamamaina mai agasala a le lalolagi. O se tasi o upumoni tatou te aoao mai i le fuaiupu e 9 o le e tatau ona tatou fusia i tatou lava ia galulue i upumoni ua tatou aoaoina. (Atonu e te manao e tusi le mataupu faavae lenei i au tusitusiga paia.)

Tali fesili nei i lau api talaaga mo le suesueina o tusitusiga paia:
1. E mafai faapefea e le galue i mea tatou te aoaoina i sauniga a le Ekalesia ona fesoasoani ia avea i tatou ma ni [tagata] faapaiaina?
2. O a matafaioi e te manatu e faia e le papatisoga ma le faamanatuga i lo tatou avea [ma ni tagata] faapaiaina?
3. O le a se taimi sa e tuuto ai e galue i mea na e aoaoina i se sauniga a le Ekalesia, ona sosoo ai lea ma le tulitataoina e ala i le faia o lena mea? Na faapefea ona faamanuiaina oe ona o le faia o lena mea?

I le Mataupu Faavae ma Feagaiga 43:12–14, na fetalai mai le Alii i le Au Paia, o le a latou maua mamalu o Lona malo pe a latou lagolagoina Lana perofeta.

Mataupu Faavae ma Feagaiga 43:17-35

O auauna a le Atua e talai atu le salamo e sauniuni ai mo le Afio Mai Faalua ma le Meleniuma

Mafaufau i se gaoioiga po o se fuafuaga faatino e manaomia ai le tele o se tapenapenaga toto‘a, e pei o se misiona talai, gaoioiga tau taaloga, faafiafiaga faamusika, tofiga faafaiaoga, po o se suega. O le a sou manatu, o a ni lagona e oo i se tagata sa lei saunia ina ua oo i le taimi e fai ai lena gaoioiga po o le fuafuaga faatino?

Faitau le Mataupu Faavae ma Feagaiga 43:17–22, ma vaavaai mo se fuafuaga faatino e manaomia ai ni tapenapenaga toto‘a.

Na faatonuina e le Alii ia toeaina e ta‘u atu i atunuu uma e saunia mo le Afio Mai Faalua o Iesu Keriso. Mai mea ua e aoaoina i le Mataupu Faavae ma Feagaiga 43:20, faatumu avanoa i upu talafeagai e faauma ai le mataupu faavae lenei: E tatau ona tatou salamo ma i tatou lava mo le Afio Mai Faalua o Iesu Keriso.

Faitau le Mataupu Faavae ma Feagaiga 43:25–28, ma vaavaai mo nisi o auala ua valaau ai e le Alii tagata uma ia salamo ma faaolaina. Aisea e te manatu ua faaaoga ai e le Alii le tele o leo e lapatai ai i tatou?

Faitau le Mataupu Faavae ma Feagaiga 43:29–31, ma vaavaai po o le a le mea o le a tupu pe a mavae le Afio Mai Faalua o Iesu Keriso.

Atonu e te manao e faailoga upu po o fasifuaitau o loo aoao mai, i le taimi o le Meleniuma, o le a saisaitia ai Satani ma o le a nofotupu Iesu Keriso ma Lona nuu i le lalolagi.

Na faamalamalama mai e Peresitene George Q. Cannon o le Au Peresitene Sili, le auala o le a saisaitia ai Satani i le taimi o le Meleniuma: “Tatou te talanoa e uiga i le saisaitia o Satani. O le a saisaitia Satani e le mana o le Atua; ae o le a saisaitia foi o ia e ala i le naunautaiga o tagata o le Atua ia le faalogo atu ia te ia, ia le puleaina e ia “ (Gospel Truth: Discourses and Writings of President George Q. Cannon, sel. Jerreld L. Newquist, 2 vols. [1957–74], 1:86).

Na aoao mai le Perofeta o Iosefa Samita: “O le a nofotupu Keriso ma le Au Paia toetutu i luga o le fogaeleele i le taimi o le afe tausaga. Atonu o le a latou le nonofo i le lalolagi, ae o le a asiasi mai i ai pe a latou finagalo ai, po o le, pe a manaomia e pulea ai” (i le History of the Church, 5:212).

Ia faapitoa ona mafaufau loloto i le mea e manaomia ona e faia e salamo ma saunia ai mo le Afio Mai Faalua o Iesu Keriso ma le Meleniuma. Ona o le natura patino o lenei galuega atofaina, tusi [le faaupuga] Maea le galuega atofaina 5 i lau api talaaga mo le suesueina o tusitusiga paia pe a uma ona e faia lenei galuega atofaina.

Mataupu Faavae ma Feagaiga 44

Ua poloaiina e le Alii ia Ana auauna e faapotopoto faatasi

I le Maota Autu Mo Konafesi, i le Aai o Sate Leki, Iuta, ma isi fale i le lalolagi atoa, e tai ono masina ma faapotopoto ai tagata o le Ekalesia e faafofoga ao saunoa mai le Au Pulega Aoao ma isi taitai o le Ekalesia.

I le Mataupu Faavae ma Feagaiga 44, na faatonuina e le Alii ia toeaina o le Ekalesia e faapotopoto mo se konafesi. O le lona fa ai lenei o konafesi aoao a le Ekalesia ma le konafesi muamua na faia i Katelani, Ohaio. Suesue le Mataupu Faavae ma Feagaiga 44:1–4, ma vaavaai mo mafuaaga pe aisea na poloaiina ai e le Alii le Au Paia e fai lenei konafesi.

Faatumu le avanoa i le faamatalaga lenei, e faaaoga ai mea ua e aoaoina mai nei fuaiupu: Na poloaiina e le Alii ia toeaina o Lana Ekalesia e . I le konafesi na folafola mai ai e le Alii e . Ina ua maea le konafesi, o toeaina sa . O le taunuuga, e toatele tagata o le a .

A o e faamaeaina lenei lesona, toe mafaufau i le mea o le a e faia e te galue ai i nei mataupu faavae ua e aoaoina. O le a faamanuiaina oe e le Alii a o e galue i nei upumoni.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mataupu Faavae ma Feagaiga 43–44 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa i lou faiaoga: