Mataupu Faavae ma Feagaiga 103

Faatomuaga

I se fonotaga a fautua maualuga a Katelani i le aso 24 o Fepuari, 1834, na saili ai e Pale P. Palate ma Laimani Uaite se taitaiga mai le aufono e faatatau i le auala e mafai ai e le Au Paia i Misuri ona maua se toomaga le tumau ma toe maua le umiaina o o latou laueleele i le Itumalo o Jackson. O lena lava aso, na maua ai e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 103, lea na folafola mai ai le Alii o le a toe maua mai le laueleele o Siona. Na faatonuina e le Alii ia taitai o le Ekalesia e faapotopoto punaoa ma ia saili nisi e fesoasoani i le Au Paia i Misuri. O lenei vaega sa faapea ona ta’ua o le Tolauapiga a Siona.

Ua taunuu atu le Tolauapiga a Siona i Misuri

Mataupu Faavae ma Feagaiga 103:1–21

Ua folafola mai e le Alii o le a laveaiina Siona

O a fili o e amiotonu o loo i ai i aso nei?

Mafaufau e uiga i le auala o loo saili ai fili o le Alii e taofia lou alualu i luma faaleagaga ma le alualu i luma o le Ekalesia. A o e suesueina le Mataupu Faavae ma Feagaiga 103, vaavaai mo aoaoga faavae ma mataupu faavae o le a fesoasoani ia te oe e faatoilalo ai ia fili.

E pei ona faamatala mai i le faatomuaga o lenei lesona, na tuuina mai e le Alii se faaaliga i le Perofeta o Iosefa Samita o le tali i fesili e uiga i auala e fesoasoani ai i le Au Paia i Misuri. I le amataga o le faaaliga, na faamalamalama mai ai e le Alii le mafuaaga na Ia faatagaina ai Ona fili e sauaina le Au Paia i Misuri. Faitau le Mataupu Faavae ma Feagaiga 103:1–4, ma vaavaai mo mafuaaga e faataga ai e le Alii ia mea matautia e tupu i Lona nuu.

Mafaufau pe aisea e taua ai le ta’uina e le Alii o i latou o e sa sauaina le Au Paia o Ona fili.

Faitau le Mataupu Faavae ma Feagaiga 103:5–7, ma saili mo tali i fesili nei: Afai e mulimuli le Au Paia i fautuaga a le Alii “i [lena] lava itula”, o a ni faamanuiaga o le a latou maua? (Atonu e te manao e faailoga tali pe a e mauaina. Ia matau o le upu manumalo o lona uiga ia malolosi atu nai lo o se fili po o le ia manumalo.)

O nei fuaiupu o loo aoao mai ai se mataupu faavae e mafai ona faatatau i au taumafaiga e manumalo faasaga i faatosinaga a le lalolagi: A amata ona tatou mulimuli i fautuaga a le Alii, tatou te maua le malosi e amata ai ona manumalo e faasaga i le lalolagi.

Faitau le Mataupu Faavae ma Feagaiga 103:8–10, ma vaavaai mo le mea na lapatai mai le Alii o le a tupu pe afai e filifili le Au Paia e le usitai i Ana afioga.

O a mataupu faavae na aoao mai e le Alii i nei fuaiupu e faatatau i le mea o le a tupu pe a tatou le tausia Ana poloaiga? Faauma le faamatalaga “afai-ona” lenei: Afai tatou te le usiusitai i poloaiga a le Alii, ona .

Toe faitau le Mataupu Faavae ma Feagaiga 103:9 . E mafai faapefea ona avea oe ma “se malamalama i le lalolagi”? E mafai faapefea ona avea oe ma se “faaola”?

Tali fesili nei i lau api talaaga mo le suesueina o tusitusiga paia:
1. O a nisi o faataitaiga o auala e taumafai ai fili o le Alii ia manumalo e faasaga i tagata o le Ekalesia i o tatou aso?
2. Aisea e te manatu o le a le mafai ai e se tagata e le usiusitai pe usitai na o se vaega i le Alii, ona manumalo e faasaga i fili o le Alii?
3. O le a se taimi na e vaai ai i se tasi o manumalo i se fili o le Alii e ala i le taumafai e usitai i afioga a le Alii? (Mo se faataitaiga, atonu e te mafaufau i se tasi ua faatoilaloina se vaisu po o le ua ola nei i le talalelei i le mavae ai ona ola i se ituaiga olaga faalelalolagi.)
Tusi se mea se tasi i lau api talaaga mo le suesueina o tusitusiga paia, e mafai ona e amata faia “i lenei lava itula” (MF&F 103:5) ina ia usitai lelei ai i le fautuaga a le Alii. Fai se fuafuaga o le auala o le a e faia ai lea mea.

Ia manatua, e ui atonu o le a e le usiusitai atoatoa i afioga uma a le Alii, ae afai e te taumafai ma le filiga e usitai ia te Ia, ma afai e te salamo ma le faamaoni ma saili le faamagaloga e ala i Lana Togiola pe a e sese, o le a Ia fesoasoani ia e manumalo i Ona fili.

I le Mataupu Faavae ma Feagaiga 103:11–21, tatou te faitau ai i le folafolaga a le Alii e faapea, i le mavae ai o mafatiaga o le Au Paia, o le a laveaiina Siona e ala i Lona mana. Ae sa Ia lapatai mai foi ia te i latou, pe afai e faaleagaina e le Au Paia o latou tofi, o le a aveesea mai ai i latou. Sa Ia fetalai mai e uiga i le Perofeta o Iosefa Samita e faapei o se tagata e pei o Mose o le o le a taitaiina le nuu (tagai i le MF&F 103:16, 21; tagai foi i le MF&F 28:2). O lenei faatusatusaga e moni i Peresitene uma o le Ekalesia (tagai i le MF&F 107:91).

Mataupu Faavae ma Feagaiga 103:22-40

Ua faaali mai e le Alii le ala e laveaiina ai le laueleele o Siona

Faitau le Mataupu Faavae ma Feagaiga 103:22–23. O nei fuaiupu o loo i ai faatonuga a le Alii mo taitai o le Ekalesia i lena taimi, i le 1834. Na ia poloaiina i latou e faapotopoto se vaega e o atu i le laueleele o Siona, i Misuri, ma fesoasoani i le Au Paia o loo iina. O le vaega o alii o le a faapotopotoina faatasi e taitai o le Ekalesia, ina ia taitaiina e le Perofeta o Iosefa Samita, na faapea ona lauiloa o le Tolauapiga a Siona (o letolauapiga o le isi upu mo le autau). E lua faamoemoega autu sa i ai i sui o le Tolauapiga a Siona. Muamua, ina ia latou aveina atu punaoa i le Au Paia i Misuri. O nei punaoa, o le a latou tuuina atu ai le toomaga mo le Au Paia ma mafai ai ona toe avatu i latou i o latou fale. O le a latou faaaogaina foi nei punaoa e faatau mai ai ni fanua faaopoopo. Lona lua, e pei ona faatagaina ai e le Kovana o Misuri o Daniel Dunklin, ina ua uma ona faafeao atu e le vaegaau o le setete o Misuri le Au Paia e toe foi atu i le Itumalo o Jackson, o le a tuua ai le Tolauapiga a Siona e fesoasoani e tausisia le nofolelei ma le filemu iina.

O Heber C. Kimball sa o se tasi o le au uso sa tali atu ma le faamaoni i le valaau e auai i le Tolauapiga a Siona. Na avea mulimuli ane o ia o se tasi o le Au Peresitene Sili. Sa ia faamatala e uiga i ona lagona a’o aluese atu faatasi ma le Tolauapiga a Siona: “Sa matou amata i le aso 5 o Me, ma e moni lava sa o se taeao mamalu lenei ia te a’u. Sa ou tuua lo’u toalua ma [la’u] fanau ma uo, ma e le’i faamoemoe e toe vaai ia i latou, ona sa faamata’uina a’u ma isi o le usoga i totonu o lena atunuu ma i Misuri, e le fili, e faapea o le a latou faaumatia i matou ma faaumatia uma i matou mai le laueleele” (i le “Extract from the Journal of Heber C. Kimball,” Times and Seasons, Jan. 15, 1845, 771; tagai foi Church History in the Fulness of Times Student Manual, 2nd ed. [Church Educational System manual, 2003], 143).

Tali fesili nei i lau api talaaga mo le suesueina o tusitusiga paia:
1. Afai na e ola i na aso, e te manatu e te manao e te alu i le Itumalo o Jackson e fesoasoani i le Au Paia? Aisea e ioe pe leai ai?
2. O le auai i le Tolauapiga a Siona e manaomia ai le tuua o tiutetauave o le aiga ma galuega ina ia savavali e tusa ma le 900 maila (1,450 kilomita) i tulaga matuai leaga i totonu o se siosiomaga [e tele ai le] inoino ma le lamatia. Faitau le Mataupu Faavae ma Feagaiga 103:20. O a ni auala e aafia ai lau faaiuga e volenitia ona o le folafolaga o loo i lenei fuaiupu?

Faitau le Mataupu Faavae ma Feagaiga 103:27–28, ma vaavaai mo le fetalaiga a le Alii ia i latou o e o le a auai i le Tolauapiga a Siona. Atonu e te mafaufau e faailoga fasifuaitau o loo aoao mai ai le upumoni lenei: O soo o Iesu Keriso e naunau e tuuina atu o latou ola ona o Ia.

Mo le Au Paia i le Tolauapiga a Siona, o le avanoa e ono maumau ai o latou ola sa moni. E ui atonu e te le feagai ma lea tulaga lamatia, ae o lenei upumoni e faatatau lava ia te oe.

Na tuuina mai e Peresitene James E. Faust o le Au Peresitene Sili se isi auala e mafaufau ai e tuuina atu o tatou ola mo le Alii: “Mo le toatele o i tatou, o le mea o loo moomia e le o le oti mo le Ekalesia ae ia ola mo le Ekalesia. Mo le toatele, o le ola i se olaga faaKeriso i aso taitasi e mafai ona sili atu ona faigata nai lo le tuuina atu o le ola o se tasi” (“Avea ma Soo,” Ensign po o le Liahona, Nov. 2006, 22).

Faauma gaoioiga nei:
1. Faasoa atu le saunoaga a Peresitene Faust i se tagata o le aiga po o se uo, ona fai atu lea o le fesili lenei: Aisea e te manatu atonu e sili atu ona faigata ona ola mo le Alii nai lo o le oti mo Ia?
2. Tusi i lau api talaaga mo le suesueina o tusitusiga paia, le tagata sa e fesili i ai ma lana tali. Faaopoopo atu i ai ou lava manatu e uiga i le saunoaga a Peresitene Faust ma le fesili.

Faitau le Mataupu Faavae ma Feagaiga 103:30–34, ma vaavaai pe toafia ni volenitia na finagalo i ai le Alii mo le Tolauapiga a Siona.

E toafia ni volenitia na finagalo i ai le Alii?

O le a le aofaiga aupito maualalo sa finagalo i ai le Alii?

I le faaiuga o le fonotaga a fautua maualuga lea na talanoaina ai e taitai o le Ekalesia le tulaga o le Au Paia i Misuri, na fofogaina ai e le Perofeta o Iosefa Samita o le a alu o ia i Siona e fesoasoani e laveai mai. Pe tusa ma le 30 po o le 40 o alii na auai sa faapea foi ona volenitia atu. Ona tofia lea e le Alii o ni alii se toa 8 e o atu i aulotu taitasi o le Ekalesia e saili mai ni volenitia mo le Tolauapiga a Siona ma saili ni saofaga o ni mea e faaaoga ma tupe mo le Au Paia i Misuri (tagai i le MF&F 103:37–40).

Faitau le Mataupu Faavae ma Feagaiga 103:35–36, ma faailoa mai mea na manaomia ona fai e le Au Paia ina ia faamanuiaina i a latou taumafaiga e laveai Siona. Mafaufau e faailoga le upumoni ua aoao mai e le Alii i le fuaiupu e 36 e uiga i le auala e mafai ona tatou manumalo ai i le faataunuuina o Lana galuega.

Mafaufau i auala e taumafai ai le tiapolo e faasalavei lou alualu i luma faaleagaga. O i ai se agasala, faaosoosoga, po o se faafitauli o loo faasaga atu ia te oe i au taumafaiga e mulimuli i le Alii? Toe vaai i lau tali i le gaoioiga 2 i lau api talaaga mo le suesueina o tusitusiga paia. E faapefea ona fesootai lau tali i le filiga ma le faamaoni ma le tatalo i le faatuatua? Ia manatua, e pei o le Au Paia i taimi o Iosefa Samita, o loo ia te oe le gafatia e maua ai le manumalo i fili o le Alii ma ausia faamoemoega o le Alii a o e tatalo i le faatuatua ma a o e usitai ma le filiga ma le faamaoni i Ana afioga.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mataupu Faavae ma Feagaiga 103 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: