Mataupu Faavae ma Feagaiga 107:21–38

Faatomuaga

Ia Aperila 1835 sa i ai sui na le’i leva ona faauuina o le Korama a Aposetolo e Toasefululua i Katelani, Ohaio, e sauni e o ese atu i le latou misiona muamua a le korama. A o lei o ese atu i latou, sa faasoa atu ia i latou e le Perofeta o Iosefa Samita nisi o faaaliga na ia maua ia ua i ai i le Mataupu Faavae ma Feagaiga 107. O le lona lua lenei o lesona e tolu e talanoaina ai le vaega lenei. I le vaega lenei o le faaaliga, sa faataoto mai ai e le Alii tiute o korama pulefaamalumalu o le Ekalesia: o le Au Peresitene Sili, o le Korama a Aposetolo e Toasefululua, ma le Fitugafulu.

Mataupu Faavae ma Feagaiga 107:21-26

Ua faataoto mai e le Alii ia tiute ma le pule o korama pulefaamalumalu o le Ekalesia

Mafaufau i se taimi na fesoasoani, lagolagoina, puipuia, pe faamalosiauina ai oe e se tasi. O le a se eseesega sa faia ai i le i ai o se tasi e fesoasoani ia te oe i lenei auala?

I tusitusiga paia, o le lagolago i se tasi o lona uiga o le tatou fesoasoani, lagolago, puipui, po o le faamalosiau i lena tagata. Faitau le Mataupu Faavae ma Feagaiga 107:21–22, ma vaavaai po o ai na fetalai mai le Alii e tatau ona lagolago e tagata o le Ekalesia.

E tusa ai ma le fuaiupu e 22, e faapefea ona tatou lagolago i le Au Peresitene Sili? Tali le fesili e ala i le faaumaina o le faamatalaga lenei: E lagolagoina le Au Peresitene Sili e ala i le , ma le o le Ekalesia. Atonu e te manao e faailoga upu po o fuaitau o loo aoao mai ai lenei upumoni. (Ia matau, i le fuaiupu e 22, o le fuaitau “filifili e le tino potopoto” e le faapea e filifili e tagata o le Ekalesia i latou e auauna i le Au Peresitene Sili. E faatatau i le naunau o tagata o le Ekalesia e lagolago na taitai.)

Tali fesili nei i lau api talaaga mo le suesueina o tusitusiga paia:
1. O le a sou manatu i le uiga o le lagolago le Au Peresitene Sili e ala i lo tatou talitonuga, faatuatua, ma tatalo?
2. Mai ou aafiaga, e faapefea ona faamanuiaina i tatou a o tatou fesoasoani ma lagolago i le Au Peresitene Sili?
3. O le a se mea ua e aoaoina mai le Mataupu Faavae ma Feagaiga 107:21–22 e uiga i le Au Peresitene Sili?

A o e faitau i le faamatalaga lenei mai ia Peresitene Henry B. Eyring o le Au Peresitene Sili, vase lalo o le mea sa ia fai mai e mafai ona tatou faia e fesoasoani ai, pe lagolago, i o tatou taitai o le Ekalesia:

“Mo i tatou e lagolagoina i latou o e ua valaauina … , e tatau ona tatou iloiloina o tatou olaga, salamo pe a talafeagai ai, ia folafola atu e tausia poloaiga a le Alii, ma mulimuli i Ana auauna. …

“… Atonu o se mea atamai … ona fuafua e lagolagoina ma lo tatou faatuatua ma a tatou tatalo i latou uma o loo tautuaina i tatou i le malo. Ua ou malamalama lelei i le mana o le faatuatua o tagata o le Ekalesia e lagolagoina ai e ua valaauina. … Sa ou lagonaina ai i ni auala mamana ia tatalo ma le faatuatua a tagata o e ou te le iloaina ae latou te iloaina au o se tagata ua valaauina e auauna atu e ala i ki o le perisitua” (“O Le Ekalesia Moni ma le Ola,” Ensign po o le Liahona, Me 2008, 21).

Mafaufau e uiga i mea o loo e faia i le taimi nei e lagolago ai le Au Peresitene Sili ma isi taitai o le Ekalesia. O a ni auala e mafai ona sili atu ona e fesoasoani, lagolago, puipuia, pe faamalosiau ai ia i latou?

Faitau le Mataupu Faavae ma Feagaiga 107:23, ma vaavaai mo le fetalaiga a le Alii e uiga i tiute a le au Aposetolo e Toasefululua. O le a le mea ua valaauina le au Aposetolo e Toasefululua e fai?

Atonu e te manao e faailoga upu po o fuaitau i lau tusitusiga paia o loo aoao mai ai le upumoni lenei: O Aposetolo o molimau faapitoa o le suafa o Iesu Keriso i le lalolagi atoa.

O le a sou manatu i le uiga o le, o Aposetolo o molimau faapitoa o le suafa o Iesu Keriso?

Suesue i le Taiala i Tusitusiga Paia po o le Bible Dictionary mo mea o loo ta’u mai ai e uiga i le upu ma le faalagiga Aposetolo.

O le Peresitene o le Ekalesia o le Aposetolo sinia i luga o le lalolagi, ma o fesoasoani i le Au Peresitene Sili o ni Aposetolo foi. O le mea lea, o sui o le Au Peresitene Sili o ni molimau faapitoa foi o le suafa o Iesu Keriso.

Na aoao mai e Elder David A. Bednar o le Korama a Aposetolo e Toasefululua, le uiga o le avea ma se molimau faapitoa o le suafa o Keriso: “O le matafaioi a se Aposetolo i aso nei e tutusa lava ma le mea sa i ai i aso anamua (tagai i le Galuega 1:22; 4:33). O lo tatou tiute o le o atu i le lalolagi atoa ma folafola atu ‘Iesu Keriso, ma na faasatauroina o ia’ (tagai i le Mareko 16:15; 1 Korinito 2:2). O se Aposetolo o se faifeautalai ma se molimau faapitoa i le suafa o Keriso. O le ‘suafa o Keriso’ e faatatau i le atoatoaga o le misiona, maliu, ma le toetu o le Faaola—o Lana pule, Ana aoaoga faavae, ma Ona tomai tulaga ese o le Alo o le Atua e avea ma lo tatou Togiola ma lo tatou Faaola. I le avea ai o ni molimau faapitoa o le suafa o Keriso, matou te molimau atu i le moni, paia, ma le toetu o Iesu Keriso, o Lana Togiola e le i‘u ma faavavau, ma Lana talalelei” (“Special Witnesses of the Name of Christ,” The Religious Educator: Perspectives on the Restored Gospel, vol. 12, no. 2 [2011], 1).

I lau api talaaga mo le suesueina o tusitusiga paia, tusi ai pe o a ni ou lagona ma o a ni mea na e aoaoina a’o e faalogologo atu pe faitau i molimau, po o tautinoga, a le au Aposetolo. (Atonu e fesoasoani le toe faamanatu o ni lauga a le au Aposetolo i konafesi aoao ua mavae o loo i mekasini a le Ekalesia.)

Faitau le Mataupu Faavae ma Feagaiga 107:24, ma vaavaai mo le fetalaiga a le Alii e uiga i le pule ma le mana o le Korama a Aposetolo e Toasefululua.

Pe a avea ni tamalii ma ni Aposetolo faauuina, ua tuuina atu ia i latou ia ki lava e tasi o le perisitua e pei o le Peresitene o le Ekalesia. Ae peitai, o le Peresitene o le Ekalesia, i le avea ai ma faitaulaga sili pulefaamalumalu i le Perisitua Mekisateko, ua na o le pau lea o le tagata i le lalolagi o le ua faatagaina e faaaogaina ki uma o le perisitua. O isi Aposetolo e faaaogaina nei ki pe a faatagaina ai e le Peresitene o le Ekalesia. Pe a maliu se Peresitene o le Ekalesia, e soloia le Au Peresitene Sili ma avea ai le Korama a le Toasefululua, lea e tutusa i le pule ma le mana ma le Au Peresitene Sili, ma tino pulefaamalumalu o le Ekalesia. I le avea ai ma Peresitene o le Korama a le Toasefululua, o le Aosetolo sinia o loo soifua e faatagaina e faaaogaina uma ki o le perisitua.

Na aoao mai Elder David B. Haight o le Korama a Aposetolo e Toasefululua:

“Pe a maliu se tasi Peresitene o le Ekalesia, e faapefea la ona filifilia se Peresitene fou?

“O le tausaga e 1835 na tuuina mai ai e le Alii se faaaliga e uiga i lenei mataupu, e faatulaga lelei ai le faasologa i le tofi. Ua faapea mai lea faaaliga, o le Korama a Aposetolo e Toasefululua o se tino e tutusa i le pule ma le mana ma le Au Peresitene Sili. (Tagai i le MF&F 107:24.) O lona uiga la, a maliu le peresitene o le Ekalesia ona soloia loa lea o le Au Peresitene Sili, a e avea le Korama a le Toasefululua ma tino pulefaamalumalu o le Ekalesia. Na faavaeina lena faatulagaga ina ua maliu le uluai Peresitene o le Ekalesia, o Iosefa Samita. …

“O lenei auala faalelagi na faaalia mai e faatagaina ai se Au Peresitene Sili fou o le Ekalesia—o le faaaliga mai le Alii ma le lagolagoina e tagata—o loo mulimuli pea i ai e oo mai i o tatou nei ona po. E ao ona ‘lagolagoina i le faalagolago, faatuatua, ma le tatalo a le Ekalesia.’ (MF&F 107:22.)” (“O Se Perofeta Filifilia a le Alii,” Ensign, Me 1986, 6-7).

E le gata i le faamalamalamaina o tiute o le Au Peresitene Sili ma le Korama a Aposetolo e Toasefululua, na faaali mai foi e le Alii tiute o Fitugafulu. Faitau le Mataupu Faavae ma Feagaiga 107:25, ma vaavaai mo le fetalaiga a le Alii e uiga i o latou tiute.

Atonu e te manao e faailoga upu po o fuaitau i le fuaiupu e 25 o loo aoao mai ai le upumoni lenei: O Fitugafulu ua valaauina e talai atu le talalelei ma avea ma molimau a Iesu Keriso i le lalolagi atoa.

Faitau le Mataupu Faavae ma Feagaiga 107:26, ma vaavaai mo le fetalaiga a le Alii e uiga i le pule o le korama a Fitugafulu.

Na aoao mai Elder Earl C. Tingey o le Au Peresitene o Fitugafulu e uiga i le pule o le Au Fitugafulu: “E le maua e le Au Fitugafulu ni ki faaopoopo o le perisitua, ae faatasi ma tofiga taitasi latou te maua mai le Au Peresitene Sili po o le Korama a Aposetolo e Toasefululua, e faasafua atu ai ia i latou le pule e faataunuu ai tofiga ua tuuina atu” (“O Le Korama a le Au Fitugafulu,” Ensign, Ako. 2005, 48–49).

O faamatalaga nei e mafai ona fesoasoani e te malamalama ai i le sootaga i le va o le Au Peresitene Sili, o le Korama a Aposetolo e Toasefululua, ma le au Fitugafulu:

“O Iesu Keriso o loo umia ki uma o le perisitua e faatatau i Lana Ekalesia. Na Ia faaee atu i luga o Ana Aposetolo taitasi ki uma e faatatau i le malo o le Atua i le fogaeleele. O le Aposetolo sinia o loo soifua, o le Peresitene o le Ekalesia, ua na o le pau lea o le tagata i luga o le fogaeleele ua faatagaina e faaaogaina ki uma o le perisitua. …

“E galulue Fitugafulu e ala i tofiga ma le faamatuu mai o le pule mai le Au Peresitene Sili ma le Korama a Aposetolo e Toasefululua. … E vaetofia le Au Peresitene o Fitugafulu ma tuuina atu i ai ki e pulefaamalumalu ai i Korama a Fitugafulu” (Tusitaulima 2: Taitaiina o le Ekalesia [2010], 2.1.1).

E ui lava na fetalai mai le Alii o le Au Peresitene Sili, o le Korama a Aposetolo e Toasefululua, ma le Au Fitugafulu e “tutusa i le pule” (MF&F 107:24, 26), ae o le Au Peresitene Sili e pulefaamalumalu i isi. O le Korama a le Au Peresitene Sili e aofia ai le Peresitene o le Ekalesia ma e masani lava ma ni fesoasoani e toalua. O fesoasoani e masani lava, ae e le o taimi uma, e filifilia mai ai mai le Korama a Aposetolo e Toasefululua. O nei “Faitaulaga Sili Pulefaamalumalu e toatolu … ua avea o se korama o le Au Peresitene o le Ekalesia” (MF&F 107:22). E faalagolago i o latou luga le tiutetauave o le taitaiina o le malo o le Atua i le fogaeleele (tagai i le MF&F 90:12–16). Na faamamafa mai e le Alii le taua o le Au Peresitene Sili ina ua Ia fetalai, “Soo se tasi e talia laʼu upu ua talia aʼu, ma o soo se tasi e talia aʼu, ua talia e ia i latou na, o le Au Peresitene Sili, o e ua Ou auina atu, o e ua Ou faia o fautua ia te outou, mo loʼu igoa” (MF&F 112:20).

E pei ona faamatala atu i le amataga o le lesona lenei, o le Korama a Aposetolo e Toasefululua e avea ma korama pulefaamalumalu i le Ekalesia pe afai lena ua maliu se Peresitene o le Ekalesia. Pe a ua vaetofia se Peresitene fou o le Ekalesia ma ona fesoasoani, ona toe amata foi lea ona avea le Au Peresitene Sili ma korama pulefaamalumalu.

I lana saunoaga e uiga i le Au Peresitene Sili, na folafola mai ai e Peresitene Boyd K. Packer o le Korama a Aposetolo e Toasefululua e faapea: “Faafetai lava i le Atua mo le au peresitene. E pei lava foi o na [tumutumu mauga e tolu], e tutu ai iina e aunoa ma se mea e tasi i o latou luga ae ua na o le lagi lava. Latou te manaomia la tatou palota lagolago. O nisi taimi e lagona ai le tuua toatasi i na valaauga fita o le tulaga taitai—aua o lo latou valaauga e le o le faamalieina o le tagata a ia faamalieina ai le Alii. Ia faamanuia e le Atua nei tamalii maoae ma lelei e toatolu” (“E Molimau Atu Ai le Agaga,” Ensign, Iune 1971, 87).

Mataupu Faavae ma Feagaiga 107:27-32

Na faamalamalama mai e le Faaola le ala e tatau ona faia ai e nei korama pulefaamalumalu o le Ekalesia ia faaiuga

Mafaufau i se taimi na tatau ai ona e faia se faaiuga i le avea ai o se tasi o se vaega. Na faapei lau aafiaga?

E faapefea ona masani ona faia e ni vaega o tagata ni faaiuga? O le a sou manatu i le faatusatusaga o nei faagasologa o le faiga o faaiuga, ma le auala e fai ai e le Au Peresitene Sili, le Korama a Aposetolo e Toasefululua, ma le Au Fitugafulu ia faaiuga?

Faitau le Mataupu Faavae ma Feagaiga 107:27–32, ma vaavaai mo le mea na aoao mai e le Alii e uiga i le auala e tatau ona faia ai e korama pulefaamalumalu o le Ekalesia ia faaiuga. Atonu e te manao e faailoga fuaitau o loo fesoasoani ia te oe e malamalama pe faapefea ona faia e nei korama ia faaiuga.

E tusa ai ma nei fuaiupu, e faapefea ona fai faaiuga a korama pulefaamalumalu?

Atonu e te manao e tusi le faamatalaga faale-aoaoga faavae lenei i au tusitusiga paia i autafa o fuaiupu nei: O faaiuga a korama pulefaamalumalu o le Ekalesia e faia i le lotogatasi ma le amiotonu.

Tali fesili nei i lau api talaaga mo le suesueina o tusitusiga paia:
1. E mafai faapefea e le iloa ua folafola mai e le Alii e faamanuia le Au Peresitene Sili, le Korama a Aposetolo e Toasefululua ma le au Fitugafulu i Lona malamalama, ona fesoasoani e te lagolagoina ai nei taitai i le talitonuga, faatuatua, ma le tatalo ma mulimuli i a latou fautuaga?
2. O a uiga auau mama ua lisiina i le Mataupu Faavae ma Feagaiga 107:30 e taua ona i ai i nei Uso ina ia mafai ona maua ni faaiuga autasi?
3. E tusa ai ma le fuaiupu e 31, o le a le mea na folafola mai e le Alii i korama pulefaamalumalu o le Ekalesia a o latou faia ni faaiuga i le lotogatasi ma le amiotonu?

Mataupu Faavae ma Feagaiga 107:33-38

Ua tuuina mai e le Alii se taitaiga faaopoopo i korama pulefaamalumalu o le Ekalesia

Faitau le Mataupu Faavae ma Feagaiga 107:33–35, ma vaavaai mo upumoni nei:

E galulue le Au Aposetolo e Toasefululua i le suafa o le Alii ma i lalo o le taitaiga a le Au Peresitene Sili i le atinaeina o le Ekalesia.
E galulue le au Fitugafulu i le suafa o le Alii, i lalo o le taitaiga a Aposetolo e Toasefululua.
O le Au Aposetolo e Toasefululua e umia ki o le folafolaina atu o le talalelei a Iesu Keriso.

Tusi i lau api talaaga mo le suesueina o tusitusiga paia, nisi o mea faapitoa o le a e faia e lagolago (fesoasoani, lagolago, puipui, ma faamalosiau) ai i auauna filifilia a le Alii ma mulimuli lelei ai i a latou fautuaga.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mataupu Faavae ma Feagaiga 107:21–38 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: