Iunite 5: Aso 2
Mataupu Faavae ma Feagaiga 18
Faatomuaga
O le faaaliga i le Mataupu Faavae ma Feagaiga 18 na tuuina mai ia Iuni 1829, a’o lei leva ona faaee mai e Peteru, Iakopo, ma Ioane le Perisitua Mekisateko i luga o Iosefa Samita ma Oliva Kaotui. O le la asiasiga mai sa faamamafaina ai le taua o le tiute o Aposetolo i le faavae o le Ekalesia a Iesu Keriso. O le Mataupu Faavae ma Feagaiga 18:1-16 ua taulai atu i le valaauga na maua e Oliva Kaotui ma Tavita Uitimera e avea ma auauna a Iesu Keriso ma talai atu le salamo i isi. O leMataupu Faavae ma Feagaiga 18:17–47 o loo aoao mai ai le taua o le tauaveina i o tatou luga o le suafa o Iesu Keriso. Na ta‘ua mai ai foi e le Alii le valaauga i le lumanai o le au Aposetolo e Toasefululua ma le naunautai o le a ia te i latou e tauave i o latou luga le suafa o le Faaola “ma le faamoemoe atoa o le loto” (MF&F 18:27). Na tuuina mai e le Alii ia Oliva Kaotui ma Tavita Uitimera le matafaioi tulaga ese o le “saili mai le Toasefululua” (MF&F 18:37).
Mataupu Faavae ma Feagaiga 18:1–5
Ua aoao mai e le Alii le ala e fausia ai Lana Ekalesia
Pe ua e oo i le faalavelave ma faatamaiaga o se mafuie? I le aso 17 o Oketopa, 1989, i le 5:04 i le afiafi, na taia ai le eria o le Iunaite Setete o San Francisco, Kalefonia, i se mafuie malosi (o lona malosi e 6.9 i le fua mafuie). E faitau afe fale na faaleagaina pe na faatamaiaina. O nisi o fale sa foliga mai na lelei mai fafo, ae na ta’uleaogaina e taitai ona o faavae sa ta’eta’ei pe na le mausali. O a ni popolega o le a ia te oe i le nofo ai i se fale e le mausali se faavae?
E pei ona tusia i le mataupu Faavae ma Feagaiga 18, na faaali mai e le Alii ia Iosefa Samita ma Oliva Kaotui le auala e fausia ai Lana Ekalesia i luga o se faavae mausali. I le amataga o lenei faaaliga, na faatatau atu ai le Alii i mea na tusia e Oliva Kaotui, o lona uiga o upu o le Tusi a Mamona lea na faamaumauina e Oliva a’o avea ma se tusiupu mo le Perofeta o Iosefa Samita.
Faitau le Mataupu Faavae ma Feagaiga 18:2-5, ma faailoa mai mea sa tusia i le Tusi a Mamona lea na poloaiina e le Alii Ana auauna e atia’e ai luga le Ekalesia.
Mai faatonuga a le Alii ua tatou iloa ai se elemene tutotonu o le Ekalesia moni a le Alii. Faatumu le mataupu faavae lenei e faavae i le faaaliga ua tuuina mai i nei fuaiupu: O le Ekalesia ua fausia i luga .
Na aoao mai e le Perofeta o Iosefa Samita le faamatalaga lenei e uiga i le faavae ma le papa:
“O Keriso o le ao o le Ekalesia, o le maa tulimanu autu, o le papa faaleagaga lea na fausia ai le Ekalesia, ma o le a lē manumalo ai faitotoa o seoli [tagai i le Mataio 16:18; Efeso 2:20]. Sa ia fausia le Malo, filifilia Aposetolo ma faauuina i latou i le Perisitua Mekisateko, ua tuuina atu ai ia i latou le mana [ki o le perisitua] e taitai ai sauniga o le Talalelei” (Aoaoga a Peresitene o le Ekalesia: Iosefa Samita [2007], 147).
“O Iesu i Ana aoaoga sa fetalai mai, ‘Ou te atia’e foi lau Ekalesia i luga o lenei papa, e le mafaia foi e faitotoa o seoli ona manumalo i ai.’ [Mataio 16:18.] O le a le papa? O faaaliga” (Aoaoga: Iosefa Samita,207).
Na tuuina mai e le Alii se folafolaga patino i Ana auauna pe afai latou te atia’e Lana Ekalesia i luga o le faavae mautu o Lana talalelei. Faitau le Mataupu Faavae ma Feagaiga 18:5, ma faailoa mai le folafolaga a le Alii.
Mataupu Faavae ma Feagaiga 18:6-16
Ua valaauina Oliva Kaotui ma Tavita Uitimera e talai atu le salamo
E faapefea ona e faamatalaina le faaleagaga ma le tulaga lelei o le lalolagi o loo tatou ola ai i le taimi nei? Faitau le Mataupu Faavae ma Feagaiga 18:6, ma matau le ala na faamatalaina ai e le Alii le lalolagi. Faailoa mai le vaifofo a le Alii i le amioletonu faateteleina i le lalolagi, o loo tusia i le Mataupu Faavae ma Feagaiga 18:9.
Mafaufau i se mea i totonu o lou fale e te manatu e taua tele. E te iloa pe fia tonu se tau faaletupe o lena aitema? O se tasi o auala e iloa ai le tau o se mea faitino, o le sueina lea pe fia se tau o loo manao se tagata e totogi mo lea mea. Atonu e faapea mai se tagata, o lena mea faitino faapitoa e tusa ma se aofai faapitoa o se tupe, ae e pau le taimi e sa’o ai lena tau, pe afai lea e naunau le isi tagata e totogi lena aofaiga mo le mea faitino.
O le a le taua o se agaga? O leMataupu Faavae ma Feagaiga 18:10 o loo aoao mai ai le taua o se tagata i le silafaga a le Atua. Faitau le fuaiupu lenei, ma vaavaai pe o le a lo tatou taua lea na folafola mai e le Alii:
-
I lau api talaaga mo le suesueina o tusitusiga paia, tusi ai pe aisea e te manatu ai, ua taua naua tele oe i le Tama Faalelagi ma Iesu Keriso.
Na faamalamalama mai e Peresitene Dieter F. Uchtdorf o le Au Peresitene Sili, lo tatou taua i lo tatou Tama Faalelagi: “E silasila mai le Atua ia te oe e le gata o se tagata soifua i luga o se paneta itiiti, ma o le e ola mo se taimi itiiti—E silasila mai o Ia ia te oe o Lona atalii/afafine. E silasila mai o Ia ia te oe o le tagata e gafatia ma faamoemoeina e avea ai oe. E finagalo o Ia ia e iloa e taua oe ia te Ia” (E Taua Oe ia te Ia,” Ensign po o le Liahona, Nov. 2011, 22).
E taua agaga taitasi i le Alii, ma e masani ona faatonuina taitai o le Ekalesia e le Agaga e auauna atu i se tagata faapitoa e toatasi. Mo se faataitaiga, sa mulimuli Peresitene Thomas S. Monson i musumusuga a le Agaga ma suia ai le savali sa ia saunia ina ia mafai ona talanoa atu ai i se tasi o teineitiiti i le taimi o se konafesi aoao:
“I le poletito i lo‘u itu agavale o loo o’u iloa atu ai se teineitiiti lalelei pe a ma le sefulu ona tausaga. Le pele laitiiti e, ou te le iloa lou igoa po o fea foi e te sau ai. E ui o lea, o le mea lenei ua ou iloa, o le mama o lau ataata ma le agavaivai o ou foliga ua faatauanauina ai a’u e taatia ese mo se taimi i le lumanai le savali na ou saunia mo lenei sauniga. O le aso nei, ua musuia a’u e talanoa atu ia te oe.”
Ona faasoa mai lea e Peresitene Monson se aafiaga na faamalosia ai lona malamalama i le maoae o le alofa o Iesu Keriso mo tamaiti. Sa ia saunoa e uiga ia Christal Methvin e 10 ona tausaga, o lē, faatasi ai ma lona aiga, sa nonofo i le Siteki a Shreveport Louisiana. Sa maua Christal i le kanesa, lea sa sosolo atu i ona mama. “Sa le’i faanoanoa le au aiga o Methvin, ae sa latou fuafuaina se malaga e felelei atu ai i le Aai o Sate Leki. Ia mafai e Christal ona maua se faamanuiaga mai se tasi o le au Pulega Aoao. Sa leai se isi o le Usoga na masani lelei i ai le au Methvins, o lea sa faataatia ai i luma o Christal se ata o le Au Pulega Aoao uma, ma faia ai loa se filifiliga i soo se isi lava. O le faafuasei lava, na filifilia ai lo’u igoa.
“Sa le’i oo ona malaga mai Christal i le Aai o Sate Leki. Sa tulaga faaletonu lona ma’i. Na lata lava ina a oti o ia. Ae sa le‘i faavaivai ai lona faatuatua. Sa ia faapea atu i ona matua, ‘Pe ua lata mai ea le konafesi a le siteki? Pe le’i tofia ai ea se Pulega Aoao? Ae aisea foi e le o Tuagane Monson ai? Afai e le mafai ona ou alu atu ia te ia, e mafai ona auina mai o ia e le Alii ia te a’u.’
“O le taimi lea i le Aai o Sate Leki, ma le leai o se iloa o mea o loo tutupu i Shreveport, sa tulai mai ai se tulaga sa sili ona le masani ai. Mo le faaiuga o le vaiaso o le Konafesi a le Siteki o Shreveport Louisiana, sa tofia ai a’u ou te alu i El Paso, Texas. Sa aami mai a’u e Peresitene Ezra Taft Benson i lona ofisa ma faamatala mai, sa faia e se tasi o le Usoga ni galuega sauniuni e faatatau i le vavaeina o le siteki i El Paso. Sa ia fesili mai pe afaina pe a tofia se isi i El Paso ae tofia a’u i se isi mea. Ioe sa leai se faafitauli i lena mea— soo se mea lava o le a lelei ia te au. Ona fai mai lea o Peresitene Benson, ‘Uso Monson, ua uunaia au e te alu e asiasi i le Siteki a Shreveport Louisiana.’ Sa [ou] talia le tofiga. Na oo mai le aso. Sa ou taunuu atu i Shreveport.
“O lena aoauli o le Aso Toonai sa tele ai ni fonotaga. ,,, Sa tau faamalie mai, le Peresitene o le Siteki o Charles F. Cagle ma fesili mai pe mata e gafatia ma a’u fuafuaga atofaina se taimi e tuuina atu ai se faamanuiaga i se teineitiiti e 10 tausaga o loo mafatia i le kanesa. O lona igoa: o Christal Methvin. Sa ou tali atu, afai e mafai, o le a ou faia o lea, ona ou fesili atu lea pe mata o le a i ai o ia i le konafesi, po o i ai o ia i se falemai i Shreveport? O le iloaina sa fai si pisi o fuafuaga atofaina, na toetoe ai a musumusu mai Peresitene Cagle, o Christal o loo i lona fale ua le mafai ona toe fealuai—e sili atu ma le valusefulu maila mai Shreveport!
“Sa ou iloiloina fonotaga atofaina mo lena afiafi ma le taeao na sosoo ai—na oo lava i le taimi o la’u malaga toe foi. Sa matuai leai lava ma se taimi avanoa. Ona oo mai lea o se isi fautuaga i lou mafaufau. Pe le mafai ona tatou manatua lenei teineitiiti i a tatou tatalo lautele i le konafesi? E mautinoa lava o le a malamalama le Alii. O lenei la manatu, sa matou faaauauina ai fonotaga atofaina.
“Ina ua oo atu le tala i le auaiga o Methvin, sa i ai lagona malamalama ae sa i ai foi ma sina faanoanoa laitiiti. Pe na le’i faafofogaina ea e le Alii a latou tatalo? Pe na te le’i saunia ea ia oo mai Uso Monson i Shreveport? Ma sa toe tatalo foi le aiga, ma talosagaina sina fesoasoani mulimuli lava—ina ia faataunuu le manao o si a latou pele o Christal.
“O le taimi tonu a’o tootutuli le aiga o Methvin i le tatalo, na iloa ai i le uati i le fale autu o le siteki le taimi e 7:45. Sa musuia le fonotaga a taitai perisitua. Sa ou faavasegaina a’u faamatalaga tusitusia, e sauni ai e laa atu i le pulelaa, ae ou faalogoina loa se leo o tulei mai i lo’u agaga. Sa puupuu le savali, o upu masani lava: ‘Ina tuu mai ia o tama iti e o mai ia te au, aua le vavao ia te i latou: aua e faapei o i latou nei o e o i le malo o le Atua.’ (Mareko 10:14.) Sa oo ina nenefu a’u faamatalaga tusitusia. Sa liliu atu o‘u mafaufauga i se teineitiiti laitiiti o loo manaomia se faamanuiaga. Sa faia le faaiuga. Sa suia le fonotaga na atofaina. Aua foi, e sili atu le taua o tagata nai lo o fonotaga. …
“O le a ou manatua pea ma o le a le galo lava lena faigamalaga i le taeao po i se lagi ua ta’ua e le auaiga o Methvin o le aiga. …
“Sa siomia e le aiga le moega o Christal. Sa ou vaavaai atu i se teineitiiti sa vaivai tele e nofo mai i luga—na toetoe a le mafai ona tautala. O lona ma’i ua le mafai ai nei ona pupula. Sa matua malosi le agaga o lea na ou faapau ifo ai i o’u tulivae, uu mai lona lima vaivai, ma faapea atu, ‘Christal, o lea ua ou iinei.’ Sa matala ona laugutu ma musumusu mai, ‘Tuagane Monson, sa ou iloa lava e te sau.’ Sa ou tilotilo solo i le potu. Na leai se tasi na tu. Sa taufai tootutuli tagata uma. Na tuuina atu se faamanuiaga. Sa vaaia si ataata i foliga o Christal. O lana musumusu ‘faafetai’ na tuuina mai ai se faaiuga talafeagai. …
“O le fa o aso mulimuli ane, i le Aso Tofi, a’o tuu faatasi e tagata o le Ekalesia i Shreveport o latou faatuatua ma le auaiga o Methvin ma manatua ai le igoa o Christal i se talosaga faapitoa i se Tama Faalelagi agalelei ma alofa, sa faapea ona tuua ai e le agaga mama o Christal Methvin lona tino na faatamaia e faama’i ae ulufale atu i le parataiso a le Atua. …
“Ia te oe, la‘u uo laitiiti i le poletito pito i luga, ma i tagata faatuatua uma i soo se mea, ou te molimau atu e alofa Iesu le Nasareta i tamaiti laiti, e faafofoga mai i a outou tatalo ma tali mai i ai” (“O Le Faatuatua o se Tamaitiiti,” Ensign, Nov. 1975, 20–22).
Faitau le Mataupu Faavae ma Feagaiga 18:11–12, ma vaavaai mo le tau na totogi e lo tatou Faaola o Iesu Keriso, e togiola ai i tatou. (O loo faasino le fuaitau “tagata uma” i tagata uma—i alii, tamaitai, ma tamaiti uma.) (O leMataupu Faavae ma Feagaiga 18:10–11 o se mau tauloto. Atonu e te manao e faailoga i se auala e iloagofie ai ina ia faigofie ai ona e maua.)
Ona e taua tele le aoga o agaga taitasi, o le a sou manatu, o a ni lagona o le Tama Faalelagi ma Iesu Keriso pe afai e salamo se tasi ma talia le taulaga a le Faaola? Faitau le Mataupu Faavae ma Feagaiga 18:13, ma faailoa mai le tali a le Alii. Mafaufau loloto pe aisea e te manatu ai, tatou te aumaia le olioli tele i le Alii pe a tatou salamo.
Mai le Mataupu Faavae ma Feagaiga 18:14 tatou te aoao ai, na valaauina e le Alii ia Oliva Kaotui ma Tavita Uitimera e “alaga atu le salamo i lenei nuu.” O le faamalamalama mai e Elder Neil L. Andersen o le Korama a Aposetolo e Toasefululua: “O le alagaina o le salamo o lona uiga o le fesoasoani i tagata e toe foi atu i le Atua” (“Sauniuni mo Lou Taunuuga Faaleagaga” [Ian. 10, 2010], 7, speeches.byu.edu).
-
Faitau le Mataupu Faavae ma Feagaiga 18:15-16, ma vaavaai po o a aafiaga sa oo i tagata taitoatasi ina ua latou fesoasoani i se tasi e sau ia Iesu Keriso. (O leMataupu Faavae ma Feagaiga 18:15-16 o se mau tauloto. (Atonu e te manao e faailoga lenei fuaitau i se ala e iloagofie ai ina ia fesoasoani ia te oe ia faigofie ai ona maua.) E tusa ai ma le folafolaga a le Alii i nei fuaiupu, faauma le mataupu faavae lenei: Afai tatou te fesoasoani i isi ina ia salamo ma o mai i le Alii, o lo tatou olioli .
-
Mau Tauloto—Mataupu Faavae ma Feagaiga 18:10–11
Tusi upu o le Mataupu Faavae ma Feagaiga 18:10–11 i luga o se kata po o se fasi pepa laitiiti. Alu ma feaveai lenei pepa, ma ia tagai i ai mai lea taimi i lea taimi o le aso atoa, ina ia fesoasoani e te manatua ai lou taua ma le taua o isi i le silafaga a le Atua.
-
-
E mafai faapefea e le iloaina o lenei upumoni ona aafia ai lau vaaiga ia te oe lava?
-
E mafai faapefea e le manatuaina o le tau na totogi e Iesu Keriso mo agaga o isi ona aafia ai le ala e te taulimaina ai i latou?
-
Mau Tauloto—Mataupu Faavae ma Feagaiga 18:15-16
Fai atu i se tagata o le aiga po o se uo e fesoasoani ia te oe e tauloto le Mataupu Faavae ma Feagaiga 18:15-16. Tuu atu i le tasi tagata e amata i le laina muamua o le mau tauloto, e pei ona faaalia i lalo. Ona taumafai lea o le isi tagata e toe tauloto le laina muamua ma faaopoopo atu i ai le laina o loo sosoo ai. Toe fai lenei faagasologa, feauauai mai lea tagata i le isi tagata, e tauloto muamua laina na muamua atu ma faaopoopo atu i ai se laina o le fuaitau seia oo ina uma. Atonu e te manao e toe fai le faagasologa seia oo ina tauloto le fuaitau mo ni nai taimi.
“Ma afai e faapea lua te galulue i aso uma”
“i le alagaina o le salamo i lenei nuu,”
“ma aumai, nao se agaga e toatasi ia te aʼu,”
“e matua tele lava lo oulua olioli faatasi ma ia”
“i le malo o loʼu Tamā!”
“Ma o lenei, afai o le a tele lo oulua olioli faatasi ma se agaga e toatasi ”
“na oulua aumai ia te aʼu”
“i le malo o loʼu Tamā,”
“e matua tele atu lo oulua olioli”
“pe afai lua te ʼaumai ni agaga e toatele ia te aʼu!”
-
Mataupu Faavae ma Feagaiga 18:17–25
Ua aoao e Iesu Keriso ia Olivai Kaotui ma Tavita Uitimera e uiga i le mana o Lona suafa
Mafaufau i lou faaiu (igoa mulimuli) mo sina taimi. Pe na e mafaufau ea i faamanuiaga ma tiutetauave ua o mai faatasi ma le i ai o lou igoa ma le avea ai ma se tagata o lou aiga? O nisi o nei faamanuiaga atonu e aofia ai le alofa ma le taliaina, o se nofoaga e nofo ai, saogalemu, ma ni tagata e alolofa ia te oe. O ou tiutetauave e ono aofia ai le faia lelei o tagata o le aiga ma le faaaloalo, o le faia o galuega i le fale, ma le aumaia o le tauleleia i le igoa o le aiga.
E tusa lava pe e le o manaia tele lou olaga faaleaiga, ma e manatu e le taua lou faaiu, ae na e tauaveina i ou luga le suafa o Iesu Keriso ina ua e papatiso. Faitau le Mataupu Faavae ma Feagaiga 18:17–25, ma faailoa mai faamanuiaga ma tiutetauave ia e oo mai ma le tauaveina i ou lava luga o Lona suafa. Tusi au tali i le siata lenei:
|
Faamanuiaga |
Tiutetauave |
|---|---|
E tusa ai ma le Mataupu Faavae ma Feagaiga 18:23, aisea e taua mo i tatou ona tauave i o tatou luga le suafa o Iesu Keriso?
-
Mataupu Faavae ma Feagaiga 18:26–47
Ua faaali mai e le Alii le valaauga ma le misiona a le Au Aposetolo e Toasefululua
I lana uluai konafesi aoao, o se Aposetolo fou faatoa valaauina, na saunoa ai Elder Jeffrey R. Holland:
“E mautinoa lava o lo’u fiafiaga sili ma le mitamitaga sili o manatu uma o le, ua ou maua le avanoa, e pei ona faaupuina e Nifae, e ‘tautalatala e uiga ia Keriso, … olioli ia Keriso, … talai atu Keriso, [ma] vavalo e uiga ia Keriso’ (2 Nifae 25:26) po o fea lava ou te i ai, ma po o ai foi matou te i ai, seia oo ina iu lo’u ola. E mautinoa lava e leai se isi faamoemoega e maualuga atu po o se avanoa e sili atu nai lo o le avea ma se ‘[molimau] faapitoa o le suafa o Keriso i le lalolagi atoa’ (MF&F 107: 23).
“… I tua atu o au upu ma aoaoga ma molimau tautalagia, e ao ona avea lo’u olaga ma se vaega o lena molimau ia Iesu. E tatau ona atagia i lo’u lava tagata le paia o lenei galuega. E matuai le mafai ona ou gafatia pe afai e i ai se mea ou te ono tautala pe faia e ono faaitiitia ai la outou molimau ia Keriso, lo outou alolofa i lenei ekalesia, po o le maualuga o loo outou taulimaina ai le tofi paia faaaposetolo.
“Ou te folafola atu ia te outou—e pei ona ou folafola atu i le Alii ma o’u uso nei—o le a ou taumafai e ola agavaa mo lenei faatuatuaga ma auauna atu i le atoatoa ou te mafaia” (“Miracles of the Restoration,” Ensign, Nov. 1994, 31).
Na ta’u mai e le Alii le valaauga ma le misiona a le Au Aposetolo e Toasefululua i le Mataupu Faavae ma Feagaiga 18:26–32, 37–47.
-
Aisea e sili atu ai ona iloagofie isi leo nai lo o isi? Pe faigata ea ia te oe ona iloa le siufofoga o le Alii ma iloa le taimi e fetalai mai ai o Ia ia te oe?
E mafai ona tatou faalogo i le siufofoga o le Alii e ala mai i Ana auauna. I le Mataupu Faavae ma Feagaiga 18, na faamalamalama mai ai e le Alii se auala faaopoopo e mafai ona tatou faalogo ma masani ai i Lona siufofoga. Faitau le Mataupu Faavae ma Feagaiga 18:34–36, 47, ma vaavaai mo lenei auala taua lea e talanoa mai ai le Alii ia i tatou. I le Mataupu Faavae ma Feagaiga 18:34 o le fuaitau “o nei upu” ua faatatau i faaaliga na tuuina mai e le Alii, ia ua maua nei i le Mataupu Faavae ma Feagaiga. E tusa ai ma nei fuaiupu, o le a sau tala e fai atu i se tasi e fia iloa pe faapefea ona tatou faalogo i le fetalai mai o le Alii ia i tatou?
Tusi le mataupu faavae lenei i au tusitusiga paia po o lau api mo le suesueina o tusitusiga paia: E mafai ona tatou faalogo i le siufofoga o Iesu Keriso a o tatou faitau i tusitusiga paia e ala i le mana o le Agaga.
E mafai ona tatou faalogo i le siufofoga o le Alii i auala e le mafai ona manino i o tatou taliga. E ala i le Agaga Paia e mafai ai ona tatou maua lagona ma savali i o tatou mafaufau ma loto (tagai i le MF&F 8:2-3). Na aoao mai Elder M. Russell Ballard o le Korama a Aposetolo e Toasefululua, “Pe a tatou faitau ma suesue i faaaliga, e mafai e le Agaga ona faamautu mai i o tatou loto le moni o mea o loo tatou aoaoina; o lenei auala, e talanoa mai ai le siufofoga o le Alii ia i tatou taitoatasi” (“Marvelous Are the Revelations of the Lord,” Ensign, May 1998, 32).
Mafaufau i se aafiaga i se taimi na e lagonaina ai le musuia o oe e le Alii a’o e faitau pe mafaufau loloto i tusitusiga paia. Manatunatu loloto i fesili nei:
-
E faapefea e le iloa e mafai ona fesoasoani mai le Agaga Paia ia i tatou ia faalogo i le siufofoga o le Faaola, a’o tatou faitau i Ana afioga, ona aafia ai le ala e te mafaufau ai e uiga i mau?
-
E mafai faapefea ona taitai oe e lena upumoni a’o e filifilia le taimi, nofoaga, po o le siosiomaga e faitau ai au tusitusiga paia?
-
Ua ou suesueina le Mataupu Faavae ma Feagaiga 18 ma faamaeaina lenei lesona i le (aso).
O fesili, mafaufauga, ma manatu faaopoopo ou te fia faasoa atu i lo’u faiaoga: