Iunite 2: Aso 4
Iosefa Samita—Talafaasolopito 1:55–65
Faatomuaga
Ina ua mavae le fa tausaga o le mauaina o faatonuga mai le agelu o Moronae, na tuuina mai ia Iosefa Samita le vaaiga o papatusi auro, ma sa amata ona ia faaliliuina le Tusi a Mamona. Sa faatagaina Matini Harisi e faaali atu nisi o tusitusiga na kopi mai papatusi ma o latou faaliliuga i tagata atamamai i Niu Ioka. Matau le ala na taulima ma manatu mamafa ai Iosefa Samita i lana matafaioi e faatatau i papatusi.
Iosefa Samita—Talafaasolopito 1:55–58
Na tutupu ni aafiaga taua ia Iosefa i le talutalufou o lona tulaga faatagata matua
Mafaufau i ni mea taua na tutupu i olaga o ni tagata talavou e te iloa. (O nei mea e ono aofia ai faamanuiaga faapeteriaka, galuega, aoga, suiga o tulaga faaleaiga, po o le maliliu foi o e e pele.) O le a se mea taua na tupu ia te oe i nai tausaga ua mavae? O le a sou lagona i se aafiaga o lenei mea na tupu i lou tagata ma lou lumanai?
Faitau le Iosefa Samita—Talafaasolopito 1:55–58, ma faailoa mai mea taua na tutupu i le olaga o Iosefa Samita, ia sa faapea ona tutupu a’o le’i ona mauaina papatusi auro mai le agelu o Moronae.
E taua le iloa o le taimi lenei na maliu ai Alavini le uso matua o Iosefa. O lenei mea na tupu sa i ai sona sao i faaaliga na mulimuli mai, ia o le a e aoao i ai i se taimi mulimuli mai o le tausaga (tagai i le MF&F 137:1–6).
O le isi mea taua na tupu i le taimi lea, o lana faaipoipoga ia Ema Hale. Na saunoa le tina o le Perofeta, o Lusi Maka Samita, e uiga i le faaipoipoga a lana tama tama ia Ema: “Sa matou fiafia lava i lana filifiliga, ma e le gata i le ioeina o lona faaipoipo atu ia te ia, ae na talosagaina foi o ia e sau ma aumai [Ema] matou te nonofo” (History of Joseph Smith by His Mother, ed. Preston Nibley [1958], 93).
Iosefa Samita—Talafaasolopito 1:59–62
Ua maua e Iosefa papatusi ma amata ona faaliliuina
Vaai faalemafaufau e faapea, ua tuuina atu ia te oe e lou tama se kopi o le lomiga muamua o le Tusi a Mamona (lea e toeitiiti $180,000 le tau i le tupe i aso nei). E faapefea ona e taulimaina lenei tusi, pe afai ua e malamalama i lona taua tautupe? E faapefea ona e taulimaina pe afai ua e iloaina o le kopi mulimuli lenei o le uluai Tusi a Mamona o loo i ai?
Sa tuuina atu ia Iosefa Samita se mea e taua tele. Mafaufau loloto i se mea e mafai ona e aoaoina mai i lana faataitaiga a o e suesue i lana tala. Faitau le Iosefa Samita—Talafaasolopito 1:59, ma vaavaai mo mea taua na tuuina mai e le agelu o Moronae ia Iosefa (mafaufau e faailoga nei mea i au tusitusiga paia).
O le a le tiutetauave na maua e Iosefa e faatatau i nei mea? Faauma le mataupu faavae lenei e faavae i le mea na folafola mai e Moronae ia Iosefa, e pei ona tusia i le Iosefa Samita—Talafaasolopito 1:59: A o ou tauaveina le tiutetauave mo le, ma le faasaosaoina o le mea ua tuuina mai e le Alii ia te au, o le a Ia .
O se tasi auala e mafai ona e faaumaina ai le mataupu faavae o le “tuuina mai Lana puipuiga ma [Lana] fesoasoani.”
Faitau le Iosefa Samita—Talafaasolopito 1:60, ma vaavaai mo le mea na tupu a o i ai ia Iosefa papatusi auro. A o e faitau, matau le ala na faataunuuina ai e le Alii Lana folafolaga, a o faamaoni Iosefa i le tiutetauave na tuuina mai ia te ia.
Ina ua uma ona maua e Iosefa Samita papatusi mai ia Moronae, sa ia natiaina muamua i totonu o se ogalaau pala pe tusa ma le tolu maila mai lona fale. Ina ia malamalama i le ala na saunia ai e le Alii Lana puipuiga ma le fesoasoani a’o faaaogaina e Iosefa Samita lona malosi atoa i le vaaiga o papatusi auro, faitau le faamatalaga lenei mai le tina o Iosefa Samita e uiga i le mea na tupu i se taimi e le’i mamao talu ona ia mauaina mai papatusi mai ia Moronae i le Mauga o Kumora:
“O Iosefa, a’o sau ia i matou, sa ia aveese mai papatusi mai lo latou nofoaga lilo, ma afifi i lona peleue umi, tuu i lalo o lona aoao ma sau loa i le fale.
“E le’i mamao tele se mea na agai mai ai, ae ona manatu o le a sili atu ona saogalemu le aluese mai i le alatele ae ui mai i le togavao. E le’i leva ona agai mai talu ona ia aluese mai le alatele, ae tau mai i se vaega tele o ni laau na toulu i le matagi, ma a’o oso o ia i luga a’e o se ogalaau, sa oso faafuasei mai i ona tua se tagata ma matuai ta o ia i se fana. Sa faliu atu Iosefa tu’i ma pau ai i lalo, ona momoe loa lea i le saoasaoa sili na ia mafaia. E tusa ma le afa maila le mamao ae toe osofaia foi o ia i le ituaiga osofaiga e pei ona sa tupu muamua; sa ia tu’iina foi ma palasi ai i lalo lea tamaloa e pei ona sa ia faia i le tamaloa muamua, ma momoe pea; ma a’o lei oo atu i le fale, sa osofaia faatolu o ia. O lona tu’iina o le tamaloa lona tolu na gau ai lona limamatua, peitai, na te le’i iloaina, ma ina ua ia iloa atu le fale, sa faapalasi o ia i le tulimanu o le pa se’i tau to ai lona sela. O le taimi lava na mafai ai, na ia tu a’e ai ma sau i le fale. Sa tau le mafai ona tautala mai le fefe ma le lelava i le momoe” (History of Joseph Smith by His Mother, 108).
E ui lava sa le’i faigofie ia Iosefa le puipuiga o papatusi auro, ae matau le auala na faamanuiaina ma faamalosia ai o ia e le Atua ina ia mafai ona faataunuuina lona tiutetauave. Na tuuina mai e Elder D. Todd Christofferson o le Korama a Aposetolo e Toasefululua, ni fautuaga e uiga i faatuatuaga paia ua tuuina mai e le Alii ia te oe:
“Ia faautauta i mea e tuuina atu e le Alii ia te oe. O se faatuatuaga. …
“Nai lo le tuuina o lou olaga e faatafeafea atu i le faatamala, talosia ia avea o se olaga e faateleina le usitai a’ia’i. Ou te faamoemoe o le a e mafaufau, lagona, laei, ma amio i ni auala e faaalia ai le migao ma le faaaloalo mo mea paia, nofoaga paia, ma taualumaga paia” ((“A Sense of the Sacred,” New Era, June 2006, 31).
Mafaufau i nisi o faatuatuaga paia ua tuuina mai e le Tama Faalelagi ia i tatou, e pei o le taulimaina ma le migao o o tatou tino, feagaiga o le papatisoga ma le malumalu, pule ma tiute o le perisitua, valaauga o le Ekalesia, o le tiutetauave o le tausia o o tatou mafaufau ma agaga, tiutetauave faaleaiga ma mafutaga, ma le apoapoaiga e faasoa atu le talalelei. Iloilo pe o e faatamala ma ola faasamasamanoa po o e tausia mea na tuuina mai ia te oe. Mafaufau loloto po o a faamanuiaga e mafai ona oo mai ia te oe a’o e taumafai e taulima au faatuatuaga paia uma ma le faaeteete tele.
-
I lau api talaaga mo le suesueina o tusitusiga paia, tusi ai nisi o faatuatuaga paia e te lagona ua tuuina mai ia te oe, ma faamanuiaga e ono oo mai ia te oe pe a e taulimaina ma le faaeteete na faatuatuaga.
Ina ia iloa le auala na faaauau ona faamanuiaina ai e le Alii ia Iosefa ma Ema Samita ona o lo la’ua faamaoni, faitau le Iosefa Samita—Talafaasolopito 1:61–62. O a auala na faamanuiaina ai e le Alii le Perofeta ma lona faletua i lea taimi?
Iosefa Samita—Talafaasolopito 1:63–65
Ua tuuina atu e Matini Harisi ia togitogiga mai papatusi i le au atamamai i Niu Ioka
Vaai faalemafaufau e faapea, na faatagaina oe e kopi nisi o togitogiga moni mai papatusi auro. O le a se mea e te faia i le kopi? O le a se mea e te faia pe afai e te manao e faamaonia atu i se uo, o papatusi auro e mai anamua, e pei lava ona e fai atu ai i lena taimi atoa?
O le ata na muamua atu o se faataitaiga o togitogiga [mataitusi] na tusia i luga o papatusi auro. I le 1827, na kopiina ai e Iosefa Samita nisi o togitogiga i luga o se fasi pepa. Na talosaga Matini Harisi pe mafai ona ia faaali atu ia togitogiga i le au atamamai o e na i ai ni malamalamaaga i gagana ma olaga anamua. Atonu na manatu Matini, o le faamaoniga e le au atamamai o togitogiga, o le a fesoasoani lea i lona toalua, o le sa le’i fiafia i le fesoasoani atu o Matini ia Iosefa Samita i le faagasologa o le faaliliuga. Atonu foi sa faamoemoe Matini Harisi o se faamaoniga o le moni aiai o togitogiga, o le a mafai ai ona fesoasoani ia te ia i le sailiga o se tupe e totogi ai le lolomiina o le Tusi a Mamona. Tatou te le iloa po o le kopi o loo faaalia iinei, o le kopi lava lea e tasi na tuuina atu e Matini Harisi i le au atamamai, ona e i ai ni nai kopi o togitogiga na faia.
-
O leIosefa Samita—Talafaasolopito 1:63–65 o loo i ai le tala o le fonotaga a Matini Harisi ma le au atamamai. O lenei mea na tupu na valoia e le perofeta anamua o Isaia. Faitau le mau lena; ona faitau lea o le Isaia 29:10–12. (O le a aoga foi le faitauina o le faaulutala o le mataupu o le Isaia 29 .) A o e faitauina nei mau, fai se aotelega o faamatalaga i le koluma o loo sosoo ai o lau siata. A uma ona faatumu itu uma e lua o le siata, vaavaai mo mea e tutusa ai le faamatalaga a Matini Harisi ma le valoaga a Isaia, ma tusi mea e te maua i lau api talaaga mo le suesueina o tusitusiga paia.
O a ni upumoni o le valoaga a Isaia ma le tala a Matini Harisi i le faaalia atu o togitogiga i le au atamamai, ua tatou aoao ai e uiga i le muai silafia e le Atua ma valoaga a auauna a le Alii?
Atonu e te manao e tusi le faamatalaga lenei o le upumoni i au tusitusiga paia i autafa o le tala lenei i le Iosefa Samita—Talafaasolopito 1:63–65: O le a faataunuuina lava valoaga a auauna a le Alii. E mafai ona e mafaufau i se fuaitau o mau tauloto o loo aoao mai ai lenei upumoni e tasi?
O fuaitau o mau tauloto e lua o loo aoao mai o le a faataunuuina lava valoaga a auauna a le Alii o le Mataupu Faavae ma Feagaiga 1:37–38 ma le Amosa 3:7. Atonu e te manao e tusi nei mau faasino i autafa o le Iosefa Samita—Talafaasolopito 1:65 i au tusitusiga paia.
Ina ua uma ona faaali atu e Matini Harisi ia togitogiga ia Polofesa Anthon ma Dr. Mitchell, sa ia toe foi atu i Palamaira ma se naunautai faafouina ina ia fesoasoani i le lomiga o le Tusi a Mamona.
-
-
Ua ou suesueina le Iosefa Samita—Talafaasolopito 1:55–65 ma faamaeaina lenei lesona i le (aso).
O fesili, mafaufauga, ma manatu faaopoopo ou te fia faasoa atu i lou faiaoga: