Iunite 26: Aso 4
Mataupu Faavae ma Feagaiga 123; O Le Faatuina o Navu
Faatomuaga
A o faafalepuipuiina le Perofeta o Iosefa Samita i le Falepuipui o Liperate i Liperate, Misuri, mai ia Tesema 1838 e oo ia Aperila 1839, sa ia tusiaina atu ni tusi faamafanafana ma fautuaga i le Au Paia. O leMataupu Faavae ma Feagaiga 123 o se vaega mai se tusi i le aso 20 Mati, 1839, lea sa ia tusiaina atu i le Au Paia. I lenei vaega, na tuuina atu ai e Iosefa se fautuaga i le Au Paia o e na tulieseina mai Misuri. Ina ua uma ona faatagaina Iosefa Samita e sola ese mai le faafalepuipuiina, sa toe faatasi atu o ia i le Au Paia ma galulue ma i latou e faatu le aai o Navu, Ilinoi.
Mataupu Faavae ma Feagaiga 123:1–6
Ua fautuaina e Iosefa Samita le Au Paia e ao mai ma lolomi ma faasalalauina tala o a latou sauaga ma puapuaga
Ia Mati 1839, sa mafatia ai le Au Paia i sauaga ogaoga i Misuri. Sa taofia le Perofeta o Iosefa Samita ma nisi o isi taitai o le Ekalesia i le falepuipui i Liperate, Misuri, ae sa tutuliese le Au Paia mai le setete o Misuri i le vaitaimi o le maatiati o le masina taumalulu ona o le poloaiga a Kovana Lilburn W. Boggs e fasioti [tagata Mamona].
Faitau le faamatalaga lenei, lea o loo faamatalaina ai nisi o mea sese na faia i le Au Paia: “Ia avea lenei faamatalaga e faamaonia ai o a’u, o Delia Reed, na siitia atu i Misuri i le tausaga e 1836. Na maliu lo’u toalua a’o le’i leva ona matou taunuu ma tuua ai a’u ma le fanau laiti e toafitu. Ona ou siitia atu lea i le Itumalo o Caldwell, faia ai se alualu i luma, [ma] faaauau ai i le faatoaga e pei ona taua, seia oo i le tautoulu o le 1838. Ina ua tulai mai faafitauli i le va o tagata o le afioaga ma Mamona, o a’u, faatasi ma tagata uma o le matou faapotopotoga, sa noatia ina ia tuua le setete. … Sa noatia a’u ina ia ositaulaga le tele o a’u meatotino [ma] sa [oo] ina faataapeapeina solo lo’u aiga, ma sa ou maua mai ni nai tupe itiiti i aso taitasi mai tagata ese” (Delia Reed, i le Mormon Redress Petitions: Documents of the 1833–1838 Missouri Conflict, ed. Clark V. Johnson [1992], 523; ua faalaugatasia ia faailoga, mataitusi tetele, ma le sipelaga).
Na tuuina atu e Sister Reed lenei faamatalaga aloaia i se taitai o le faamasinoga. Mafaufau loloto pe aisea atonu na ia tuuina atu ai lenei faamatalaga.
Faitau le Mataupu Faavae ma Feagaiga 123:1–5, ma vaavaai mo le mea na fautuaina e le Perofeta o Iosefa Samita le Au Paia e fai. Atonu e aoga le iloa o le fuaiupu e 5 o le fasifuaitau “o faiga faatiapolo” e faasino i se faaputuga o pepelo amioleaga, ae o le fasifuaitau “faamalosiga amioleaga ma fasioti tagata” e faatatau i faiga faatiapolo ma le saua.
Faitau le Mataupu Faavae ma Feagaiga 123:6, ma vaavaai mo mafuaaga na ala ai ona faatonuina le Au Paia e ao mai faamatalaga ma tala e uiga i o latou sauaga ma mafatiaga. (A o e faitau, atonu e fesoasoani le iloa o le fuaitau “faatonuina ai i tatou” o lona uiga o le “manaomia mai ia i tatou.”)
O le toatele o le Au Paia sa usiusitai i le fautuaga a le Perofeta ma aoina mai le tele o tala o o latou sauaga, lea na aofia ai le faatafunaga ma le faaleagaina o o latou fale, lafumanu, ma isi meatotino; o sauaga faaletino; ma e oo lava i le maumau ai o ola. Aisea e te manatu na taua ai i le Au Paia le aoina mai o nei tala ma auina atu i taitai o le malo, nai lo na o le faatalitali po o le faamoemoe i le Atua e foia o latou faafitauli mo i latou? O se tasi o upumoni e mafai ona tatou aoao mai i le Mataupu Faavae ma Feagaiga 123:6 o le o le a faataunuuina e le Alii Ana folafolaga pe a uma ona tatou faia la tatou vaega. Mafaufau loloto pe aisea e te manatu ai, ua faamoemoe mai le Alii ia i tatou e fai la tatou vaega ae a’o le’i Ona faataunuuina Ana folafolaga.
-
Tali le fesili lenei i lau api talaaga mo le suesueina o tusitusiga paia: O le a se taimi na e vaaia ai le faataunuuina o lenei upumoni i lou lava olaga po o le olaga o se tasi e te iloa?
Mataupu Faavae ma Feagaiga 123:7-17
Ua fautuaina e Iosefa Samita le Au Paia e fesoasoani atu ia i latou o e ua faaseseina ona o mea sese
Vaai faalemafaufau e faapea ua tuuina atu ia te oe se tofiga e tusi se lipoti e uiga i le Ekalesia mo se tasi o au vasega o le aoga. O se vaega o le tulaga manaomia, e tatau lava ona aofia ai ia le itiiti ifo ma le tolu ni puna o faamatalaga. Mafaufau pe o le a faapefea ona e tali i fesili nei:
-
O a ni puna [o faamatalaga] e te ono faaaogaina mo lau lipoti?
-
Aisea e taua ai po o a puna [o faamatalaga] e faaaogaina e tusi ai e uiga i le Ekalesia?
-
E faapefea ona e iloa po o le fea o puna o faamatalaga e sa’o lo latou faamatalaina o le Ekalesia?
Faitau le Mataupu Faavae ma Feagaiga 123:7–10. Ina ua tusia e le Perofeta o Iosefa Samita le tusi lenei, sa anoanoa’i pepelo sa faasalalauina e uiga i le Ekalesia. Na ta‘u atu i le Au Paia e faapea, o lo latou “tiute lē maʼalofia” (MF&F 123:7, 9) le ao mai ma lolomi ma faasalalauina tala o o latou sauaga ma puapuaga e tali atu ai i nei pepelo.
Faitau le Mataupu Faavae ma Feagaiga 123:11–12, ma vaavaai mo mafuaaga faaopoopo na faatonuina ai le Au Paia e ao mai ma lolomi ma faasalalauina nei tala.
-
-
E tusa ai ma le Mataupu Faavae ma Feagaiga 123:12, o a auala e faatauasoina ai le toatele o e loto mama mai le iloa o le mea moni?
-
E faapefea i le lolomiina o le upumoni e uiga i sauaga ma mafatiaga o le Au Paia i le taimi lea ona fesoasoani i isi ia maua ai le moni o le talalelei?
-
E tusa ai ma le fuaiupu e 12, aisea ua toatele ai tagata i le lalolagi e taofia mai le upumoni? Tali le fesili lenei e ala i le faamaeaina o le upumoni lenei: E toatele o loo taofia mai i le upumoni ona …
-
O loo i ai pea lava le toatele o tagata i aso nei “o e ua faatauasoina i le taufaasese poto o tagata” ma na pau le mea o loo taofia mai ai le upumoni ona latou te le iloa le mea e maua ai (MF&F 123:12
A o e faitau i le saunoaga lenei a Elder M. Russell Ballard o le Korama a Aposetolo e Toasefululua, vase mea na ia saunoa mai e taofia ai tagata mai le iloaina o le upumoni e uiga i le Ekalesia i o tatou aso: “Ua toatele naua tagata e le o lava le malamalama i le Ekalesia ona o le tele o faamatalaga latou te faalogo i ai e mai lipoti o talafou lea e masani ona faatupuina i fefinauaiga. O le tele ona gauai atu i fefinauaiga ua mafua ai ona i ai ni manatu sese o tagata i le uiga moni O Le Ekalesia a Iesu Keriso o le Au Paia o Aso e Gata Ai” (“Faasoaina Atu o le Talalelei e Faaaoga ai le Initoneti,” Ensign, Iulai 2008, 62).
E tutusa lava ma le Au Paia i le 1839, ua faatonuina i tatou e fesoasoani i isi ia maua se malamalamaaga sa’o e uiga i le Ekalesia—i ona tagata, taitai, talitonuga, talafaasolopito, aoaoga, ma faatinoga.
-
A o e faitauina le faamatalaga lenei mai ia Elder Ballard, vaavaai mo se auala se tasi na ia saunoa mai e mafai ona tatou fesoasoani atu ai i isi ia maua se malamalamaaga sa‘o e uiga i le Ekalesia:
“O loo i ai talanoaga o loo faia pea e uiga i le Ekalesia. O na talanoaga o le a faaauau pea ona faia e tusa pe tatou te filifili e auai atu i ai pe leai. Ae le mafai ona tatou tutu i autafa ae o loo taumafai isi, e aofia ai ma le au faitio, e faauiga mea o loo aoaoina atu e le Ekalesia. E ui o nisi talanoaga o loo i ai ni aofia e fiaafe pe fia foi miliona, ae o le tele lava, e matuai toalaiti lava. Ae o talanoaga uma lava e i ai se aafiaga ia i latou e auai atu i ai. O manatu e uiga i le Ekalesia e tulai mai i talanoaga taitasi. …
“Ou te fia talosaga atu nei ina ia outou auai i le talanoaga e ala lea i le auai i luga o le Initoneti e faasoa atu ai le talalelei ma faamalamalama atu i ni faaupuga faigofie ma le manino le savali o le Toefuataiga. … O lenei faiga, e moomia ai lou malamalama lelei i mataupu faavae o le talalelei. E taua le mafai ona e ofoina atu se molimau manino ma sa’o e uiga i upumoni o le talalelei” (“Faasoaina Atu o le Talalelei e Faaaoga ai le Initoneti,” 61, 62).
-
-
Tusi e uiga i se taimi sa e fesoasoani ai, pe na fesoasoani ai se tagata e te iloa i isi ia malamalama atili e uiga i le Ekalesia.
-
Filifili se tasi o auala na e lisiina i le galuega atofaina 3, ma tusi po o le a se auala o le a e faia ai lena mea, e fesoasoani ai i isi ia iloa ma maua upumoni e uiga i le Ekalesia ma le talalelei.
-
Faitau le Mataupu Faavae ma Feagaiga 123:13–16, ma vaavaai po o a mea na ta’u atu i le Au Paia e uiga i a latou taumafaiga e tuuina atu se tala sa’o e uiga i o latou aafiaga i isi. E tusa ai ma le fuaiupu e 15, aisea na ta’u atu ai ia i latou e aua ne’i manatu i a latou taumafaiga o ni “mea faatauvaa”?
O le tasi o mataupu faavae e mafai ona tatou aoaoina mai i le Mataupu Faavae ma Feagaiga 123:15 o le o a tatou faaiuga e usitai i poloaiga a le Alii e foliga mai e faatauvaa, e mafai ona i ai se aafiaga tele i o tatou olaga i le lumanai.
E tusa ai ma le Mataupu Faavae ma Feagaiga 123:16, e mafai faapefea e se mea faatauvaa e pei o se foeuli (o le uili e faatonutonuina le foe) ona aafia ai se vaa tele lava? (I le fuaiupu lenei o le fuaitau “e taofiofi faasagatonu ai i le matagi ma galu” e faatatau i le mafai ona liliu le vaa ina ia mafai ona tausisia lona paleni ma le sa’e ai i le taimi o se afa.)
-
-
E faapefea ona pei a tatou faaiuga laiti o le foeuli o se vaa?
-
E mafai faapefea e nei faaiuga ona fesoasoani e faatumauina lou paleni i le taimi o afa o le olaga?
-
O a ni faaiuga laiti o loo e faia i lou olaga i le taimi nei o le a mafai ona i ai se aafiaga tele i lou lumanai?
-
Faitau le Mataupu Faavae ma Feagaiga 123:17, ma vaavaai pe faapefea ona fesootai le fuaiupu lenei i le mataupu faavae na faailoa mai i le fuaiupu e 6: O le a faataunuu e le Alii Ana folafolaga e fesoasoani mai ia i tatou pe a uma ona tatou faia la tatou vaega.
E faavae i luga o mea na tusia e le Perofeta o Iosefa Samita, ua tatou aoaoina ai, afai tatou te faia mea uma e mafai ona oo i ai lo latou malosi ina ia usiusitai i poloaiga a le Alii, ona mafai lea ona tatou maua le faamautinoaga e faapea, o le a faaaoga e le Atua Lona mana e fesoasoani ai ia i tatou e tusa ai ma Lona finagalo ma le taimi.
-
-
Aisea e te manatu ai, e tatau ona tatou “faia mea ua i ai i lo tatou mana” (MF&F 123:17) a o lei mafai ona tatou maua le faamautinoaga o le a fesoasoani mai le Atua ia i tatou?
-
Aisea e te manatu e taua ai le faia ma le fiafia o mea uma e mafai ona oo i ai lo tatou malosi?
-
E mafai ona e mautinoa pe a e faia mea uma e te mafaia e mulimuli ai ma le usiusitai i poloaiga a le Atua, o le a Ia faataunuuina Ana folafolaga.
O Le Faatuina o Navu
Ina ua mavae le tutuliese faamalosi o i latou mai Misuri, sa maua e le Au Paia le sulufaiga i Quincy, Ilinoi, ma isi nuu laiti i Ilinoi ma Aioua. Su’e Quincy i le faafanua 5 o talafaasolopito o le Ekalesia, “Eria i Misuri, Ilinoi, ma Aioua i le USA,” i au tusitusiga paia.
Ia Aperila i le 1839, na faatagaina ai e leoleo o le falepuipui o le Falepuipui i Liperate, Misuri, ia Iosefa Samita e sola ese, ma sa faatasi atu o ia i lona aiga i Quincy, Ilinoi. I lalo o le taitaiga a le Perofeta, na faatau mai ai e le Ekalesia ni fanua mai itu uma e lua o le Vaitafe o Misisipi i le itu i matu o Quincy. O le itu i sisifo o le vaitafe sa o se vaega o le Teritori o Aioua, ae o le itu i sasae sa o se vaega o le setete o Ilinoi. Sa faatuina e le Au Paia le laumua fou o le Ekalesia i le itu o Ilinoi i se nofoaga na taua o Commerce, lea sa latou toe faaigoaina o Navu. O le upu Navu o se upu Eperu o lona uiga o le “matagofie.”
A’o tapenaina e le Au Paia ia laumua i Navu, sa musuia le Perofeta o Iosefa Samita e faatulaga le Aualofa; sa faaali mai e le Alii ia sauniga o le papatisoga mo e ua maliliu, o le faaeega paia i le malumalu, ma le faamauga o le faaipoipoga; ma sa faalauteleina atu le galuega faafaifeautalai i le lalolagi atoa.
-
-
Sa ou suesueina le Mataupu Faavae ma Feagaiga 123 ma le “O Le Faatuina o Navu,” ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: