Iunite 19: Aso 4
Mataupu Faavae ma Feagaiga 89
Faatomuaga
I le aso 27 o Fepuari, 1833, i le tali atu i faafesili a le Perofeta o Iosefa Samita e uiga i le faaaogaina e le usoga o le perisitua o tapaa i a latou fonotaga, na tuuina mai ai e le Alii le faaaliga o loo i le Mataupu Faavae ma Feagaiga 89, ua ta’ua o le Upu o le Poto. I totonu, sa lapatai mai ai le Alii e faasaga i le faaaogaina o fualaau faasaina ae uunaia le faaaogaina o meaai lelei. Na folafola mai foi le Alii e faapea, o i latou e mulimuli i le Upu o le Poto o le a faamanuiaina i le faaletino ma le faaleagaga.
Mataupu Faavae ma Feagaiga 89:1–3
Ua folasia mai e Iosefa Samita le faaaliga lea ua ta’ua o le Upu o le Poto
Pe na e faamalamalamaina atu i se tasi le mafuaaga e te le inuina ai le ava malosi, lauti, po o le kofe, pe faaaoga foi le tapaa? Afai o lea, e te manatua lau tala na fai i ai ma le ala foi na tali mai ai lena tagata? O lenei lesona o le a fesoasoani e te malamalama lelei ai i le Upu o le Poto ma ia saunia ai e faamalamalama atu i isi.
I le taumalulu o le 1833, pe a ma le 20 usoga o le perisitua na amata ona fono i le potu i luga o le faleoloa o Newel K. Whitney i Katelani, Ohaio, e auai i le Aoga a Perofeta. “I le fonotaga a le aoga sa faia i le aso 27 o Fepuari, 1833, sa faapea ona maua ai e le Perofeta se faaaliga taua. I le popofou o le Ekalesia, o le faaaogaina o le ava malosi, tapaa, kofe, ma le lauti sa o se faiga masani i le lalolagi ma i tagata o le Ekalesia. A o vaai atu le Perofeta i le faaaogaina e le usoga o le tapaa i le aoga, sa oo ina popole o ia. Sa toe faamatala mai e Polika Iaga: ‘Pe a latou faapotopoto faatasi i totonu o lenei potu ina ua maea le taumafataga o le taeao, o le mea muamua sa latou faia o le tutuina lea o a latou paipa, ma, ao latou ulaula, e talanoa i mea sili ona taua o le malo. … E masani pe a oo atu i totonu le Perofeta e tuuina atu ni aoaoga e na te vaaia le tele o le asu o tapaa. O lenei mea, faatasi ai ma faitioga mai lona toalua i le faamamaina o le fola palapala [mai tapaa lamu], sa avea ma mea e mafaufau ai le Perofeta i le mataupu, ma sa ia fesili atu ai i le Alii e uiga i amio a toeaiina i le faaaogaina o le tapaa, ma o le faaaliga, ua taua o le Upu o le Poto, o se tali mai ai i lana fesili‘“ (Aoaoga a Peresitene o le Ekalesia: Iosefa Samita [2007], 280).
Faitau le folasaga o le vaega mo le Mataupu Faavae ma Feagaiga 89, ma vaavaai mo le mea sa faia e le Perofeta o Iosefa Samita i le tali atu i le faaaogaina e le usoga o tapaa. Ona faitau lea o le Mataupu Faavae ma Feagaiga 89:1–3, ma vaavaai mo upu po o fasifuaitau o loo faamatala ai faamoemoega a le Alii i le tuuina mai o lenei faaaliga.
Atonu ua e iloaina o se tasi o faamoemoega o lenei faaaliga e faatatau i lo tatou faaolataga faaletino. O le faaolataga faaletino e faatatau i lo tatou manuia faaletino.
Ia matau i le Mataupu Faavae ma Feagaiga 89:2 o le Upu o le Poto sa lei tuuina mai muamua o se poloaiga. Na faamalamalama mai Peresitene Iosefa F. Samita: “I lena taimi, … afai [o le Upu o le Poto] na tuuina mai o se poloaiga, o le a tausalaina ai tagata uma, na fai ma vaisu le faaaogaina o nei mea oona; o lea sa alofa mutimutivale le Alii ma tuu mai ia i latou se avanoa e foia ai, a’o le’i Ona aumaia i latou i lalo o le tulafono” (i le Conference Report, Oct. 1913, 14).
Ona o lenei mea, e tatau ona tatou faaeteete ia le faamasino atu i nisi o taitai ma tagata anamua o le Ekalesia o e, e ui lava ina na uma ona faaali mai le Upu o le Poto, ae sa faaaogaina lava fualaau faasaina ua faasaina i aso nei. I le talafaasolopito anamua o le Ekalesia, sa valaaulia ai e taitai le Au Paia ia sili atu ona ola atoatoa i le Upu o le Poto. I le konafesi aoao i le tautoulu o le 1851, na fautuaina ai e Peresitene Polika Iaga e faapea, ia osifeagaiga aloaia le Au Paia uma e taofi le inu lauti, kofe, tapaa, ma le uisiki. I le aso 13 o Oketopa, 1882, na faaali mai ai e le Alii ia Peresitene Ioane Teila e faapea, o le Upu o le Poto e tatau ona manatu i ai o se poloaiga. I le 1919, na faia ai e le Au Peresitene Sili, i lalo o Peresitene Heber J. Grant, ia avea le tausia o le Upu o le Poto o se tulaga manaomia mo le mauaina o se pepa faataga o le malumalu. O loo faaauau pea ona avea le Upu o le Poto ma se poloaiga taua i aso nei, ma o le usitai i ai, o se tulaga e muai manaomia mo le papatisoga, auai i le malumalu, auaunaga faafaifeautalai, ma isi auaunaga taua i le Ekalesia.
-
I lau api talaaga mo le suesueina o tusitusiga paia, tusi ai le fuaitau O se Mataupu Faavae faatasi ma se Folafolaga (mai le MF&F 89:3) e pei ona faaalia i lalo. Tuu se avanoa e tusi ai mataupu faavae ma folafolaga o lenei faaaliga i lalo o na vaega e lua o le fuaitau. Atonu e te manao e faailoa lenei fuaitau i au tusitusiga paia.
O Se Mataupu Faavae
faatasi ma se Folafolaga
Mataupu Faavae ma Feagaiga 89:4-9
Ua lapataia e le Alii le Au Paia e aua le faaaogaina le ava malosi, tapaa, lauti, po o le kofe
Sa e fagota muamua?
O a ni auala e taumafai ai se tagata e fagota e faasese se i’a ia u se matau?
Aisea e ono taumafai ai nisi tagata e tauanau oe e faaaoga ni fualaau faasaina ua faasa mai e le Alii? O a ni maunu, po o ni auala, o latou faaaogaina e taumafai ai e tauanau oe ma isi e faaaoga na vailaau faasaina? Faitau le Mataupu Faavae ma Feagaiga 89:4, ma vaavaai po o ai lea na lapatai mai le Alii o le a taumafai e faasese le Au Paia i aso e gata ai.
Tusi le faamatalaga lenei i lau api talaaga mo le suesueina o tusitusiga paia i lalo o le ulutala “O Se Mataupu Faavae”: Ona o faamoemoega amioleaga a tagata taupulepule faalilolilo i aso e gata ai, ua lapatai ai i tatou e le Alii ia aua ne’i faaaogaina vailaau faasaina.
O le saunoaga lenei mai ia Peresitene Ezra Taft Benson, e fesoasoani tatou te malamalama ai o se tasi o faamoemoega o tagata amioleaga ma taupulepule faalilolilo o le, ia maua ni a latou tupe faasili mai le faatauina atu o fualaau faasaina i isi:
“Na silafia mamao e le Alii tulaga o ona po nei o le a avea ai le tuinanau i tupe ma mea e tau pulepule ai tagata e faatosina atu isi ia latou ave i o latou tino mea e faaleagaina ai. O nisi o faataitaiga o ia faatosinaga na silafia e le Alii, o faasalalauga faatosina ia e uiga i pia, ma uaina, ma ava malolosi, ma kofe, ma tapaa, ma isi mea leaga uma faapena. A e o le faataitaiga sili ona leaga o tau pulepulega leaga o o tatou nei ona po, o faatosinaga ia ua faatosina atu ai o tatou au talavou ia latou faaaoga vailaau oona.
“Ou uso e ma tuafafine talavou e, matou te lapatai atu ia te outou ma le alofa tele o le a taumafai malosi Satani ma ana au e faatosina atu outou e faaaoga mea e faaleaga ai outou, aua ua latou iloa a outou faia, o le a taofia lo outou malosi faaleagaga, ma o le a latou pule ai ia te outou. Aloese mai tagata ma mea e faatosinaina outou ia outou soli poloaiga a le Atua. Tausi poloaiga a le Atua ona outou maua ai lea o le poto ma le atamai tou te iloa lelei ai mea ua leaga” (“O Se Mataupu Faatasi ma se Folafolaga,” Liahona, Iulai 1983, 86).
Faitau le Mataupu Faavae ma Feagaiga 89:5–9, ma vaavaai po o a fualaau faasaina na lapataia ai e le Alii le Au Paia e aua ne’i tuuina i totonu o latou tino. Mafaufau e faailoga mea e te maua. (Ua ta’u mai e taitai o le Ekalesia e faapea, o le faaupuga o “mea inu vevela” e faasino i le lauti ma kofe.) O a ni auala e leaga ai fualaau faasaina o loo i fuaiupu e 5–9 ?
Ia matau, fai mai le Mataupu Faavae ma Feagaiga 89:7-8 o le ava malosi ma le tapaa e i ai ona faaaogaaga talafeagai faapea foi ma faaaogaaga e le talafeagai. I aso nei, o loo i ai isi vailaau faasaina e mafai ona faaaoga sese e faapea ona avea ai ma mea leaga ma vaisu. Ua lapatai mai taitai o le Ekalesia i le faaaogaina o “soo se ituaiga meainu, fualaau faasaina, vailaau, po o se faiga matautia e faaaoga e maua ai le “lele” po o isi aafiaga le lelei malolosi ia e ono faamanualia ai lou tino ma lou mafaufau. O nisi o nei mea e aofia ai maruana, fualaau matautia, faaaogaina ma le faatautala o talavai mai le fomai po o vai foi e mafai ona faatau e aunoa ma se pepa talavai mai le fomai, faapea ai ma vailaau e faaaoga i le fale” (Mo le Malosi o le Autalavou [tamaitusi, 2001], 26).
-
-
O a ni auala e pei ai le vaisu o se matau lea e faaaoga e se tagata faifaiva e pu’e ai i’a?
-
Aisea e faaleaga ai e le vaisu lo tatou alualu i luma e faavavau?
-
Na faapefea ona faamanuiaina lou olaga ona o le lapataiga e aloese mai vailaau e fai ma vaiasu ma vailaau faasaina?
-
O le a faamanuiaina oe pe afai e te filifili nei e aua lava ne’i e faaaoga ia vailaau faasaina ia e feteenai ma le Upu o le Poto.
Mataupu Faavae ma Feagaiga 89:10-17
Ua uunaia i tatou e le Atua e faaaoga laau-afu, fualaauaina, aano o manu, ma saito
Faitau le Mataupu Faavae ma Feagaiga 89:10–17, ma vaavaai mo mea ua uunaia i tatou e le Alii e ai. Atonu e te manao e faailoga mea e te maua. E tusa ai ma le fuaiupu e 11, o le a le ituaiga o uiga faaalia e tatau ona tatou maua a o tatou faaaogaina nei meaai maloloina?
Atonu e aoga le iloa, o le “ma le faautauta” o lona uiga o le atamai ma le faaeteete. O se taumafataga e tele naua pe le paleni e oo lava i meaai lelei, e mafai ona le maloloina foi.
-
O se tasi o faataitaiga o le faaaoga ma le faautauta o meaai, e mafai ona maua i le faatonuga na tuuina mai e le Alii e uiga i aano o manufasi i le Mataupu Faavae ma Feagaiga 89:12–13. O le upu itiiti ua fautua mai ai o aano o manu e tatau ona faaaoga i se auala feoloolo.
Mataupu Faavae ma Feagaiga 89:18-21
Ua folafola mai e le Alii le soifua maloloina, poto, ma le puipuiga ia i latou o e usitai i le Upu o le Poto
Tusi le faamatalaga lenei i lau api talaaga mo le suesueina o tusitusiga paia i lalo o le ulutala “Folafolaga”: Afai tatou te mulimuli i le Upu o le Poto, o le a faamanuia i tatou e le Alii i le …
Faitau le Mataupu Faavae ma Feagaiga 89:18–19, ma faailoa mai nisi o faamanuiaga e mafai ona e maua mo le usitaia o le Upu o le Poto.
-
Na faamalamalama mai e Peresitene Boyd K. Packer o le Korama a Aposetolo e Toasefululua, se tasi o faamoemoega autu o le Upu o le Poto:
“Ua ou iloa nei … o se mafuaaga autu o le Upu o le Poto ua faatatau lea i faaaliga. …
“Afai o se tasi ua i ‘lalo o ia faatosinaga’ e faigata ona faalogo i talanoaga manino, e faapefea la ona latou tali atu i uunaiga faaleagaga e pai atu i o latou lagona e sili ona maaleale?
“E ui lava i le taua o le Upu o le Poto o se tulafono o le soifua maloloina, atonu e sili atu le taua ia te oe faaleagaga nai lo le faaletino” (“Prayers and Answers,” Ensign, Nov. 1979, 20).
Mafaufau po o a ni auala na mafai ai e lou usitai i le Upu o le Poto ona faatagaina oe e fiafia i le mafutaga a le Agaga Paia, o le na te faaalia mai le poto ma le malamalama i e faamaoni.
Faitau le Mataupu Faavae ma Feagaiga 89:20–21, ma vaavaai mo faamanuiaga faaopoopo lea e oo mai mai le mulimuli i le Upu o le Poto. (O leMataupu Faavae ma Feagaiga 89:18–21 o se mau tauloto. (Atonu e te manao e faailoga lenei mau i se auala e iloagofie ai, e fesoasoani e te maua ai i se taimi mulimuli ane.)
-
Mafaufau e faatu se sini ia sili atu le lelei o lou ola i le Upu o le Poto.
Mau Tauloto—Mataupu Faavae ma Feagaiga 89:18–21
-
Soifua Maloloina
Poto
Malosi
Puipuiga
Filifili se tasi o fuaiupu, ma galue loa e tauloto i ni nai minute. Vaai pe mafai ona e taulotoina atu i se tagata o lou aiga po o se uo. Ina ia tauloto le mau atoa, atonu e te manao e filifili isi fuaiupu ma atofa se taimi e te galue ai i le taulotoina o na fuaiupu i le lumanai.
-
Ua ou suesueina le Mataupu Faavae ma Feagaiga 89 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: