Iunite 16: Aso 3

Mataupu Faavae ma Feagaiga 76:1–49

Faatomuaga

I le aso 16 o Fepuari, 1832, sa galulue ai le Perofeta o Iosefa Samita ma Sini Rikitone i iloiloga musuia o le Tusi Paia. A o laua mafaufau loloto i le uiga o le Ioane 5:29, sa faaali mai ia te i la’ua se faaaliga vaaia. O lenei faaaliga vaaia, lea o loo faamaumauina i le Mataupu Faavae ma Feagaiga 76, na faamautuina mai ai le moni ma le paia o Iesu Keriso, na aoao mai ai e uiga i le toilalo o Satani ma atalii o le malaia, ma faamatalaina mai ai malo e tolu o le mamalu ma i latou o e o le a mautofi i le malo taitasi.

O leMataupu Faavae ma Feagaiga 76 o le a suesueina i ni lesona se tolu. I le lesona muamua lenei, o le a e aoao ai e uiga i le naunautai o le Alii e faamanuia i tatou, ma e uiga i faatinoga a le Perofeta o Iosefa Samita ma Sini Rikitone na taitai atu ai i lo laua mauaina o le faaaliga vaaia. O le a e aoao ai foi e uiga i le toilalo o Satani ma le taunuuga o i latou o e mulimuli ia te ia.

Mataupu Faavae ma Feagaiga 76:1-10

Ua folafola mai e le Alii faamanuiaga ia i latou o e faamaoni ia te Ia

Afai e mafai ona e filifilia se tagata se toatasi e faamamaluina, o ai lea tagata ma aisea?

O loo aoao mai leMataupu Faavae ma Feagaiga 76:1–5 e faapea, o le Alii e atamai, mamana, faavavau, alofa mutimutivale, ma agaalofa. Ua aoao mai foi lefuaiupu e 5 o le a Ia faamamaluina i tatou pe a tatou agavaa. Faitau le fuaiupu e 5, ma faailoa mai mea e tatau ona tatou faia ina ia faamamaluina ai e Iesu Keriso.

I le tulaga lenei, o le matatau i le Alii o lona uiga o le ava, faamamalu, faaaloalo, ma alolofa ia te Ia. E tusa ai ma le afioga a le Alii i le fuaiupu e 5, ua tatou aoao ai afai tatou te ava ma auauna i le Alii, o le a Ia faamamaluina foi i tatou.

Faitau le Mataupu Faavae ma Feagaiga 76:6–9, ma vaavaai mo auala o le a faamamaluina ai e le Alii i latou o e ava ma auauna ia te Ia. A o e faitau, atonu e aoga le iloa i tusitusiga paia o le faaupuga mealilo e masani ona faasino i upumoni faaleagaga ia e pau lava le ala e aoaoina ai, e ala lea i faaaliga.

E tusa ai ma mea na e faitauina i le fuaiupu 6–9, faaopoopo atu i le mataupu faavae muamua: Afai tatou te ava ma auauna atu i le Alii, o le a Ia faamamaluina i tatou e ala i le .

Faitau le Mataupu Faavae ma Feagaiga 76:10, ma faailoa mai se mataupu faavae e faatatau i le ala o le a faaali mai ai e le Alii upumoni ia i tatou.

1. Mafaufau loloto i le mataupu faavae e faapea e faamalamalamaina i tatou e le Alii e ala i le Agaga. Ina ia fesoasoani ia te oe e manatua taimi na faamalamalamaina ai oe e ala i le Agaga, faauma le vaega lenei i lau api talaaga mo le suesueina o tusitusiga paia: Sa ou lagonaina talu ai nei le faamalamalamaina e ala i le Agaga ina ua ou …

Mataupu Faavae ma Feagaiga 76:11-19

Ua faamatala mai e Iosefa Samita ma Sini Rikitone tulaga na taitai atu ai i le la faaaliga vaaia

O le faaaliga vaaia o loo faamaumauina i le Mataupu Faavae ma Feagaiga 76, sa maua i le faatoaga a John Johnson, i Hairama, Ohaio.

O le faaaliga vaaia na faaali mai i le Perofeta o Iosefa Samita ma Sini Rikitone, o se faataunuuga o folafolaga a le Alii o loo i le Mataupu Faavae ma Feagaiga 76:5–10. Faitau le Mataupu Faavae ma Feagaiga 76:11–14, ma matau le auala na faamamaluina ai e le Alii ia Iosefa Samita ma Sini Rikitone e ala i le faaalia mai o le upumoni ia i laua.

Pe na e faaaluina se taimi e faitau ai tusitusiga paia ae sa e le malamalama i mea na e faitauina? O le a le mea na e faia ia malamalama lelei ai i tusitusiga paia?

O mea sa faia e Iosefa Samita ma Sini Rikitone a’o le’i faaali mai ia i laua lenei faaaliga vaaia, e mafai ona aoao ai i tatou i auala e mafai ona tatou malamalama lelei ai i mau ma valaaulia ai le Agaga e faaali mai upumoni ia i tatou. Faitau le folasaga o le vaega mo le Mataupu Faavae ma Feagaiga 76, ona faitau lea o le Mataupu Faavae ma Feagaiga 76:15–19. A o e faitau, vaavaai mo mea na fai e Iosefa ma Sini na mafai ai ona la maua le malamalama e uiga i mau e ala i le faaaliga.

Ia matau o le taimi lea a’o la suesue ma manatunatu loloto i mau na faapea ona faamalamalamaina ai e le Agaga o laua malamalamaaga. Ina ia manatunatu loloto i mau o lona uiga o le mafaufau loloto po o le mafaufau i mea e te faitauina. O le faataitaiga a Iosefa ma Sini ua faaali mai ai ia i tatou e faapea, afai tatou te suesue ma le agaga tatalo ma mafaufau loloto i tusitusiga paia, e mafai e le Alii, ona faateleina lo tatou malamalama.

Na faamalamalama mai e Elder D. Todd Christofferson o le Korama a Aposetolo e Toasefululua, le auala e suesue ai ma le agaga tatalo ma mafaufau loloto i tusitusiga paia: “O lo’u fai atu e ‘suesue,’ o lona uiga, e sili atu nai lo le na ona faitau. … Ou te iloa o nisi taimi tou te faitauina ai ni nai fuaiupu, ona mafaufau lea i ai, ma toe faitau ma le faaeteete na lava fuaiupu, ma a o outou mafaufau pe o le a le uiga, tou te tatalo mo se malamalama, tuufesilisili i lou mafaufau, ma faatalitali mo ni lagona faaleagaga, ma tusitusi i lalo lagona ma malamalamaaga e oo mai ina ia mafai ai ona outou manatua ma aoao atili ai. O le suesue faapea, atonu e le tele ni mataupu po o ni fuaiupu tou te faitauina i se afa itula, ae peitai o le a e tuua ai se vaega i lou loto mo le upu a le Atua, ma o le a fetalai atu o Ia ia te oe” (“Pe a Liua Mai Oe,” Ensign po o le Liahona, Me 2004, 11).

2. Tali le vaega lenei i totonu o lau api talaaga mo le suesueina o tusitusiga paia:

   1. O a ni taunuuga na e mauaina e ala i le suesueina ma le agaga tatalo, ma mafaufau loloto i tusitusiga paia?

   2. Tusi se faatinoga se tasi na ta’ua mai e Elder Christofferson o le a e faaaogaina i au lava suesuega o tusitusiga paia.

Mataupu Faavae ma Feagaiga 76:20-24

Na vaai Iosefa Samita ma Sini Rikitone i le Tama Faalelagi ma Iesu Keriso

A o faaali mai le faaaliga vaaia, na faapea ona vaai le Perofeta o Iosefa Samita ma Sini Rikitone ia Iesu Keriso i Lona mamalu ma le matagofie.

3. Tusi se siata e i ai ulutala nei e tolu i lau api talaaga mo le suesueina o tusitusiga paia:

   O mea na laua vaaia:	O mea na laua faalogoina:	O mea na laua aoaoina mai:

   1. Faitau le Mataupu Faavae ma Feagaiga 76:20–24, ma tusi ai upu ma fasifuaitau mai nei fuaiupu e fetaui ma ulutala e tatau i ai.

   2. E faavae i luga o mea na vaaia, faalogoina, ma aoaoina e Iosefa Samita ma Sini Rikitone, fai se lisi o ni upumoni pe a ma se lua e uiga ia Iesu Keriso o loo aoaoina mai i nei fuaiupu. Ona tusi lea o lau molimau e uiga i se tasi o nei upu moni ma pe faapefea ona e iloa, ma pe aisea e te talitonu ai e moni.

Mau Fesootai

E masani lava, e mafai e se mau se tasi ona faamalamalama pe faamanino se fuaitau po o se manatu faavae o loo maua i se isi mau. Faafesootai ia mau i le tasi ma le isi e ala i le faaaogaina o vaefaamatalaga o mau, faasino upu, po o le Taiala i Autu po o le Taiala i Tusitusiga Paia, e fesoasoani e tatala ai le uiga o se mau.

Mau Tauloto—MF&F 76:22–24

O leMataupu Faavae ma Feagaiga 76:22–24 o se mau tauloto. Atonu e te manao e faailoga i se auala iloga e fesoasoani e faigofie ai ona maua i le lumanai.

4. Sa molimau mai le Perofeta o Iosefa Samita ma Sini Rikitone e faapea o Iesu Keriso o se Tagata soifua, ma faamamaluina. Su’e nisi faataitaiga se lua i tusitusiga paia o ni taimi na vaai ai se isi tagata i le Faaola toetu. Faaaoga vaefaamatalaga, Taiala mo Autu, po o le Taiala i Tusitusiga Paia e fesoasoani ia te oe. Tusi i lau api talaaga mo le suesueina o tusitusiga paia ia mau mo faataitaiga e te maua.

Mataupu Faavae ma Feagaiga 76:25-29

Ua vaai Iosefa Samita ma Sini Rikitone i le faaaliga vaaia i le toilalo o Satani

Fai le suega lenei e ala i le makaina o faamatalaga taitasi pe moni (M) pe sese (S).

1. Sa iloga Satani o Lusifelo.

2. O Satani sa o se agaga sa pule i le afioaga o le Atua.

3. Sa le’i faamoemoe Satani e le usitai i le Tama Faalelagi ma Iesu Keriso.

4. Sa alalaga le lagi ina ua tuli i fafo Satani.

5. O loo tau Satani ma le Au Paia a le Atua.

A uma ona e faia le suega puupuu, toe faamanatu le Mataupu Faavae ma Feagaiga 76:25–29, lea o loo faamatala ai le faaaliga vaaia a le Perofeta o Iosefa Samita ma Sini Rikitone e uiga i le toilalo o Satani. Ia faia soo se suiga i au tali e faavae i luga o mea na e faitauina, ona siaki lea i ai o au tali i le faaiuga o le lesona lenei.

Mataupu Faavae ma Feagaiga 76:30-49

Ua vaai Iosefa Samita ma Sini Rikitone i le faaaliga vaaia i puapuaga o atalii o le malaia

I le taimi o se taua, o le a se faalata? O leMataupu Faavae ma Feagaiga 76:30–49 e faatatau i tagata taitoatasi o e e filifili e avea ma ni tagata faalata i le Faaola. O nei tagata ua ta’ua o atalii o le malaia. Faitau le Mataupu Faavae ma Feagaiga 76:30–35, ma vaavaai mo filifiliga e taitai atu ai tagata e avea ma atalii o le malaia.

O atalii o le malaia e ese mai i tagata o le Ekalesia o e sa i ai ni molimau malolosi o le upumoni ae mulimuli ane ua pauu ese, mai le avea ma tagata malolosi ma mulimuli i mataupu faavae o le talalelei. O atalii o le malaia e solia le agasala e le mafaamagaloina i le faafitia o le Agaga Paia.

Na aoao mai e le Perofeta o Iosefa Samita le mea lenei e uiga i le agasala e le mafaamagaloina: “O le a se mea e faia e se tagata e solia ai le agasala e le mafaamagaloina? E tatau ona ia maua le Agaga Paia, tatala mai le lagi ia te ia, ma iloa le Atua, ona agasala lea e faasaga ia te ia. A uma ona agasala se tagata e faasaga i le Agaga Paia, e leai se salamo mo ia. E tatau ona ia faapea mai e le o susulu le la, ae o loo ia vaai atu i ai; e tatau ona ia faafitia Iesu Keriso ae ua tatalaina le lagi ia te ia, ma ia teena le ata o le faaolataga ae o loo pupula atu ona mata i lona moni“ (i le History of the Church, 6:314).

O le solia o le agasala e le mafaamagaloina, e manaomia ai se malamalama faapitoa o le Faaola e maua e ala i se aafiaga paia ia te Ia. Na fesoasoani mai Peresitene Spencer W. Kimball ia tatou malamalama i le uiga o lenei mea, mo le tele o tagata o le Ekalesia: “O le agasala e faasaga i le Agaga Paia e manaomia ai se malamalamaaga e faapea, ua iloa lelei le faigata i tagata masani ona solia se agasala faapea” (The Miracle of Forgiveness [1969], 123).

Faitau le Mataupu Faavae ma Feagaiga 76:36–38, 44–49, ma vaavaai mo le tulaga o atalii o le malaia.

O atalii o le malaia o le a lē togiolaina mai le oti faaleagaga, po o le oti lona lua, ma o le a lē mautofi i se malo o le mamalu pe a mavae lo latou toetutu. Nai lo lena, o le a latou mafatia e faavavau.

I le taimi o le faaaliga i atalii o le malaia, sa aoaoina ai e le Perofeta o Iosefa Samita ma Sini Rikitone se mataupu faavae o le faamoemoe. Faitau le Mataupu Faavae ma Feagaiga 76:39–43, ma vaavaai mo upu ma fuaitau o loo aoao mai ai le mataupu faavae lenei: E ala i le Togiola a Iesu Keriso, o fanau uma a le Atua, vagana ai atalii o le malaia, e mafai ona faaolaina mai le agasala ma le oti.

Mau Tauloto—Mataupu Faavae ma Feagaiga 76:40–41

Faitau le Mataupu Faavae ma Feagaiga 76:40–41. Ona o lenei fuaitau o se mau o mau tauloto, atonu e te manao e faailoga i se auala iloga e fesoasoani e te iloagofie ai i le lumanai. O le upu talalelei o lona uiga o tala e lelei.

5. I lau api talaaga mo le suesueina o tusitusiga paia, tusi ai se ulutala puupuu e aotele ai le tala e lelei o loo aoaoina i le Mataupu Faavae ma Feagaiga 76:40–41. Ona tusi lea o ni nai fuaiupu e faamatala ai pe aisea ua avea ai lenei mea ma tala e lelei ia te oe. Atonu e te manao e tusi le mau ma faapipii i se mea e mafai ona e galue ai i le taulotoina i nai aso o loo sosoo ai.

6. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Mataupu Faavae ma Feagaiga 76:1–49 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lo’u faiaoga:

O tali i le galuega faatino moni–sese:

O le faamatalaga 1 e moni (tagai i le MF&F 76:26, 28).

O le faamatalaga 2 e moni foi (tagai i le MF&F 76:25–27). O le uiga o le igoa Lusifelo o le aumai malamalama po o le tagata susulu. Sa avea Lusifelo “o se atalii o le taeao,” lea o loo faailoa mai ai “o ia o se tasi o fanau agaga sa muai fanaua a le Tama” (Bruce R. McConkie, Mormon Doctrine, 2nd ed. [1966], 744).

O le faamatalaga 3 e sese (tagai i le MF&F 76:25, 28). Na saili Satani e fao faamalosi le nofoalii o le Tama Faalelagi ae ave Lona mana, malo, ma le mamalu…II le muai olaga, sa fouvale Lusifelo i le Tama Faalelagi ma Iesu Keriso ma na tuli ai i fafo.

O le faamatalaga 4 e sese foi (tagai i le MF&F 76:26). Na tutulu le lagi i le aveesea o Lusifelo, ma sa tuuina i ai le igoa o le Malaia, o lona uiga o le faafanoga po o le malaia.

O le faamatalaga 5 e moni (tagai i le MF&F 76:29). Mafaufau e faailoga le fuaitau o loo i le fuaiupu e 29 lea o loo aoao mai e faapea, o loo tau Satani ma le Au Paia a le Atua. Mafaufau loloto i auala ua e vaaia o loo siitaua atu ai Satani e faasaga i le Au Paia a le Atua i aso nei.