Iunite 27: Aso 1
Mataupu Faavae ma Feagaiga 124:1–83
Faatomuaga
I le taimi o le taumalulu o le 1838–39, sa sosola ese ai le Au Paia mai Misuri ma nonofo i Ilinoi i le Vaitafe o Misisipi. Sa amata e le Au Paia iina ona fausia se aai i le eria o se nuu laitiiti na ta’ua o Commerce. I le mavae ai o sauaga ma faigata sa latou oo i ai, ua i ai nei se nofoaga e mafai ona latou faapotopoto i ai ma fausia se aai i le filemu. Sa latou atiina ae lo latou nuu ma toe faaigoa o Navu. Ina ua maua e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 124 i le aso 19 o Ianuari, 1841, ua toeitiiti atoa le lua o tausaga talu ona i ai le Au Paia i Navu, Ilinoi. I le faaaliga lenei na poloaiina ai e le Alii le Au Paia e fausia se malumalu, ma faamalamalama mai faamanuiaga o le a latou maua pe afai o le a latou filiga i le fausiaina [o le malumalu].
Mataupu Faavae ma Feagaiga 124:1–41, 56–83
Ua poloaiina e le Alii le Au Paia e fausia se malumalu ma se fale mo tagata asiasi atu i Navu
O le a se mea ua e ausia na manaomia ai se aofaiga tele o le taimi, taumafaiga, po o le ositaulaga i lau vaega? Aisea na aoga ai le taimi, taumafaiga, po o le ositaulaga na manaomia ai?
Sa amata e le Alii le faaaliga i le Mataupu Faavae ma Feagaiga 124 i le poloai mai ina ia tusia se folafolaga i taitai o le lalolagi e uiga i le toefuataiga o le talalelei (tagai i le MF&F 124:1–14). I le faataunuuina o lenei poloaiga, na lomia ai e le Korama a Aposetolo e Toasefululua se folafolaga i le aso 6 o Aperila, 1845, lea na amataina i le:
Faatanoa o le vai papatisoga i le malumalu
“Ia outou iloa: —
“Ua oo mai le malo o le Atua: e pei ona sa valoia ai e perofeta anamua, ma tatalo i ai i augatupulaga uma; o lena lava malo lea o le a faatumulia ai le lalolagi atoa, ma o le a tumau ai e faavavau” (i le James R. Clark, comp., Messages of the First Presidency of The Church of Jesus Christ of Latter-day Saints, 6 vols. [1965–75], 1:253).
O le selau tolusefulu tausaga mulimuli ane, na fofogaina ai e Peresitene Ezra Taft Benson, a’o avea ai ma Peresitene o le Korama a Aposetolo e Toasefululua, se saunoaga i le konafesi aoao lea na ia toe faamaonia mai ai le savali o lena folafolaga (tagai i le “A Message to the World,” Ensign, Nov. 1975, 33–34).
E le gata i le poloaiga ina ia tusia se folafolaga, ae na tuuina mai e le Alii se poloaiga i le Au Paia lea o le a faapea ona manaomia ai le ositaulaga tele i la latou vaega. Faitau le Mataupu Faavae ma Feagaiga 124:25–27, ma vaavaai mo le mea na poloaiina e le Alii le Au Paia i Navu e fai.
O le a le mea na finagalo le Alii e faaaoga e le Au Paia e fausia ai le malumalu?
I le taimi na toe siitia atu ai le Au Paia i Navu, Ilinoi, o le toatele na maumau ai o latou fanua ma meatotino uma. Mafaufau loloto pe faapefea e le usiusitai i le poloaiga e fausia se isi malumalu ona ono manaomia ai le faatuatua ma ositaulaga mai le Au Paia.
Faitau le Mataupu Faavae ma Feagaiga 124:28, ma vaavaai mo le mafuaaga na fetalai mai ai le Alii e tatau i le Au Paia ona fausia se malumalu. Faailoga mea e te maua i au tusitusiga paia.
Na aoao mai e Peresitene Iosefa Filitia Samita le mea lenei e uiga “i le atoatoaga o le perisitua”: “O tagata uma o e faamaoni ma o le a maua nei sauniga ma faamanuiaga e maua se atoatoaga o le perisitua, ma ua fetalai mai le Alii, ‘na te faia ia tutusa i latou i le mana, ma i le malosi, ma i le puleʼaga.’ [MF&F 76:95; tagai foi i le MF&F 88:107.] … Ua faia e le Alii ia mafai ona maua e alii uma i lenei Ekalesia, e ala i lona usiusitai, le atoatoaga o le perisitua e ala i sauniga o le malumalu o le Alii. O lenei mea e le mafai ona maua i se isi lava mea” (Doctrines of Salvation, comp. Bruce R. McConkie, 3 vols. [1954–56], 3:132–33).
O tagata uma o le Ekalesia—alii ma tamaitai—e mafai ona maua le atoatoaga o faamanuiaga o le perisitua e ala i le mauaina o sauniga uma o le malumalu. E ala i nei sauniga e mafai ona tatou maua faamanuiaga uma e finagalo le Tama Faalelagi e tuuina mai i Lana fanau. O le toefuataiga o sauniga ma feagaiga o le malumalu na amataina i le Malumalu o Katelani, ae sa le’i faamaeaina ai iina. O le fausiaina o se malumalu i Navu o le a mafai ai ona faaauau le toefuataiga mai o sauniga ma feagaiga o le malumalu (tagai i le MF&F 124:28, 40–41).
-
Faitau parakalafa muamua e lua o loo i lalo o le autu “Sauniga” i le Taiala i Tusitusiga Paia (scriptures.lds.org) po o le Faamaoni i le Faatuatua: O Se Tusitaiala o le Talalelei ([2004], 154–55). Ona tali lea o le fesili lenei i lau api talaaga mo le suesueina o tusitusiga paia: O le a le sauniga?
O nisi sauniga e taua mo le faaeaga, ma o le tele o nei sauniga faaola e na o malumalu lava e mafai ona faatinoina ai. Faitau le Mataupu Faavae ma Feagaiga 124:29, ma vaavaai mo se tasi o nei sauniga taua o le malumalu lea na faailoa mai e le Alii e manaomia ona toefuatai mai.
I le aso 15 o Aokuso, 1840, na aoao muamua mai ai e le Perofeta o Iosefa Samita e faapea, e mafai e le Au Paia ona faia sauniga e pei o le papatisoga e fai ma sui o a latou uo ma aiga ua maliliu o e sa le’i i ai se avanoa e maua ai le talalelei (tagai i le Aoaoga a Peresitene o le Ekalesia: Iosefa Samita [2007], 431; tagai foi i le 1 Korinito 15:29 Ina ua maea lenei faasilasilaga, e tele papatisoga mo e ua maliliu sa faia i le Vaitafe o Misisipi po o auvai lata ane.
Faitau le Mataupu Faavae ma Feagaiga 124:30–34, ma vaavaai mo le faatonuga a le Alii e uiga i le tatau ona faia o le sauniga o le papatisoga mo e ua maliliu ina ia mafai ona taliaina ia te Ia.
E ui lava ina sa fetalai mai le Alii o sauniga o le papatisoga mo e ua maliliu e manaomia ona faatinoina i le malumalu, ae aisea na Ia faatagaina ai le Au Paia ia faia mo se taimi le tumau ia papatisoga i fafo o le malumalu?
Ina ua uma ona maua e Iosefa Samita le faaaliga i le Mataupu Faavae ma Feagaiga 124, sa faapea ona vave ai le faagasologa o le galuega i le malumalu o Navu. I le aso 3 o Oketopa, 1841, ina ua uma ona eli le pito i lalo o le malumalu, sa ta’u atu e Iosefa Samita i le Au Paia, “O le a le toe faataunuuina papatisoga mo e ua maliliu, sei vagana ai ua faia lenei sauniga i totonu o le Maota o le Alii. … Aua ua faapea ona fetalai mai ai le Alii!” (Aoaoga: Iosefa Samita,499). I le aso 21 o Novema, 1841, ina ua uma ona fausia ma faapaiaina se faatanoa le tumau o le vai papatisoga i le fogafale i lalo o le Malumalu o Navu, sa faapea loa ona toe faaauau ai le faiga o papatisoga mo e ua maliliu. (Tagai i le Church History in the Fulness of Times Student Manual, 2nd ed. [Church Educational System manual, 2003], 251–52; tagai foi i le Aoaoga a Peresitene o le Ekalesia: Iosefa Samita, 501–02.)
O leMataupu Faavae ma Feagaiga 124 o loo aoao mai ai le upumoni lenei: O le malumalu ua na o le pau lea o le nofoaga e mafai ona tatou maua ai le atoatoaga o sauniga o le perisitua mo le faaolataga o e ola ma e ua maliliu.
-
Faailoga upu po o fasifuaitau e tulaga ese ia te oe i le aoaoga lenei a Peresitene Thomas S. Monson i le taua o lenei upumoni e uiga i le malumalu: “O i latou o ē malamalama i faamanuiaga e faavavau e maua mai i le malumalu, ua latou iloa e leai se taulaga e telē naua, leai se tau ua mamafa tele, leai se tauiviga ua faigata naua ia maua ai na faamanuiaga. E leai se mamao e le mafai ona laasia, leai ni mea faalavefau e le mafai ona foia, e leai foi ni faigata e le mafai ona onosaia. Latou te malamalama o sauniga faaola e maua i le malumalu e mafai ai i se aso ona tatou toe foi atu i lo tatou Tama Faalelagi i se mafutaga faaleaiga e faavavau, ma faaeeina ai i faamanuiaga ma le mana mai luga, e matuai aoga ai lava a tatou osigataulaga uma ma taumafaiga uma” (O Le Malumalu Paia—O Se Sulu Taiala i le Lalolagi,” Ensign po o le Liahona, Me 2011, 92).
-
Mafaufau loloto i mea o loo e faia i lou olaga e saunia ai e ulu atu ma le agavaa i le malumalu ma maua ai le atoatoaga o sauniga o le perisitua mo oe lava ia. Tusi i se api o talaaga patino po o se fasi pepa mea e te lagona e tatau ona e faia i le taimi nei e agavaa ai mo le mauaina o sauniga o le malumalu.
Faitau le Mataupu Faavae ma Feagaiga 124:38–41, ma vaavaai pe aisea na poloaiina ai e le Alii ia Mose e fausia se tapeneko i le vao ma faatonuina Lona nuu e fausia se malumalu i le laueleele o le folafolaga.
Matau po o le a le umi, e tusa ai ma nei fuaiupu, sa i ai sauniga faaola o le malumalu.
-
-
Aisea e fauina ai e le Ekalesia ia malumalu?
-
Aisea e taua ai ia te oe le malumalu?
-
I le Mataupu Faavae ma Feagaiga 124:22–24, 56–83, na faatonuina ai foi e le Alii le Au Paia e fausia se isi fale na ta’ua o le Maota i Navu, ina ia mafai ona nonofo ai i latou e asiasi atu i Navu.
Sa fausiaina lenei maota i luga o se vaega o le faavae o le tulagafale sa le’i uma o le Maota i Navu.
Mataupu Faavae ma Feagaiga 124:42-55
Ua faamalamalama mai e le Alii le mea o le a tupu pe afai e usitai le Au Paia i le poloaiga e fausia se malumalu
Faitau le Mataupu Faavae ma Feagaiga 124:42–45, ma vaavaai mo le mea na fetalai mai le Alii o le a tupu, pe afai o le a fausia e le Au Paia le malumalu i Navu, Ilinoi, ma usitai i Lona siufofoga ma siufofoga o Ana auauna.
I le Mataupu Faavae ma Feagaiga 124:46–54, na faamalamalama mai ai e le Alii le mea o le a tupu pe afai e fausia e le Au Paia le malumalu, ae le usitai i Lona siufofoga po o siufofoga o Ana auauna. Sa Ia fetalai mai foi, o le a Ia talia taumafaiga a le Au Paia e ausia le galuega a le alii (e aofia ai le fausiaina o malumalu), e tusa lava pe sa taofia i latou mai le faia o lea mea ona o sauaga sa latou feagai.
Faitau le Mataupu Faavae ma Feagaiga 124:55, ma vaavaai mo le mea na folafola mai e le Alii o le a faamaonia atu e le Au Paia ia te Ia, e ala i le usitaia o Lana poloaiga e fausia le Malumalu o Navu.
E tusa ai ma le fuaiupu e 55, o le a le mea tatou te faamaonia atu i le Alii pe a tatou usitai i Ana poloaiga?
Atonu e te manao e tusi le mataupu faavae lenei i au tusitusiga paia i talane o le fuaiupu e 55: O le usitaia o poloaiga a le Alii, tatou te faamaonia ai lo tatou faamaoni.
-
E tusa ai ma le Mataupu Faavae ma Feagaiga 124:55, o a nisi faamanuiaga na folafola mai e le Alii i le Au Paia pe afai o le a latou fausia se malumalu i Navu?
-
Lu’i oe lava e faamaonia atu lou faamaoni i le Atua e ala i le usitai ma le faamaoni i Ana poloaiga.
-
Ua ou suesueina le Mataupu Faavae ma Feagaiga 124:1–83 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: