Iunite 20: Aso 3
Mataupu Faavae ma Feagaiga 94–96
Faatomuaga
Na tuuina mai e le Alii le faaaliga ua faamaumauina i le Mataupu Faavae ma Feagaiga 94 i le aso 2 o Aokuso, 1833, ma faatonuina le Au Paia e faatulaga le aai o Katelani, Ohaio, e faapei o le aai o Siona i Misuri. Na poloaiina foi e le Alii le Au Paia e fausia se fale (se maota o le pulega o le Ekalesia) mo le Au Peresitene Sili ma se fale lomitusi, e faaopoopo atu i le malumalu, lea sa Ia poloaiina muamua ai le Au Paia e fausia. O le lua masina na muamua atu, i le aso 1 o Iuni, 1833, sa maua ai e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 95, lea na aoai ai e le Alii le Au Paia ona o le tuai o le fausiaina o le malumalu. O leMataupu Faavae ma Feagaiga 96 o loo i ai le faatonuga a le Alii e tofia ai Newel K. Whitney, “e pulea le” (MF&F 96:2) fanua lea o le a fausia ai i luga le malumalu i Katelani.
Mataupu Faavae ma Feagaiga 94
Ua poloaiina e le Alii le Au Paia e fausia ni fale se lua ma faamautu mai le manaomia ona fausia o le malumalu
Vaai faalemafaufau e faapea ua e maua le avanoa e malaga ai i se atunuu e tele ni ona aai. Ao e malaga, ua e matauina o loo i ai se faletaalo tele i le ogatotonu o aai taitasi. O le a se mea e ono tau mai e lenei mea e uiga i tagata o lenei atunuu?
Afai o le a e mamanuina se aai tele, o le a se mea o le a e tuuina i le ogatotonu o le aai? Aisea?
Faitau le Mataupu Faavae ma Feagaiga 94:1–2, ma vaavaai pe na faapefea ona faatonu e le Alii le aai o le siteki o Siona i Katelani, Ohaio ina ia mamanuina.
O le a se mea o tau mai e lenei mea e uiga i le taua o le malumalu i le Alii?
Faitau le Mataupu Faavae ma Feagaiga 94:3, 10, ma faailoa mai isi fale e lua na poloaiina e le Alii le Au Paia e fausia i Katelani.
O le poloaiga e fau nei fale ua faaalia ai le taua ua tuu e le Alii i sauniga o le malumalu, i le galuega a le Au Peresitene Sili i le mauaina o faaaliga ma le auaunaga i le Ekalesia, ma le lolomiina o tusitusiga paia ma isi galuega e poloai mai ai le Alii.
Faitau le Mataupu Faavae ma Feagaiga 94:6–8, 12, ma vaavaai mo fuaitau o loo talanoa mai i le paia o nei maota.
Na faatonuina e le Alii ia Ailama Samita, Reynolds Cahoon ma Iareto Kata e faatu se komiti o mea tau fale mo maota na ta’ua i lenei faaaliga (tagai i le MF&F 94:13–17).
Faitau le Mataupu Faavae ma Feagaiga 94:16, ma vaavaai mo le mea na tau mai e le Alii i le Au Paia e uiga i le fausiaina o fale mo le Au Peresitene Sili, ma mo le lolomiina [o tusitusiga paia].
Mafaufau pe aisea na taua ai le fausiaina muamua o le malumalu i lo o isi fale e lua. O le a se mea ua aoao mai i lenei mea i le taua o malumalu?
Mataupu Faavae ma Feagaiga 95
Ua aoai e le Alii le Au Paia mo le tuai ona fausiaina o le malumalu
Sa tuuina mai muamua e le Alii le poloaiga e fausia le Malumalu o Katelani i le Mataupu Faavae ma Feagaiga 88:119, lea sa faamaumauina i le aso 27–28, o Tesema, 1832.
Sue le folasaga o le vaega o le Mataupu Faavae ma Feagaiga 95 mo le aso na tuuina mai ai le faaaliga lenei. Mata o le a tonu lava le umi o le va o nei aso e lua?
I le taimi lenei, na maua ai e taitai o le Ekalesia se fanua i Katelani e fau ai le malumalu. Ae peitai, e oo ane i le aso 1 o Iuni, 1833, e le’i amataina lava e le Au Paia ona fau le malumalu pe na saunia foi le faavae.
Faitau le Mataupu Faavae ma Feagaiga 95:1-3, ma faailoa mai le mea na ta‘u mai e le Alii i le Au Paia e uiga i lo latou faatuai i le fausiaina o le malumalu.
Tagai i le fuaiupu 1 e faauma ai le faamatalaga lenei: E aoai e le Atua .
O le aoai o lona uiga o le faatonu malosi po o le faasa’o. I le fuaiupu 1, atonu e te manao e faailoga mafuaaga e aoai ai e le Atua i latou e alofa i ai o Ia.
Mafaufau pe o le a le auala e te ono tali atu ai pe a aoaiina oe pe faasa‘oina. A o e faitau le faamatalaga lenei, vaavaai mo auala na tali atu ai nisi o le usoga i le aoaiga a le Alii:
Ina ua uma ona maua e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 95, sa faia loa e taitai o le Ekalesia se konafesi e talanoaina ai le fausiaina o le malumalu. “O nisi sa mananao e fausia se fale e faaiviivi ma puipui laupapa, ae o isi sa mafaufau e fai se fale ogalaau. Sa faamanatu atu e Iosefa ia i latou, latou te le’i fausia se fale mo se tagata, ae mo le Atua; ‘ma o le a tatou, uso e,’ na ia fai atu ai, ‘fausia la se maota mo lo tatou Atua, i ogalaau? E leai, ua i ai sa’u fuafuaga e sili atu i lo o lena. Ua i ai la’u fuafuaga o le maota o le Alii, na tuuina mai e ia lava; ona o le a le toe umi ae outou vaai i ai, i le eseesega i le va o o tatou manatu ma lona finagalo i mea’” (Lucy Mack Smith, History of Joseph Smith by His Mother, ed. Preston Nibley [1958], 230). Ina ua uma ona faamalamalama atu e le Perofeta le mamanu atoa o le malumalu, sa fiafia uma le usoga. Sa latou malaga atu i le nofoaga e fausia ai le maota, aveese se pa, ma faalaugatasi le toga saito lea na totoina muamua ai e le aiga o Samita. Ina ua uma ona faamamaina le saito, na amata loa e Ailama Samita le “eliina o le faavae o le puipui, aua na ia tautino atu o ia le tagata muamua o le a amataina le fauina o le fale” (Lucy Mack Smith, History of Joseph Smith, 231).
-
I lau api talaaga mo le suesueina o tusitusiga paia, tusi ai le mea e mafai ona e aoaoina mai i nei usoga i le auala e tali atu ai i le aoaiga po o le faatonuga. E le gata i lea, tusi e uiga i se taimi na aoaiina ai oe ma e tali atu i ai e ala i le taumafai e faalelei atili.
Ia matau na faamatala e le Alii le tuai ona fauina e le Au Paia o le malumalu o “se agasala mamafa tele” (MF&F 95:3). Aisea e te manatu o le a ta’ua ai e le Alii le tuai o le fausiaina o le malumalu o se agasala mamafa tele? Suesue i le Mataupu Faavae ma Feagaiga 95:6 e vaai ai po o le a le mea na faatusa i ai e le Alii lenei agasala mamafa.
Mafaufau pe faapefea ona pei le le amanaiaina o poloaiga a le Alii—ae maise lava o le poloaiga e fausia se malumalu—i le savali i le pogisa i le aoauli.
Faitau le Mataupu Faavae ma Feagaiga 95:4, 8-9, ma faailoa mai mafuaaga na poloaiina ai e le Alii le Au Paia e fausia le Malumalu o Katelani. (O le fuaitau “ina ia mafai ona Ou faataunuu o laʼu galuega uiga ese” [MF&F 95:4] e faatatau i le galuega a le Alii i aso e gata ai, ma le auala e mafaufau ai tagata o e e le talitonu i faaaliga, asiasiga faalelagi, ma isi mea faaleagaga, o le Toefuataiga o le talalelei o se mea e ese lava.)
Mai nei fuaiupu ua tatou aoao ai i totonu o malumalu, e saunia ai e le Alii Ana auauna e fai Lana galuega ma faaee atu ia i latou le mana.
O le upu faaee o lona uiga o le tuuina atu i se tasi se meaalofa. Ina ia [maua] faaeega paia i le malumalu o lona uiga o le maua o le mana ma le atamai faaleagaga. I le Malumalu o Katelani, o le a toefuatai mai ai e le Alii ki taua o le perisitua e faatino ai sauniga faaola lea e na o totonu lava o malumalu e mafai ona tatou maua ai i aso nei: o le faaeega paia o le malumalu ma le faamauga i le malumalu (tagai i le MF&F 110).
Na saunoa Peresitene Thomas S. Monson i le taua o le mauaina o nei faamanuiaga o le malumalu: “A e le ulu atu i le Maota o le Alii ma maua faamanuiaga uma o loo faatalitali mai mo oe iina, e te lei mauaina mea uma o loo ofoina atu e le Ekalesia. O faamanuiaga taua uma ma sili ona maualuga o le avea ai ma tagata o le Ekalesia, o faamanuiaga na tatou te maua i malumalu o le Atua” (“O Le Malumalu Paia—o se Sulu Taiala i le Lalolagi,” Ensign po o le Liahona, Me 2011, 93).
-
O le fausiaina o le Malumalu o Katelani sa o se galuega tele mo le Au Paia. I le amataga o le 1833, sa laiti ifo ma le 200 tagata o le Ekalesia i Ohaio, ma o le toatele o i latou sa matitiva. Faitau le Mataupu Faavae ma Feagaiga 95:11–12, ma vaavaai mo le mea na folafola mai e le Alii pe afai o le a tausia e le Au Paia Ana poloaiga.
Sa amata loa e le Au Paia i Ohaio ma le faatuatua i le folafolaga a le Alii ona fausia le malumalu. Mai le Mataupu Faavae ma Feagaiga 95:11, ua tatou aoao ai, afai tatou te tausia poloaiga, o le a tatou maua le mana e fai ai mea na fofoga mai e le Alii tatou te faia. Atonu e te manao e tusi le mataupu faavae lenei i autafa o au tusitusiga paia.
-
-
O a nisi o tulaga e ono feagai ma oe lea e mafai ai ona e faaaoga lenei mataupu faavae?
-
O le a se taimi na e lagonaina ai ua e maua le fesoasoani a le Alii e fai ai se mea ona ua e tausia poloaiga?
-
Matau le fuaitau “o le a lē tumau pea le alofa o le Tamā e faatasi ma outou” i le Mataupu Faavae ma Feagaiga 95:12. Pe a tatou le usiusitai i poloaiga o le talalelei, e aveese mai ia i tatou faamanuiaga, e pei o le malamalama ma le atamai, o fua ia o le alofa o le Tama mo i latou o e faaali atu lo latou alolofa ia te Ia e ala i le usiusitai.
I le Mataupu Faavae ma Feagaiga 95:13–17, tatou te faitau ai, na tuuina mai e le Alii i le usoga ni faatonuga i le fua ma aoga o potu faapitoa o le Malumalu o Katelani. Faitau le fuaiupu e 14, ma vaavaai mo se auala se tasi na faailoa mai e le Alii o le a Ia faataunuu ai Lana folafolaga e tuu mai i Lona nuu le mana e fausia ai le malumalu.
O tamalii e toatolu lea na folafola mai le Alii e faaali i ai le auala e fau ai le malumalu o le Au Peresitene Sili. O le faamatalaga lenei o le a fesoasoani e te iloa ai le auala na faataunuuina ai lenei folafolaga:
Sa tatalo faatasi Iosefa Samita, Sini Rikitone, ma Feterika G. Viliamu ma vaai ai i le malumalu i se faaaliga. Ina ua uma ona vaavaai i le tino i fafo[o le malumalu], “sa foliga mai sa alu ae le fale i o [latou] luga” ma sa latou vaai i totonu o le fale e pei sa latou i ai moni i totonu (tagai i le Aoaoga a Peresitene o le Ekalesia: Iosefa Samita [2007], 271). Mulimuli ane, ina ua lata ina maea le malumalu, sa fai mai Feterika G. Viliamu, na foliga uma lava o le ata sa ia vaaia i le faaaliga e oo lava i le faamatalaga aupito itiiti ma e le mafai ona ia iloa le eseesega.
Mataupu Faavae ma Feagaiga 96
Ua tofia Newel K. Whitney e vaaia le fanua o le malumalu mo le Ekalesia
I le Mataupu Faavae ma Feagaiga 96, tatou te faitau ai na faatonuina e le Alii e faapea, e tatau ona vaai e Epikopo Newel K. Whitney, le fanua lea o le a fausia ai i luga le malumalu. Na poloaiina foi e le Alii ia Epikopo Whitney e vaevae le fanua i ni fasi fanua mo i latou o e sailia se tofi. O nisi o fasifanua sa totofi atu mo taitai o le Ekalesia sa nafa mo le lolomiga o faaaliga. O le mauaina o lenei tofi, o le a fesoasoani ia i latou e tuu atoa atu ai o latou taimi i le faiga o le galuega a le Alii. Faitau le Mataupu Faavae ma Feagaiga 96:4–5, ma faailoa mai po o a auala o le a fesoasoani ai le lolomiga o le afioga a le Atua i le Au Paia.
I le faaaliga lenei na faatonu mai ai le Alii ina ia taliaina ia Ioane Ioanesone o se tasi o le Kamupani Tuufaatasi, lea na vaaia le faagaoioia o mea tautupe, lolomiga, ma pisinisi a le Ekalesia.
-
Ua ou suesueina le Mataupu Faavae ma Feagaiga 94-96 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: