Iunite 27: Aso 3

Mataupu Faavae ma Feagaiga 127; 128:1–11

Faatomuaga

O leMataupu Faavae ma Feagaiga 127 o loo i ai se tusi mai le Perofeta o Iosefa Samita, na tusia i le aso 1 o Setema, 1842, na poloaiina ai le Au Paia e tausia faamaumauga o papatisoga na latou faia mo e ua maliliu. Pe a ma se vaiaso mulimuli ane, na tusia ai e Iosefa se isi tusi e uiga i le mataupu o le papatisoga mo e ua maliliu. O le Mataupu Faavae ma Feagaiga 128 o loo i ai lenei tusi, lea o loo aoao mai ai le pogai tatou te tausia ai faamaumauga o sauniga faaola e faataunuuina.

Mataupu Faavae ma Feagaiga 127:1–4

Ua olioli Iosefa Samita i sauaga ma puapuaga

Faitau le Mataupu Faavae ma Feagaiga 127:1, ma vaavaai po o a tofotofoga na oo i le Perofeta o Iosefa Samita i Navu, Ilinoi, i le 1842.

Ia Me 1842, na faamanualia ai e se tagata faaoosala e le’i mailoa ia Lilburn W. Boggs, o le sa avea muamua ma kovana o Misuri ma o le sa tuuina maia se poloaiga e faatea ese le Au Paia. Sa tuuaia e taitai o Misuri le Perofeta o Iosefa Samita i lona faatonuina o se tasi e fasioti ia Boggs ma sa taumafai e toe aumai le Perofeta i Misuri mo le faamasinoina. Sa tuua e le Perofeta ia Misuri i ni tausaga ua mavae ma sa nofo i le eria o Navu, Ilinoi, i lena taimi. Na iloaina afai e toe foi mai o ia i Misuri, o le a fasiotia o ia, o lea na ia sola ai mai taitai o Misuri mo se taimi, e aloese ai mai le molia sese o ia. O Ianuari 1843 na iloa ai le iuga o taualumaga e pu’e ma tuulima atu Iosefa Samita i Misuri sa o se faiga faasolitulafono.

O leMataupu Faavae ma Feagaiga 127 o se tusi, na tusia i le aso 1 o Setema, 1842, sa tusi atu ai le Perofeta o Iosefa Samita i le Ekalesia a o fesolaa’i solo e aloese mai le pu’e sese o ia e taitai o le [setete] o Misuri. O lenei tusi sa faitau atu i le Au Paia i Navu i ni nai aso mulimuli ane.

Faitau le Mataupu Faavae ma Feagaiga 127:2, ma vaavaai mo le auala na tali atu ai Iosefa i puapuaga. A o e faitauina, atonu e fesoasoani le iloa o le upu masani o lona uiga o le masani i se mea.

1. Tali fesili nei i lau api talaaga mo le suesueina o tusitusiga paia:

   1. O a uiga faaalia o Iosefa Samita agai i puapuaga?

   2. E faapefea ona mafai ona fesoasoani lana faataitaiga ia i tatou?

E faavae i mea na tusi atu ai le Perofeta i le Au Paia, e mafai ona tatou aoao ai o le, faalagolago i le Tama Faalelagi e mafai ona fesoasoani tatou te onosaia ai puapuaga. Toe faamanatu le Mataupu Faavae ma Feagaiga 127:2, ma mafaufau e faailoga upu po o fasifuaitau o loo aoao mai ai lenei upumoni.

2. I lau api talaaga mo le suesueina o tusitusiga paia, tusi ai le igoa o se tagata e te iloa (pe sa e aoao e uiga i ai) o le sa mafai ona onosaia tofotofoga aua sa faalagolago o ia i le Tama Faalelagi. Na faapefea ona fesoasoani le faalagolago i le Tama Faalelagi i lenei tagata e onosaia ai puapuaga?

Sa faamautinoa atu e le Perofeta o Iosefa Samita i le Au Paia e mafai ona latou olioli aua “o le Atua o Isaraelu o lo latou Atua” (MF&F 127:3). Faitau le Mataupu Faavae ma Feagaiga 127:4, ma vaai mo le mea na folafola mai e le Alii ia i latou o e o le a onosaia sauaga.

Mafaufau loloto i le faatuatua o le Au Paia o e na faaauau pea ona fausia le Malumalu o Navu, e ui lava ina sa faamata’uina i latou i sauaga. E faapefea e a latou faataitaiga ona faatosinaina oe pe a e feagai ma ni luitau faigata?

Mataupu Faavae ma Feagaiga 127:5-12

Ua fautuaina e le Perofeta o Iosefa Samita le Au Paia ina ia tausia faamaumauga o papatisoga latou te faataunuuina mo e ua maliliu

Ia manatua, e tusa ma le tasi ma le afa tausaga a’o le’i tusia e Iosefa Samita le tusi lea ua faamaumauina i le Mataupu Faavae ma Feagaiga 127, sa fofoga mai ai e le Alii i le Au Paia e faapea, o sauniga o le papatisoga mo e ua maliliu e faatinoina i totonu o le malumalu (tagai i le MF&F 124:30). Ae ui i lea, na faatagaina e le Alii le Au Paia e faia papatisoga mo e ua maliliu i le vaitafe ma auvai na lata ane, seia oo ina saunia se faatanoa o le vai papatisoga i totonu o le malumalu. O le taimi lava na saunia ai se faatanoa o le vai papatisoga, sa na o totonu loa o le malumalu e taliaina ai le faia o sauniga o le papatisoga mo e ua maliliu. Sa amata ona faataunuu e le Au Paia papatisoga mo e ua maliliu i le Malumalu o Navu ia Novema o le 1841.

Pe ua mafai ona e alu i le malumalu ma faia papatisoga mo e ua maliliu? Afai o lea, pe na e matauina pe sa i ai se tasi na nofo latalata i le faatanoa o le vai papatisoga?

Faitau le Mataupu Faavae ma Feagaiga 127:5–9, ma vaai po o ai e tatau ona i ai i le taimi e faia ai papatisoga mo e ua maliliu.

E tusa ai ma le fuaiupu e 7, aisea e taua ai le i ai o se tagata e tusi talafaamaumau e avea ma se molimau e vaaitino i le papatisoga?

E faaopoopo atu i le manaomia o se tasi e tusi talafaamaumau, e mafai foi ona tatou aoao mai i le fuaiupu e 7 e faapea o sauniga o le malumalu tatou te faia i le lalolagi e fusia i le lagi. Atonu e te manao e faailoga upu po o fuaitau o loo aoao mai i lenei aoaoga faavae. O le uiga o le fusia i le lagi o le, o loo aoga sauniga i le silafaga a le Tama Faalelagi.

3. Tali le fesili lenei i lau api talaaga mo le suesueina o tusitusiga paia: O a ni auala e te aafia ai i lenei aoaoga faavae pe a e auai i sauniga mo e ua maliliu?

I le Mataupu Faavae ma Feagaiga 127:10–12, tatou te aoao ai, sa manao Iosefa Samita e aoao atili le Au Paia e uiga i le papatisoga mo e ua maliliu, ae talu ai ona sa lafilafi solo o ia, o lea sa le mafai ai ona ia faia lena mea. Sa ia folafola atu e tusi atu i le Au Paia ni tusi faaopoopo e uiga i le papatisoga mo e ua maliliu ma isi mataupu taua.

Mataupu Faavae ma Feagaiga 128:1-11

Ua faamalamalama mai e Iosefa Samita le mafuaaga tatou te tausia ai faamaumauga mo sauniga o le faaolataga

E tusa ma se vaiaso talu ona ia tusia le tusi ua faamaumauina i le Mataupu Faavae ma Feagaiga 127, sa toe tusia ai e le Perofeta o Iosefa Samita se isi tusi i le Au Paia e faatatau i papatisoga mo e ua maliliu. O anotusi o lenei tusi o loo i le Mataupu Faavae ma Feagaiga 128.

I le Mataupu Faavae ma Feagaiga 128:1–5, na aoao atu ai e Iosefa Samita, e tatau ona tofia ni tusi talafaamaumau i le lotoifale e molimau ma faamaumauina le sauniga o le papatisoga mo e ua maliliu. Sa ia aoao atu foi, e tatau ona tofia se tusi talafaamaumau aoao e tuufaatasia faamaumauga i le lotoifale i luga o se faamaumauga aoao a le Ekalesia.

Ua e vaai i se tusifolau? O a ituaiga o avanoa e agavaa i ai le e umia le tusifolau? Aisea o le a le mafai ai ona e ulu atu i se isi atunuu i le tusifolau o se isi tagata? O le a se mea e mafai ona tupu pe afai e te taumafai e ulu atu i se isi atunuu, ae e le o atoatoa faamatalaga o loo i totonu o lou tusifolau?

Faitau le Mataupu Faavae ma Feagaiga 128:6–7, ma vaavaai po o a faamaumauga o le a faaaogaina e iloilo ai pe tatou te agavaa ina ia taliaina i le afioaga o le Atua. Ia matau e sili atu i le tasi le faamaumauga na ta’ua e le Aposetolo o Ioane ma le Perofeta o Iosefa Samita. Na la’ua ta’u mai e uiga “i tusi sa fofola; ma se tasi tusi,… o le tusi lea o le ola” (MF&F 128:6; tagai foi i le Faaaliga 20:12). O tusi muamua o loo ta’ua e Ioane o faamaumauga e tausia i le lalolagi, ae o le tusi o le ola o le faamaumauga lea e tausia i le lagi. O nei tusi o loo i ai se faamaumauga o a tatou galuega.

E pei lava ona manaomia e se tagata ia faamatalaga patino na tusia i lona tusifolau ina ia taliaina ai i se isi atunuu, tatou te manaomia foi ona tusia ni faamatalaga patino e faamaumauina i nei tusi ina ia mafai ona taliaina i le afioaga o le Atua.

Na aoao mai Peresitene Boyd K. Packer o le Korama a Aposetolo e Toasefululua:

“E tusa lava po o le a le tagatanuu po o le atunuu, pe o se alii po o se tamaitai, e le afaina po o le a le galuega, e le afaina po o a aoaoga, e tusa lava foi po o le a le augatupulaga e ola ai se tagata, o le olaga o se malaga toe foi atu mo i tatou uma lava, o le toe foi atu i le afioaga o le Atua i Lona malo selesitila.

“O sauniga ma feagaiga e avea ma o tatou agavaa mo le taliaina i Lona afioaga. O le agavaa mo le mauaina o ia [sauniga ma feagaiga] o le tausinioga lea o le olaga atoa; o le tausia pe a mauaina, o le lui lea o le olaga nei” (“Covenants,” Ensign, Me 1987, 24).

Mafaufau e faailoga le fuaitau “o soo se mea tou te faamauina i le lalolagi o le a faamauina foi lea i le lagi” Mataupu Faavae ma Feagaiga 128:8. Ona toe faitau lea o le Mataupu Faavae ma Feagaiga 128:8, ma vaavaai mo “se vaaiga ese mai o le faaliliuga” na tuuina mai e Iosefa Samita e uiga i lenei faamatalaga. Atonu foi e te manao e faailoga lena fasifuaitau.

A o e faitauina le fuaiupu e 8, atonu e fesoasoani le iloa o le propria persona [tagata patino] o lona uiga o le galue e fai ma sui o oe lava, ma e faatatau i tagata o e e papatisoina mo i latou lava. O fuaitau “o latou lava sui,” e faatatau ia i latou o e sa le mafai ona maua sauniga faaola o le papatisoga i le olaga nei ma e manaomia ona iai ni sui—isi tagata—ina ia papatisoina mo i latou.

E tusa ai ma le Mataupu Faavae ma Feagaiga 128:8, o a mea e lua e tatau ona tupu ina ia mafai ona faamauina ia sauniga i le lalolagi ma i le lagi? Ina ia tali lenei fesili, faatumu avanoa o le aoaoga faavae lenei: Pe a faataunuuina se sauniga e ala i le perisitua ma tausia faalelei se , o le sauniga ua faamauina i le lalolagi ma i le lagi.

4. Tali fesili nei i lau api talaaga mo le suesueina o tusitusiga paia:

   1. O le a sou manatu i le uiga o se sauniga ia faamauina i le lagi?

   2. O le a sou lagona pe a e mafaufau e uiga i lou auai i sauniga o le malumalu o le papatisoga ma le faamauga i le aumaia o faamanuiaga i tagata i le lalolagi o agaga?

Faitau le Mataupu Faavae ma Feagaiga 128:9, ma vaavaai mo le saunoaga a Iosefa Samita e uiga i lenei mataupu faavae.

O se tasi o mea ua tatou aoaoina i le fuaiupu e 9 o le, i tisipenisione uma lava o le perisitua, ua faatagaina ai e le Alii e le itiiti ifo ma se toatasi o Ana auauna e umia ma faaaoga ki o le perisitua mo faamauga.

Faitau le Mataupu Faavae ma Feagaiga 128:10–11, ma vaavaai mo le mea na tuuina atu e le Faaola ia Peteru.

E pei lava ona sa tuuina atu e le Faaola ia ki o le perisitua mo faamauga ia Peteru, ua Ia toe tuuina mai foi ia ki i o tatou aso.

5. Tali fesili nei i lau api talaaga mo le suesueina o tusitusiga paia:

   1. Aisea e taua ai le faia o sauniga, e pei o papatisoga mo e ua maliliu, i le pule e tatau ai?

   2. O le a se mea o le a e faia ona o mea ua e aoaoina i le aso?

6. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Sa ou suesueina le Mataupu Faavae ma Feagaiga 127; 128:1–11 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lo’u faiaoga: