Iunite 25: Aso 1
Ua Siitia Atu Le Ekalesia i Misuri i Matu
Faatomuaga
I le 1837 ma le 1838, sa taitai atu ai faatamalii e le Perofeta o Iosefa Samita ma isi taitai o le Ekalesia le Ekalesia i se vaitau o faigata. O se taunuuga o le atuatuvale i le tamaoaiga, faaloloto, saili masei, ma sauaga, pe tusa ma le 10 po o le 15 pasene o le Au Paia i Katelani, Ohaio, na liliuese, e aofia ai ma ni taitai iloga o le Ekalesia. Sa amata ona siitia atu le Au Paia faamaoni i Ohaio e auai faatasi ma i latou i matu o Misuri. Na avea Sisifo Mamao, i Misuri, ma laumua o le Ekalesia seia oo ina faamalosia le Au Paia e tuua le aai i le amataga o le 1839. O lenei lesona e mafai ona fesoasoani e malamalama ma aoao ai mai mea na tutupu anamua, ma tuuina atu ai ia te oe ni vaaiga manino i faaaliga na maua i lenei vaitaimi.
Faigata ma le Liliuese i Katelani, Ohaio
Mafaufau loloto i le fesili lenei: Pe fesoasoani faigata ma tofotofoga e faamalosia lou faatuatua, pe e vaivai lou faatuatua i na taimi?
I le 1837 ma le 1838, o se faasologa o tofotofoga na mafua ai ona feagai le toatele o le Au Paia ma lenei fesili. E ui o nisi o o latou tofotofoga sa o ni taunuuga o sauaga mai fafo atu o le Ekalesia, ae o le tele lava o taunuuga o finauga i totonu o le Ekalesia. A o e suesue i lenei lesona, mafaufau loloto pe mafai faapefea e le auala tatou te tali atu ai i tofotofoga ona, a le faamalosia pe faavaivaia o tatou faatuatua ia Iesu Keriso.
O Katelani, Ohaio, e faatatau i nofoaga i matu o Misuri
A o e faitau i le otootoga talafaasolopito lenei, mafaufau po o a mataupu faavae e mafai ona e aoaoina mai i mea na tutupu o loo faamatalaina:
I le 1837, na oo ai le Au Paia i Katelani, Ohaio, i nisi o faafitauli tautupe. Ina ia fesoasoani i le Au Paia ina ia le faalagolago i ni fesoasoani mo a latou mea tautupe, sa faavaeina ai e le Perofeta o Iosefa Samita ma isi taitai o le Ekalesia le Sosaiete Saogalemu a Katelani, o se kamupani e tai pei o se faletupe. Ona o le salalau solo o le faaletonu o le tamaoaiga i lena vaitaimi, na tele ai faletupe sa gau i le atunuu atoa. Sa gau foi le Sosaiete Saogalemu a Katelani i le tautoulu o le 1837. E toa luaselau tagata faaunetupe i le faletupe na toetoe a gau ai a latou tupe uma, ma o Iosefa Samita sa sili ona tele lona gau. E ui lava sa le’i faatupeina e le Ekalesia le Sosaiete Saogalemu o Katelani, ae sa manatu i ai nisi o le Au Paia o se faletupe a le Ekalesia po o le faletupe a le Perofeta, ma tuuaia ai Iosefa mo o latou faafitauli tautupe. Sa oo lava foi ina amata ta’u o ia e nisi o se perofeta toilalo. Ae e ui lava i le gau o le faletupe, o le toatele o isi na gau ai a latou tupe, sa tausisia le faamaoni ma tumau faamaoni i le Perofeta. (Tagai i le Church History in the Fulness of Times Student Manual, 2nd ed. [Church Educational System manual, 2003], 171–73.)
Sa salalau solo se agaga o le liliuese ma le saili masei i le toatele o le Au Paia. Sa faamatalaina e Polika Iaga se mea na tupu ina ua feiloai nisi o tagata o le Ekalesia, e aofia ai taitai o le Ekalesia, e teena ia Iosefa Samita ma tofia se perofeta fou: “O nisi o le Toasefululua, o molimau o le Tusi a Mamona, ma isi o le Pulega o le Ekalesia, sa faia se fonotaga i le afeafe pito i luga o le Malumalu. O le fesili sa folasia i o latou luma o le faamautinoa o le auala e mafai ona aveesea ai le tofi mai le Perofeta o Iosefa, ae tofia Tavita Uitimera e fai ma Peresitene o le Ekalesia. … Sa ou tulai, ma i se auala manino ma le malosi na ou fai atu ai ia i latou, o Iosefa o se Perofeta, ma sa ou iloaina, ma e mafai ona latou tetee malosi ma faia faamatalaga e ta’uleaga ai o ia, i le tele latou te mananao ai, ae e le mafai ona latou talepeina le tofiaina o le Perofeta a le Atua, e pau le mea e mafai ona latou faia o le faaumatia o o latou lava pule, motusia le manoa na fusia ai i latou i le Perofeta ma i le Atua ma gogoto ai i latou lava i seoli” (Manuscript History of Brigham Young 1801–1844, ed. Elden Jay Watson [1968], 15-16).
-
Tali fesili nei i lau api talaaga mo le suesueina o tusitusiga paia:
-
O a ni upumoni e mafai ona tatou aoaoina mai i nei mea na tutupu anamua?
-
A o le a se mea na semanu e te faia e tumau faamaoni ai i le Perofeta i lenei vaitaimi o le saili masei? O le a se taimi na faamalosia ai lou faatuatua ia Iesu Keriso ona o le onosaia o se tofotofoga ma le faatuatua?
-
O a ni auala ua avea ai le mulimuli i le perofeta o se puipuiga faaleagaga mo oe?
-
E oo ane ia Iuni 1838, e tusa ma le 200 po o le 300 tagata liliuese ua tuua le Ekalesia, e aofia ai Aposetolo e toafa, o Molimau e Toatolu o le Tusi a Mamona, ma se sui o le Au Peresitene Sili (tagai i le Church History in the Fulness of Times,177). Ae peitai, o le toatele o le Au Paia na tali atu i lena vaitaimi i tofotofoga ma le faatuatua, e pei ona sa faia e Polika Iaga. Na faamalolosia i latou e le Alii, ma sa latou tumau faamaoni i a latou molimau. O nisi o i latou o e sa tuua le Ekalesia i lena vaitau o le liliuese, sa toe foi mai mulimuli ane ma talosagaina ina ia toe faatasia i latou faatasi ma le Ekalesia a le Alii. Sa i ai i totonu o i latou ia Oliva Kaotui, Matini Harisi, Luka Johnson, ma Feterika G. Viliamu.
I le lotolotoi o nei tauiviga i Katelani, sa taumafai ai se vaega toaitiiti o tagata liliuese e fasioti Iosefa Samita. O Luka Johnson, o le sa liliuese mai o ia lava mai le Ekalesia, sa lava lona amiosao e lapatai ai le Perofeta e uiga i le taupulepulega. Sa tuua e Iosefa Samita ma Sini Rikitone ia Katelani ia Ianuari, 1838. Sa tuliloaina i laua mo ni aso, ae sa puipuia i laua e le Alii. Sa laua taunuu atu ma o laua auaiga i Sisifo Mamao, Misuri, ia Mati, 1838.
Misuri i Matu
Tagai i le setete o Misuri i le faafanua i le amataga o le lesona lenei. Ina ua tutuliese le Au Paia mai le Itumalo o Jackson, Misuri, i le 1833, sa taliaina i latou e tagatanuu o se itumalo tuaoi ma tuuina atu ia i latou se toomaga le tumau, ma le faamoemoe o le a na o sina taimi puupuu e nonofo ai le Au Paia. Ae peitai, ina ua toeitiiti atoa le tolu tausaga o nonofo ai iina le Au Paia, sa amata e nei tagatanuu ona faamalosia i latou e o ese ma le itumalo.
A o faitau i le otootoga talafaasolopito lenei, mafaufau po o a mataupu faavae e mafai ona e aoaoina mai i mea na tutupu o loo faamatalaina:
I le 1837, sa faaaoga ai e Ioane Uitimera ma William W. Phelps, o fesoasoani e toalua i le au peresitene o le siteki a Misuri, ia tupe a le Ekalesia e faatau mai ai fanua i se nofoaga sa ta’ua o Sisifo Mamao i Misuri i matu. Ae peitai, ina ua la ofoina atu ni fasifanua i le Au Paia sa fai mai, sa laua faatauina atu le fanua mo se tupe faasili laitiiti, lea sa laua taofia mo i laua lava. Ae ui i lea, sa faamagalo i laua e le au fautua maualuga i Misuri ma tofia isi e tufatufaina le fanua. Ae peitai, sa faaauau pea ona taumafai Ioane ma William ia la manuia mai le faatauina atu o fanua. I le 1838, na tape ai e le au fautua maualuga o laua igoa [mai le Ekalesia]. (Tagai i le Church History in the Fulness of Times, 183–85.)
Sa lagolagoina e Iosefa Samita le iuga a le aufono, ma sa le fiafia ai William. Ia Novema 1838, sa ia sainia ai se faamatalaga na tauto ai e faasaga i le Perofeta. O lenei faamatalaga tauto na saofaga i le pueina ma le lafoina o Iosefa ma isi i le Falepuipui o Liperate mo le taumalulu.
I le falepuipui, sa matuai tigaina ai le Perofeta o Iosefa Samita ma i latou sa faatasi ma ia, na le gata mai tulaga saua o lo latou faafalepuipuiina, ae faapea foi mai lipoti e uiga i le Au Paia na tutuliese mai o latou fale ma sauaina i le tele o auala. O le vaega faatupu vevesi a Misuri, sa le’i taofia e le kovana, sa faaleagaina meatotino ma fasiotia tagata e 17 i se fale vili falaoamata na anaina e se tagata na igoa ia Jacob Haun.
Sa mafatia faaleagaga ia William W. Phelps ona o ana amioga, ma sa ia tusi atu ia Iosefa se tusi e talosaga ai mo se faamagaloga. Sa toe tusi mai i ai le Perofeta:
“E moni, ua matou mafatia tele ona o le taunuuga o au amioga—o le [ipu oona], ua tumu mo le tagata soifua e inumia, ua taumasuasua ina ua e faasagatau mai ia te i matou. …
“Ae ui i lea, ua uma ona inumia le ipu, ua faia le finagalo o lo tatou Tama, ma o loo matou ola pea, o lea matou te faafetai ai i le Alii. …
“I le talitonuina o lau faatoesega o se mea moni, ma le moni aiai o lou salamo, ou te fiafia ai e toe tuuina atu le lima taumatau o le faauo, ma olioli i le toe foi mai o le atalii na leiloa. …
“’Sau ia le uso pele, aua o lea ua uma le taua, O uo sa i ai muamua, ua toe avea ma uo i le faaiuga’” (i le History of the Church, 4:163–64).
O se vaega o le tusi a Iosefa Samita ia William W. Phelps
-
-
Aisea e faigata ai ona faamagalo atu i se uo na faalataina oe ma mafua ai ona e tigaina?
-
O le a se mataupu faavae e mafai ona tatou aoao mai i le faataitaiga a Iosefa Samita? (O lenei mataupu faavae atonu e te manatua ai se mau tauloto i le Mataupu Faavae ma Feagaiga 64:9–11. (Atonu e te manao e toe faamanatu lenei mau e iloa ai pe faapefea ona fesootai i le aafiga a Iosefa Samita ma W. W. Phelps.)
-
O a nisi lesona e mafai ona tatou aoao mai i lenei tala?
-
-
O Mea na Tutupu na O’o Atu ai i le Tutulieseina o le Au Paia mai Misuri i Matu
Na e vaai i se tagata o le Ekalesia ua faia se filifiliga na faapea ona maua ai e se isi tagata ni lagona le lelei e uiga i le Ekalesia? Atonu foi e te manao e mafaufau pe o faapefea ona faatosinaina e au lava amioga ia manatu o isi e uiga i le Ekalesia.
Aisea e taua ai ona tatou mafaufau po o a auala o loo atagia atu ai le Ekalesia i a tatou amioga po o upu?
I le 1838, o amioga ma upu a nisi o tagata o le Ekalesia na faaopoopo ai lagona le lelei sa i ai i tagatanuu o Misuri e uiga i le Au Paia o Aso e Gata Ai. A o e faitau i le otootoga lenei o le talafaasolopito, vaavaai mo ni mea sa tautatala ai pe faia e nisi o le Au Paia na faapea ona faatiga ai i le Ekalesia ma ona tagata. Mafaufau e faailoga mea e te mauaina.
I le 1837 ma le 1838 na amata ai e nisi sa le malilie ma tapeina igoa mai le Ekalesia na nonofo faatasi ma le Au Paia i Sisifo Mamao, Misuri, ona aumai ni moliaga faaletulafono e faasaga i le Ekalesia ma faaleaga ai le Ekalesia. Sa amata ona tuputupu a’e le le to’a o nisi o le Au Paia i nei tagata faatuiese. Ia Iuni 1838, sa lauga malosi ai Sini Rikitone i le mea ua lauiloa o le “Lauga i le Masima.” Sa ia ta’ua le Mataio 5:13 ma faapea atu, afai e mai le masina, e leai se mea e toe aoga i ai, ma e tatau ona lafo i fafo, e faailoa ai le mea moni e faapea, o i latou o e na tuua le Ekalesia, e tatau ona lafo i fafo mai le Au Paia. E le gata i lea, e toa 84 tagata o le Ekalesia na sainia se pepa o faamatalaga na poloaiina ai le au liliuese e tuua le itumalo. I le lua vaiaso mulimuli ane, i le aso 4 o Iulai, sa tuuina atu ai e Sini se lauga lea sa ia folafola atu ai, o le a puipui e le Au Paia i latou lava e tusa lava pe oo ai i se “taua o le fasiotiga tagata.” E ui lava o nei lauga uma e lua na foliga mai na feteenai ma le faatonuga a le Alii e “aioi atu mo le filemu” (MF&F 105:38), sa lomiaina uma nei lauga e lua ma na mafua ai le fefefe o tagata e le o ni Au Paia o Aso e Gata Ai. (Tagai i le Church History in the Fulness of Times, 191–92.)
I le aso 6 o Aokuso, 1838, sa taumafai ai se vaega o le Au Paia e palota i Kalatini, Misuri, ae sa osofaia e se vaega o tagata Misuri. Sa tau atu i ai le Au Paia, ma sa tau fai manunua alii o itu uma e lua. O lenei mea na tupu na taitai atu ai i ni feteenaiga ma ni taufaamatauga faaopoopo, ma faateteleina ai feeseeseaiga i le va o le Au Paia o Aso e Gata Ai ma o latou tuaoi i Misuri. (Tagai i le Journals, Volume 1: 1832–1839, vol. 1 of the Journals series of The Joseph Smith Papers [2008], 298–301.)
I le taimi lea, na tuuina atu ai e se tagata liliu mai na igoa ia Sampson Avard ni tautoga faalilolilo ia i latou o e o le a auai ma ia i le faatuina o se vaega faomea na ta’ua o Danites. Na faatonuina e Avard i latou e fao mea ma vete tagata Misuri, ma fai mai, o lenei mea o le a fesoasoani e atinae ai le malo o le Atua.
Na faatalitonuina e Avard tagata na mulimuli ia te ia, o ana faatonuga sa sau mai i le Au Peresitene Sili. Sa iloa mulimuli ane le mea moni, ma sa tape ai le igoa Avard. O amioga a Avard na mafua ai se afaina tele i foliga o le Ekalesia, ma na fesoasoani e taitai atu ai i le faafalepuipuiina o le Perofeta i le Falepuipui o Liperate.
Ia Oketopa 1838, sa i ai se taua i le va o nisi o tagata o le Ekalesia ma fitafita Misuri. Na oo atu lipoti [faamatalaga] faatele o le taua ia Kovana Boggs, o le na tuuina mai se poloaiga o le fasiotiga [o Mamona]: “E tatau ona faia Mamona o ni fili ma e tatau ona fasiotia pe tutuliese faamalosi ma le setete, pe a tatau ai mo le manuia o tagata lautele” (i le History of the Church, 3:175). E lei umi, ae siomia le aai o Sisifo Mamao e se autau lea na sili atu le toatele nai lo autau a le Au Paia i le toalima i le toatasi. Sa faafalepuipuiina le Perofeta o Iosefa Samita ma isi taitai o le Ekalesia i le Falepuipui o Liperate, lea sa latou nonofo ai i le taumalulu atoa. O isi tagata uma o le Au Paia sa faamalosia le tuua o le setete. (Tagai i le Church History in the Fulness of Times, 199–200, 204, 208.)
Sa faamalosia le Au Paia e tuua Sisifo Mamao, Misuri.
O le mataupu faavae e tasi e mafai ona tatou faailoa mai i lenei vaitaimi o le o a tatou amioga ma upu e mafai ona aafia ai le auala e manatu ai isi i le Ekalesia a Iesu Keriso.
Aisea e te manatu e taua ai mo i tatou ona iloa, o amioga a nisi o tagata o le Ekalesia anamua, na saofaga i manatu le lelei sa i ai o nisi o tagata Misuri e uiga i le Ekalesia?
E ui o a tatou filifiliga le lelei e mafai ona faaosofia ai isi i ni manatu le lelei e uiga i le Ekalesia, ae e mafai foi ona tatou fesoasoani i isi ia i ai se manatu lelei e uiga i le Ekalesia e ala i a tatou upu ma amioga.
-
Vaavaai mo ni auala e fai ai ma se sui lelei o le Ekalesia a Iesu Keriso i le aluga o le vaiaso a sau. A o e faia, o le a faamanuia oe e le Alii.
O se tasi o mataupu faavae autu e mafai ona tatou aoao mai i le taimi lenei i le talafaasolopito o le Ekalesia o le, a o tatou filifili e tali atu i tofotofoga i le faatuatua nai lo le masalosalo, e mafai ona faamalolosia a tatou molimau.
-
-
Ua ou suesueina le lesona “Ua Siitia Atu Le Ekalesia i Misuri i Matu” ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: