Iunite 10: Aso 1
Mataupu Faavae ma Feagaiga 41
Faatomuaga
Ia Tesema 1830, na poloaiina ai e le Alii le Au Paia i Niu Ioka e siitia atu i Ohaio, lea o le a latou maua ai le tulafono a le Alii (tagai i le MF&F 37:3; 38:32). Na maua e le Perofeta o Iosefa Samita le faaaliga o loo i le Mataupu Faavae ma Feagaiga 41 i le aso 4 o Fepuari, 1831—o le aso na taunuu ai o ia i Ohaio. I lenei faaaliga na tuuina mai ai e le Alii nisi faatonuga, o le a fesoasoani e saunia ai le Au Paia e maua Lana tulafono. E le gata i lea, sa Ia valaauina ai Eteuati Paterika e avea ma epikopo muamua o le Ekalesia.
Mataupu Faavae ma Feagaiga 41:1–8
Ua faamatala mai e le Alii le auala e avea ai ma se soo o Iesu Keriso
O le a le mea e te fiafia i ai po o le fiafia e fai? O le a sou manatu i le mea e fiafia le Alii e fai? Mafaufau i le uiga o le fiafia, po o le maua le olioli, i le faia o se mea.
Faitau le Mataupu Faavae ma Feagaiga 41:1, ma vaavaai mo le mea e fiafia le Alii e fai. Matau le mea e tatau ona tatou faia e maua ai “le faamanuiaga silisili o faamanuiaga uma” ua finagalo o Ia e tuu mai ia i tatou.
E faavae i luga o le fetalaiga a le Alii i le fuaiupu 1, faauma le mataupu faavae lenei: E fiafia le Alii e a o tatou .
-
Tali fesili nei i lau api talaaga mo le suesueina o tusitusiga paia:
-
O le a se taimi na e lagonaina na fiafia ai le Alii e faamanuia oe ona sa e faalogo atu ia te Ia?
-
O le a le uiga ia te oe o le iloa, e aumaia le olioli i le Alii e faamanuia ai oe ona o lou faalogo atu ia te Ia?
-
Sa usitai le Perofeta o Iosefa Samita i le fautuaga a le Alii e faapotopoto i Ohaio. Na uma ona siitia faafitu Iosefa ma Ema i le fa tausaga sa la faaipoipo ai, ma na faatoa malosi foi Ema mai se ma’i na atoa le masina o ma’i ai ma na ono masina o lona ma’itaga, i le taimi o le faaiuga o Ianuari 1831, na la tuua ai Niu Ioka ae malaga i le toetoe a 300 maila e ala i le taavale faasee i Katelani, Ohio.
Ina ua taunuu Iosefa ma Ema i Katelani, sa la malolo i luma o le faleoloa o Gilbert ma Whitney. “Sa telea’i atu [Iosefa] i luga o faasitepu ma savali atu i totonu o le faleoloa i le mea sa tu ai le soatau laitiiti. ‘Newel K. Whitney! O le tagata la lea!’ sa ia alaga atu ai, ma faalala atu lona lima ma le faaaloalo, e pei o fai atu i se tagata ua leva ona la masani. ‘E lelei la oe nai lo o a’u,’ sa tali atu [Newel K. Whitney], a’o ia luluina [lona] lima e aunoa ma le mafaufauina, ‘Ou te le iloa lou igoa e pei ona e iloaina ai a’u.’ ‘O a’u o Iosefa le Perofeta,’ sa fai atu ai le tagata ese ma ataata. ‘Sa e tatalo ia ou oo mai iinei, ia o le a la se mea ua e manao ou te faia?’” (i le History of the Church, 1:146).
Na faamatalaina e Iosefa, sa ia vaaia i se faaaliga ia Newel o tatalo mo ia ina ia sau i Katelani. Na talia ma le agalelei e le aiga o Whitney ia Iosefa ma Ema Samita, ma sa latou nonofo faatasi ma Iosefa ma Ema mo ni nai vaiaso (tagai i le History of the Church, 1:145–46).
O le toatele o le Au Paia i Niu Ioka sa siitia atu i Ohaio i totonu o le lima masina talu ona poloai mai le Alii e faapotopoto i ai. O nisi o na tagata o le Ekalesia sa latou faia i se osigataulaga tele. Sa latou faatauina atu a latou meatotino i se tau maualalo pe na o le tuu foi o o latou fale ma meatotino e le’i faatauina atu, ae o i Ohaio e mulimuli i le Perofeta. Faitau le tala lenei ma vaavaai mo se faataitaiga o auala na faamanuiaina ai e le Alii nei Au Paia ona o le faalogo i Lana poloaiga e siitia atu i Ohaio i le taimi lea:
O le tina o le Perofeta o Iosefa Samita, o Lusi Maka Samita, na taitaia se vaega e toa 80 o tagata o le Ekalesia mai Faiete, Niu Ioka, i Ohaio. A o latou malaga i se vaa i luga o le alavaa o Cayuga ma Seneca e agai atu i Pafalo, Niu Ioka, sa faamanatu atu e Lusi i le Au Paia e faapea, sa “latou malaga e ala i le poloaiga a le Alii, e pei lava o Tama Liae, ina ua ia tuua Ierusalema; ma, afai e faamaoni, sa tutusa foi o [latou] mafuaaga e faamoemoe ai i faamanuiaga a le Atua” (History of Joseph Smith by His Mother, ed. Preston Nibley [1958], 196).
Ina ua latou taunuu i Pafalo, Niu Ioka, na latou feiloai ai ma tagata o le Ekalesia mai Colesville, o e sa i ai foi i lo latou ala e agai atu i Ohaio, ma o e na tasi le vaiaso o pa‘ulia i Pafalo. Sa taofia le alavaa i aisa “sa faaputuputu e oo i le luasefulu futu le maualuga,” ma sa ta’u atu ia i latou e ono manaomia ona latou “faatali i le uafu e le itiiti ifo ma le lua vaiaso le umi.” O le toatele o tagata o le Au Paia i le vaega a Lusi sa oo ina lotovaivai. Sa latou fia aai, ma sa mama’i nisi o tamaiti. Sa latou feosofi i se isi vaa, tuu a latou mea i luga o le vaa, ma na maua e Lusi Samita se malutaga le tumau mo tamaitai ma a latou fanau mama’i seia oo i le taeaopo o le aso na sosoo ai. (Tagai i le History of Joseph Smith by His Mother, 199–202.)
Ina ua latou toe o atu i le latou vaa, sa molimau atu Lusi i lana vaega, “O lenei, uso e ma tuagane, afai o le a siiae e outou uma o outou manaoga i le lagi, ina ia mafai ona nuti le aisa, ma faasaolotoina i tatou, e moni lava e pei ona soifua o le Alii, o le a faia lava.” Ona ia faamatalaina lea o le mea na sosoo ai: “O le taimi lava lena, sa faalogoina ai se pao, na pei o le pa o se faititili. Sa alaga le kapeteni, ‘O tagata uma i lona tulaga.’ Sa vaeluaina le aisa, ma tuua ai na o si ava lava mo le vaa, ma sa matuai vaiti lava, o lea ina ua ui atu ai le vaa, sa taia ma saeia ese ai pakete o le uilivai. … Matou te le’i sa’o ese lelei mai ae toe pipii faatasi le aisa, ma na tuua ai le usoga a Colesville i Pafalo, sa le mafai ona mulimuli mai ia i matou” (History of Joseph Smith by His Mother, 204–5).
-
Faitau le Mataupu Faavae ma Feagaiga 41:2–4, ma faailoa mai le poloaiga ma faatonuga na tuuina mai e le Atua i tagata. I le lisi o loo lalo, vase se laina i faatonuga sa le’i poloaiina le Au Paia e mulimuli ai:
-
Ia potopoto e malilie i le afioga a le Atua.
-
Maua le tulafono e ala i le tatalo o le faatuatua.
-
Tagai ia tausia le tulafono.
-
Faapotopoto i Jackson County, Misuri.
I le Mataupu Faavae ma Feagaiga 41:3, faailoga le faamoemoega o le tulafono na faapea e maua e tagata “e ala i le tatalo o [o latou tagata] faatuatua.” O lenei tulafono o loo faatatau i ai le Alii o loo maua i le Mataupu Faavae ma Feagaiga 42. O le a e suesue auiliili i lenei tulafono i nai isi lesona e sosoo mai.
-
Mafaufau po o a auala e ono tutusa ai manatu nei e lua ae po o a foi auala e ono eseese ai:
|
Tagata talitonu |
Soo |
Faitau le Mataupu Faavae ma Feagaiga 41:5, ma faauma le mataupu faavae lenei: E avea i tatou ma soo o Iesu Keriso pe a tatou .
E i ai se eseesega i le va o le talitonu i tulafono a Iesu Keriso ma le mauaina o [tulafono]? E ui o le talitonu i tulafono a le Atua o se vaega taua o le avea ma se soo o Iesu Keriso, o lo tatou mauaina o Ana tulafono—o le taliaina ma le usiusitai i ai—e fausia ai lo tatou faatuatua i le Faaola.
-
I le Mataupu Faavae ma Feagaiga 41:7 na faatonuina e le Alii le Au Paia, e tuuina atu se fale mo Iosefa Samita ma lona aiga e nonofo ai, ma ina ia mafai ona faaauau ai le faaliliuga o le Tusi Paia. Sa mulimuli le Au Paia i nei faatonuga, ma sa fausia ai se fale e le tele lea sa nonofo ai Iosefa ma Ema mo ni nai masina.
Mataupu Faavae ma Feagaiga 41:9-12
Ua valaauina e le Alii ia Eteuati Paterika e avea ma epikopo muamua o le Ekalesia
Vaai faalemafaufau e faapea, na manaomia e le tou uarota se epikopo fou. Suesue i le Mataupu Faavae ma Feagaiga 41:9, ma faailoga soo se upu po o fuaitau o loo aoao mai ai le mataupu faavae lenei: O epikopo e valaauina e le Atua, lagolagoina e le leo o le ekalesia, ma faauuina i le pule tatau.
O le fuaitau “tofia … i le leo o le ekalesia” o lona uiga, ua lagolagoina e tagata o le Ekalesia le tagata lea ua valaauina e le Atua. O le fuaitau “faaaoga lona taimi atoa i galuega a le ekalesia” sa fitoitonu lava ia Eteuati Paterika, ma e faatatau foi i sui o le au Epikopo Pulefaamalumalu i le taimi nei. E le faatatau i epikopo o uarota, o e e faaauau pea a latou galuega masani a o latou auauna atu i le Ekalesia.
-
Faitau le Mataupu Faavae ma Feagaiga 41:11, ma vaavaai mo uiga auaumama na fetalai mai le Alii na i ai ia Eteuati Paterika, lea atonu na fesoasoani ia te ia i lona valaauga o se epikopo. Atonu e te manao e tusi se faamatalaga i au tusitusiga paia, o le upu pepelo e faatatau i le taufaasese po o le taufaaoleole. O le mea lea, o Eteuati o se tagata faamaoni o le amiosao.
-
-
O le a sou manatu i le uiga o le ia faaeteete i le ala tatou te “manatu ai” i afioga a le Alii?
-
Mata o le a le fesootaiga a le faaeteete i mea e te faia i afioga a le Atua, ma mea ua e aoaoina e uiga i le avea ma se soo o Iesu Keriso?
-
A o e faitauina le faamatalaga lenei mai ia Elder Neal A. Maxwell o le Korama a Aposetolo e Toasefululua, mafaufau pe faapefea ona fesootai i mea ua e aoaoina e uiga i le avea ma soo i le lesona lenei: “O aso taitasi tatou te filifili ai po o le a le maualuga o lo tatou avea ma soo. O aso taitasi tatou te taliina ai le fesili, ‘O ai o loo i le itu a le Alii? O ai?’” (“My Servant Joseph,” Ensign, Me 1992, 39).
-
Ua ou suesueina le Mataupu Faavae ma Feagaiga 41 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: