Mataupu Faavae ma Feagaiga 104

Faatomuaga

E oo ane i le tautotogo o le 1834, ua i ai faafitauli tautupe a le Ekalesia, ma sa toilalo ni taumafaiga e ao mai ni tupe mo lona toomaga. I le 1832 sa faatonuina ai e le Alii ia taitai o le Ekalesia e “faatulaga ni taumafaiga o fefaatauaiga ma le lolomiina [o tusi ma isi mea] e ala i le faatuina o se ‘kamupani’ o le a vaaia nei taumafaiga, e faagaoioia tupe mo le faatuina o Siona ma mo le manuia o e matitiva. O lenei kamupani, na ta’ua o le Kamupani Tuufaatasi, sa faatulagaina ia Aperila 1832 ae na toe faataape i le 1834 (tagai i le vaega 82)” (Mataupu Faavae ma Feagaiga 78 faatomuaga o le vaega). I le aso 23 o Aperila, 1834, na maua ai e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 104. I lenei faaaliga na faaali mai ai e le Alii na tatau ona toe faatulagaina le Kamupani Tuufaatasi ma ia vaevaeina ona fanua i tagata o le au paia e avea ma a latou tausimea. I lalo o le taitaiga a Iosefa Samita, na suia mulimuli ane ai le faaupuga “Kamupani Tuufaatasi” i le “Faatulagaga Autasi” i le faaaliga lenei. O lenei lesona e faaaoga ai le faaupuga Faatulagaga Autasi ina ia faafetaui ma le gagana a le Mataupu Faavae ma Feagaiga 104. Na faatonuina foi e le Alii ia tagata o le Ekalesia i le ala sa tatau ona latou tausia ai e matitiva ma fautuaina taitai o le Ekalesia e uiga ia latou aitalafu. O sui auai o le Kamupani Tuufaatasi sa i ai Iosefa Samita, Sini Rikitone, Oliva Kaotui, William W. Phelps, Eteuati Paterika, Ioane Uitimera, Sini Gilbert, Matini Harisi, Newel K. Whitney, John Johnson, ma Feterika G. Viliamu.

Mataupu Faavae ma Feagaiga 104:1–18

Ua tuuina mai e le Alii ia faatonuga e faatatau i le Faatulagaga Autasi

Vaai faalemafaufau e faapea, ua tuuina atu e ou matua ia te oe se ki i le la taavale (pe mafaufau i se isi mea e manaomia ai se ki, e pei o le tou fale). Pe o lenei mea e avea ai oe ma tagata e anaina le taavale? E mafai ona e faaaogaina le taavale mo soo se mea e te manao i ai? Aisea e ioe pe leai ai? E faapefea e le iloa o le a faamasinoina oe mo le mea e te faia i ai, ona aafia ai lou faaaogaina o le taavale?

Ia Mati ma Aperila o le 1832, na faatonuina ai e le Alii ia taitai o le Ekalesia e faatulaga le Kamupani Tuufaatasi (po o le Faatulagaga Autasi), lea o le a nafa ai ona sui ma le vaaiga o le faagaoioiga o fefaatauaiga ma mea e lomiaina e le Ekalesia, ina ia mafai ona tausia ai e matitiva ma faalautele ai Lana galuega. I le tautotogo o le 1834, ua mafaufau taitai o le Ekalesia e faataape le kamupani ona o ni mafuaaga eseese. Ae peitai, sa finagalo le alii, i le usoga e toe faatulaga [le kamupani] ae vaevae ona fanua i le au paia e fai ma a latou tausimea.

Faitau le Mataupu Faavae ma Feagaiga 104:1–4, ma faailoa mai se tasi o mafuaaga mo faafitauli o le Faatulagaga Autasi.

O leMataupu Faavae ma Feagaiga 104:5–10 o loo i ai se poloaiga mai le Alii e faapea, o taunuuga o le solia o le feagaiga na o faatasi ma le Faatulagaga Autasi o le a aofia ai le fetuuina, ma le vavae ese mai le Ekalesia.

Faitau le Mataupu Faavae ma Feagaiga 104:11–13, ma vaavaai mo le fetalaiga a le Alii mo le mea na tatau ona maua e sui taitoatasi o le Faatulagaga Autasi. (Atonu e fesoasoani le iloa o se tausimea o se tagata lea e tuuina atu i ai le tiutetauave mo se mea e anaina e se isi tagata.)

Faitau le Mataupu Faavae ma Feagaiga 104:14, ma vaavaai po o ai e anaina le fanua na fesootai ma le Faatulagaga Autasi. Faailoga fuaitau o loo aoao mai ai le aoaoga faavae e faapea, na foafoaina e le Alii le lalolagi, ma o mea uma o loo i ai e a Ia lea.

Faauma galuega atofaina nei i lau api talaaga mo le suesueina o tusitusiga paia:
1. Fai se lisi o ni meatotino faalelalolagi se 10 o loo ia te oe (mo se faataitaiga, fale, lavalava, faatoaga, meaai).
2. Tusi e uiga i le auala o loo aoao mai i le aoaoga faavae i le Mataupu Faavae ma Feagaiga 104:14 ona ono faatosinaina le auala e te tagai ai ma faaaoga au meatotino.

O le faamanatu a le Alii i le Au Paia e faapea o mea uma i luga o le fogaeleele e a Ia lea, atonu na faamautinoa ai ia i latou, e mafai ona Ia tuuina atu mea faaletino latou te manaomia. Sa Ia faaauau e ala i le faamatala atu o le auala o le a Ia faaaogaina ai na punaoa e tausi ai Lana Au Paia. Faitau le Mataupu Faavae ma Feagaiga 104:15–16, ma vaavaai mo le auala na fetalai mai le Alii o le a Ia tausia ai Lana Au Paia.

Na tuuina mai e Elder Joseph B. Wirthlin o le Korama a Aposetolo e Toasefululua, se malamalamaaga i le ala a le Alii mo le tausiga o Lana Au Paia: “O le ala a le Alii e aofia ai le fesoasoani atu i tagata ia fesoasoani ia i latou lava. E faaeaina e matitiva aua latou te galulue mo le tausiga le tumau latou te maua, e aoaoina i latou i mataupu sa‘o, ma e mafai ai ona latou sii ae i latou lava mai le mativa i le tutoatasi. E faamaulaloina e mauoa aua ua latou lotomaualalo e tufatufa atu ma le le limafoai a latou mea uma i e ua le tagolima” (“Uelefea Musuia a le Ekalesia,” Liahona, Iulai 1999, 90). I le taimi nei, “o le ala a le Alii” e “fesoasoani ai i tagata ia fesoasoani ia i latou lava” e aofia ai le polokalama uelefea a le Ekalesia ma le aoina mai o taulaga anapogi.

Faitau le Mataupu Faavae ma Feagaiga 104:17–18, ma vaavaai mo le mea na faatonuina e le Alii i tatou e fai i mea e tele ua Ia tuuina mai.

Mai nei fuaiupu ua tatou aoao ai e faamasinoina i tatou i le faaaogaina o mea ua tuuina mai e le Alii ia i tatou e fesoasoani ai i isi.

Toe mafaufau i tua i le faataitaiga o le ki o le taavale na tuuina atu i le amataga o le lesona, ma le ala e faatosinaina ai lou faaaogaina o le taavale i lou tali atu i ai. E faapefea ona fesootai lenei mea i le upumoni ua e aoaoina i le Mataupu Faavae ma Feagaiga 104:14–18?

E mafai ona tatou mafaufau e uiga “i e matitiva ma e le tagolima” ia le na o i latou o e e manaomia le fesoasoani tautupe, ae faapea foi i latou e manaomia le fesoasoani faaleagaga, faalelagona, faalemafaufau, ma agafesootai. E faapena foi, e mafai ona tatou mafaufau i mea e tele ua tatou maua, e sili atu nai lo na o tupe po o meatotino faalelalolagi tatou te maua. O a tatou mea e tele e aofia ai foi o tatou taimi, taleni, poto, ma tomai.

Tali fesili nei i lau api talaaga mo le suesueina o tusitusiga paia:
1. Aisea e te manatu e taua ai ona tatou foai atu mea e tele ua tatou maua mai i le Alii?
2. O a nisi o faataitaiga i tusitusiga paia o tagata o e na fesoasoani atu ia i latou na manaomia le fesoasoani? Na faapefea ona latou fesoasoani atu i isi i le ala a le Alii?
3. E mafai faapefea ona e fesoasoani atu i isi i le ala a le Alii? (Tusi se sini patino e faia lena mea.)

Mataupu Faavae ma Feagaiga 104:19-77

Ua tuuina mai e le Alii ia faatonuga e faatatau i le Faatulagaga Autasi, faatausimea, ma le teuoloa

I le Mataupu Faavae ma Feagaiga 104:19–53, na tuuina mai ai e le Alii ni faatonuga patino e uiga i le faatausimea na tofiaina atu i sui eseese o le Faatulagaga Autasi. Faitau le Mataupu Faavae ma Feagaiga, 104:23, 25, 31, 33, 35, 38, 42, 46, ma vaavaai mo se mamanu i folafolaga a le Alii i sui taitasi o le faatulagaga. Atonu e fesoasoani lou iloa o le fuaitau “o le tulaga e oo i ai” o lona uiga o le “e tusa ai” po o le “e pei”

E faavae i mea ua e aoaoina i nei fuaiupu, tusi se mataupu faavae i lau api talaaga mo le suesueina o tusitusiga paia, e faamalamalama ai le mea o le a tupu e tusa ai ma lo tatou faamaualalo ma le faamaoni. Ona tali lea o fesili nei:
1. O le a se mea e mafai ona e aoao mai i lenei mataupu faavae i le ala e aafia ai e le usiusitai ia faamanuiaga e te maua?
2. O le a se taimi na e vaai ai i se tasi e faamaoni i o latou tiutetauave i le Alii ma ia faamanuiaina e tusa ai [ma lona usiusitai]?

I le Mataupu Faavae ma Feagaiga 104:54–77, na tuuina mai ai e le Alii ia faatonuga mo le faatuina o faleteutupe lea e mafai ona teuina ai tupe e maua mai i le faatausimea, mo le manuia o le Ekalesia, e pei o le lolomiina o tusitusiga paia.

Mataupu Faavae ma Feagaiga 104:78-86

Ua faatonu e le Alii ia taitai o le Ekalesia e tusa ai ma aitalafu a le Faatulagaga Autasi

Mafaufau i se taimi na talosagaina ai oe e fai se mea lea, sa e manatu e le mafai pe matuai faigata ona e ausiaina.

I le faagasologa o le usitaia o poloaiga a le Alii, na faapea ona pagatia ai le Faatulagaga Autasi i se aitalafu tele. O se vaega o mea na tutupu na taofia ai le faatulagaga mai le totogiina o nonogatupe. Mo se faataitaiga, o le faatamaiaina e le vaega faatupu faalavelave o le fale lomitusi i le Itumalo o Jackson, Misuri, na taofia ai le Au Paia mai le mauaina o tupe mai le lolomiina o tusitusiga paia isi oloa, ma sa taofia foi e vaega faatupu faalavelave le Au Paia mai le faaaogaina o le faleteuoloa i Initipene.

Faitau le Mataupu Faavae ma Feagaiga 104:78, ma faailoga faatonuga a le Alii e uiga i aitalafu a le Ekalesia.

O le toe totogiina o aitalafu, atonu sa o se mea faigata i le Au Paia, ae na tuuina mai e le Alii ni faatonuga e fesoasoani ai ia i latou.

I lau api talaaga mo le suesueina o tusitusiga paia, fai ai ni koluma se lua—faaautu le tasi i le AFAI ae o le isi i le ONA. Faitau le Mataupu Faavae ma Feagaiga 104:80–82. I lalo o le koluma o le “AFAI”, tusi ai le mea na fofoga mai e le Alii i sui o le faatulagaga e fai, ina ia mafai ona maua Lana fesoasoani i le totogiina o a latou aitalafu. I lalo o le koluma “ONA” tusi ai le mea na folafola mai e le Alii e fai e fesoasoani ai i le Au Paia e o ese mai le aitalafu. E faavae i luga o mea na e faitauina ma faamaumauina, tusi se mataupu faavae e mafai ona tatou aoaoina mai nei fuaiupu.
Faauma ni gaoioiga se lua pe sili atu o gaoioiga nei i lau api talaaga mo le suesueina o tusitusiga paia:
1. Tusi e uiga i se tasi i tusitusiga paia po o se tasi e te iloa, o le o se faataitaiga o le mataupu faavae na e tusia i le galuega atofaina lona 4. Faamatala pe faapefea ona e vaaia lenei mataupu faavae i le olaga o le tagata lea. Po o le tusi foi pe na faapefea ona e vaaia lenei mataupu faavae i lou lava olaga.
2. Tali i fesili nei: O a nisi o mea ua fetalai mai le Alii i tagata o le Ekalesia e fai e ono manatu i ai e faigata? O le a le matafaioi e te manatu e i ai i le lotomaualalo, faamaoni, ma le tatalo i le faataunuuina o mea ua fetalai mai le Alii ia te oe e fai?
3. Tusi pe mafai faapefea ona e lotomaualalo, faamaoni, pe loto tatalo ina ia mafai e le Alii ona fesoasoani ia te oe e ausia mea ua Ia fetalai mai ia te oe e fai. Tusi se sini ina ia faia ai lena mea.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mataupu Faavae ma Feagaiga 104 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: