Iunite 29: Aso 4
Mataupu Faavae ma Feagaiga 135
Faatomuaga
I le aso 27 o Iuni, 1844, na fasiotia ai le Perofeta o Iosefa Samita ma lona uso o Ailama, o le sa avea ma Peresitene Fesoasoani ma le Peteriaka o le Ekalesia, i Karefasi, Ilinoi. Na faamaonia e le Korama a Aposetolo e Toasefululua se faasilasilaga o le faamaturoina ina ia aofia i le faaiuga o le lomiga o le 1844 o le Mataupu Faavae ma Feagaiga, lea sa toetoe lava a saunia e lolomi. O le faasilasilaga na aumaia mai tala vaaitino a Elder Ioane Teila ma Willard Richards, o sui o le Korama a le Toasefululua. Ua faamaumauina nei i le Mataupu Faavae ma Feagaiga 135.
Mataupu Faavae ma Feagaiga 135
Ua fofogaina mai le faamaturoina o Iosefa ma Ailama Samita
Faitau le Mataupu Faavae ma Feagaiga 135:1. Mafaufau o oe o se tagata o le Ekalesia o loo nofo i Navu, Ilinoi, i le 1844, ma mafaufau pe o a ni ou lagona ina ua e mauaina lenei tala matautia.
O le toatele o le Au Paia sa lofituina i le lotomomomo ina ua latou iloa e uiga i le maliliu o Iosefa ma Ailama Samita. Tomanatu i ou lava lagona ma le molimau e uiga i le Perofeta o Iosefa Samita a o e aoao e uiga i aso mulimuli o lona soifua.
Sa ola Iosefa Samita ma le Au Paia i le filemu i Ilinoi mo le tusa ma le tolu tausaga. Ae peitai, na oo ane i le 1842 ua amata foi ona oo atu le tetee ia i latou. Sa tuufaatasi taumafaiga a tagata faatuiese i totonu o le Ekalesia ma le tetee mai fafo e faasaga i le Perofeta ma le Ekalesia. Na amata ona popole ma inoino nisi o tagatanuu o Ilinoi i le aafiaga faaupufai o le Au Paia. O isi sa oo ina lotoleaga i le tuputupu a’e o le tamaoaiga o Navu, ma sa faitio i le pule a le faigamalo ma le vaegaau a le aai o Navu. O nisi na amata ona le fiafia i le Au Paia ona o feeseeseaiga e uiga i aoaoga faavae ma faiga tulaga ese a Mamona, e pei o faaipoipoga autaunonofo, o nisi o na mea sa sese ona aoaoina e tagata liliuese o le Ekalesia. (Tagai i le Church History in the Fulness of Times Student Manual [Church Educational System manual, 2003], 263–66, 270–71.)
E oo ane ia Iuni 1844, ua matuai faateteleina lagona le lelei e faasaga i le Ekalesia. Sa talanoaina e nisi o tagatanuu i Ilinoi le tutuliese faamalosi o le Au Paia mai le setete, a’o taupulepule e isi le fasiotiga o Iosefa Samita. O nisi o i latou o e sa taupulepule leaga e faasaga i le Perofeta ma le Ekalesia, o i latou ia sa avea muamua ma tagata o le Ekalesia o e na liliuese. I le aso 7 o Iuni, 1844, na lolomi ai e William Law, o lē sa avea ma fesoasoani lua i le Au Peresitene Sili, ma isi tagata liliuese, le lomiga muamua o se nusipepa sa ta’ua o le Nauvoo Expositor. O le taumafai ai e faaoso le ita o tagata lautele e faasaga i le Perofeta ma le Ekalesia, na faaaoga ai e nei alii lenei nusipepa e taufaaleaga ai Iosefa Samita ma isi taitai o le Ekalesia. Na silafia e Iosefa Samita ma le aufono a le aai o Navu, o le nusipepa taufaaleaga o le a oo atu ai i sauaga a tagata faatupu vevesi e faasaga i le aai. Sa latou tautino mai o se faaleaga mea i tagata lautele ma poloaiina ai ina ia faaumatia le falelomitusi o le Nauvoo Expositor.
Na faaaoga e tagata liliuese le Nauvoo Expositor e taufaaleaga ai le Perofeta o Iosefa Samita ma isi taitai o le Ekalesia, ma faaoso ai le feita o tagata lautele e faasaga i le Ekalesia.
O anotusi o le Nauvoo Expositor, faatasi ai ma le faatafunaga o le falelomitusi, na faateteleina ai le inoino o tagata e tetee i Mamona. Na fai e i latou e ana le falelomitusi ni moliaga faaletulafono e faasaga ia Iosefa Samita ma isi taitai o le aai, ma tuuaia ai i latou i le faaosoina o se fetaua’iga. Na kilia Iosefa Samita mai ia moliaga e faamasino o le Au Paia o Aso e Gata Ai, ma faamasino e le o ni Au Paia o Aso e Gata Ai, ae peitai o lenei mea sa atili ai le feita o ona fili. Ina ua amata ona feaveai solo lipoti e faapea sa faapotopoto tagata faatupu vevesi e osofai le aai o navu, i le avea ai ma pulenuu, sa folafola atu ai e Iosefa Samita ia Navu ina ia i lalo o le tulafono faamiliteli (tulafono le tumau faamiliteli), ma faatasi ai ma le faatonuga a Kovana Thomas Ford o Ilinoi, na faatonuina ai e Iosefa le Autau a Navu e puipuia le aai.
Na tupu malosi le le to’a i le eria o lea na alu atu ai Kovana Ford i Karefasi, o le nofoaga autu o le malo mo le lisone, e faatoafilemu le tulaga maaleale. Sa ia tusi mai ia Iosefa Samita ma fai mai, e na o se faamasinoga o le Perofeta ma isi taitai i luma o se aufaatonu e le o ni tagata Mamona i Karefasi, e mafai ona faamalieina ai tagata. Sa folafola mai foi e Kovana Ford ia i latou le puipuiga atoa ma se faamasinoga sa’o ma tonu pe afai latou te o mai lava i latou. Na tali atu Iosefa o le a lamatia lona ola i le malaga, ma o le a le sau.
I lenei taimi faigata, ma ina ua uma ona soalaupule faatasi, sa manatu le Perofeta e faapea, afai la te tuua ma Ailama ia Navu ma malaga atu i Sisifo, o le a le faaleagaina ai le Au Paia i Navu. O le usitai ai i lenei musumusuga, na sopoia ai e Iosefa ma Ailama le Vaitafe o Misisipi e agai atu i Aioua. Ae peitai, sa masalosalo nisi o tagata o le Ekalesia i Navu i le fuafuaga a le Perofeta. Na o mai nisi toalaiti o i latou ma tuuaia o ia i le palaai, ma fai mai, ua ia lafoaiina le Au Paia ma tuua i latou e feagai toatasi ma sauaga. Na tali atu i ai le Perofeta, “Afai ua leai se taua o lo’u ola i a’u uo, ua leai foi ia te a’u” (i le History of the Church, 6:549). Ina ua uma ona soalaupule faatasi, sa faapea ona toe foi atu Iosefa ma Ailama i Navu. I le taeao po i le aso 24 o Iuni, 1844, sa la malaga atu loa mo Karefasi.
Faitau le Mataupu Faavae ma Feagaiga 135:4, ma vaavaai mo le valoaga na faia e Iosefa Samita [ina ua] lata atu i Karefasi.
-
Tali fesili nei i lau api talaaga mo le suesueina o tusitusiga paia:
-
O le a sou manatu, na faapei ia Iosefa Samita le tuua o lona aiga, ma le iloa o le a le toe foi mai ia i latou?
-
Aisea e te manatu ai sa “toafilemu [Iosefa] e pei o se taeao o le tau mafanafana” ina ua ia iloa o le a alu o ia “e pei o se tamai mamoe i le fasiga”?
-
Na silafia e le Perofeta o lona maliu o le a faasaoina ai ola o le Au Paia.
Faitau le Mataupu Faavae ma Feagaiga 135:5, ma matau le mea na faitau ma faailoga e Ailama a o lei alu atu i Karefasi.
Na faitau ma faailoga e Ailama Samita le itulau i lenei kopi o le Tusi a Mamona a o lei alu atu i Karefasi. Ia matau le mea na gagau i ai le tulimanu o le itulau.
-
I le aso 25 o Iuni, 1844, na totogi ai e Iosefa, Ailama, ma isi taitai se tupe e tatala ai i latou i tua e faatali ai le aso e faia ai se faamasinoga aloaia e faailoa ai le moliaga o le faama‘iteina o se fetaua’iga. Ae peitai, i lena afiafi sa poloaiina ai le taofia o Iosefa ma Ailama i le Falepuipui o Karefasi i moliaga o le taufaalata, lea sa tetee i ai Iosefa ma ana loia o se mea sa faasaina e le tulafono, aua o lena moliaga sa le’i ta’uaina i le valaauga o le faamasinoga lea na totogi ai le tupe ae tatala i tua, ma e le mafai ona totogi se tupe ae tatala mai i tua mo le taufaalata, o lea na manaomia ai ona la nonofo i Karefasi ma i tulaga matautia.
I le aso 26 o Iuni, 1844, na feiloai ai Iosefa ma Kovana Ford i le falepuipui. Sa mafaufau Kovana Ford e alu i Navu, ma sa talosaga Iosefa la te o faatasi, sa ia lagonaina sa le saogalemu o ia i Karefasi. Na folafola mai e kovana Ford, afai e tuua e ia Karefasi, o le a alu ma ave Iosefa ma Ailama. I lena afiafi sa molimau atu ai le Perofeta i leoleo o le falepuipui e uiga i le moni aiai o le Tusi a Mamona ma le toefuataiga o le talalelei.
I le taeao o le aso 27 o Iuni, 1844, na tusia ai e Iosefa se tusi i lona toalua, o Ema: “Ua ou matua saunia lava mo lo’u taunuuga, ma lo’u iloa ua ta’uamiotonuina a’u ma ua ou faia le lelei silisili e mafai ona faia. Tau atu lo’u alofa i tamaiti ma a’u uo uma lava” (i le History of the Church, 6:605). Mulimuli ane i lena aso, e ui ina lapataia e uiga i fuafuaga e osofai le falepuipui ma fasioti pagota, ae na tuua lava e Kovana Ford ia Karefasi ae alu e talanoa atu i tagatanuu o Navu. Sa ia solia lana folafolaga ma sa le’i alu ma ave Iosefa ma Ailama. A o lei alu, sa tuu ai e Kovana Ford le Au Ofu Efuefu a Karefasi—o fitafita faatupu vevesi aupito sili ona tetee na faapotopoto i Karefasi—e nafa ma le puipuia o le falepuipui ae faataape isi fitafita faatupu vevesi.
I le aoauli vevela ma le susū o le ea o le aso 27 o Iuni, sa i ai faatasi ia aposetolo o Ioane Teila ma Willard Richards ma Iosefa ma Ailama i le Falepuipui o Karefasi. Sa oo mai se lagona o le iite i le Perofeta ma i latou o e na faatasi ma ia a o latou saofafai i le potumoe o le leoleo o le falepuipui i le fogafale lona lua o le falepuipui. Sa talosaga atu le Perofeta ia Ioane Teila e usu le pese “Se Tagata Mativa Faanoanoa” (tagai i le Viiga, nu. 16). Afai e te maua lenei viiga (pe afai foi e mafai ona e alu i le lds.org/music/text/hymns/a-poor-wayfaring-man-of-grief), faalogologo, usu le pese, po o le faitau o upu ma mafaufau pe aisea o le a taua ai i le Perofeta i lena taimi o lona soifuaga.
Taumafai e vaai faalemafaufau i mea nei na tutupu e pei lava sa e i ai faatasi ma le Perofeta o Iosefa Samita i le Falepuipui o Karefasi:
O le potumoe o le leoleo o le falepuipui i le Falepuipui o Karefasi, lea na osofaia ai e tagata faatupu faalavelave le Perofeta, lona uso o Ailama, Ioane Teila, ma Willard Richards
E lei leva ona te’a le 5:00 i le afiafi o le aso 27 o Iuni, 1844, ae si’o e se vaega faatupu faalavelave e tusa ma le 150–200 o alii, ma o latou foliga na vali ina ia nana ai o latou tagata moni, ia le falepuipui. Sa laitiiti se tetee na tuuina atu e leoleo a’o taufetuli atu nisi o le vaega leaga i luga i le faasitepu i le potu sa i ai le Perofeta, lona uso o Ailama, ma ana uo.
Sa tulei ma poloka mai e Iosefa ma isi le faitotoa e taofi ai le au faatupu faalavelave mai le tatalaina faamalosi. Na fana mai e se tasi o le vaega leaga le pito i luga o le faitotoa, ma lavea ai le itu agavale o le isu o Ailama. Na pau o ia agai i tua, ma alaga, “O au o se tagata oti!” (i le History of the Church, 6:617). Sa tusia mulimuli ane e Ioane Teila, “O le a le galo lava ia te au le lagona loloto o le tigaalofa ma le alofa na vaaia i foliga o Uso Iosefa a o ia alu atu ia Ailama, ma punou i ona luga, ma alaga, ‘Oi! talofa e, isi o’u uso pele o Ailama!’” (i le B. H. Roberts, The Rise and Fall of Nauvoo [1965], 443).
I se taimi na muamua atu o le aso sa tuuina atu ai e se tagata asiasi se fana ia Iosefa. O le gaoioi ai e puipui tagata uma sa i totonu o le potu, na oso atu ai Iosefa i le faitotoa ma aapa atu i le faaalo o le faitotoa e faapa atu le fana agai i le potu tele. Sa na o le tolu ia pulu mai pulu e ono na papa, ma manunua ai le toatolu o tagata faatupu faalavelave. Ona tafana faamalosi mai lea e le vaega faatupu faalavelave a latou fana i le faitotoa na afa se vaega na matala ai, ma sa faaauau pea ona tasasa ese e Ioane Teila ia gutu o a latou fana i se tootoo.
A o faateteleina le faalavelave i le faitotoa, sa taumafai loa Ioane Teila e sola ese mai le potu e ala i se faamalama. A o taumafai e oso i fafo o le faamalama, sa fana mai o ia i le faitotoa ma lavea ai lona ogavae ma sa fana mai foi o ia e se tagata i fafo. Na pau o ia i le fola, ma a’o taumafai e maulu i lalo o le moega sa i talane o le faamalama, sa faapea ona faamanualia tigaina ai o ia i isi tafanaga e tolu. A o le taimi lea, sa amata ai e Willard Richards ona tasasa i lona tootoo ia fana na lala mai i le faitotoa.
Ona filifili lea o Iosefa Samita e taumafai e sola i se faamalama, o se faaiuga na talitonu Willard Richards sa faia ina ia faasaoina ai o la’ua ola ma Ioane Teila. A o faaauau pea ona taumafai Willard Richards e taofiofi le au faatupu faalavelave i le faitotoa, sa alu atu le Perofeta i le faamalama na matala ma alaga atu: “Le Alii e, loʼu Atua e!” (i le History of the Church, 6:618). A o ia alaga, sa taufai o mai pulufana mai i totonu ma lalo i le falepuipui ma lavea ai le Perofeta, o le na palasi mai le faamalama, ma taatia ai i le eleele i lalo. Sa faanatinati atu i fafo le au faatupu faalavelave sa i totonu o le falepuipui ina ia mautinoa e i latou lava ua maliu Iosefa. E ui ina sa leai ni tagata o le Ekalesia na lata ane, sa alaga se tagata, “Ua o mai Mamona!” ma sa sosoloa ese uma le au faatupu faalavelave. (Tagai i le History of the Church, 6:618, 620–21; tagai foi i le Church History in the Fulness of Times Student Manual,283.)
O le faamalama i luga a’e o le vaieli, lea na pau mai ai le Perofeta o Iosefa Samita
-
Faitau le Mataupu Faavae ma Feagaiga 135:2, ma matau le faamatalaga o iuga o Ioane Teila ma Willard Richards.
O Willard Richards sa na o lona taliga agavale na see ai se pulufana, lea na faataunuuina ai se valoaga na faia e Iosefa i le silia ma se tausaga na muamua atu “o le a oo mai le taimi o le a felelei solo ai pulufana e pei o le timuaisa, ma o le a ia vaai i le pauu o ana uo i le taumatau ma i le agavale, ae o le a leai se masae i lona ofu” (i le History of the Church, 6:619).
Matau le fuaitau “ina ia faamauina le molimau a lenei tusi ma le Tusi a Mamona” i le Mataupu Faavae ma Feagaiga 135:1. I le tulaga lenei, o le fuaitau “ina ia faamauina” o le faatuina tumau o se mea, e pei o se molimau. Mafaufau e tusi le faamalamalamaga lenei i au tusitusiga paia. Atonu foi e te manao e matau le upu faamaturoina i le fuaiupu 1. O se maturo o se tagata e pagatia i le oti i le avea ai o se molimau i le moni o ona talitonuga po o faamoemoega. O le upu maturo e sau “mai se upu Eleni o le uiga o le ‘molimau’” (Bible Dictionary, “Martyr”).
O faatagata o Iosefa ma Ailama Samita i Navu, Ilinoi
Faitau le Mataupu Faavae ma Feagaiga 135:7, ma vaavaai po o le a le mea ua avea ai ma molimau le faamaturoina o Iosefa ma Ailama Samita.
-
-
Ua ou suesueina le Mataupu Faavae ma Feagaiga 135 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: