Iunite 25: Aso 2
Mataupu Faavae ma Feagaiga 113–14
Faatomuaga
Ina ua taunuu atu i Sisifo Mamao, Misuri, ia Mati o le 1838, na maua ai e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 113. I le faaaliga, na taliina ai e le Alii ia fesili e uiga i fuaitau mai le tusi a Isaia. Na maua e Iosefa Samita le faaaliga ua faamaumauina i le Mataupu Faavae ma Feagaiga 114 i le aso 17 o Aperila, 1838. I le faaaliga lenei na faatonuina ai e le Alii ia Tavita W. Patten, o se sui o le Korama a Aposetolo e Toasefululua, e sauni e auauna atu i se misiona.
Mataupu Faavae ma Feagaiga 113
Ua tali e le Alii ia fesili e uiga i fuaitau i le tusi a Isaia
Pe e te tauivi ea ina ia malamalama i mea e te faitau i ai i tusitusiga paia?
E faaaoga e nisi o valoaga i tusitusiga paia ia faailoga e faigata ona malamalama i ai. I Sisifo Mamao, Misuri, sa fesili atu ai nisi o le usoga i le Perofeta o Iosefa Samita e faamanino atu fuaitau o le tusi a Isaia. O tali na faaali mai e le Alii i na fesili ua faamaumauina nei i le Mataupu Faavae ma Feagaiga 113.
Isaia
-
I lau api talaaga mo le suesueina o tusitusiga paia, lisi ai fesili o loo i le Mataupu Faavae ma Feagaiga 113 ma otooto ai tali a le Alii.
I le Mataupu Faavae ma Feagaiga 113:1–2, o loo manino mai ai le uiga o le pogai. O le faamatalaga lenei, e mafai ona fesoasoani e faateleina ai lou malamalama i lena faailoga: o Iesu Keriso e sau mai i le aiga o Iese, le tama o Tavita. O le upu pogai i le Isaia 11:1 ua faaliliuina mai se upu Eperu o loo faasino i le pogati po o le tafu’e o se laau—a le o se laau na tipiina i lalo po o se laau ua totoina.
Mafaufau loloto i uiga o le tatupu ma le aa, o loo ta’ua i le Mataupu Faavae ma Feagaiga 113:3–6. Mafaufau i le faamatalaga lenei na faasoa mai e Elder Bruce R. McConkie o le Korama a Aposetolo e Toasefululua: “Pe ua fai ea si o tatou sese i le faapea atu o le perofeta o loo ta’ua iinei o Iosefa Samita, o le na oo mai ai le perisitua, o le na mauaina ki o le malo, ma o le sa sisiina a’e le tagavai mo le faapotopotoina o tagata o le Alii i lo tatou tisipenisione? Ma pe le o ia foi o le ‘auauna i aao o Keriso, o lē o se vaega o lona tupuga mai e mai ia Iese faapea foi mai ia Efaraima, po o le aiga o Iosefa, o lē ua tuuina i ai le mana tele’? (MF&F 113:4–6.) O i latou o loo gauai atu o latou taliga i musumusuga a le Atua o le a iloa le uiga o nei mea” (The Millennial Messiah: The Second Coming of the Son of Man [1982], 339–40).
O a nisi o mea ua faia e Iosefa Samita i le avea “o se auauna i aao o Keriso” (MF&F 113:4)?
A o e mafaufau i le uiga o aa, suesue i le Mataupu Faavae ma Feagaiga 113:5–6.
E faapefea ona faatusa aa ia Iosefa Samita?
Faatumu le faamatalaga lenei o aoaoga faavae e faavae i mea ua e aoaoina mai le fuaiupu e 6: Na maua e Iosefa Samita ki o le malo, mo le ma mo le i aso amuli. Atonu e te manao e avea ma mau faasino le fuaiupu e 6 i le Mataupu Faavae ma Feagaiga 110:11.
Ina ua uma ona faaalia mai e le Alii ia tali i fesili e uiga i le Isaia 11, na fesiligia e Elias Higbee ni fesili e faatatau i le Isaia 52.
Suesue i le Mataupu Faavae ma Feagaiga 113:7–10, ma faatumu le siata lenei:
|
O le a le mea e tatau ona tatou “oofu” ai? |
O le a le mea ua folafola mai e le Alii ia i latou o e toe foi atu ia te Ia? |
|
O le a sou manatu i le uiga o lenei mea? |
O le a sou manatu i le uiga o lenei mea i tagata Isaraelu o loo faataapeapeina? |
-
Mataupu Faavae ma Feagaiga 114
Ua poloaiina e le Alii ia Tavita W. Patten e sauni e auauna atu i se misiona
O se tasi o tagata sa filifilia e le Alii e fesoasoani e faamalosia Siona o se tagata na igoa ia Tavita W. Patten.
Sa auai Tavita W. Patten i le Ekalesia i le aso 15 o Iuni, 1832. Sa faauuina o ia o se Aposetolo i le 1835. Sa i ai ia te ia le meaalofa o le faamalologa, ma o ia o se tagata e malosi lona lototoa ma le mana. Sa le fefe o ia i lona puipuia o le faatuatuaga, ma le Perofeta o Iosefa Samita. I le puipuiga o le Au Paia e faasaga i vaega faatupu vevesi i Misuri, sa lauiloa ai Tavita Patten o “Kapeteni Le Fefe.” (Tagai i le Lycurgus A. Wilson, Life of David W. Patten: The First Apostolic Martyr [1900], 5–8, 14–17, 48–49, 62.)
Sa talosaga atu Elder Patten i le Perofeta o Iosefa Samita e saili atu mo se faaaliga mo ia. Faitau le Mataupu Faavae ma Feagaiga 114:1, ma vaavaai mo le mea sa finagalo le Alii e fai e Elder Patten.
I le tautoulu o le 1838, i le ono o masina talu ona maua mai le faaaliga lea sa poloaiina ai Elder Patten e sauni mo se misiona, sa aafia ai o ia i le taua i le Vaitafe Pi’o [Crooked River], sa latalata i le nofoaga sa faamautu i ai le Au Paia i le ogatotonu i sisifo o Misuri. I le aso 25 o Oketopa, 1838, sa osofaia ai e tagata faatupu vevesi fale o nisi o le Au Paia, ma faatonu le au paia e tuua le setete ma ave ni pagota tamaloloa se toatolu. Ina ua logo tala e faapea na fuafua le vaega faatupu vevesi e fasioti pagota i lena po, sa faatulaga ai e le vaegaau a le Au Paia ni vaega se lua e laveai pagota. Sa taitai e Elder Tavita W. Patten le tasi o vaega. Ina ua lata i le tafa o ata, na latalata atu ai le vaega a Elder Patten i le Vaitafe Pi’o e sopo atu ai, ae peitai, na tafana mai e le vaega faatupu vevesi, o e sa lalafi latalata ane. Sa faapea ona tupu vave ai se taua, ma e feololo alii o vaega uma e lua sa manunua ai, na aofia ai ma Elder Patten.
O le taua i le Vaitafe Pi’o, i Misuri
Na maliu Elder Patten i ni nai itula mulimuli ane. Sa faapena lona faatuatua i le talalelei toefuataiina sa faapea ona i ai se taimi sa ia faailoa atu ai i le Perofeta o Iosefa Samita se manao e maliu i le maliu o se maturo. “Sa matuai ootia le Perofeta, ma faaalia le faavauvau tele, ‘aua’ sa ia fai atu ia Tavita, ‘a talosaga atu se tagata e faatuatua e pei o oe i le Alii mo soo se mea, e masani lava ona ia mauaina.’” I le falelauasiga o Elder Patten i Sisifo Mamao, i le lua o aso talu ona uma le taua, sa faia ai e Iosefa Samita se talaaga mo ia: “Ua taoto mai se tamalii ua faia le mea tonu lava sa ia fai mai o le a ia faia—ua ia ofoina atu lona ola mo ana uo.” (Tagai i le Church History in the Fulness of Times Student Manual, 2nd ed. [Church Educational System manual, 2003], 199–200; sii mai i le Life of David W. Patten,53; History of the Church, 3:175).
I le taimi na maliu ai Elder Patten, sa ia saunia o ia lava, e ala i lona faatuatua, e auauna atu i se misiona. Sa popole foi o ia e uiga i ona uso o le Au Paia, e aofia ai nisi o sui o le Korama a Aposetolo e Toasefululua, o e sa le’i faamaoni. Ina o taoto o ia ua lata ina maliu, sa alaga o ia, “E, maimau pe ana latou i ai i lo‘u tulaga! Aua ua ou lagona ua ou faatumauina le faatuatua, ua ou faamaeaina la’u galuega, o le mea lea, ua taatia mai ai mo a’u se pale, lea o le a tauaao mai e le Alii, le Faamasino amiotonu ia te a’u [tagai i le 2 Timoteo 4:7-8]. ” I lona faletua, sa ia saunoa atu i ai, “Po o le a lava se isi mea e te faia, Ia aua lava ne’i faafitia le faatuatuaga” (sii mai e Heber C. Kimball, i le Life of David W. Patten, 69).
O se tasi o upumoni e mafai ona tatou aoao mai i le aafiaga a Tavita Patten o le, afai tatou te faalogo i le taitaiga a le Alii, o le a tatou saunia mo soo se mea lava ua Ia fuafuaina mo i tatou.
-
Faitau le Mataupu Faavae ma Feagaiga 114:2, ma vaavaai mo le mea na fetalai mai le Alii o le a tupu pe a faafiti e nisi o tagata Lona suafa. (I lenei fuaiupu, o le faaupuga faa-epikopo [ e faatatau i tiutetauave o se tagata, ae le o se epikopo ma ona fesoasoani. Tagai i le Salamo 109:9; Galuega 1:20; Bible Dictionary, “Bishop.”)
Ina ua le tumau faamaoni nisi o sui o le Korama a Aposetolo e Toasefululua, sa valaauina isi e auauna atu e sui i o latou tulaga. O nei Aposetolo fou na aofia ai Ioane Teila ma Uilifoti Uitilafi, o e sa auauna faamaoni i ni misiona i Egelani ma aumai ai le faitau afe o agaga i le malamalama o le talalelei toefuataiina.
-
-
Ua ou suesueina le Mataupu Faavae ma Feagaiga 113–14 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: