Mataupu Faavae ma Feagaiga 137

Faatomuaga

I le aso 21 o Ianuari, 1836, sa fono ai le Perofeta o Iosefa Samita ma ona fesoasoani i le Au Peresitene Sili ma lona tama, o Iosefa Samita le Matua, i se afeafe pito i luga o le Malumalu o Katelani lea sa toeitiiti lava faamaeaina. I lenei tulaga, na vaai ai le Perofeta i se faaaliga vaaia i le malo selesitila ma faalogoina o tautino mai e le Alii le ala o le a Ia faamasinoina ai i latou o e e maliliu e aunoa ma se malamalama o le talalelei. O Warren Parrish o le sa fai ma tusiupu a Iosefa Samita i lena taimi, sa faamaumauina le faaaliga vaaia i le api talaaga a le Perofeta. O le faamaumauga o le faaaliga vaaia na faaaofia mulimuli ane i le Mataupu Faavae ma Feagaiga o le vaega e 137.

Mataupu Faavae ma Feagaiga 137:1–6

Ua maua e Iosefa Samita se faaaliga vaaia i le malo selesitila

Mafaufau i nisi o tagata e sili ona taua i lou olaga. Aisea e sili ai ona taua i latou ia te oe?

I lau api talaaga mo le suesueina o tusitusiga paia, tusi ai pe aisea e taua ai ia te oe ona iloa o tagata e te alofa i ai, o le a maua le avanoa e nonofo ai i le malo selesitila, pe a latou maliliu.

O leMataupu Faavae ma Feagaiga 137 o loo i ai le faamatalaga a le Perofeta o Iosefa Samita o se faaaliga vaaia lea na ia vaai ai i le malo selesitila.

Faitau le Mataupu Faavae ma Feagaiga 137:1–4, ma vaavaai mo upu ma fuaitau o loo faamatala ai le malo selesitila. Taumafai e vaai faalemafaufau pe o le a faapei le i ai i le malo selesitila.

Sa olioli Iosefa Samita i le vaaia o nisi o tagata o lona aiga i le malo selesitila. Faitau le Mataupu Faavae ma Feagaiga 137:3, 5-6, ma faailoa mai po o ai na vaai i ai Iosefa Samita i le malo selesitila.

Sa soifua lava matua o Iosefa i le taimi lea, ma sa i ai foi lona tama faatasi ma ia i totonu o le potu i le taimi o lenei faaaliga vaaia. E faailoa mai i lenei mea, o lenei faaaliga sa le mo i latou o e sa i ai i le taimi lea i le malo selesitila, ae o i latou foi o e o le a iu ina i ai iina.

Tali fesili nei i lau api talaaga mo le suesueina o tusitusiga paia:
1. E tusa ai ma le Mataupu Faavae ma Feagaiga 137:6, aisea na maofa (ofo) ai Iosefa Samita ina ua ia vaai i lona uso o Alevini i le malo selesitila?
2. O a nisi lagona e te manatu atonu na oo ia Iosefa ina ua ia vaaia Alevini i le malo selesitila?

maa o le tuugamau a Alevini Samita — O Alevini Samita, o le uso o le Perofeta, na maliu i le aso 19 o Novema, 1823, a o lei faavaeina le Ekalesia.

Sa alofaina ma faamemelo le Perofeta o Iosefa Samita i lona uso matua o Alevini. Sa alofa foi Alevini ia Iosefa, ma sa ia lagolagoina Iosefa i ana sauniuniga e maua papatusi auro mai le agelu o Moronae. Ia Novema 1823, a’o 25 tausaga o le matua o Alevini, ae 17 tausaga o Iosefa, sa faafuasei lava ona ma’i tigaina ai Alevini. A’o faateteleina le faaletonu o lona tulaga, ma sa foliga mai o le a le toe umi ae maliu o ia, sa ia fautuaina ai Iosefa: “Ou te manao ia te oe ia e tama lelei ma fai mea uma lava i lou mana ina ia maua tala faamaumau. Ia e faamaoni i le mauaina o faatonuga ma le tausiga o poloaiga uma e tuuina atu ia te oe” (sii mai i le Aoaoga a Peresitene o le Ekalesia: Iosefa Samita [2007], 429).

O le maliu o Alevini na aumaia ai le faavauvau tele i le aiga o Samita. “Na talosagaina e le aiga se faifeau Peresipeteriane i Palamaira, Niu Ioka, na te taitaia lona falelauasiga. Talu ai o Alevini sa lei avea ma se tasi o le aulotu a le faifeau, na tau mai ai e le faifeau i lana lauga o Alevini e le mafai ona faaolaina. Na manatuaina e Viliamu Samita, le uso laitiiti o Iosefa: “Na matua ta’u mai ma le malosi e [le faifeau] … o [Alevini] ua alu i seoli, aua o Alevini e le o se tagata o se ekalesia, ae o ia o se tama lelei ma sa le i fiafia i ai lo’u tama’” (Aoaoga: Iosefa Samita, 429, 431).

Mataupu Faavae ma Feagaiga 137:7-10

Ua faaali mai e le Alii le ala o le a Ia faamasinoina ai tagata e maliliu e aunoa ma se malamalamaaga o le talalelei

A o maofa le Perofeta o Iosefa Samita i le mafai ona ulu atu o Alevini i le malo selesitila e aunoa ma le papatisoina, sa tuuina mai e le Alii se tali. Suesue i le Mataupu Faavae ma Feagaiga 137:7–8, ma faailoa mai le aoaoga faavae na aoao mai e le Alii, e fesoasoani ai ia Iosefa ia malamalama i le pogai o le a mafai ai e Alevini ona ulu atu i le malo selesitila.

I lau api talaaga mo le suesueina o tusitusiga paia, tusi ai le aoaoga faavae na e faailoaina mai i le Mataupu Faavae ma Feagaiga 137:7–8, ma tali le fesili lenei: E mafai faapefea e lenei aoaoga faavae ona faamafanafanaina i latou o e e i ai tagata e pele o aiga ua maliliu e aunoa ma se malamalamaaga o le talalelei?

Na faaali mai e le Alii le aoaoga faavae i le Mataupu Faavae ma Feagaiga 137:7–8 a o lei Ona faaalia mai le aoaoga faavae o le papatisoga mo e ua maliliu. O le a e suesue i faaaliga e uiga i le papatisoga mo e ua maliliu i lesona a sau.

O se vaega o lenei faaaliga e faatatau ia i latou o e ua maliliu, na aoao mai ai le Alii e uiga i le ala o le a Ia faamasinoina ai tagata uma. Faitau le Mataupu Faavae ma Feagaiga 137:9, ma faauma le faamatalaga lenei: O le a faamasino i tatou e le Alii e ala i a tatou ma le .

I lau api talaaga mo le suesueina o tusitusiga paia, faamalamalama ai i au lava upu le mafuaaga e te manatu ai o o tatou manaoga ma a tatou galuega e taua uma.

Ina ia malamalama lelei i le auala o le a faamasino ai e le Alii i tatou e tusa ai ma a tatou galuega ma o tatou manaoga, suesue i le saunoaga lenei a Elder Dallin H. Oaks o le Korama a Aposetolo e Toasefululua:

“Po o tatou mautinoa ia lē sala i lalo o le tulafono a le Atua pe afai na ona tatou aloese mai amioga leaga? Ae faapefea pe afai tatou te faafiafia i mafaufauga ma manaoga leaga?

“Mata o le a le matauina lagona inoino i le aso o le faamasinoga? A e faapefea le losilosivale? A e a le manao fua? …

“O a tatou tali i fesili faapena e faaalia ai le mea tatou te ono ta’ua o tala faanoanoa, e faapea e mafai ona tatou agasala e aunoa ma le iloagofie [manino] o galuega, e ala i na o lagona ma manaoga o o tatou loto.

“O loo i ai foi tala lelei. I lalo o le tulafono a le Atua, e mafai ona tauia i tatou mo le amiotonu e oo lava i taimi na le mafai ai ona tatou faia amioga ia e masani ona o faatasi ma na faamanuiaga.

“Afai e manao moni se tagata e faia se mea mo le tama o lo‘u toalua, ae peitai sa taotaomia ona o tulaga [le maalofia], o le a fai atu o ia: ’Faafetai lava. O le a ou talia le faamoemoega lelei mo le galuega.’ E faapena foi, ou te talitonu o le a talia e lo tatou Tama oi le Lagi manaoga moni o o tatou loto e fai ma sui mo faatinoga ia e le mafai moni ona faia” (“The Desires of Our Hearts” [Brigham Young University devotional, Oct. 8, 1985], 4; speeches.byu.edu).

O faataitaiga nei e fa e mafai ona fesoasoani e te malamalama atili ai i le aoaoga faavae na faailoaina mai i le Mataupu Faavae ma Feagaiga 137:7–8. I lau api talaaga mo le suesueina o tusitusiga paia, tali le fesili lenei mo faataitaiga taitasi: E faapefea e lenei faataitaiga ona faaalia le taua o o tatou manaoga faapea foi ma a tatou galuega?
1. Ua i ai i se tagata o le Ekalesia se manaoga amiotonu ina ia faaipoipoina i le malumalu. I le mavae ai o se olaga o auaunaga faamaoni i le Ekalesia, na faapea ona maliu lenei tagata e aunoa ma se avanoa e faamauina ai i se toalua i le malumalu.
2. O se alii talavou o loo tausia ma le lototoa ana feagaiga o le papatisoga ma faia ona tiute o le Perisitua Arona. Ina ua uma ona faauu mai i le aoga maualuga, sa i ai sona manaoga tele e auauna atu faamisiona ae e le mafai ona faia lena mea ona o se le atoatoa faaletino.
3. O se tamaitai talavou o loo i ai se lagona le fiafia i se isi tamaitai talavou. E faafoliga o ia e faauo atu, ae e faamoemoe faalilolilo ia tutupu ni mea leaga i le isi tamaitai talavou.
4. O se alii talavou e mafaufau i mafaufauga faatuinanau, ma na te le sailia le fesoasoani a le Alii ia suia ai ona manatu ma lagona le talafeagai.

Mafaufau loloto po o le a le uiga ia te oe o le iloa, o le a faamasinoina oe e ala i au galuega faapea foi ma manaoga o lou loto.

Faitau le Mataupu Faavae ma Feagaiga 137:10, ma faailoga le upumoni o loo aoao mai ai e uiga i tamaiti e maliliu a o lei aulia le matua e faamasinoina ai.

Ina ua maua e le Perofeta o Iosefa Samita lenei faaaliga i le Mataupu Faavae ma Feagaiga 137:10, sa mafatia i laua ma lona toalua, o Ema, i le maliliu o le toafa o le la fanau, e aofia ai se tasi o tamaitiiti na vaetamaina. Mulimuli ane, o le a maliliu ai foi le isi toalua o le la fanau. Mafaufau e uiga i le auala e mafai ona aumai ai e le aoaoga faavae ua faaalia mai i le fuaiupu lenei le faamafanafanaga i aiga e faavauvau ona o le maliu o se tamaitiiti.

E faapefea ona fesoasoani lenei aoaoga faavae i le faateleina o lou faatuatua i le Atua? Aisea e te manatu e taua ai le faalagolago i le fuafuaga a le Atua pe a maliliu fanau i lo latou laiti?

O le saunoa ai e uiga i le maliliu o tamaiti laiti, na aoao mai ai le Perofeta o Iosefa Samita e faapea: E aveeseina e le Alii le toatele e oo lava i le fanau iti, ina ia latou o ese ai mai le losilosivale o tagata, ma faanoanoaga ma leaga o lenei lalolagi; e mama tele i latou, matagofie tele, e soifua ae i le lalolagi; o le mea lea, afai e manatunatu i ai ma le sa’o, o le a leai se faavauvau ae o le a i ai le mafuaaga e fiafia ai ona o le a aveeseina mai i latou mai le leaga, ma o le a le toe umi ona tatou toe faatasi lea ma i latou” (Aoaoga: Iosefa Samita,187).

Na aoao mai Peresitene Wilford Woodruff: “Atonu e tulai mai ia te a’u ma oe le fesili—’Aisea ua aveesea ai e le Alii la’u fanau?’ Ae e le o se mea lena ou te ta’u atua, aua ou te le iloaina; o loo i aao o le Alii, ma sa i ai mai lava i le foafoaga o le lalolagi ma seia oo mai i le taimi lenei. O tamaiti o loo aveesea a o pepe i latou, e o sa’o lava i latou i le lalolagi o agaga. E o mai i latou iinei e faataunuu le faamoemoe o lo latou o mai, o le faaofuina i le tino faaletino. E o mai i latou ia maua se faataitaiga ma se tofi i le lalolagi; latou te maua tino, po o ni malumalu, ma o lena malumalu o le a faasaoina mo i latou, ma i le taeao o le toetutu o le a tuufaatasia agaga ma tino, ma e faapei ona i ai iinei tatou te maua ai fanau o tausaga eseese i se aiga, mai le pepe o loo susu i le tina e oo atu i le tagata matua, o le a faapena foi i le faatulagaga o le aiga i le lalolagi selesitila. O le a toe tuuina mai ia i tatou a tatou fanau e faapei o le taimi na tuu ifo ai i latou i le tuugamau, pe afai e tausisia pea e i tatou, o o latou matua, le faatuatua ma faamaonia lo tatou agavaa e mauaina le ola e faavavau; ma afai e le faamaonia i tatou, o le a faasaoina lava a tatou fanau ma latou mauaina le mamalu selesitila. O lo’u lea iloa e uiga i tamaiti pepe uma e maliliu” (Aoaoga a Peresitene o le Ekalesia: Wilford Woodruff [2004], 85–86).

Tali fesili nei i lau api talaaga mo le suesueina o tusitusiga paia:
1. O le a se mea ua e aoaoina mai au suesuega o le Mataupu Faavae ma Feagaiga 137 e uiga i taumafaiga a le Alii e tuu mai i tagata uma le avanoa e ola ai i le malo selesitila?
2. Aisea e taua ai nei upumoni ia te oe?
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mataupu Faavae ma Feagaiga 137 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: