Iunite 8: Aso 1

Mataupu Faavae ma Feagaiga 29:31–50

Faatomuaga

A o le’i umi a’o lei amataina se konafesi a le Ekalesia i le aso 26 o Setema, 1830, na tuuina mai ai e le Alii le faaaliga o loo maua i le Mataupu Faavae ma Feagaiga 29 “i luma o toeaina e toaono” (MF&F 29, ulutala o le vaega). Ina ua e suesueina le Mataupu Faavae ma Feagaiga 29:1–30 i se lesona na muamua atu, sa e aoao ai e uiga i le faapotopotoina o le au filifilia a le Alii ma le fausia o Siona. O le lesona lenei e taulai atu i le natura o le Pa‘ū o Atamu e pei ona faaalia mai i le Mataupu Faavae ma Feagaiga 29:31–50.

Mataupu Faavae ma Feagaiga 29:31–35

Ua faamalamalama mai e le Faaola, o mea uma ua faaleagaga ia te Ia

Mafaufau pe faapefea ona e tali atu i tulaga nei:

Tulaga 1: Vaai faalemafaufau e faapea o loo auai se tasi o au uo i ni amioga le talafeagai e te iloa e leaga mo ia. I se tasi taimi na e taumafai e uunaia lau uo e tuu lenei amioga, ae ua ia fai atu ia te oe, o ana filifiliga e le afaina tele aua e leai se mea leaga ua tupu ia te ia. O a mataupu faavae o le talalelei e mafai ona fesoasoani i lau uo e malamalama ai i le taua o ana filifiliga?

Tulaga 2: Vaai faalemafaufau e faapea, ua sau ia te oe se tasi o au uo ma fai mai, ua ia lagona sina lotovaivai. Sa ia fai mai ia te oe, ua na le iloa pe aoga taumafaiga i le tausia o poloaiga. Sa ia faamatala mai e ui lava sa taumafai e fai le mea ua poloaiina e le Atua, ae na te le o vaaia o lelei atu ona tulaga nai lo o ana uo o e o loo filifili e agasala. O a mataupu faavae o le talalelei e mafai ona fesoasoani i lau uo ia faaauau pea ona usiusitai?

A o e suesue i le vaega mulimuli o le Mataupu Faavae ma Feagaiga 29, vaavaai mo aoaoga ma mataupu faavae e mafai ona faaaoga e fesoasoani ai i tagata taitasi i nei tulaga.

I le 1830 na toefuataiina ma toe faatulagaina ai le Ekalesia a Iesu Keriso i le lalolagi, ma sa faaalia mai le atoatoaga o le talalelei i tagata o le Ekalesia e ala i le Perofeta o Iosefa Samita. I le faaaliga o loo faamaumauina i le Mataupu Faavae ma Feagaiga 29, sa fesoasoani le Alii i le Au Paia anamua ia malamalama atili i le Pa‘ū o Atamu, ma sa faaali mai ai nisi o faamoemoega o Ana poloaiga.

Ua aoao mai leMataupu Faavae ma Feagaiga 29:31–33 na foafoaina e le Atua mea uma i le faaleagaga. O le tasi uiga o lenei mea o le, e mafai ona latou i ai i Lona afioaga ma sa le mafai ona oo i ai le oti. Sa Ia saunia se ala mo Ana foafoaga ia avea ai faaletino, o lona uiga o le a vavae ese mai i latou mai Lona afioaga ma e oo i ai le oti. Na faia foi e le Atua se ala mo Ana foafoaga e faatoilalo ai le oti ma toe foi atu i Lona afioaga. O le vaega uma lenei o Lana fuafuaga ina ia tuu atu ai i Lana fanau le avanoa e avea ai faapei o Ia.

Faitau le Mataupu Faavae ma Feagaiga 29:34–35, ma vaavaai po o faapefea ona manatu le Alii i poloaiga ua Ia tuuina mai ia i tatou. Faailoga lenei upumoni i au tusitusiga paia: O poloaiga uma a le Atua e faaleagaga. O tulafono taitasi e tuuina mai e le Atua e i ai se faamoemoega faaleagaga ma ua fuafuaina e fesoasoani ia i tatou e toe foi atu ai i Lona afioaga.

1. O se faataitaiga o le aoaoga faavae, o poloaiga uma a le Atua e faaleagaga, mafaufau i le Upu o le Poto. Tali fesili nei i lau api talaaga mo le suesueina o tusitusiga paia:

   1. O a ni auala atonu tatou te aafia ai faaletino i le usiusitai i le Upu o le Poto?

   2. O a ni auala atonu tatou te aafia ai faaleagaga i le usiusitai i le Upu o le Poto?

E ono i ai ni taunuuga faaletino e mafua mai i le le usitaia i le Upu o le Poto, ae o taunuuga silisili lava e faaleagaga ona natura, ae maise lava i tagata o le Ekalesia o e ua osi feagaiga e usitaia lena poloaiga. Ona o poloaiga uma mai le Atua e faaleagaga, e aofia ai le Upu o le Poto, o le usiusitai e aumaia ai faamanuiaga faaleagaga i o tatou olaga. I le isi itu, o le le usiusitai i poloaiga a le Atua e taofia ai i tatou mai le mauaina pe mafua ai ona tatou le mauaina faamanuiaga faaleagaga.

Mafaufau loloto pe faapefea e le iloa o poloaiga a le Atua e faaleagaga uma, ona fesoasoani i tagata taitasi o loo i tulaga na e faitau i ai i le amataga o le lesona lenei.

Mataupu Faavae ma Feagaiga 29:36–41

O le Pau o Atamu na aumai ai le oti faaleagaga

A o tuuina mai e le Atua ia i tatou poloaiga e faamanuia ai i tatou faaleagaga, matau i le Mataupu Faavae ma Feagaiga 29:35 ua Ia faataga i tatou ia pule ia i tatou lava. O le uiga o lenei mea, ua tuuina mai e le Atua i Ana fanau uma le faitalia, ma faataga i latou e filifili pe latou te usitai i Ana poloaiga.

2. Tusi le siata lenei i lau api talaaga mo le suesueina o tusitusiga paia. Ona faitau lea o le Mataupu Faavae ma Feagaiga 29:36–41, ma faatumu filifiliga ma taunuuga a tagata po o vaega o tagata:

   	Filifiliga	Taunuuga
   O le tiapolo
   “O le tasi vaetolu o au o le lagi”
   Atamu

Mafaufau e tusi le mataupu faavae lenei i au tusitusiga paia: Ua tuuina mai e le Atua ia i tatou le meaalofa o le faitalia e fai ai filifiliga ma maua ai taunuuga o na filifiliga.

A o lei ‘aia e Atamu le fua faasaina, sa ola o ia i le lalolagi i le Faatoaga o Etena, ma mafai ona nofo i le afioaga o le Atua. Ina ua uma ona ia aia le fua, sa tumau o ia i le lalolagi ae ua le mafai ona toe nofo i le afioaga o le Atua. Ona sa gauai atu Atamu i faaosoosoga ma ai le fua faasaina, ua faapea ai ona tatou i ai uma i se tulaga faaletino (ua mafai ona oti) ma vavae ese mai le afioaga o le Atua. E tusa ai ma le Mataupu Faavae ma Feagaiga 29:41, o le a le igoa o lenei vavae ese?

3. I lau api talaaga mo le suesueina o tusitusiga paia, tusi ai le ata lenei:

   

   I luga o le ata, i lalo o le fuaitau “Lalolagi Pau (Faaletino),” tusi ai: O le oti faaleagaga o le tuliese mai luma o le Atua. Ona tali lea o le fesili lenei: Aisea e te manatu e tatau ai mo i tatou le vavae ese mai le afioaga o le Atua mo se taimi?

Faitau le faamatalaga lenei e uiga i le Pa‘ū, ma pe aisea e tatau ai ona vavaeeseina i tatou mai le Atua mo se taimi: “O le Pau o se vaega taua tele o le fuafuaga o le faaolataga a le Tama Faalelagi (tagai i le 2 Nifae 2:15–16; 9:6). E valalua le faasinoga—e faasino i lalo ae agai i luma. E le gata ina aumaia ai le oti faaletino ma le faaleagaga, ae ua aumaia ai foi ia i tatou le avanoa e fananau mai ai i le fogaeleele ma aoao ai e alualu i luma” (Faamaoni i le Faatuatua: O Se Tusitaiala o le Talalelei [2004], 131; tagai foi i le 2 Nifae 2:25).

Na aoao mai e Elder Bruce R. McConkie o le Korama a Aposetolo e Toasefululua, le mea lenei e uiga i le Pau:

“O mea na tutupu e sili ona taua pe o le a tutupu i le faavavau atoa … o le Foafoaga, o le Pa’ū, ma le Togiola.

“Ae tatou te lei amata ona malamalama i le foafoaga faaletino o mea uma, e tatau ona tatou iloa pe faapefea ma po o le a foi le ala o loo filiina ai faatasi e le mavavaeeseina ia nei mataupu faavavau e tolu —o le Foafoaga, o le Pa’ū, ma le Togiola—ina ia fausia ai le ata o le faaolataga e tasi. E le tu toatasi se mea o ia mataupu faavae; e nonoa faatasi le tasi mataupu faavae i le isi lua; ma a aunoa ma se iloa o ia mataupu faavae uma, e le mafai la ona iloa le upumoni e uiga i soo se tasi o ia mataupu faavae.

“… Ia manatua, na oo mai le Togiola ona o le Pa‘ū. Sa totogi e Keriso le tau mo le solitulafono a Atamu. Ana faapea e leai se Pa’ū, semanu e leai se Togiola faatasi ai ma ona taunuuga o le tino ola pea ma le ola e faavavau. O lea la, e pei ona mautinoa le oo mai o le faaolataga ona o le Togiola, ua faapea foi ona oo mai le faaolataga ona o le Pa‘ū.

“O le olaga i le tino ma le mana o le foafoaga ma le oti, na amata uma mai i le Pa‘ū” (“Christ and the Creation,” Ensign, June 1982, 9).

Mataupu Faavae ma Feagaiga 29:42–50

O le Togiola a Iesu Keriso ua laveai ai i tatou mai le oti faaletino

Mafaufau loloto i le fesili lenei: O ai o le a toe foi atu i le afioaga o le Atua?

Ina ia malamalama i aoaoga a le Alii i le Mataupu Faavae ma Feagaiga 29, e taua le iloa o tagata uma o le a toe foi atu i le afioaga o le Atua ina ua uma ona latou toetutu. Ona o le Togiola a Iesu Keriso ua laveai ai tagata uma mai aafiaga faaletino ma faaleagaga o le Pa‘ū (tagai i le Helamana 14:15–18).

4. I lau api talaaga mo le suesueina o tusitusiga paia, i le itu taumatau o le ata, i lalo o le fuaitau “Afioaga o le Atua,” tusi ai le: O le Togiola, o le a laveaiina ai tagata uma mai le oti faaletino ma faaleagaga lea na mafua mai ona o le Pa‘ū o Atamu. Ona tali lea o le fesili lenei: Afai o le a iu ina toe avatu i tatou uma i le afioaga o le Atua, aisea e te manatu ai e afaina lo tatou faia po o lo tatou le faia foi o filifliga lelei iinei i le lalolagi?

E ala i Lana Togiola, ua ofo mai ai e Iesu Keriso le faamagaloga ma le ola faavavau ia i latou uma o e faatuatua ia te Ia ma salamo i a latou agasala. Faitau le Mataupu Faavae ma Feagaiga 29:42–43, ma vaavaai mo mea e tatau ona tatou faia ina ia agavaa e nofo ai pea i le afioaga o le Atua. Mafaufau loloto po o a mea e tatau ona e salamo ai, ina ia mafai ona e agavaa e nofo ai pea i le afioaga o le Atua i se aso.

E ui o tagata uma o le a toetutu ma o le a laveaiina mai le oti faaleagaga, ma toe aumaia i le afioaga o le Atua ina ia faamasinoina, ae e le o tagata uma o le a tumau ai iina.

5. I lau api talaaga mo le suesueina o mau, i le itu taumatau o le ata, tusi se laina togitogi e i ai se aū e faasino ese mai le afioaga o le Atua. Ona faitau lea o le Mataupu Faavae ma Feagaiga 29:44–45, ma tali i fesili nei:

   1. O a ni filifiliga e mafua ai ona le agavaa ia tagata e nonofo ai pea i le afioaga o le Atua?

   2. O a taunuuga o a latou filifiliga?

6. I lau api talaaga mo le suesueina o tusitusiga paia, i talane o le laina togitogi o loo i luga o le ata, tusi ai: O i latou e le faaaogaina le faatuatua po o le salamo, e le mafai ona tumau e faavavau i le afioaga o le Atua.

   O le ata lenei e faaalia ai foliga e tatau ona i ai lau ata i lau api talaaga mo le suesueina o tusitusiga paia:

   

7. Toe iloilo tulaga e lua na faamatalaina i le amataga o le lesona lenei. Ona tali lea o fesili nei i lau api talaaga mo le suesueina o tusitusiga paia:

   1. O le a se mea na e aoaoina ananei e mafai ona fesoasoani ai i le uo o loo i le tulaga 1?

   2. O le a se mea na e aoaoina ananei e mafai ona fesoasoani ai i le uo o loo i le tulaga 2?

Faitau le Mataupu Faavae ma Feagaiga 29:49, ma mafaufau i mea ua faamoemoe mai e le Alii mo oe. Fai se sini ia faaauau pea ona faaaoga le Togiola a Iesu Keriso i lou olaga, e ala i le salamo i au agasala ma saunia oe lava e toe nofo i le afioaga o le Atua.

8. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Mataupu Faavae ma Feagaiga 29:31–50 ma faamaeaina lenei lesona i le (aso).

   O fesili, mafaufauga, ma manatu faaopoopo ou te fia faasoa atu i lo’u faiaoga: